
密勒日巴大师教言集MILA4༄༅། །རྗེ་བཙུན་མི་ལ་རས་པའི་རྣམ་པར་ཐར་པ་ཉི་ཟླའི་འོད་ཟེར་སྒྲོན་མེ་ཞེས་བྱ་བ་བཞུགས་སོ། །
3-3-1a
༄༅། །རྗེ་བཙུན་མི་ལ་རས་པའི་རྣམ་པར་ཐར་པ་ཉི་ཟླའི་འོད་ཟེར་སྒྲོན་མེ་ཞེས་བྱ་བ་བཞུགས་སོ། །
༄། །བླ་མ་མིད་ལ་རས་པ་ཞེས་མཚན་ཡོངས་སུ་གྲགས་པ་དེའི་ལོ་རྒྱུས་ལ། དང་པོ་རིགས་དང་རུས་ཀྱི་ཡོན་ཏན།
༄༅། །རྗེ་བཙུན་མི་ལ་རས་པའི་རྣམ་པར་ཐར་པ་ཉི་ཟླའི་འོད་ཟེར་སྒྲོན་མེ་ཞེས་བྱ་བ་བཞུགས་སོ། །
3-3-1b
༄༅། །ན་མོ་རཏྣ་གུ་རུ་བྷྱཿ གང་གིས་མཐོང་ཐོས་དྲན་རེག་གྱུར་པ་ཡིས། །འཇིག་རྟེན་སྲིད་པའི་མུན་པ་འཇོམས་བྱེད་ཉི་མའི་འོད་དང་མཚུངས། །རིགས་ཀྱི་བདག་པོ་རྒྱལ་བ་རྡོ་རྗེ་འཆང་། །དཔལ་ལྡན་བླ་མའི་ཞབས་ལ་གུས་པས་འདུད། །གྲངས་མེད་ཚོགས་བསགས་སྤངས་རྟོགས་མཐའ་རུ་ཕྱིན། །ལྷ་དང་མི་སོགས་མཁའ་མཉམ་ཡོངས་ཀྱིས་(ཀྱི་)དཔལ། །བསྟན་བདག་སྟོན་པ་ཆེན་པོར་གྱུར་པ་ཡི། །ཤཱཀྱ་སེང་གེ་དེ་ལ་གུས་པས་འདུད། །རྒྱལ་དང་དེའི་སྲས་རྒྱན་དྲུག་མཆོག་བརྒྱད་སོགས། །གང་འདོད་རེ་སྐོང་ཐབས་ཆེན་དུ་མ་ཡིས། །ལས་ཅན་གདུལ་བྱ་དག་པའི་ས་ལ་
3-3-2a
འགོད། །འཛམ་གླིང་མཁས་གྲུབ་རྣམས་ལ་གུས་པས་འདུད། །ཚོགས་གཉིས་ཡོངས་རྫོགས་རྒྱལ་བའི་གདུང་ཆེན་འཛིན། །བྱང་སེམས་རྣམ་གཉིས་འགྲོ་ལ་ཆོས་སྤྱན་གཟིགས། །རིམ་གཉིས་ཐེག་པས་སྐལ་ལྡན་ལམ་སྣ་འདྲེན། །བོད་ཁམས་བཀའ་རྒྱུད་(བརྒྱུད་)རྣམས་ལ་གུས་པས་འདུད། །ཞེ་སྡང་ལམ་སློང་འགྱོད་སེམས་དྲག་པོ་ཡིས། །བླ་མའི་བཀའ་བསྒྲུབས་དཀའ་ཐུབ་ཕ་རོལ་ཕྱིན། །རླུང་སེམས་དབང་འདུས་བསྟན་པའི་བ་དན་ཕྱར། །མི་ལ་རས་ཆེན་ཞབས་ལ་གུས་པས་འདུད། །དངོས་གྲུབ་རྣམ་གཉིས་དད་བརྩོན་ཅན་ལ་སྟེར། །བསྟན་འཛིན་སྐྱེས་བུའི་གང་བསམ་
3-3-2b
ཉེ་བར་བསྒྲུབ། །ལོག་འདྲེན་བགེགས་འཇོམས་བསྟན་པ་སྐྱོང་མཛད་པའི། །མཁའ་འགྲོ་ཆོས་སྐྱོང་རྣམས་ལ་གུས་པས་འདུད། །མཁས་གྲུབ་བླ་མ་དམ་པས་ཅི་གསུང་བསྒྲུབ། །ཇི་སྲིད་འཁོར་བའི་རྒྱ་མཚོ་མ་སྟོངས་བར། །དེ་སྲིད་སྐད་ཅིག་ལེ་ལོ་མི་བྱེད་པར། །ཤེས་རབ་རྣམ་གསུམ་བློ་གྲོས་རབ་འབྱོངས་པའི། །ཕྱོགས་དུས་ཆོས་མཛད་ཡོངས་ལ་གུས་པས་འདུད། །བདག་སོགས་མཁའ་མཉམ་འགྲོ་བ་མ་ལུས་པར། །མ་རིག་སྒྲིབ་གཉིས་རྩད་ནས་རབ་བསལ་ཏེ། །རང་རིག་བདེ་ཆེན་སྐུ་གསུམ་སྩལ་དུ་གསོལ། །འོ་ན་སེམས་ཅན་ཐམས་ཅད་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་དོན་དུ་ལམ་དམ་པའི་ཆོས་ཞུས་ལ་ཉམས་སུ་བླང་སྙམ་པ་ཐུགས་བསྐྱེད་ཀྱིས་ཟིན་པར་མཛད་པར་ཞུ། དེ་ཡང་སྐྱེ་བ་གཏན་གྱི་འདུན་མ་ཡིན་པས། གང་རུང་+རུང་+ཅིག་གིས་མི་ཆོག་པས། འབུང་ཤ་བཏོན་ནས་རྡོ་རུས་ཐུག་པ་ཅིག་བྱེད་དགོས་པ་ལགས་པས། བཀའ་ཆད་ལུང་རྡུམ་ལམ་ལོག་སྟོན་པའི་སློབ་དཔོན་དང་མི་ཕྲད་པ་འདི་གལ་ཆེའོ་ཨང་། དེ་ཡང་བཀའ་མདོ་རྒྱུད་ནས་བཤད་པ་བྱེད་
3-3-3a
ན། སངས་རྒྱས་ཀྱི་སྐྱེས་རབས་ལ་སོགས་པའི། རྒྱལ་བ་དགོངས་རྒྱུད་ཀྱི་བྱུང་(འབྱུང་)ཁུངས་བཤད་གཞུང་གཏམ་རྒྱུད་དང་བཅས་པ་རྣམས་ལ་དཔེར་ན་ཅུ་གང་དར་ལ་གཙགས་པའམ། ནམ་མཁའ་དྭངས་པ་ལ་གཟའ་སྐར་བཀྲ་བ་ལྟར་དུ་ཞིབ་ལ་རྒྱས་པ་ཞིག་བྱེད་འཚལ། དེ་ལ་དགོས་དོན་ཅི་ཡོད་ཟེར་ན། ཁུངས་བཙུན་ཡིད་ཆེས་པ། མུ་སྟེགས་བྱེད་ལ་སོགས་ལམ་ལོག་པ་རྣམས་ཀྱིས་རང་གར་མི་ཚུད་པ་ཡིན་ནོ། །བསྟན་བཅོས་ལ་བཤད་པ་བྱེད་ན་རྒྱ་གར་གྲུབ་ཆེན་ལྔ་བརྒྱའམ། བརྒྱད་ཅུ་རྩ་བཞིའམ། ལྔ་བཅུ་རྩ་བཞིའམ། མདོར་ན་རྒྱན་དྲུག་མཆོག་བརྒྱད་དང་ལ་སོགས་དང་། མཁའ་འགྲོ་མའི་གསང་བརྒྱུད་བརྡའ་འགྲོལ་དང་བཅས་པ་རྣམས་ལ། དཔེར་ན་འཚོ་བྱེད་མཁས་པའི་སྨན་སྒྲོ་(སྒྲོས་)བཞིན་དུ་མ་ནོར་ལ་གྲངས་ཚང་བ་ཞིག་དགོས་སོ། །དེ་ལ་དགོས་དོན་ཅི་ཡོད་ཟེར་ན། གང་ཟག་བློ་ཅིང་རྣམས་ཀྱིས་ཐོབ་རྫུན་དང་། ར་ཆོད་གཟུ་ལུམས་མི་ཆུད་ཅིང་། བཀའ་བརྒྱུད་དང་བྱིན་རླབས་ལ་རུ་ཏྲ་མི་ཞུགས་པ་ཡིན། ཟབ་དོན་དམར་དབྱངས་མ་རིམ་གཉིས་ཀྱི་སྒོ་ནས། ལམ་ཁྲིད་
3-3-3b
གསུམ་གྱི་སྒོ་ནས་སྲངས་སུ་འཇུག་ན། དཔེར་ན་སྤྱི་དགོས་བྱེ་བྲག་བཀའ་བསྟན་བཅོས་ཕྱོགས་མེད་ཀྱི་བླ་མ་དགེ་བའི་བཤེས་གཉེན་རྣམས་ཀྱི་རིགས་རུས་དཀའ་སྤྱད་དང་། ཡོན་ཏན་རྣམས་ལ་དཔེར་ན་བལ་པོས་རྡོ་སྒྲིབ་པའམ་མདའ་མཁན་གྱི་མིག་བཞིན་བྱེད་འཚལ། དེ་ལ་དགོས་པ་ཅི་ཡོད་ཟེར་ན། གང་ཟག་ཡ་རབས་རྣམས་ཀྱི་གསལ་འདེབས་སུ་འགྲོ་བ་དང་། ཕལ་པ་རྣམས་བློ་ཁ་འཁྲིད་པ་དང་། སྙིང་རུས་བསྐྱེད་པ་དང་། མ་རབས་རིགས་ཆད་རྣམས་ལ་ཡང་ལས་འབྲེལ་ཆུད་པ་ཡིན་ནོ། །དེ་ཡང་ད་རེས་འདིས་བླ་མ་མིད་ལ་རས་པ་ཞེས་མཚན་ཡོངས་སུ་གྲགས་པ་དེའི་ལོ་རྒྱུས་ལ་རྣམ་པ་གཉིས་ཀྱིས་སྟོན་པ་ལ། དང་པོ་རིགས་དང་རུས། གཉིས་པ་ཆོས་ཕྱིར་དཀའ་བ་སྤྱད་པའི་ཡོན་ཏན་གྱི་གསལ་བྱེད་གཉིས་ལགས་སོ། །གདུང་རུས་ཆེན་པོ་བཅོ་བརྒྱད་ཀྱི་ནང་མཚན་(ཚན་)བེ་རི་ཡིན་ལ། དེའི་ནང་ཚན་ཁྱུང་ཚ་ཡིན་ལ། ཁྱུང་ཚ་ལ་སྟོད་སྨད་གཉིས་ཡོད་པའི་ནང་ཚན་ཁྱུང་ཚ་སྟོད་པ་ཕུ་བོའི་རྒྱུད། ཁྱུང་ཚ་སྟོད་པ་ཡིན་ལ། དེའི་ནང་ཚན་འབྲོག་པ་མི་ཚང་ཅིག་ལ་བུ་ཆུང་མིད་ལ་ཙ་ཀྲས་ཟིན་པའི་ལྟས་ངན་ཅིག་སྐྱེས་པ་ལ། བོན་པོ་མཁས་པ་ཞིག་བོས་ནས། ལྟས་ངན་བཟློག་པའི་མིད་ལ་ཆུ་སེལ་བྱས་པས་ལྟས་ངན་བཟློག་ནས། བུ་ཆུང་ཤ་ལུས་རྒྱས་ནས་ལེགས་
3-3-4a
པོར་སོང་བ་དང་། མིང་ཡང་མིད་ལ་གཡང་བློན་རྒྱལ་པོ་བྱ་བར་བཏགས་སྐད་དོ། །དེའི་བུ་མིད་ལ་གཡུ་རུང་རྒྱལ་ཡིན་ལ། དེའི་བུ་མིད་ལ་བཀྲ་ཤིས་རྒྱས་པ་དེ་ལ་སྟོད་བྱང་ན་ཡར་ཕྱིན་ནས། བཅུང་པའི་འོག་སྐྱིད་པ་ཕུག་རིང་ན་ཁྱིམ་ཐབ་ཅིག་བྱས་ནས་བསྡད་པས་བུ་རྡོ་རྗེ་རྒྱལ་པོ་སྐྱེས་པ་ལ། རང་བཞིན་མི་གཞི་དགའ་མོ་ཞིག་ཡོད་ཅིང་། རོགས་དགའ་ཆེས་ནས་ཤོ་རྩེས་པས། ཆོ་ལོ་ཕམ་ནས་ནོར་ཡོད་ཚད་ཤོར་ནས་མངའ་རིས་གུང་ཐང་གི་ཙ་པ་ཉང་མི་ཅིག་དང་ཤག་པོ་བྱས་ནས། ཚུར་ཡོངས་ནས་རྒྱལ་ལྔ་ཡུལ་གྱི་ཙ་རོང་གི་མཁར་སྒོང་ཐང་ན། དགེ་བཤེས་ཙ་པ་གྲགས་པ་བསོད་ནམས་ཀྱི། དབོན་མོ་ཅིག་གནང་བ་ལ། བུ་ཚ་མིང་སྲིང་ལྔ་སྐྱེས་པའི་བུ་ཆེ་བའི་མིང་མིད་ལ་རིན་རྒྱལ་ཡིན་ལ། ཆུང་བ་མིད་ལ་ཤེར་རྒྱལ་ཡིན། བུ་མོ་ཆེ་བ་སྒྲོན་སྐྱིད། དེ་འོག་སྒྲོན་ཆུང་། དེ་འོག་སྒྲོན་ནེ་ཡིན། རིན་རྒྱལ་ལ་སྲུ་ཆུང་ཅིག་ཆུང་མར་བླངས་པ་ལ། བུ་དྲུག་བུ་མོ་གསུམ་དང་མི་སྲིང་དགུ་ཙམ་སྐྱེས། གསེར་སྐུ་དང་གསུང་རབ་རྒྱས་འབྲིང་རྣམ་གསུམ་དང་། དཀོན་བརྩེགས་ལ་སོགས་ཆོས་མང་པོ་བཞེངས་ནས་བཞུགས་པའི་རྒྱས་འབྲིང་རྣམ་གསུམ་གྱིས་མགོ་བྱས་པའི་ཆ་རྐྱེན་མང་རབ་རིན་རྒྱལ་ལ་ཕོགས་བྱས་ལ། ཤེར་རྒྱལ་ལོ་བཅུ་བདུན་ལོན་པའི་དུས་ན། 
3-3-4b
དགེ་བཤེས་ཙ་པའི་དབོན་མོ་ཉང་བཟང་དཀར་ལེགས་ཟེར་བ་དེ་སྲུ་ཆུང་ཡིན་པས་གཉེན་བྱས་ནས། ལོ་བཅོ་བརྒྱད་ལོན་པ་དང་བསུ་ཚིས་ཡིན་པ་ལ། མིད་ལ་རྡོ་རྗེ་རྒྱལ་པོ་བཟའ་ཚོ་གཉིས་ཁ་ཤི་ནས། ལོ་བཅུ་དགུ་ལོན་དུས་ན། དཀར་ལེགས་ལོ་ཉིས་ཤུ་རྩ་གཅིག་ལོན་པ་དེ་བག་མར་བླངས་ནས། ཕ་མའི་ཤུལ་གྱི་ནོར་མདོ་སྡེ་དཀོན་བརྩེགས་ཀྱིས་མགོ་བྱས་པའི་ནོར་ཐམས་ཅད་ཤེར་རྒྱལ་ལ་ཕོགས་བྱས་པ་ལ། རིན་རྒྱལ་གྱི་ཆུང་མ་ན་རེ་རང་རེ་བུ་ཚ་མང་པོ་ཡོད་པ་དང་། ཆ་རྐྱེན་ཆུང་ངུ་སོང་བ་དང་། ད་རུང་སྲིང་མོ་ཆུང་བ་གཉིས་ཀྱང་རང་རེས་རྫོང་དགོས་པ་ལ། ཕ་མའི་ཤུལ་གྱི་ནོར་ཡོད་ཚད་ཤེར་རྒྱལ་ལ་བྱིན་པ་དེ་མ་ལེགས་ཟེར་ནས། རིན་རྒྱལ་ལ་ངོ་གནག་ཤིང་འཐབ་ཤ་བྱས་ཀྱང་གཏད་ཚར་ནས་བྱེད་ཐབས་མེད་པར་སོང་སྐད། དེ་ནས་སྟག་གི་ལོ་ཟླ་བ་བཅུ་པའི་ཚེས་བཅུ་བཞིའི་སྔ་དྲོ་དཀར་ལེགས་ལ་བུ་ཞིག་བཙས་སྐྱེས་པ་ལ། དགེ་བཤེས་ཙ་པ་གྲགས་བསོད་པས། མིང་ཀླུ་སྒྲུབ་མགོན་བྱ་བར་བཏགས། བུས་ལོ་གསུམ་དང་ཞག་བདུན་ལོན་དུས་སུ་བུ་མོ་ཅིག་སྐྱེས་པ་ལ། མགོན་པོ་སྐྱིད་བྱ་བར་བཏགས་ལ། ཡར་ཚར་ཤིང་གླེན་མ་འདྲ་བ་ཅིག་བྱུང་བས་པེ་ཏ་ཟེར་བ་ཡིན། ལྷ་བོན་པ་ཞང་པོ་དགེ་བཤེས་ཙ་པ་རང་ལགས་སྐད། བུས་ནི་གླུ་སྲུང་
3-3-5a
བྱེད་མི་མཐོང་ན་དེ་ལ་དགའ་བས་ཕ་མའི་ཆར་མི་ཆགས་པར་རྩེད་མོ་ལ་འགྲོ་ཞིང་ཁོ་རང་ཡང་གླུ་སྲུང་ལེན་པ་ཅིག་བྱུང་བས་དེར་མིང་ཡང་ཐོས་པ་དགའ་བྱ་བར་གྲགས། འདི་ཡང་གཏམ་རྒྱུད་གཉིས་ཡོད་པ་རྣམ་ཐར་ཆེན་མོར་གསལ་ཤིང་། དེར་བུས་ལོ་གསུམ་དང་ཟླ་བ་གསུམ་བཞི་ལོན། བུ་མོས་ཟླ་བ་བཞི་ལོན་དུས་ན། དཀར་ལེགས་ལོ་ཉིས་ཤུ་རྩ་བཞི་ལོན་པ་དང་། ཤེར་རྒྱལ་ལོ་ཉིས་ཤུ་རྩ་གཅིག་ལོན་དུས་སུ་དེར་ཤི་བས། དགེ་རྩ་བཟང་པོ་བྱས་ཀྱང་ད་རུང་ཆ་རྐྱེན་ཆེན་པོ་ཡོད་ལ། དེ་ནས་དཀར་ལེགས་ལོ་ཉི་ཤུ་རྩ་བདུན་ལོན་པ་དང་། ཕོ་གཉེན་མོ་གཉེན་ཚོགས་ནས་གྲོས་བྱས་ནས། ད་ཡུགས་ས་ཡངས་སངས་པས། དཀར་ལེགས་རིན་རྒྱལ་གྱི་བུ་དང་དུས་ཅིག་སྡོད་དགོས་ཟེར་བ་ལ། དཀར་ལེགས་ན་རེ་ཤེར་རྒྱལ་འདྲ་བའི་སྐྱེས་པ་ཤི་ནས་བུ་ཚ་འདི་གཉིས་མི་སྐྱོང་བར་ད་ངས་ཚེ་འདི་ལ་སྐྱེས་པ་གཞན་དང་སྡོད་རི་ཟེར་ནས། མནའ་བསྐྱལ་ནས་ཉན་དུ་མ་འདོད། དེར་རིན་རྒྱལ་གྱིས་ཁྱོད་ངའི་བུ་དང་མི་འདོད་ན། ངས་ནོར་ཚོ་ལེན་ཟེར་ནས་གསུང་རབ་དཀོན་བརྩེགས་ཀྱིས་མགོ་བྱས་པའི་ནོར་ཐམས་ཅད་ཁྱེར་བ་དང་། ཉེ་དུ་ཐམས་ཅད་ཀྱང་རིན་རྒྱལ་བདེན་ཟེར་ནས་དཀར་ལེགས་ལ་འཐབ་སྐད། དགེ་བཤེས་ཙ་པས་
3-3-5b
དཀར་ལེགས་ཀྱི་ཕྱོགས་མཛད་ནས་ཁ་བཟུང་ཡང་། ཉེ་མཉམ་དུ་སོང་བས་བྱ་ཐབས་ཙམ་ཡང་མ་བྱུང་ནས། མ་སྨད་གསུམ་ནན་ཏར་སྡུག་པར་ཡོད་པ་ལས། རྗེ་བཙུན་དེ་དུས་ལོ་ལྔ་པ་ཡིན་ཟེར། དེ་ནས་དཀར་ལེགས་ཀྱི་ཕ་མ་གཉིས་ཀར་ཤི་ནས་སྔར་ལས་ཀྱང་སྡུག་ཏུ་སོང་ཡོད་པར་འདུག་ལ། དེ་ནས་རྗེ་བཙུན་ལོ་བདུན་ལོན་པ་དང་། དགེ་བཤེས་ཙ་པའི་དྲུང་དུ་བཞག་ནས། མ་སྨད་གཉིས་པོ་ཁང་སྟོང་དེར་སྡོད་པ་ལ་ཟས་གོས་ཅི་ཡང་མེད། ཡུལ་མི་ཁྱིམ་མཚེས་རྣམས་ཀྱིས་ཀྱང་དཀར་ལེགས་ལ་ཁྱོད་སྐུད་པོའི་བུ་དང་མི་སྡོད་པ་ཟེར་ནས་འཐབ་ཅིང་ཤིན་ཏུ་སྡུག་པའི་ཚོད་དུ་སོང་ལ། དགེ་བཤེས་ཙ་པ་ལ་ཡང་ཉེ་དུ་རྣམས་ཀྱིས་ཐོས་པ་དགའ་སྡོད་དུ་མ་འཇུག་ཟེར་ནས་སྐུར་བ་འདེབས་སོ། །རྗེ་བཙུན་ནི་དེ་དུས་ན་ཡང་ཐུགས་རྒྱུས་ཆེ་བས་ཀློག་བཟང་པོ་ཤེས་ཡོད་པར་འདུག །མས་བཀལ་ཐགས་བྱེད། པེ་ཏས་ཡས་འདྲ་ལེན་བྱེད་པ་ལ། རིན་རྒྱལ་ཕ་སྤད་བཟའ་ཚོ་རྣམས་ཀྱིས་ནི། རྗེ་བཙུན་དང་པེ་ཏ་གར་མཐོང་ཡང་རྡོ་རྡེག་པར་བྱེད་ཅིང་། དཀར་ལེགས་ལ་ཡང་རྡུང་ནི་མི་ཕོད་ཏེ། ཁ་ངན་ཚིག་ངན་ཟློས་ཏེ། དེ་ནས་དགེ་བཤེས་པས་ཀྱང་ཐུགས་ཀྱིས་མི་ཕོད་ན་ཡང་། ཐོས་པ་དགའ་ད་ཁྱོད་སྙིང་རྗེ་བར་འདུག་སྟེ། ད་འགྲོ་དགོས་པར་འདུག་གསུང་སྟེ་བཏོན་ནས་བཏང་། 
3-3-6a
དེ་དུས་ན་རྗེ་བཙུན་ལོ་བཅུ་བདུན་པ་ཡིན་གསུང་། མ་སྨད་གསུམ་སྡུག་རིར་ཤི་ལ་ཁད་ནས་ཡོད་དུས། སྔར་གྱི་གོ་མི་ཞིག་གིས་ཆང་རྒྱུ་ཅིག་བྱིན་པ་དེ་བཙོས་ཏེ། ཉེ་དུ་རྣམས་བསགས་ནས། ཁུ་བོ་ལ་བླུད་ནས་ད་རེས་མ་སྨད་ལ་ནོར་དུམ་ཅིག་བླང་བྱས་པས། དུམ་ཅིག་སྟེར་བ་སྐད་ཟེར་བ་ལ་། བུ་སྨད་ཀྱི་བསྒྱུར་ནས་སྟེར་དུ་མ་འདོད། དེ་ནས་རྗེ་བཙུན་གྱི་གླུ་ལེན། པེ་ཏས་ཡས་ལེན། ལམ་ཟན་འདྲ་བླངས། མས་བཀལ་ཐགས་བྱེད་ཅིང་། གོས་མེད་ཟས་མེད་ལ་ཚེ་ཡེ་མ་ཕྱིད་ནས། ཡང་དགེ་བཤེས་པ་དང་སྔར་གྱི་གོ་མི་མ་དེས་ཕག་ཏུ་ནས་བྲེ་དོ་བྱིན་པ་དེ་ཆང་བཙོས་ནས་ཁུ་བོ་ལ་ཁོ་མི་གཞན་གྱིས་ནི། ཉོས་སྤུ་བཙོང་སྤུ་ངོ་ལེན་བྱེད་ཅིང་ཡང་འདུག་པ། ང་རང་དག་མོ་ནོར་ལ་རྟེན་སྤང་ཆོག་སྟེ། ཁྱེད་རང་གི་ཚ་ཡུག་འདི་ཀུན་ལྟོགས་རིར་ཤི་བ་ལ་དགོས་པ་ཅི་ཡོད་བྱས་ནས་ཞུ་བ་བྱས་པས། ཁོ་ཆང་གི་བཟི་སེ་བྱས་ནས། ནན་ཏར་རང་ཡིན་ན་མ་སྨད་གསུམ་ཀར་བསད་ན་ཅི་ཡིན་ཟེར་སྟེ། དཀར་ལེགས་ལ་རྡོ་ཅིག་བརྒྱབ། རྗེ་བཙུན་རྡོག་རིལ་བྱས་ནས་དོ་བསད། པེ་ཏ་སྒོ་ན་མར་བྲོས་ནས་བྱ་རྒྱུ་མེད་ཅིང་། ཁུ་བོ་སོང་ཙ་ན་མ་སྨད་གསུམ་ཚོགས་ནས་ངུ་ཡིན་ཡོད་ཙ་ན། ཡང་སྒོ་ཙ་ན་མི་ཅིག་སླེབ་གྲགས་པ་དང་། ཡང་ཁུ་བོ་ཡིན་བསམ་
3-3-6b
ནས། བུ་ཚ་གཉིས་ངུ་ཡིན་བསྡད། མས་གྲི་དང་བེར་ཀ་བཟུང་ནས་བཀྲས་ཁར་སྒུགས་པས། ཁུ་བོ་མིན་པར་གོ་མི་བཟའ་རྒྱུ་འདྲ་ཁྱེར་ནས་སེམས་བསོ་བ་ལ་ཡོངས་བ་ཡིན་པར་འདུག་ཟེར། འདི་ལ་ནི་དུས་ཕྱིས་ཀྱང་རྗེ་བཙུན་ཆེན་པོས་གོ་མི་དེ་རིགས་དྲུག་ནས་ལེགས་པར་འདོན་པའི་གཉེར་ཀ་ང་ལ་ཡོད་པ་ཡིན། ཡང་ཡང་གསུང་སྐད། དེ་དུས་ན་ཁུ་བོ་དག་ཨ་ཅང་ཆེ་སྟེ། ཨ་ནེ་ཀུན་ངན་པར་བྱུང་གསུང་། གར་ཕྱིན་པ་ན་ཡང་ཁུ་བོ་ཚང་དང་འཕྲད་དོགས་པའི་སེམས་ཁྲལ་ཆེན་པོ་ཡོད་གསུང་སྐད། དེར་ཉིན་གཅིག་ནི་མ་ཕར་རི་ན་ཡར་མེ་ཤིང་ཐུ་ཡིན་ཡོད་ཙ་ན། མི་ཚང་ཅིག་གིས་མདོས་ཅིག་བསྐྱལ་བ་ལ། པེ་ཏས་ཡས་ལེན་དུ་ཕྱིན་པས། གཏོར་མ་ལ་བསྙབས་པས། ལག་པ་ཁྱིའི་ཁ་ཤོར་བས། ཁྱིའི་མགོ་ལ་རྡོག་པ་བརྒྱབ་པས། ཁྱིས་ལག་པ་བཏང་ནས་འདོམས་ན་ཚུར་བསྙབས་ཏེ་མོ་མཚན་ལ་ཕུག་པས་སྡུག་སྐད་ཆེན་པོ་ཤོར་བ་དང་། མས་ཐུར་ལ་རྒྱུགས་ནས་ཡོངས་པས། ཕ་རིའི་སྦལ་པ་ཁ་གདངས་ཅན་དུ་རྦབ་ལ་འབྲིལ་བས། ཁ་ངོ་བྲག་ལ་ཕོག་ནས་ཁ་སོ་ཆག །ལུས་པོ་ཉག་ཉོག་དུ་(ཏུ་)སོང་ནས། བུ་མོའི་རྩར་སླེབ་ནས་བསྡོངས་ཏེ་ཡར་ཡོང་ཙ་ན། རྗེ་བཙུན་རྩ་ཕུ་ན་ཡར་སྐྱུར་སྲུན་ལ་སོང་ན་ཕ་སྤུན་
3-3-7a
ཚོ་དང་ཕྲད་པས་བརྡུངས་ཤིང་རྡོག་རིལ་བྱས། མགོ་བཅག་ནས་མར་ཡོང་བ་དང་། མ་སྨད་གསུམ་ཀར་ལམ་ཀ་ན་ཁྲག་ཙ་རེ་འཇོམས་པས། ཐོས་པ་དགའ་ནི་ད་རུང་གླུ་ལེན་ཅིང་འདུག་པ་དང་། མས་ཨ་ངས་ཁྱོད་འདྲ་བའི་བསམ་རླག་ཅན་ཅིག་ཡོད་པ་ཨང་། རང་རེ་མ་སྨད་གསུམ་ལས་སྡུག་པ་ས་སྟེང་ན་མེད། ཁུ་བོས་གསོད་ལ་ཐུག་ཅིང་ལས་འདི་ལ་སླེབ་ནས་ཡོད་པ་ལ། ཁྱོད་ད་རུང་གླུ་ལེན་པ་རང་དྲན་རྒྱ་ཆེ་བ་བྱས་ནས་ངུས་པས། རྗེ་བཙུན་ཡུག་པ་ཞིག་ཁ་རོག་བསྡད་ནས་འདུག་ལ། དེ་ནས་འོ་ན་ཨ་མ་ད་ཅི་བྱས་པ་དྲག །ཡང་ན་ད་རུང་ཨ་མས་ཁུ་བོའི་བུ་དང་ཡུག་ཅིག་བསྡད་ནས། ནོར་དུམ་ཅིག་ལོན་པ་དང་དེ་ནས་རང་རེ་མ་སྨད་གར་ཤེད་བྲོས་ན་དྲག་གམ་ཟེར་བས། མས་ས་སྤར་གང་བུའི་ངོ་ལ་གཏོར། མོ་རང་གི་བྲང་ལ་ཁུ་ཚུར་རྒྱབ་ནས་ངུ་ཞིང་། ཕ་ཤེར་རྒྱལ་འདྲ་བ་ལ་བུ་ཁྱོད་འདྲ་སྐྱེ་བ། ང་རིན་རྒྱལ་གྱི་བུ་དང་ཡུག་ཅིག་བསྡད་ནོར་ལེན་རན་ཙ་ན། ངའི་ལུས་ལ་བུ་ཚ་ཅིག་ཚུད་པ་དང་། ཁྱེད་མིང་སྲིང་གཉིས་སྡུག་རིར་ཤི་བ་ཅིག་མི་ཡོང་ངམ་ཟེར་ནས་ངུ་ཡིན་ཡོད་ཙ་ན། དགེ་བཤེས་ཙ་པ་དང་། སྔར་ཤེར་རྒྱལ་གྱི་མི་མནའ་བཅད་ཡིན་ཟེར་བའི་ཤག་པོ་ཅིག་དང་། གོ་མི་མ་དེ་དང་གསུམ་པོ་
3-3-7b
ཡོངས་ནས། མ་སྨད་གསུམ་གྱི་ཁྲག་ཚོ་ཕྱིས། རྨ་ལ་སྔགས་བཏབ། བཟའ་རྒྱུ་འདྲ་བྱིན་ནས་སེམས་བསོ་ཡིན་ཡོད་པ་ལ། ཁུ་བོ་བཟའ་ཚོ་རྣམས་ཀྱི་མི་རེས་བེར་ཀ་རེ་ཁྱེར་ཡོངས་ནས། ཤག་པོ་དང་གོ་མི་མ་གཉིས་ལ་རྒྱབ། དགེ་བཤེས་པ་ལ་ཡང་ཨ་ཁུ་བས་ངེད་ལ་ཁྱད་གསོད་བྱེད་པ་ཞན། མི་ཤི་བ་ཀུན་ལ་ཡོང་སྟེ། དཀར་ལེགས་འདིས་ངེད་ལ་སྨད་བབས་ཆེན་པོ་བྱས། མོ་ཁ་ན་སོ་མ་བརྗེས་པའི་གནའ་མ་ཡུགས་སར་ལུས་པ་ལ། ངའི་བུ་ལ་སྡོད་མ་ཉན་ཟེར་ནས་ངར་བ་དང་། ཁོང་གཉིས་པོ་བྲོས་ནས་སོང་། དགེ་བཤེས་པ་ཐུགས་ཁྲོས་ཏེ། རིན་རྒྱལ་ལ་ཁྱོད་ནན་ཏར་རང་ང་རྒྱལ་ཆེ་ན། ངས་ནོར་ཚོ་ཕྲོགས་ནས་ཇོ་བོ་ལ་གཏད། ཁྱེད་རང་རྣམས་འབའ་དི་རེ་བཏོན་ན་ཅི་ཡིན། དཀར་ལེགས་འདྲ་བའི་ལས་སུ་ལ་ཡོང་བ། བུ་ཚ་ལྟོགས་རིར་བཞག་ནས་ནོར་ཁྱེར་བས་མི་ཆོག་པར། ད་རུང་ཁྱོད་ང་རྒྱལ་ཆེ་བ། མོ་བུ་ཚའི་ཐོག་ན་སྡུག་སྒུར་བྱས་པ་མིན་པ། སྐྱེས་པ་གཞན་ལ་སོང་བ་ནི་མ་ཡིན་ཟེར་ནས། དགེ་བཤེས་པ་ཁྲོས་པ་དང་། དགེ་བཤེས་པ་ཡུལ་མི་ཁ་དྲག་ཏུ་སོང་བ་དང་། མིད་ལ་ཚང་མི་འཁྱམས་སུ་སོང་བས་ཅི་ཡང་སྨྲ་མ་ཕོད་ཟེར་བས་འདི་ལ་ནི་དུས་ཕྱིས་ཀྱང་། མིད་ལའི་ཞལ་ནས་ཞང་པོ་དེ་སྐུ་དྲིན་ཆེ་གསུང་སྐད། དུས་
3-3-8a
ཕྱིས་རྗེ་བཙུན་ཅུང་པ་ཆེའུ་ཆུང་ན་བྱོན་དུས། ཡོན་བདག་མོ་ལེགས་གསལ་འབུམ་གྱིས་ངེད་བུད་མེད་བྱ་བ་འདི་ཉོན་མོངས་པ་ཤས་ཆེ་བ་ཡིན་ཏེ། རྗེ་བཙུན་གྱི་ཡུམ་དེ་ཡེ་ཤེས་ཀྱི་མཁའ་འགྲོ་མ་རང་ཡིན་པར་གདའ་ཞུས་པས། མིད་ལའི་ཞལ་ནས་ཡེ་ཤེས་ཀྱི་མཁའ་འགྲོ་མ་ནི་ཆ་མེད་སྟེ། སྐུད་པོ་སོས་ཀའི་བོང་རེང་འདྲ་བ་ཁྱུ་ཅིག་བཞག་ནས། གནའ་མ་ཡུགས་ས་མོ་ལོ་ཉེར་བཞི་མ་ཁ་ན་སོ་མ་བརྗེས་མ་ཅིག་ཉལ་རོགས་པུས་མོ་ལ་བྱས་པ་དེ་ངའི་མ་ཙམ་དུ་མི་འདུག་གམ་གསུང་སྐད། དེ་ནས་མ་སྨད་གསུམ་ཡེ་རང་སྡུག་ཚེ་ཕྱིར་མ་སྟེར་ནས། ཉིན་ཅིག་དཀར་ལེགས་ཀྱིས་བུ་ལ་ད་སྡོས་པས་ནི་རང་རེས་ཁུ་བོ་པ་རྣམས་མི་ཐུབ་པར་འདུག་པས། ཁྱོད་ཀྱིས་ཡི་གེ་འདྲ་ཤེས་པར་འདུག་པས། ད་མཐུ་འདྲ་བསླབས་ནས་བྱེད་པ་ལས་མ་ཤེས་བྱས་པས། མིད་ལ་ན་རེ་ཨ་མས་རྒྱགས་སྟེར་ནས་ངས་དག་མཐུ་ཡོང་སྟེ་ཟེར་སྐད། དེ་དུས་རྗེ་བཙུན་དགུང་ལོ་བཅོ་བརྒྱད་པ་ཡིན་ཟེར། མི་ལ་ལ་ན་རེ་བླ་མ་མིད་ལས་མང་གུང་བར་དུ་རྐུ་ཇག་འགའ་རེ་བྱས་ཟེར་ཏེ་དེ་ནི་བླུན་གཏམ་ཡིན་ནོ། །དེ་ནས་དགུང་ལོ་བཅོ་བརྒྱད་པ་ལ། མས་མོ་རང་གི་ནོར་ཞིང་ཅིག་ཡོད་པ་དེ་ཡང་བཙོངས་ལ་དཀར་ལེགས་རང་གི་ཉེ་དུ་རྣམས་ལ་སློངས་ཅིག་ཀྱང་བྱས་ནས། གཞན་ཡང་ཕན་ཆས་དམ་དུམ་
3-3-8b
དྭངས། ཚོས་ལྡང་དྲུག་དང་བཅས་པ་རྣམས། རྟ་ཁམས་བརྟེ་ལ་གྲགས་ལ་བཀལ་ནས། མང་གུང་ནས་རོགས་མི་ལྔ་བྱུང་བ་དང་འགྲོགས་ཏེ། དཔལ་མོ་རོང་ཁ་ཐུག་པ་མས་སྐྱེལ་པ་ལ་ཕྱིན་ནས། མ་ན་རེ་ཁྱོད་མཐུ་ཤེས་ནས་ཀྱང་ཡར་མ་ཡོང་ཅིག །མཐུ་མ་བྱས་པ་ལ་ཡང་གསོད་པ་ལ་མཐུ་བྱས་རྟིང་ནི་གསོད་པ་ལ་ཐེ་ཚོམ་མེད་དོ། །ཁྱེད་རོགས་རྣམས་ཀྱིས་ཀྱང་ཁོ་ཡར་ཁྲིད་མ་ཡོང་ཅིག །མ་གི་རང་དུ་སྡོད་ཅིག་ཟེར་ནས། ངས་ཀྱང་རྒྱགས་འདྲ་ཅི་སློབ་བྱ་ཡི་ཟེར་ནས། ཡར་ལོག་ནས་སོང་བ་དང་། རོགས་རྣམས་ན་རེ་ངེད་ཚོ་ལ་ཡང་དགྲ་དྲག་པོ་སྙིང་ན་བ་མང་རབ་ཡོད་ཏེ(དེ)། ཁྱོད་ཀྱི་བཞིན་ནི་མེད་ཟེར་སྐད། མིད་ལའི་དགོངས་པ་ལ་ངའི་མ་དེ་སྙིང་རེ་རྗེ། ཡར་རེས་ལམ་ལ་རོགས་ནི་མེད། དེ་འཁྱགས་ནས་འཆིའམ། སྤྱང་ཀུས་ཟའམ་བསམ་པ་བྱུང་གསུང་སྐད། དེ་ནས་མར་ལ་མཐུ་སུ་ཆེ་འདྲི་ཡིན་བྱོན་པས། ཡར་ལུང་སྐྱུར་པོ་གྲོང་གི་གཉག་གཡུང་སྟོན་ཁྲོ་རྒྱལ་ཆེ་ཟེར་ནས། ཁ་རག་གི་ལ་ལ་ཕྱིན་པས། ལ་མཐོ་ལ་བརྟན་པའི་སྤྱི་རྒྱ། བན་བོན་གྱི་མཐུ་རྒྱ་ཡོད་བྱ་བ་ཁྲིས་འདུག་པས། སུའི་ཡིན་དྲིས་པས་གཡུང་སྟོན་གྱི་ཡིན་ཟེར་བས། ལམ་རྒྱ་ལ་ཕྱིན་ནས། གཡུང་སྟོན་ལ་རྟ་དང་། ལྟང་ཚེ་དང་བཅས་པ་དུས་ཅིག་ལ་ཐམས་ཅད་ཕུལ་ནས། མཐུ་ཞུས་པས། ཁོང་
3-3-9a
ན་རེ་ང་ལ་མཐུ་ཞུ་བ་མང་པོ་བྱུང་སྟེ། ཁྱོད་བཞིན་འབུལ་བ་སྔོན་ལ་བྱེད་པ་མི་ཡོང་བར་འདུག །དེར་ངས་ཀྱང་འཕྲལ་རང་ཅག་སྟེར་སྙིང་ཡང་མི་འདོད་པར་འདུག །ཁྱོད་ཐག་རིང་ནས་ཀྱང་ཡོངས་ནས་འབུལ་བ་ཡང་སྔོན་ལ་བྱེད་པ་ལ། མཐུ་གཤའ་མ་ཅིག་མ་བྱིན་ན་མིར་གར་འདོད། ལར་མཐུ་གཤའ་མ་ཅིག་སློབ་ན་དག་ཟླ་བ་རེ་རེའམ། ཟླ་བ་ཕྱེད་དམ། ཞག་བཅུ་རེ་ཙམ་གྱིས་ཤེས་པ་ཡོད་དེ། འོན་ཀྱང་སློབ་དཔོན་དེ་ཅན་ཡུན་འདི་ཙམ་བསྡད་ཟེར་བ་ཡང་དགོས་པ་ཡིན་པས། ཁྱོད་རང་ལ་རྒྱགས་ནི་འདུག་པས་ཡུག་ཙམ་སྡོད་ཟེར་བས། དེར་བསྡད་པ་ལ་མཐུ་ཡོང་ཡོང་འདྲ་བ་ཁ་ཚབས་ཅན་མང་པོ་བརླབས་ནས། རོགས་རྣམས་ཡར་ཆས་པ་དང་། མིད་ལ་འགྲོ་མ་ཉན་པ་དང་། གཉག་གིས་ཁྱོད་མི་འགྲོ་བ་ཅི་ཡིན་གསུངས་པས། ང་ལ་འགྲོ་ས་མེད་ཟེར་ནས། སྔར་ཁུ་བོ་ཕ་སྤད་ཀྱིས་ངན་བྱས་པའི་ལོ་རྒྱུས་རྣམས་བཤད་ནས་ངུས་པས། རོགས་རྣམས་ཐེག་པ་དང་། གཉག་ན་རེ་ང་ལ་མཐུ་ཞུ་བ་མང་པོ་བྱུང་སྟེ་ཁྱོད་ལས་སྙིང་རྗེ་བ་མ་བྱུང་བས། ཁྱོད་ལ་མཐུ་གཤའ་མ་ཅིག་རང་དགོས་པར་འདུག་པས། སྔར་གྱི་དེ་རྣམས་ལ་མཐུ་མི་ཡོང་བ་ནི་མིན། ཡོང་ནི་ཡོང་སྟེ་ང་རང་གིས་ལག་ལེན་བྱེད་པ་ཅིག་ཡོད་པ་དེ། 
3-3-9b
གཙང་གཡས་རུ་རྟ་ནག་གི་བོན་པོ་ཞིག་ལ་བྱིན་ནས་གཞན་སུ་ལའང་མི་སྟེར་བར་བྱས། ཁོའི་སེར་བ་ཅིག་ཁོང་ལ་ངས་བསླབས་ནས་གཞན་སུ་ལའང་མི་སྟེར་བར་བྱས་པ་ཡིན་པས། ད་ཁྱོད་དེར་བཏང་དགོས་ཟེར་ནས། རྟ་དཀར་རུ་ཅིག་ལ་གོས་ཚོས་སྡང་ཅིག་བཀལ་ནས་གཉག་གི་བུ་དང་གཉིས་བཏང་ནས། བུ་དེ་ལ་ཕ་ཇོ་ན་རེ་མི་འདི་སྙིང་རྗེ་བར་འདུག་པས། མཐུ་གཤའ་མ་ཅིག་དོགས་པར་འདུག་པས། ངེད་ལ་སྦྱིན་དབང་མེད་པས། ཉིད་ཀྱིས་གནང་བར་ཞུ་ཟེར་ཅིང་འདུག་བྱས་ནས་གཉེར་གཏད་པས། བོན་པོས་ལོ་རྒྱུས་དྲིས་པས། མིད་ལས་སྡུག་གཏམ་བཏང་ནས་ངུས་པ་དང་། བོན་པོ་ན་རེ་ཁྱོད་ལ་མཐུ་གཤའ་མ་ཅིག་ཅིས་ཀྱང་དགོས་པར་འདུག་ཟེར་ནས་བོན་པོའི་བུ་དང་གཉིས་གཡོག་ཅིག་དང་གསུམ་མཚམས་བཅད་དུ་བཅུག་ནས། མཐུ་ཡོང་བར་འདུག་ཟེར་བ་དང་། ཡབ་རང་གིས་ཟླ་བ་གཅིག་མཚམས་བཅད་པས། མཐུ་ནི་ཆོག་པར་བྱུང་སྟེ། དེ་དུས་ན་ཁུའི་བུ་ལ་བག་མ་བླངས་པའི་སྟོན་མོ་བྱས་པའི་ཕྱི་མི་རྣམས་གྱེས། ནང་མི་རྣམས་མ་གྱེས་པ་ལ་སྤྲང་པོས་སྒོ་བརྡུངས་པས། འོག་ཁང་གི་ཀ་བ་ལ་རྟ་བཏགས་པ་འདྲོགས་ནས། ཀ་བ་འགྱེལ་ནས་ཁང་པ་རྡིབས་པས། མི་ཐམས་ཅད་དཀྲུགས་
3-3-10a
ཤིའོ། །མ་ཤི་བ་ཉག་ཉོག་ཀུན་ཡང་ང་ཐོས་པ་དགས་མཐུ་བཏང་བ་ཡིན་ཟེར་ནས་ཁ་སྨྲ་ཡིན་བྱུང་ལ། གཅིག་ཤོར་རམ་ཟེར་བ་དེ་ཨ་ནེ་སྨོན་སྐྱིད་ཡིན་ཟེར། ལར་མི་ཉིས་ཤུ་རྩ་གཅིག་ཤི་ཟེར་ནས་ཡུལ་པ་རྣམས་ན་རེ། དང་པོ་དག་ཁོ་བདེན་ཏེ། ད་མི་འདི་ཙམ་བསད། ཡུལ་པ་ཕུང་ལ་བཏང་བས། འདི་གསོད་པའི་སྔན་ཟན་ཅིག་བཏང་དགོས་པར་འདུག་བྱས་ཏེ་གྲོས་བྱས་པས། དེ་པའི་གཙོ་བོ་ཆང་གི་གཟི་བའི་རླབ་ཆོལ་ལ་ཐོས་པ་དགའ་འདིས་མི་མང་པོ་བསད། ཡུལ་པ་ཕུང་ལ་བཏང་བས་འདི་གསོད་པའི་སྔན་ཟན་ཅིག་བཏང་དགོས་པར་འདུག་ཟེར་བ་དང་། གཙོ་བོའི་ཆུང་མ་དེས་ཐོས་པས། དེ་དང་པོ་མིད་ལ་ཤེར་རྒྱལ་གྱི་གོ་མི་མ་བྱས་པ་ཡིན་པས། མོས་མ་ཕོད་ནས་དཀར་ལེགས་ལ་བྱ་བཏང་བས། དཀར་ལེགས་སྐྲག་ནས་སྔན་ཟན་ཅིག་བཙལ་བས། ཡུལ་ཐག་རིང་རབ་ཅིག་ནས་རྣལ་འབྱོར་པ་དོན་འགྲུབ་ཤེས་རབ་བྱ་བ་ཅིག་བརྙེད་ནས། དེ་ལ་མས་ཁྱོད་ཀྱིས་གོ་བཅད་ནས་འདིར་མཐུ་ནི་སླེབ་སྟེ། ཡུལ་པ་རྣམས་ཀྱིས་ཁྱོད་གསོད་པའི་གྲོས་ཟིན་ཡོད་པས། སུ་ལ་ཡང་བློ་མ་གཏོད་པར་ཟོན་གྱིས་བྱས་ནས་བཏང་བས། མི་ལ་སྐྲག་སྟེ། བོན་པོ་ལ་ཞུས་པས། བོན་པོ་ན་རེ་ང་ལ་ཐབས་ཡོད་ཟེར་ནས། ཡི་གེ་བྲིས་ནས་ཁྱོད་ཡུལ་པ་
3-3-10b
རྣམས་ཀྱིས་ང་གསོད་པའི་གྲོས་བྱེད་གྱིན་འདུག་སྟེ། དེའི་གོང་དུ་ངའི་ཆོས་བསྲུངས་ཀྱིས་ཚོར་ནས་བྱུང་བས། ད་ང་བསད་པས་སོད་དམ་ཡང་ལྟ། ཁྱེད་རྣམས་བསད་པས་འཛད་དམ་ཡང་ལྟ། ཁྱེད་ལ་སྲོག་དང་སེར་བ་གཉིས་ཀ་བྱེད་པ་ཡིན་བྱས་ནས། ཡི་གེ་བསྐུར་ནས་བཏང་བས། གུང་ཐང་པ་རྣམས་ཀྱི་མི་ཕྲད་ཚད་ལ་སྟོན། ལ་བཙས་དང་ལམ་འཕྲང་རྣམས་ལ་ཡི་གེ་ཐོབ་བྱས་ནས་བཏང་བས། དེ་ཡུལ་པ་རྣམས་ཀྱི་ཐོས་ནས། ད་བསད་པས་སོད་པར་མི་འདུག་ལ། མངོན་ཤེས་ཀྱང་ཡོད་པར་འདུག་པས། ད་དུ་མས་བྱེད་དགོས་ཟེར་བ་དང་། གྲོས་བྱེད་རྣམས་ཀྱང་ཤི། ལར་སྔ་ཕྱི་གཉིས་ལ་སྐྱེས་པ་རང་ཡང་བཞི་བཅུ་ཞེ་གཅིག་ཙམ་ཤི་ལ། སྤྱིར་གྲོང་ཁྱིམ་བཅུ་བདུན་གྱི་སྒོ་རྡིབ་ཟེར། དེ་ནས་གཉག་གི་དྲུང་དུ་ཕྱིན་ནས་མཐུ་ནི་བྱུང་ཡོད་པར་འདུག་ལགས་ཏེ། ཁོང་རྣམས་ཀྱིས་ང་གསོད་ཟེར་བས་སེར་བ་གཅིག་གཏོང་པར་ཞུ་བྱས་པས། ཁོ་པ་མི་བདེན་པས་འགྲོ་བ་འདུལ་བ་ལ་སེར་བ་དགོས་པས། སེར་བ་བྱེད་དགོས་གསུངས་ནས། གཉག་གི་སྲས་པོ་དང་ཐོས་པ་དགའ་གཉིས་མཚམས་ལ་བཅུག་ནས། ཞག་ཉེར་གཅིག་ནས་ཕེབས་པའི་རྟགས་བྱུང་བས། ད་ཙམ་ལོ་ཐོག་ཇི་ཙམ་ཡོད་གསུངས་པས། ཡུར་མ་སྔ་ཕྱིའི་བར་
3-3-11a
ཙམ་ཡོད་བྱས་པས། འོ་ན་ད་ཁྱོད་ལ་རོགས་ཅིག་དགོས་པ་ལ་དེ་ཡང་བང་རྟ་བས་ཀྱང་མགྱོགས་པ། ཤེད་གྱད་པས་ཀྱང་ཆེ་བ་ཅིག་དགོས་པ་དེ་ངའི་གཡོག་འདི་ལ་ཚང་ཡོད་པ་ཡིན་གསུང་ནས། མི་ནག་པོ་མཐོང་བ་ཙམ་གྱིས་ཀྱང་ཟིལ་ཆུམ་བྱེད་པ་ཞིག་རོགས་ལ་བཏང་སྟེ། དེ་ཆོས་སྐྱོང་འཇིམ་མགོན་པོ་ཡིན་པར་འདུག་སྟེ། དེ་མིད་ལས་ཀྱང་ཕྱིས་མིན་པ་མ་ཤེས་གསུང་། གུང་ཐང་ན་ཡུར་མ་སྔ་ཕྱིའི་བར་ཙམ་ལ་སླེབ་ནས། ནུབ་མོ་ཞིང་ལ་སེར་ཐོ་བཙུགས་ནས། ཉིན་མོ་རི་ཁ་ནས་མཐུ་འཕགས་པས། སེར་བ་ཆེན་པོ་ཕབས་ཏེ། རི་ལུང་ཐམས་ཅད་གངས་སུ་སོང་ནས་མ་ཐར་བས། རི་ལ་བསྡད་པས་ཁྱི་ར་བ་མཐོང་ནས། ཡུལ་པ་ལ་སྐད་བཏང་ནས་དེད་པས། རོགས་དེ་ན་རེ་འདིར་བསྡད་ན་གཉིས་ཀར་གསོད་པ་ལས་མེད་ཟེར་ཏེ། རྒྱགས་དོགས་ནས་ཟླ་བ་ཕྱེད་ན་དིང་རིའི་གནང་ཆུང་ཅིག་ཏུ་འཚོགས་དུས་བྱས་ཏེ། རོགས་མི་ནག་པོ་དེས་མིད་ལར་བརྫུས་ཏེ་རལ་གྲི་དྲངས་ནས་བྲོས་པས། ཡུལ་པ་རྣམས་ཀྱིས་དེའི་རྗེས་ལ་དེད་པས། མིད་ལས་དེའི་ཚེ་ལམ་གཞན་ཅིག་ནས་བྲོས་ཏེ། ཕྱི་སྙེགས་བྱུང་གིས་དོགས་པས་སྙ་ནམ་ངོས་ལ་བྲོས་པས། ཞག་བཅུ་བདུན་གྱི་ཉིན་བར་ཏི་ཐུང་གནས་ཆུང་དུ་སླེབ་པ་དང་། ཕོ་ལེ་
3-3-11b
མ་རྣམས་ལ་འདིར་མགྲོན་པོ་ཅིག་བྱུང་ངམ་དྲིས་པས། རོགས་ཅིག་སྒུགས་པ་ཡིན་ཟེར་བ་ཅིག་འདུག་པ་དེ་ནི། ད་ལྟ་ནི་སྟོན་མོ་ལ་སྲུར་སོང་ཡུག་ཅིག་ནས་ཡོང་ཟེར་བ་དང་། ཁོང་གིས་ཤ་ཟན་ཅིག་ཁྱེར་ནས་བྱུང་བས། ཁོང་ན་རེ་མ་དང་ཁྱོད་རྨིས་ནས་དི་རིང་བསྡད་པ་ཡིན། ཡོང་ངམ་བསམ་ནས་དི་རིང་མ་སླེབ་ན་ང་ནང་པར་འགྲོ་རྩིས་ཡིན། དེ་ཙམ་ཐོགས་པ་ཅི་ཡིན་ཟེར་བས་ཁ་བས་རྐང་པ་ཕྱིད། དོ་ཤི་བྱས་པས་མ་ཐར་བ་ལགས་བྱས། དེ་ནས་མར་ལམ་རྟ་ནག་ཏུ་ཕྱིན་པས་མས་ཀྱང་རྒྱགས་བོང་ཁལ་ཅིག་བསྐྱལ་ནས་འདུག་ཟེར། དེ་ནས་ཡར་ལུངས་ན་སླེབས་པས་གཉག་ན་རེ་སེར་བ་ཕེབས་སམ་གསུང་། ཕེབས་བྱས་པས། ད་ཐེབས་ཅིག་ཙམ་ཕབ་པས་ཡུལ་མི་རྣམས་ཐུལ་ནས་འགྲོ་བ་ཡིན། ད་རེས་ཡར་འགྲོ་མི་དགོས། ཐུན་ཁ་གསོས་པས་ཆོག་གསུང་ནས་གཉག་གི་སྲས་པོ་དང་མིད་ལ་གཉིས་ཀྱིས་ཞག་གསུམ་མཚམས་བཅད་པས། གུང་ཐང་ན་སྙེ་མ་རྫོགས་ཙམ་དེ་ལ་སེར་བ་ཆེ་ངེས་པ་ཅིག་ཕབ་པས། རི་རྡོ་ཐམས་ཅད་ཀླུངས་སུ་ཕབ། ཀླུང་རྡོ་ཐམས་ཅད་ཆུ་ལ་ཕོ་བས། མིད་ལ་གྲོག་པོ་བྱ་བའི་གྲོག་པོ་ཆེན་པོ་རྣམས་བྱུང་གདའ། དེ་ནས་གུང་ཐང་ཙ་པ་རྣམས་ལ་ལོ་རེ་ལ་སེར་བ་ཐེབས་གཉིས་གཉིས་ཀྱིས་ལོ་བདུན་
3-3-12a
སྟོན་ཐོག་ལ་མ་རེ་ཅིག་བྱས་ནས་ལ་བཙས་དང་ལམ་འཕྲང་ལ་བཏགས་ནས་བཞག་གོ། །དེའི་དུས་ན་མ་དེ་ཡང་ཤི་ཟེར་བ་ཐོས་པས། ཐོས་པ་དགས་ངུས་པས་གཉག་དང་བོན་པོ་གཉིས་ཀྱིས་སེམས་གསོས་སྡུག་ཟན་གནང་ནས་ཞལ་ཏ་མཛད་ཟེར། དུས་ཕྱིས་ཀྱང་མི་ལའི་ཞལ་ནས། སློབ་དཔོན་གཉིས་པོ་དེའི་བཀའ་དྲིན་ལ་བསམ་ན་ད་རུང་ཡིད་ལ་ཅག་གོ་ཡོད་གསུང་ནས། སྐབས་སུ་སྤྱན་ཆབ་བྱོན་སྐད་དོ། །གནས་སྐབས་ཅིག་ཏུ་གཉག་གཡུང་སྟོན་ཁྲོ་རྒྱལ་དེ་སྤྲང་པོ་ཅིག་ཤི་བ་ལ་ཐུགས་སྐྱོ་བ་སྐྱེས་ནས་ཉིན་ཅིག་ནི་བཤུམས་ཏེ། ཁོ་དེ་ཐོས་པ་དགའ་ཁྱོད་ཀྱིས་ཀྱང་མཐུ་དང་སེར་བ་དེ་ཙམ་བྱས། མི་ནོར་སེམས་ཅན་གྲངས་མེད་པ་ལ་གནོད་པ་ཆེན་པོ་བྱས། སྡིག་པ་ཆེན་པོ་བསགས། ཁྱོད་ཀྱི་རིན་ལ་ངེད་རྣམས་འཁོར་བཅས་ལ་ཡང་སྡིག་པ་མང་པོ་དགོས་པས། ད་ནི་ཁྱོད་རང་སྡིག་བཤགས་ལ་ཆོས་ཅིག་བྱས་པ་དྲག །རང་རེ་ཤི་བའི་དུས་ན་ཆོས་མིན་པ་གཞན་གང་གིས་ཀྱང་མི་ཕན་གསུངས་པ་དང་། དེར་ཐོས་པ་དགས་ཆོས་བྱེད་པ་དེ་ལས་དགའ་བ་མེད་ལགས་ཏེ། སློབ་དཔོན་རྣམ་གཉིས་ལས་སྐུ་དྲིན་ཆེ་བ་མེད་པས། ང་ལ་ནོར་ལོངས་སྤྱོད་ཀྱི་ཞབས་ཏོག་ནི་བྱེད་རྒྱུ་མེད་པས། གཡོག་དང་ཁོལ་པོ་བྱས་ལ་དྲིན་
3-3-12b
ལན་འབུལ་བསམ་པ་ལགས་ཞུས་པས། ཁོང་ན་རེ་དེ་ཡང་ཡིན་ཏེ། ཆོས་ཅིག་རང་བྱུང་ན་ཁྱོད་རང་ལ་ཡང་དེ་ལས་ཕན་ཆེ་བ་མེད། ངེད་ལ་ཡང་ཕན་ཆེ་གསུང་བ་ལ། འོ་ན་སློབ་དཔོན་བོན་པོ་ལ་ཡང་ཞལ་ཏ་ཞུ་དགོས་བྱས་པས། དེ་འཐད་གསུང་ནས་བོན་པོ་ལ་གཉག་གིས་འདི་སྐད་གསུང་ཞུས་པས། བོན་པོས་ཀྱང་དང་པོ་སྤྱན་ཆབ་བྱོན་ཏེ། དེ་ནས་ངས་ཀྱང་དེ་རང་བསམས་དེ་བྱས་པས་རང་རེ་ཐམས་ཅད་ལ་ཕན་གསུང་། དེ་ནས་དེར་གཉག་དང་བོན་པོ་ལ་སྐུ་ཁམས་ཞུས་པས། གནང་སྦྱིན་དང་སྐྱེལ་ཐུང་ཡང་མཛད་ཅིང་། སྤྱན་ཆབ་ཡང་བྱོན་ནས། ཁྱོད་ལ་སྙིང་རུས་ཆེན་པོ་འདུག་ཀྱང་འདུག་སྟེ། ད་རུང་ཆོས་ལ་སྙིང་རུས་བསྐྱེད་གསུང་སྐད། དེར་གདམས་ངག་སུ་ཆེ་དྲིས་ནས་ཐམས་ཅད་ལ་རྩད་བཅད་པས། རོང་ཁུ་ལུང་གི་ན། རྗེ་ཡེ་ཤེས་གཟུངས། ཆོས་མཁས་གདམས་ངག་ཆེ་ཟེར་ནས། དེའི་དྲུང་དུ་གཤིན་རྗེའི་སྐོར་དང་དྲག་སྔགས་གཟའ་གདོང་དམར་ནག་ལ་སོགས་གདམས་ངག་མང་བར་ཞུས། དེ་ནས་ཉང་སྟོད་ཁོ་རེ་ན་བ་མི་བྱང་ཆུབ་རྒྱལ་པོའི་དྲུང་དུ་རྒྱུ་འཕྲུལ་ཞུས། དེ་ནས་ཉང་སྟོད་རྒྱན་མཁར་ན། གྱེར་སྟོན་དབང་ཕྱུག་རྒྱལ་མཚན་གྱི་དྲུང་དུ་རྫོགས་ཆེན་སྔ་འགྱུར་ཞུས། ཡར་འབྲོག་གླང་བུ་དོ་རུ། མར་པ་འབྱུང་གནས་ཡེ་ཤེས་ཀྱི་དྲུང་དུ་མདོ་སེམས་ཕྱོགས་དང་མདོ་རྒྱུ་
3-3-13a
འཕྲུལ་ཞུས། དེ་ནས་ཉང་སྟོད་ཁུ་ལེ་དང་རོང་གཡུ་ཕུག་གི་དགོན་པ་གཉིས་ན་བཞུགས་པའི་བླ་མ་འདྲེ་སྟོན་ལྷ་དགའ་བ་དཔལ་གྱི་དྲུང་དུ་ཕྱིན་ནས་སྔར་གྱི་མཐུ་བྱས་པའི་ལོ་རྒྱུས་རྣམས་ཞུས་ནས། བདག་སྡིག་པོ་ཆེ་ཅིག་ལགས་པས་གདམས་ངག་ཐུགས་ལ་འདོགས་པར་ཞུ་བྱས་པས། ཁོང་གི་ཞལ་ནས་བུ་ཁྱོད་བསོད་ནམས་རབ་ཅིག་འདུག །ངེད་ཀྱི་བཀའ་རྫོགས་པ་ཆེན་པོ་འདི། ཆོས་ཐེག་པ་རིམ་པ་དགུའི་ཡང་རྩེ། རྩ་བ་བརྟན་པས་གཞི་གཏན་ལ་ཕེབས་པ། རྩེ་མོ་བྱུང་རྒྱལ་ཡིན་པས་འབྲས་བུ་གྲུབ་རྒྱུ་མེད་པ། ཟུར་བཞི་ལོགས་བརྒྱད་རྩེ་མོ་དཔལ་དང་དགུ། ཁ་གསེར་ཁ་དང་གཡུ་ཁ་ཡིན་ལ། ནང་རྟོགས་ན་ནང་སངས་རྒྱ། ནུབ་རྟོགས་ན་ནུབ་སངས་རྒྱ་གསུང་ནས། འདི་ལས་ལྷག་པའི་ཆོས་ནི་གཞན་གང་ན་ཡང་མེད་ཟེར་ནས། དེར་འོ་ན་སློབ་དཔོན་རྣམ་གཉིས་ཀྱི་ཞལ་ནས་མཐུ་ལ་ཚེགས་མེད་གསུང་ཙ་ན་ཡང་སླ་མོར་འདུག་པས། ད་སངས་རྒྱས་སམ་དེ་ཡང་སླ་རབ་ཡོང་ངམ་བསམ་ནས་བློ་བདེ་འབོལ་ལོ་སོང་ནས་ལོ་གཅིག་ཙམ་སྡད་ནས་ཆོས་འདྲ་ཉན། དཔེ་འདྲ་བྲིས་པས་ལག་ལེན་བྱེད་རྒྱུ་ཙམ་མ་རྙེད་པར་ཡོད་ཙ་ན། ཉིན་གཅིག་ནི་བླ་མ་འདྲེ་སྟོན་སྐྱེམས་གསོལ་ནས་བད་པའི་དུས་ཅིག་ན། ཐོས་
3-3-13b
པ་དགའ་འདི་ས་ན་མི་སུ་འདུག་གསུང་བས། སུ་མི་འདུག་ཞུས་པས། ཁོ་དེ་ཁྱོད་ཀྱང་སྡིག་པོ་ཆེ་རང་ཅིག་འདུག་གོ། །ངེད་ཀྱི་ཆོས་འདིས་ཀྱང་ཨེན་ཙམ་མ་བྱུང་ངོ་། །གཞི་རང་གཅིག་པུའི་སྟེང་དུ་ལས། ལྟ་བ་ཁ་ལྟར་སོང་། སྒོམ་པ་རྣམས་ཀྱིས་རྩི་བྲལ། སྤྱོད་པ་ལ་བོགས་མ་ཐོན། འབྲས་བུ་ལ་བསྔོ་བའི་རྒྱས་མ་ཐེབས། འདིས་ཀྱང་བག་མི་ཡོང་བར་འདུག་གསུང་སྐད། དེར་ཐོས་པ་དགས་འོ་ན་བླ་མ་རང་ཁ་སིང་ནི། ངེད་ཀྱི་ཆོས་འདི་ཐེག་པ་རིམ་དགུའི་ཡང་རྩེ། ནང་རྟོགས་ན་ནང་སངས་རྒྱས། ནུབ་རྟོགས་ན་ནུབ་སངས་རྒྱ། འདི་ལས་ལྷག་པ་མེད་གསུང་བ་བྱས་པས། ཁོང་ན་རེ་དེ་ཀུན་བླ་མ་གོང་མའི་གསུང་སྒྲོས་རྐྱང་པ་ཡིན། ངེད་ཀྱི་སྔ་འགྱུར་འདི་ལྟ་བུའི་འཁྱེར་སོ་དག་ལེགས་པ་ཅིག་འདུག་སྟེ། བྱིན་རླབས་ཀྱི་རྒྱུད་པ་ཆད་པས། ང་རང་ལ་ཡང་ཅི་ཟེར་ཆ་མེད་དོ། །ཡ་ཀི་ལྷོ་བྲག་བྱ་བ་ན། རྗེ་བཙུན་མར་པ་ལོ་ཙཱ་བྱ་བ། རྒྱ་གར་དུ་ལན་གསུམ་བྱོན་པ། ནཱ་རོ་དང་མཻ་ཏྲི་ལ་སོགས་པའི་གྲུབ་ཐོབ་མང་པོ་དང་མཇལ་ནས་གསང་སྔགས་ཕ་བརྒྱུད་ཀྱི་གདམས་ངག་རྩ་རླུང་དང་ཐིག་ལེའི་རྟེན་འབྲེལ་ལུས་ལ་བསྒྲིགས་པས། ཚེ་གཅིག་ལུས་གཅིག་ལ་སངས་རྒྱས་བྱེད་པ་ཅིག་ཡོད་པར་འདུག་པས། ཁྱོད་དེར་འགྲོ་བ་དྲག་པས། 
3-3-14a
ང་ཡང་འགྲོ་བ་ཡིན་ཏེ་ང་རྒས་པས་རྩ་རླུང་བསྒོམ་པར་མི་ནུས་པས། ཕྱི་མ་ལ་སྨོན་ལམ་བཏབ་གསུང་། དེར་མཚན་མོ་མ་བདེ་བར་ཉལ། ནང་པར་སྔ་དྲོ་ཞལ་ཏ་དང་གནང་སྦྱིན་བླངས་ནས། ཕྱེ་སླུད་བུ་གང་གི་སྟེང་དུ་གདམས་ངག་གི་ཀ་པ་ལི་བཞག་ནས་ཁུར་ཏེ་ལྷོ་བྲག་ཏུ་ཕྱིན་ནས། ས་སྟེགས་ན་སླེབ་པ་དང་། བན་རྒན་ཅིག་སྤང་རྐོ་ཡིན་འདུག་པ་ལ། བདག་བླ་མ་མར་པའི་དྲུང་དུ་མཇལ་བ་ལགས་པས་ཞུ་འཕྲིན་ཅིག་མཛོད་དང་བྱས་པས། དེས་ས་ལ་རི་མོ་ཅིག་བྲིས་ནས་འདི་བརྐོས་ཟིན་པ་དང་འགྲོ་ཟེར། དེར་ཟིན་དུས་མ་བྱུང་ནས་ངས་རྐོ་ཡིས་བྱས་ནས་ལ་འུར་བརྐོས་ནས་ད་འབྱོན་པར་ཞུ་བྱས་པས་ཡང་སྔར་ལས་ཀྱང་ཆེ་བ་ཞིག་བྲིས་ནས་འདི་ཟིན་པ་དང་འགྲོ་ཟེར་བས། དེ་བས་ཧབས་སེ་བརྐོས་པས། མི་ལས་ཀ་ཡོང་བ་ཅིག་འདུག་ཟེར་ནས། ཐང་ཐེབ་ཅིག་གི་འོག་ནས་ཆང་མ་ཤམ་གཤོར་མ་གང་བཏོན་ནས་ཕོར་གང་བླུགས་ནས་ཁོང་རང་གིས་གསོལ། དེ་བས་ལྷག་མ་ཐོས་པ་དགའ་ལ་བླུད་ནས་ཏོག་ཙམ་ཕྲག་པ་ལ་བཀལ་ནས་སོང་བའི་ཕྱི་ན་ཕར་ཕྱིན་པས། མི་མང་རབ་ཀྱིས་རྒྱང་ནས་ཕྱག་འཚལ་གྱིན་འདུག་པ་ལ། འདི་ཡང་ཟུར་ཆོས་པའི་དགེ་བཤེས་ཅིག་ཡིན་ནམ་བསམ། ཁྱོད་རང་དེར་སྡོད་
3-3-14b
དང་ངས་འཕྲིན་བྱེད་ཟེར་ནང་དུ་གཤེགས་སོང་། ཡུག་ཅིག་ནས་མི་ཅིག་བཏང་ནས་ཡར་ཤོག་ཟེར་ཏེ་ཕྱིན་ཙ་ན། ད་ཅིའི་བན་རྒན་དེ་འབོལ་གྲུམ་ཅིག་གི་ཐོག་ན་བྷིར་རེ། སེན་བར་འདག་པ་ཁལ་ལེ་འདུག་པ་དང་། ཨེན་ཙམ་ངོ་ཚ་ནས་ས་ལ་སྡོད་མ་ཕོད་པར། ཀྲང་ངེ་ལངས་ནས་ཡོད་པ་ལ། སྐྲག་མི་དགོས་ང་སོ་ནམ་བྱེད་ཟེར་བ་མ་ཚོར་རམ་གསུང་། དེ་མ་ཐོས་ལགས་ཞུས་སྐད། སྙན་རྒྱུད་སྟོན་པ་བྱང་ཆུབ་རྒྱལ་མཚན་པའི་ལུགས་ནས། བུར་ལྡང་ཅིག་དང་། རས་ཕྲུག་གི་སྣམ་བུ་ཅིག་ཕུལ་ཟེར་བ་འདུག་སྟེ། དེ་རང་ཕུལ་རྒྱུ་མེད་པ་འདྲ་ལགས། དེ་ནས་ཕྱག་རྟེན་དམ་དུམ་ཡོད་པ་རྣམས་ཕུལ་ནས། སྔར་མཐུ་བྱས་པའི་ལོ་རྒྱུས་རྣམས་ཞུས་ནས། བདག་སྡིག་པོ་ཆེ་ཅིག་ལགས་པས། ཆོས་དང་ཟས་གོས་ཐུགས་ལ་འདོགས་པར་ཞུ་ཞུས་པས། སྤྱན་ཧུར་མཛད་ནས། གཉིས་ཀ་ག་ན་ཡོང་། གང་རུང་ཅིག་འདོམས་གསུང་། འོ་ན་ཟས་གོས་གཉིས་ཚོལ་གྲོ་འདྲ་བྱེད་ལགས། དུས་གཏན་གྱི་དོན་ཡིན་པས། ཆོས་ཐུགས་ལ་འདོགས་པར་ཞུ་བྱས་པས། ཁྱོད་ཀྱི་མིང་ཡང་གུང་ཐང་པ་ཨ་པོ་མཐུ་ཆེན་ཡིན་གསུང་། རྫོགས་ཆེན་གྱི་ཀ་བ་ལི་
3-3-15a
མཆོད་ཁང་ན་ཡར་ཁྱེར་བས། བཀའ་ཆད་ལུང་བརྡུམ་དེ་འདྲ་ཡར་མ་ཁྱེར། ངའི་བཀའ་ཆོད་ལུང་ཆོད་དྲི་མ་མེད་པ་རྣམས་ཆམས་པ་ཡོངས་(ཡོང་)གསུང་ནས་འཇོག་མ་བཅུག་གསུང་། རྗེ་མར་པའི་ཞལ་ནས། ཁྱོད་རང་ལ་རྒྱགས་ཟོང་དམ་དུམ་ཡོད་དམ་གསུང་། དེར་ཅི་ཡང་མེད་ནས། ལྷོ་བྲག་ལུང་པར་གླུ་བླངས་ཅིང་བླངས་པས། མི་རྣམས་ཀྱི་སྟོད་ཀྱི་གུང་གླུ་སྙན་ཟེར་ནས། ཉི་མ་གཅིག་རང་ལ་ཡང་ནས་ཁལ་བདུན་རྙེད་ནས། བྱིན་པོ་བཅོལ་ནས་ཁུར་ཅིག་ཁུར་ནས་ཡོངས་པས། མི་རང་ཤེད་ནི་ཆེ་སྟེ་ཁང་ཐོག་འཇོམས་པ་ཡིན་གསུང་ནས་བཀྱོན་དུ་བྱུང་བ་དང་། ཇོ་མོའི་ཞལ་ནས་མི་སྟོ་འདི་འདྲ་ལས་གཡོག་ཁང་ཡང་ཐེག་པ་ཡིན། ག་ལེ་ཕོག་གསུང་། རྗེ་བཙུན་ན་རེ་འདི་ཙམ་ཁུགས་པ་ཅི་བཙོངས་པ་ཡིན་གསུང་། ཅི་ཡང་བཙོངས་རྒྱུ་མེད་ལགས་བླངས་པ་ལགས། འདིས་མི་ཚད་བཅོལ་ནས་རང་ཡོད་ཞུས་པས། ཁྱོད་མི་རྒོད་པོ་ཅིག་འདུག །ངས་ནི་ལྷོ་བྲག་ན་ལོ་འདི་ཙམ་བསྡད་སྟེ་(དེ་)འདི་འདྲ་བ་མ་རྙེད་གསུང་། ལར་ཉི་མ་བཞི་བླངས་པས། ནས་ཁལ་ཉིས་(ཉི་)ཤུ་རྙེད་སྐད། དེའི་དུས་ན་དགུང་ལོ་ཉེར་བརྒྱད་པ་ཡིན་གསུང་སྐད། དེར་རྗེ་བཙུན་ན་རེ་ད་ནང་ནས་ཁྱོད་རང་གིས་
3-3-15b
ལྟོ་ཟོ། ལས་ངེད་ཀྱི་ལས་ཀ་གྱིས་གསུང་། ལར་བླ་མའི་ཕྱག་རྫས་ནས་ལན་ལྔ་ཟོས་སྐད། ལས་རོགས་བྱས་ཤིང་བསྡད་ནས་གདམས་ངག་ཞུས་པས་ནི། དབང་ཐོབ་དགོས་གསུང་ནས་མ་གནང་། དེའི་དུས་སུ་མེས་ཆེན་པོས་ལྷོ་བྲག་གི་ཞིང་ཞོ་ཅིག་འགྲོ་བའི་ས་དང་། ཚོས་དང་བུ་རམ་ལ་སོགས་ལྟང་ཙོས་བཀང་ནས་ཕུལ་བ་ལ་དེས་གཞི་བྱས་པའི་གསེར་གྱིས་བཞེངས་པའི་མདོ་སྡེ་སུམ་ཅུ་དུམ་ཅིག་དང་། སྐུ་མཁར་དགུ་ཐོག་པ་ཅིག་གི་གཞི་བཏིང་བའི་རྡོ་ཁུར་བས། སྐུ་རྒྱབ་ལ་རྨ་ཆེན་པོ་བྱུང་བས། ཇོ་མོ་ན་རེ་མི་ལ་སྒལ་པ་བྱུང་བ་འདི་ལས་མ་མཐོང་། འདི་ད་ཡུག་རྡོ་ཁུར་དུ་མ་བཅུག་ཞུས་པས། རྗེ་བཙུན་ན་རེ་ང་ལ་ཐབས་ཡོད་བོང་བུ་ལ་ཡང་བྱེད་པ་ཡིན་གསུང་ནས། སྒལ་ཁང་བྱས་ཅིང་རྡོ་ཁུར་བས། སྒལ་པ་ལན་གསུམ་བྱུང་བྱུང་དུ་རྡོ་སྐྱས། ནང་ནུབ་ཇོ་མོའི་ཆུ་ལེན་ཡོས་བཏགས་བྱས་པས་ཐུགས་ཟིན་ནས། ཐུགས་ལ་བཏགས་སྐད། འདིའི་དུས་སུ་དགུང་ལོ་ཉེར་བརྒྱད་པ་ཡིན་གསུང་། རྗེ་མར་པའི་བུ་ཆེན་བཞི་ནི། རྔོག་གཞུང་པ་དང་། མེས་ཚོན་པོ་དང་། ཤུད་ཀྱི་ལྦ་བ་ཅན་དང་། རྒྱང་རོ་ཞང་སྟོན་པ་དང་། བཞི་ཡིན་ལ། དེ་ནས་ཚུར་སྟོན་དབང་ངེ་དང་། དགྱེར་ཕུའི་ཀློག་སྐྱ་འབྱུང་རྒྱལ་
3-3-16a
དང་། འཕན་ཡུལ་གྱི་མར་པ་མགོན་གཡག་དང་། ལྷོ་རྫ་ས་རིང་དང་། འཕྲང་གི་རྒྱ་སྟོན་ཞིག་པོ་དང་། མར་པ་བྱ་ཟེ་པ་དང་། ཉང་སྒོམ་སྤྲང་བཏགས་དང་། བ་ངར་རང་ཟོ་ལྦ་བ་ཅན་དང་། བླ་མ་མིད་ལ་རས་ཆེན་ལ་སོགས་རྣམས་ཀྱི་རྣམ་ཐར་ཡང་ཁོ་བོ་ལ་གཏམ་རྒྱུད་ཡོད་དེ་ཟུང་ན་གསལ། སྐུའི་སྲས་པོ་དགུ་འཁྲུངས་པ་ལ། གཉིས་ནི་སྔ་པོ་གྲོངས་གདའ། དར་མ་མདོ་སྡེ་ལ་སོགས་བདུན་པོ་ནི། རྗེ་བཙུན་མིད་ལ་ཡར་བྱོན་པའི་རྗེས་ལ་གྲོངས་པ་ཡིན་པ་ལ། དུས་ཕྱིས་གཡངས་མཁན་ལ་སོགས་རྒྱུས་མེད་རྣམས་ཀྱིས་དོན་དང་མ་འབྲེལ་བའི་འོལ་ཚོད་ཀྱིས་རྫུན་འགའ་རེ་བྱེད་ཅིང་འདུག་སྟེ། དེ་འདྲ་ལ་བློ་གཏད་མི་ཉན་ནོ། །ཡར་མར་པའི་དྲུང་དུ་མིད་ལ་རས་པ་ལུང་སྟོན་མཁན་ཡང་། མར་པ་འབྱུང་ཡེ་དང་། འདྲེ་སྟོན་ལྷ་དགའ་ཡིན་ལ་སྐུ་དྲིན་ཆེ་གསུང་སྐད། བླ་མ་མིད་ལ་རས་པའི་ཡབ་གྲོངས་དུས་ནས་དགུང་ལོ་གསུམ་དང་ཟླ་བ་ངོ་བཞི་པ་ཡིན། དགེ་བཤེས་ཙ་པའི་དྲུང་དུ་སྡོད་དུས་ན་ལོ་བདུན་པ། མཐུ་སློབ་དུས་ན་བཅོ་བརྒྱད་པ། མར་པ་འབྱུང་ཡེ་ཡར་བཅད་ལོ་ཉེར་བདུན་པ། བླ་མ་འདྲེ་སྟོན་ཧ་དགའི་དྲུང་དུ་ལོ་གཅིག་སོང་། མར་པའི་དྲུང་དུ་མཇལ་
3-3-16b
དུས་ན་ལོ་ཉེར་བརྒྱད་པ་ཡིན་གསུང་། ཡང་ལ་ལ་ན་རེ་ཡུམ་བདག་མེད་མས་མིད་ལ་རས་པ་ལ་སྐུ་ལུས་གནང་ངམ་ཟེར་བ་ཡང་འདུག་སྟེ། དེའོ་ཚོད་ཀྱི་བླུན་སྐད་ཡིན་ནོ། །རྗེ་བཙུན་མིད་ལས་དགུང་ལོ་ལྔ་བཅུ་རྩ་གསུམ་པའི་དུས་ན། སྤྲུལ་པའི་དཔའ་མོ་ཚེའི་དབང་ཕྱུག་མ་ལ་སོགས་པ་ཕྱག་རྒྱ་བརྟེན་གདའ། དེ་མན་ཆད་མིའི་བུད་མེད་ཀྱང་བརྟེན་ནམ། སྔར་ཡན་ཆོད་གྲོང་ཆོས་ཀྱི་མ་གོས་གསུངས་སོ། །རྗེ་མར་པའི་ཞལ་ནས། མིད་ལ་རས་པ་ལ་ཞལ་ཏ་འདི་རྣམས་གནང་གསུང་། སྒོམ་ཆེན་པ་བྱ་བ་དེ་ཉལ་དུས་གླང་ཉལ་བ་བཞིན་ཅིག་དགོས་ལ། ལྡང་དུས་ན་སྟག་ལངས་པ་བཞིན་ཅིག་དགོས་པ་ཡིན་ནོ། །དེ་ཡང་གང་འདུག་ས་དེར་སྤང་ལ་ཕུར་པ་བཏབ་པ་ལྟར་དུ་སྡོད་ཚུགས་པ་ཅིག་དགོས་ལ། གཞི་ལམ་ཅིག་ལ་ཡུན་རིང་ན་ཉེས་སྐྱོན་དུ་མ་རྣམས་ཡོད་པས། རི་ཁྲོད་དང་བས་མཐའ་སྐོར་བ་ལ་སྟག་གིས་གཟན་ཚོལ་བ་འདྲ་བ་ཅིག་དགོས་ལ། ལར་ཆོས་པས་ཕ་ཡུལ་དང་གཞི་དགོན་ལམ་དུ་སློངས་པ་ནི། རྒྱ་གར་ན་རྒྱལ་པོ་ཆེན་པོ་ཨིན་ཏྲ་བོ་དྷི་ཙམ་ཡིན་ལ། བོད་ན་ང་ཙམ་ཡིན་གསུང་། བླ་མ་མི་ལ་རས་པས་ལྷོ་བྲག་ཏུ་རྗེ་མར་པའི་སྐུ་མཁར་དགུ་ཐོག་པ་དེ་ཐེབས་བཞི་རྩིགས། ཐེབས་
3-3-17a
བཞི་བཤིག །གཞན་ཡང་དཀའ་བ་སྤྱད་ལུགས་རྣམས། ང་ཞི་བྱེད་རི་ཁྲོད་པས་ཐོས་ཚད་བཤད་ན་དུས་ད་ལྟའི་མི་ཕལ་ཆེར་གྱིས་ནི་སངས་རྒྱས་དག་ཕར་ཞོག་ལ་མི་སྐྱིན་ཀྱང་ག་ན་ལོན། ཇོ་མོ་བདག་མེད་མའི་བཞོན་འཇོ་བའི་ཞབས་སྟེགས་མིད་ལས་མཛད་པ་ཡང་གྲངས་ལས་འདས། སྐུ་རྒྱབ་ལ་སྒལ་པ་ཐེངས་གསུམ་བྱུང་ཟེར། སྔ་ཕྱི་གཉིས་ལ་ལོ་དགུ་བཞུགས་པ་ལ། གླུ་བླངས་ཅིང་སླངས་ནས་གསོལ་ཅིང་། བླ་མའི་ཞབས་ཏོག་མཛད་གདའ། ཡང་ལན་ཅིག་ལྷོ་བྲག་ལྕགས་ཡུལ་དུ་འགྱོད་ཅིག་བྱུང་བ་ལ། མིད་ལས་ཀྱང་བྱོན་པས། མི་རྣམས་ལ་བླ་འབུལ་རེ་རེ་བྱས་པས་གནས་བརྟན་ཅིག་ལ་ཟངས་ཅིག་དང་རེ་ཕྲུག་གི་སྣམ་བུ་ཅིག་ཕུལ་བ་ལ། ཁོང་མ་མགུ་ནས་ལེན་མ་ཉན་པ་དང་། སྟོན་མོ་ཚར་ནས་མི་རྣམས་གཟིངས་ལངས་པ་དང་། མིད་ལས་ཡར་རྒྱུགས་ནས་དེ་ངས་ཁྱེར་ནས་འགྲོ་བྱས་པས། མི་རྣམས་ཀྱིས་གནས་བརྟན་གྱི་གཡོག་པོ་ཡིན་བསམ་ནས་ཁོང་ལ་གཏད་པས། དེ་ཁྱེར་ནས་མར་པའི་དྲུང་དུ་ཕུལ་བས། བླ་མ་མཉེས་ནས་འོ་ཕོ་རྒོད་ཡིན་ཟངས་འདི་ང་ལ་དགོས་ཇོ་མོའི་ཆུ་ར་བྱེད། རེ་ཕྲུག་དེ་ཁྱོད་རང་གི་གོས་གྱིས། ཟངས་
3-3-17b
འདི་ནང་དམར་བ་དེས་ཁྱོད་ལ་ཆོས་དམར་པོ་ཅིག་ཡོང་བ་ཡིན། ཕྱི་ནག་པོ་དེས་ཁྱོད་ལ་ད་རུང་དཀའ་བ་ཁ་ཅིག་སྤྱད་དགོས་པ་ཅིག་ཡོང་བར་འདུག་གསུང་སྟེ། ཕྱིས་ཀྱང་བླ་མས་གསུང་བ་བཞིན་རང་བྱུང་གསུང་། ཡང་དུས་ལན་ཅིག་རྗེ་མར་པའི་ནས་ཆད་པ་ལ། མིད་ལས་གླུ་བླངས་ཅིང་ལྷོ་བྲག་ལུང་པ་རུ་བླངས་པས་ནས་མང་རབ་རྙེད་པ་ཕུལ་བས། བླ་མ་དང་ཇོ་མོ་གཉིས་ཀར་མཉེས་སྐད། ཡང་རྗེ་མར་པ་དང་རྔོག་གཞུང་པ་ལ་ངན་བྱེད་རྣམས་ལ་མིད་ལས་སེར་བ་ཕབ་པས། མི་ངན་རྣམས་འབབས་སོ་ལ་བྱུང་དུས་ན། བྱ་རོ་བྱི་རོ་མང་རབ་ཁྱེར་བྱུང་ནས། མི་ངན་རྣམས་ན་རེ་ངེད་དག་ཉེས་ཅན་ཡིན་ཏེ། འདི་རྣམས་ཀྱིས་ཅི་བྱས་པ་སྙིང་མི་རྗེའམ། ཁྱེད་ཆོས་པ་མ་ལགས་སམ་ཟེར་ནས། བྱ་འབྲུལ་གྱི་རོ་རྣམས་མདུན་དུ་སྤུངས་པས། མི་ལས་ངུས་པ་དང་། རྗེ་མར་པས། རིགས་ལྔ་བྱ་འཕུར་ཆོས་ཉིད་རླུང་། །འཁོར་ལོ་སྒྱུར་རྒྱལ་རིན་ཆེན་འཛིན། །ང་ལ་ན་རོ་པཎ་ཆེན་གྱི། །སྡིག་སྡུགས་ཡོད་པ་ཡིན་གསུང་ནས། །སེ་གོལ་གཏོགས་མཛད་པས་བྱ་བྲུལ་ཤི་རོ་རྣམས་ནམ་མཁའ་ལ་འཕུར་ནས་སོང་སྐད། སྤྱིར་མིད་ལ་རས་པས་ལྷོ་བྲག་དུ་(ཏུ་)ལོ་དགུ་བཞུགས་པ་ལ། རྗེ་མར་པའི་རྡོ་མཁར་ཆེན་པོ་དེ་ལ། 
3-3-18a
རྩིག་གཤིག་ཐེབས་བཞི་བྱས་པའི་རྟིང་མ་དེ་ཕྱིན་པ་དང་། མར་པ་ཡང་མཉེས་པ་ལྟར་མཛད་ནས། ད་ནི་རབ་གནས་བྱེད་རན་གསུང་ནས། ཁང་པ་ལ་སྐོར་བ་ཁྱིལ་པ་ཅིག་མཛད་ནས། རྨང་རྡོ་ཀུན་ལ་གཟིགས་ཏེ། ཆུ་རྡོ་ཆེན་པོ་ལུག་རོ་ཙམ་ཅིག་མིད་ལ་མིན་པ་ཅིག་གིས་ཁུར་རོགས་བྱས་པ་དེ་ངོ་ཤེས་ནས། རྡོ་འདི་ཐོས་པ་དགའ་མིན་པ་ཅིག་གིས་ཁུར་བར་འདུག །འདི་སུས་ཁུར་བ་ཡིན་གསུང་ནས་བཀྱོན་དུ་བྱུང་བས། འདི་གྲྭ་པ་རྣམས་ཤེད་ཚད་འགྲན་པ་ཡིན་ཞུས་པས། མར་པའི་ཞལ་ནས་ད་ལྟ་རང་ཤིག་གསུང་ནས་རྡོ་མཁར་དེ་ག་རང་རྩ་བ་ནས་བཤིག་བཅུག་ནས། ད་ཅིའི་གྲྭ་པ་ཚོས་ཁུར་བའི་རྡོ་ཆེན་པོ་དེ། མིད་ལ་རས་པ་ལ་རྡོ་འདི་ཁུར་ལ་ཁར་ཙང་གི་ས་དེར་སྐྱོལ་གསུང་ནས། སྔར་གྱི་སར་ཞོག་གསུང་ནས། དེ་ནས་དེ་ཡང་ཡར་ལོང་ལ་ཤོག་གསུངས་པས། ཡང་ཡར་ཁུར་ནས་ཡོངས་པས། དེ་ཡང་བརྩིགས་གསུང་ནས། ད་གཟོད་རྩིགས་ཏེ། སྐུ་མཁར་དགུ་ཐོག་པ་ཡང་ཚར་བ་དང་། མར་པའི་ཞལ་ནས། ད་ནི་ཐོས་པ་དགའ་ཁོ་དེ་ངང་མ་ཐུང་དང་། དུས་རེས་ཅིག་ཙ་ན་ཁ་མོ་ཟོས་པའི་རྗེས་ལ་མངར་མོ་ཅིག་མྱོང་ངམ་མི་ཤེས་གསུང་སྐད། ལར་སྐྱེས་མཆོག་མིད་ལ་རས་ཆེན་དཔལ་ལྡན་བཞད་པ་རྡོ་
3-3-18b
རྗེའི་སྙིང་རུས་དང་། དཀའ་སྤྱད་འདི་དྲན་ཙ་ན། དུས་ད་ལྟའི་ཆོས་པ་ཕལ་ཆེར་ནི་འཆི་འཕྱིས་པ་རང་ཡིན་ལགས་སོ། །གངས་ཅན་རྒྱུད་དུ་སྐུ་འཁྲུངས་ཤིང་། །འཇིག་རྟེན་སྐྱོན་རྣམས་ཡོངས་སྤོངས་ཏེ། །རྣལ་འབྱོར་དབང་ཕྱུག་འཛམ་གླིང་བརྒྱན། །མི་ལ་རས་ཆེན་ཁྱེད་ཞབས་དང་། །སྤྲང་པོ་ཞི་བྱེད་རི་པ་ཡི། །སྤྱི་བོར་དུས་རྣམས་ཐམས་ཅད་དུ། །སྐད་ཅིག་འབྲལ་བར་མ་གྱུར་ཅིག །ཨ་ལ་ལ། ཨ་ལ་ལ། ཕ་མི་ལ་རས་ཆེན་ཨང་། ཡང་མཆེད་གྲོགས་ཀུན་གྱིས་ཀ་ཅ་སྟོན་ནས་དབང་གྲལ་ལ་ཞུགས་པས། རྗེ་མར་པའི་ཞལ་ནས། ཁྱོད་ལ་དབང་ཁྲལ་ཅི་ཡོད་གསུང་། ང་ལ་ཀ་ཅ་མེད་པས་མཆེད་གྲོགས་རྣམས་ཀྱིས་དབང་ཁྲལ་བྱིན་པ་ཡིན་ཞུས་པས། ཆོས་ཞུ་བ་ལ་རང་རེ་དབང་བའི་ནོར་བཏང་དགོས་པ་ཡིན། མིས་ང་ལ་འབུལ་རྒྱུ་ལ་ཡོངས་བ་རྣམས་ལམ་ཀར་བགོ་བཤའ་བྱེད་པ་དེ་ཁྱེད་ཚོ་མི་བདེན་གསུང་ནས། མིད་ལ་ཨ་ཅང་ཆེ་དེ་གཞན་རྣམས་ཀྱང་ཁོང་གི་རིན་ལ་སྒོར་བཏོན་པ་ཡང་ལན་དྲུག་ཙམ་བྱས་གསུང་། གཞན་རྣམས་ལ་དབང་དང་ཆོས་གནང་ཙ་ན། ཐོས་པ་དགའ་ལས་ཀ་གང་དཀའ་བ་ཅིག་བསྐོས་ནས་གཏོང་བ་ཡིན་སྐད། ཚོགས་འཁོར་དུས་ན་སྐལ་བ་དྲག་པ་རེ་བྱུང་ན། དེ་ལ་མར་པ་སྤྱན་ཅེར་བ་རེ་
3-3-19a
གཟིགས་ནས། མིད་ལ་ལ་ལྷག་མ་འདྲ་བྱིན་པས་ཆོག །ཁོའི་དེ་ཡར་ལོང་ངེད་ཀྱི་འགྲོན་ཆས་གྱིས་གསུང་ནས་ཕྲོགས་པ་ཡིན་གསུང་སྐད། ཡང་དུས་ལན་ཅིག་མར་པའི་བུ་ཆེན་བཞིས་དབང་ཅིག་ཞུས་པ་ལ། ཇོ་མོ་ན་རེ་ཁྱེད་རྣམས་ཀྱི་ཞོར་ལ་མི་ལ་ཡང་ཚུད་དགོས་གསུང་པས། ཁོང་ཚོ་ན་རེ་ཉིད་དག་མི་ལ་ཆུད་ན་དགའ་དེ། བླ་མའི་དྲུང་དུ་ཞུ་དགོས་ཟེར་ནས་ཞུས་པས། ཐོས་པ་དགའ་ལ་དབང་ཁྲལ་ཅི་འདུག་གསུང་། ཤ་ཁོག་ཅིག་དང་མར་གོང་གཅིག་གདའ་ཞུས་པས། དེ་བཟང་ཁྱེར་ལ་ཤོག་གསུང་ནས་ཁྱེར་ཕྱིན་པས། དེ་རྣམས་ཡོན་བདག་ཆེ་གེ་དང་ཆེ་གེས་ང་ལ་ཕུལ་བ་དེར་འདུག་གསུང་ནས་དབང་མ་གནང་། ཡང་ལན་ཅིག་མེས་སྟོན་ལ་སོགས་པ་ཁ་ཅིག་གིས་གསང་འདུས་ཀྱི་དབང་ཞུས་པས། ཇོ་མོས་ཞུ་རོགས་བྱས་ནས་ཞུས་པས། ཁོ་ལ་དབང་ཁྲལ་ཅི་འདུག་གསུང་། ཇོ་མོས་ཕག་ནོར་གཡུ་ཆེན་པོ་ཅིག་གནང་ནས། གཡུ་ཅིག་འདུག་ཞུས་པས་ཁྱེར་ཤོག་གསུང་སྟེ། ཁྱེར་ནས་ཕྱིན་པས་ཁོ་ལ་གཡུ་འདི་གང་ནས་བྱུང་བ་ཡིན་གསུང་། ཇོ་མོ་ན་རེ་མིད་ལ་ལ་གཡུའི་ཡོང་ས་ག་ན་ཡོད་པ། ང་ལས་མས་མར་པའི་མི་རིགས་རྣམས་མི་ངན་པ་ཡིན་པས། དུས་ཕྱིས་
3-3-19b
བཀྲེས་པ་བྱུང་ན་ཕག་ནོར་གྱིས་ཟེར་ནས་བྱིན་པ་ཡིན་ཞུས་པས། རྗེ་མར་པ་ན་རེ་དེ་ཡིན་གཡུ་ལས་ཁྱོད་རང་ཡང་ང་དབང་བ་ཡིན་གསུང་། ཇོ་མོ་ན་རེ་ང་ཉིད་ཅག་དབང་ན་ཡང་། གཡུ་ཉིད་མི་དབང་། དང་པོ་ཕ་མས་ཉིད་ཅག་ལ་སྟེར་བའི་དུས་ན། དང་པོ་ཁོང་རང་རེའི་འབངས་ཡིན་ཏེ། ད་ཡོན་ཏན་ཅན་བྱུང་འདུག་པས་ཁྱོད་སྟེར་བ་ཡིན་ཟེར། བླ་མས་དབང་མི་གནང་ན་གཡུ་འདི་བསྐུར་ནས་གཞན་དུ་དབང་ཞུར་གཏོང་བ་ཡིན་ཞུས་པས་དབང་ལ་ཚུད་དོ། །རྗེ་བཙུན་ན་རེ་གཡུ་བཟང་པོ་གཅིག་གཞན་དུ་དོ་རང་ཤོར་གསུང་། དེ་མན་ཆད་རྒྱུད་བཤད་ཚད་ཉན་དུ་བཅུག་གོ། །དེ་དུས་ན་མི་ལ་དགུང་ལོ་ཉི་ཤུ་རྩ་དགུ་པ་ཡིན་གསུང་། སྐབས་ཅིག་དཔལ་ལྡན་དགེས་པ་རྡོ་རྗེའི་དབང་བསྐུར་ནས། རྒྱུད་བརྟག་པ་གཉིས་པ་ཚར་བཅུ་དྲུག་ཉན་གསུང་། མན་ངག་ནི་མ་གནང་། ཇོ་མོས་ཕྱག་རྒྱ་ཆེན་པོ་ལྷན་སྐྱེས་ཅིག་གནང་བས་ཨན་ཙམ་ཉམས་ལེན་ལ་ཕན་པར་བྱུང་གསུང་། ཡང་ལན་ཅིག་ལྷོ་ལ་ཡག་པས་མར་པའི་འབུལ་སྐྱེལ་བཅོམ་པ་ལ། སེར་བ་ཕབ་དང་གདམས་ངག་སྦྱིན་གསུང་པ་ལ། ད་སེར་བ་ཡང་མི་འབེབས། གདམ་ངག་ཡང་མི་གནང་བར་འདུག་པས། ད་བླ་མ་གཞན་ཅིག་གི་དྲུང་དུ་འགྲོ་བར་ཞུ་ཞུས་པས། ཇོ་མོ་ན་རེ་ད་རེས་སེར་བ་ཕབ་དང་། 
3-3-20a
རང་རེ་གཉིས་ཀས་ཞུས་པས་གདམས་ངག་གནང་ཡོང་གསུང་ནས། སེར་བ་ཕབ་པས། ནོར་ཁུགས་ཀྱང་གདམས་ངག་མ་གནང་བས། དེ་ནས་ཇོ་མོ་དང་མིད་ལ་གཉིས་གྲོས་བྱས་ཏེ། མིད་ལ་འགྲོ་བ་སྐད་བྱས་ནས་རྗེ་བཙུན་ལ་སྐུ་ཁམས་ཞུས་ནས་ཕྱིན་པས། ཇོ་མོ་ལ་ཁྱོད་རང་གི་མིད་ལ་ནི་འགྲོ་བར་འདུག་སྡོད་གྱིས་གསུང་བ་ལ། མིད་ལས་འགྲོ་བ་སྐད་བྱས། ཇོ་མོས་ཟློག་པ་ལྟར་བྱས་པས། རྗེ་བཙུན་ཐོག་ཁ་ནས་ཉག་ཉུག་རབ་རིབ་གཟིགས་ཅིང་འདུག །དེར་ཟློག་ནས་ཡོངས་ཏེ། གདམས་ངག་ཞུས་པས་མ་གནང་། ཡང་ཡང་ཞུས་པས་ག་ལེ་སྦྱིན་གསུང་ནས་མ་གནང་བས། ཇོ་མོའི་ཞལ་ནས་ད་ཁྱོད་འདིར་བསྡད་ཀྱང་དོན་མི་འདུག་པས། གདམས་ངག་ལ་ནི་བླ་མ་འདི་ལས་ལྷག་པ་ག་ན་ཡང་མེད་དེ་ཁོང་གི་ནི་མི་གནང་བར་འདུག་པས། ད་ཁོང་གི་བུ་ཆེན་ཅིག་ཅན་བཏང་དགོས་པར་འདུག་སྟེ། དེ་ཡང་ཞང་སྟོན་ནི་རྗེ་བཙུན་གྱི་སྐུ་ཞང་ཡིན་པ་དང་། ལར་ཡང་དྲུང་དུ་ཕལ་ཆེར་སྡོད་དགོས་པས་ལྗབས་མི་བདེ། ཤུད་ཀྱི་ལྦ་བ་ཅན་ནི་མི་ཆེན་པོ་ཁྱེངས་གྲགས་ཅན་དང་ལྟ་སྤྱོད་མི་མཐུན། རྔོག་གཞུང་པ་དེ་བྱང་ཆུབ་སེམས་དཔའ་ཅིག་ཡོད་པས་དེར་བཏང་དགོས་གསུང་ནས། དེའི་
3-3-20b
བར་དུ་སྐུ་མཁར་དགུ་ཐོག་པ་དེ་ལ། ལོ་རེ་རེ་ལ་ཨར་པོ་བཅུ་གསུམ་བཅུ་གསུམ་གྱིས་ཐོག་རེ་རེ་བཏང་བའི་ཐོག་བདུན་ཕུབ་ཚར་བ་དང་། ལོ་བདུན་བསྡད་ནས་ཕྱིན་པ་ཡིན། ལར་ལོ་དགུ་ལྷག་ཙམ་བཞུགས་གསུང་། དབང་རྫོགས་པ་ལྔ་ཙམ་ཐོབ། མཚན་རྡོ་རྗེ་རྒྱལ་མཚན་དང་། གསང་མཚན་དཔལ་ལྡན་བཞད་པ་རྡོ་རྗེར་བཏགས། དེ་ནས་ཇོ་མོས་བཀའ་བརྒྱུད་གོང་མ་རྣམས་ཀྱི་དབུ་སྐྲ་ལ་སོགས་རྟེན་བྱིན་རླབས་ཅན་ཚན་ཅིག་བསྐུར་ནས། ང་ན་རོ་དགེ་བཤེས་རྔོག་ལ་མིད་ལ་ལ་གདམས་ངག་ཐུགས་ལ་ཐོགས་ཟེར་གྱིན་འདུས་གྱིས་ལ་སོང་གསུང་ནས། རྗེ་བཙུན་ལ་སྐུ་ཁམས་ཞུས་ནས་བྱོན་པས། རྗེ་མར་པའི་ཞལ་ནས། ཇོ་མོ་ལ་ཁྱོད་རང་གི་མིད་ལ་འགྲོ་བ་འདུག་པས་སྡོད་གྱིས་གསུང་བ་དང་། ཇོ་མོ་ན་རེ་མིད་ལ་འདྲ་བའི་ལས་ཡོང་བ་སུ་ཡོད། ཞབས་ཏོག་དཀའ་བ་དེ་འདྲ་སྤྱད་ཀྱང་གདམས་ངག་ནི་མི་སྟེར་བར་འདུག་པར། ང་སྡོད་མི་ཟེར་གསུང་ནས་འགྲོ་མ་ཉན་པ་དང་། རྗེ་བཙུན་རང་གིས་བདས་ཀྱང་མ་ཉན་པ་དང་། ཁྱོད་ཡེ་མི་སྡོད་ན་ང་རང་གི་རྒྱགས་ཕྱེ་ཞོགས་གསུང་ནས། རྒྱགས་ཕྱེ་ཕྲོགས་ཡང་མ་ཉན་པར་མིད་ལས་གཞུང་གི་རི་བོ་སྒང་དུ་ཕྱིན་པ་དང་། རྔོག་གིས་གྲྭ་པ་ཚན་ཅིག་ལ་བརྟག་གཉིས་གསུང་གིན་འདུག་པ་སླེབ་པས། 
3-3-21a
དགེ་བཤེས་རྔོག་གི་སྤྱན་ཟུར་ལ་ཕྱག་བབས་ཁྱུག་ཁྱུག་པ་བྱུང་སྟེ། ཐང་ཐེབ་བཏེག་ནས་བལྟས་པས། ཐོས་པ་དགའ་འདུག་ནས། བཀའ་བརྒྱུད་ཀྱི་དབུ་སྐྲ་ཕྱག་དུ་བཏང་ནས། ཇོ་མོ་བདག་མེད་མའི་ཞལ་ནས། ང་ལ་གདམས་ངག་གནང་བར་ཞུ་གསུང་གིན་གདའ་ཞུས་པས། རྟེན་ལ་སྤྱན་ཅེ་རེ་གཟིགས་ནས། རྟེན་འདི་ཁྱོད་ཀྱིས་ཁྱེར་ཡོངས་པ་མིན། བླ་མའི་ཐུགས་རྗེས་ང་རང་ལ་བྱོན་པ་ཡིན་གསུང་ནས། འཆད་པ་པོ་ང་ཆོས་ཀྱང་ང་། །ཟེར་བའི་ཆོས་ཐུན་གྱི་མཚམས་དེ་ལ་འདུག་པ་ལ། ཤར་བ་ཅིག་ཀློག་ནས་དེའི་འབྲུ་ནོན་ནང་པར་བྱེད་གསུང་སྟེ། ནང་དུ་གཤེགས་ཇོ་མོ་ལ་ཕུད་ཡོད་དམ་གསུང་། ནམ་དགོས་ཆ་མེད་པ་དེས་ཡོད་ལགས་ཟེར་བ་དང་། བཀའ་རྒྱུད་(བརྒྱུད་)ཀྱི་རྟེན་བྱོན་པ་ལ་ཤང་ལེན་བྱེད་དགོས་པས་མཆོད་པ་ཤོམས་གསུང་ནས། ཚོགས་འཁོར་མཛད་ནས། རྔོག་གི་ཞལ་ནས་ཁྱོད་ཡོངས་པ་དེ་གོ་བཅད། ཁྱོད་འབོད་པ་ལ་ཐུག་ཡོད་པ་ཡིན་ཏེ། རྗེ་བཙུན་མ་གཉེས་དོགས་ནས་མ་ཕོད་པ་ཡིན་གསུང་། ངེད་ཀྱི་གནག་ལུག་རྣམས་དོལ་གྱི་ཕལ་མོ་བས་ཁྱེར་བས་སེར་བ་ཅིག་གཏོང་དགོས་གསུང་། དེར་སེར་བ་འབེབས་པ་མི་དགའ་ན་ཡང་། ངོ་གསར་དུ་སོང་བས་ངོ་མ་ཆོགས་ནས། སེར་བ་ཕབ་པས་
3-3-21b
ཕེབས་ཀྱང་ད་རུང་རྔོག་གི་མཐུ་ཡིན་པའི་ངེས་པ་མེད་ཟེར་ནས། ཡང་སྐྱར་ནས་ཕབ་པས། ཤིང་ཕུང་རེ་རེའི་འོག་ན་ཡང་བྱ་རོ་བྱི་རོ་གྲངས་མེད་པ་ཤི་འདུག་པས། ཐུ་བ་གང་ཁྱེར་ཡོངས་པ་དང་། ཇོ་མོ་ན་རེ་དོན་གྲུབ་སམ་(བམ་)ཟེར་བས། བྱ་རོ་རྣམས་མདུན་དུ་སྤུངས་ནས། དོན་གྲུབ་སེ། མི་ཚེ་གང་དུ་མཐུ་དང་སེར་བ་ཁོ་ན་བྱེད་དགོས་པ་ང་འདྲ་བའི་བསོད་ནམས་མ་བསགས་པ། བྱས་པ་ཆོས་བྱས་ནས་འགྲོ་ས་དམྱལ་བར་འགྲོ་བ་བྱས་ནས་ངུས་པས། རྔོག་ན་རེ་མི་སྟོ། རྗེ་མར་པས་ནཱ་རོ་པ་ཐེབས་གསུམ་བརྟེན་པའི་རྗེས་ལ་གནང་བའི་མན་ངག་གཞན་སུ་ལ་ཡང་མ་གནང་པ་ཅིག་ང་ལ་ཡོད། དེ་ཁྱོད་ལ་བྱིན་པས་ཆོག །ལར་ཡང་རྩ་ཁུར་བ་ལ་ཟོར་བ་མི་ལྕི། ཆོས་བྱས་པས་སྡིག་པ་འདག་པ་ལ་ཚེགས་མེད་པ་ཡིན། ཆང་འཐུང་མེ་ལ་སྤྲོས་གྱིས་གསུང་ཡང་ངུ་འཕྲོ་མ་ཆོད་པ་དང་། ཇོ་མོ་ན་རེ་གདམས་ངག་གམ་དེ་ཡོད་ན་ད་ལྟ་རང་སྟོན་མཛོད། མི་འདི་ཤི་བར་འདུག་པ། ཤི་ཚར་ནས་གདམས་ངག་སུ་ལ་སྟོན་ཟེར་བས། དོ་ནུབ་རང་ལ་བདག་མེད་མ་ལྷ་མོ་བཅོ་ལྔའི་དབང་གནང་། བརྟག་པ་གཉིས་པའི་རྒྱུད་གསུང་། ཐབས་ལམ་ཆོས་དྲུག་གི་ཁྲིད་གནང་། ཁྱད་པར་གཏུམ་མོའི་བསྲངས་སུ་བཅུག་ནས། ཕུག་ཅིག་
3-3-22a
ན་འདག་ཆར་ལ་བཞག་ནས། ཇོ་མོས་རྒྱགས་དང་ཚོགས་འཁོར་བྱུང་ཚད་ཀྱི་སྐལ་བ་དང་། དཀྱིལ་འཁོར་གྱི་སྐུ་སྐལ་དང་། མིད་ལ་རང་ལ་སྐལ་བ་རེ་དང་། ཇོ་མོ་རང་གི་ལྷག་མ་རེ་དང་གསུམ་གསུམ་ཕུག་སྒོར་སྐྱལ། བླ་མ་རྔོག་གི་སྤོང་ཐག་ལན་གསུམ་བྱས་པ་ལ། རྗེ་མར་པས་གདམས་ངག་འདི་དང་འདི་གནང་གསུང་ནས། ཕུག་སྒོར་བྱོན་ནས་ཆོས་རྣམས་གསུངས། དོལ་པས་ཀྱང་ནོར་དང་རྒྱལ་ཁ་བྱས་ནས། སྒྲུབ་པ་ལོ་ཅིག་བྱས་པས་ཀྱང་གདམས་ངག་ལ་བློ་ལེགས་པར་ཁེལ་ཏེ། ཉམས་མྱོང་ཙམ་ནི་མ་སྐྱེས་པར་ཡོད་ཙ་ན། རྗེ་མར་པས་རྔོག་ལ་འཕྲིན་བཏང་ནས། ངས་འདིར་ཞིང་ཆེན་པོ་ཆོད་སྟེ་(དེ་)ཕྱག་སོགས་མེད་པས་ལུགས་ཚེར་མོ་ལས་མི་རྒན་མི་གཞོན་པ་གང་ཡོད་ཅིག་སྐྱོལ་ཅིག་བྱ་བ་བྱུང་བས། རྔོག་ན་རེ་ཁ་མར་པོ་ནོར་རམ་ཟད་པའི་སེམས་ལས་སམ། གདམས་ངག་དེ་ཆོས་མཁས་པ་ཙམ་ལས་ཇེ་ཟབ་ཇེ་ཟབ་ལ་འགྲོ་དགོས་པར་འདུག་པ་ལ་གསུང་ནས། ལུག་ཚེར་མོ་བརྒྱ་དང་གཞན་ཡང་ཆ་རྐྱེན་མང་རབ་དང་། གསུང་རབ་དཀོན་རྩེགས་(བརྩེགས་)ཅིག་དང་། དེ་རྣམས་སྡེབས་ནས་ཐོས་པ་དགའ་ལ། བླ་མས་ང་ལ་འདི་སྐད་གསུང་བྱུང་བས་དྲུང་དུ་འབུལ་བ་སྐྱེལ་དུ་འགྲོ་དགོས་
3-3-22b
པར་འདུག་པས། ཁྱོད་འགྲོའམ་མི་འགྲོ་གསུངས་པས། བདག་ཀྱང་འགྲོ་བར་ཞུ་ཟེར་ནས་ཐོན་པས། ཇོ་མོ་ན་རེ་ངའི་མིད་ལའི་མཚམས་སུས་བཏོན་ཟེར་བ་དང་། ཁོ་རང་བླ་མ་ལ་མཇལ་དུ་འགྲོ་བ་ཡིན་བྱས་པས། འོ་ན་ཐེབས་ཅིག་སོང་ལ་དེ་ནས་ཚུར་ཤོག་ཟེར། དེར་རྔོག་གི་ཞབས་ཏོག་བྱས་ནས་ལྷོ་བྲག་དུ་(ཏུ་)ཕྱིན་པ་ལ། བྲོ་བོ་ལུང་སླེབས་ཁར་བླ་མ་རྔོག་གི་བསུ་བ་ཅིག་རེ་ནས། མི་ལ་སྔོན་ལ་བཏང་བས། བླ་མ་མར་པ་སྤང་རྐོ་ཡིན་འདུག་པ་ལ། ཕྱག་ཕུལ་བས། ཁྱོད་སླེབ་སམ་གསུང་། བླ་མ་རྔོགས་པ་གསུང་རབ་དཀོན་བརྩེགས་དང་། ལུག་དང་བཅས་པ་འབུལ་བ་ལ་བྱོན་གྱིས་ཡོད་ཞུས་པས། དེ་ཀ་ཡིན་ཁྱོད་རང་ནང་དུ་སོང་ལ་ཇོ་མོ་ཡོད་གསུང་། རྔོག་ལ་བསུ་བ་ཅིག་མི་འཚལ་ལམ་ཞུས་པས། ཧ་ཧ་ངས་རྒྱ་གར་ནས་ནཱ་རོ་མི་ཏྲིའི་ཆོས་ཁྱེར་ནས་ཡོངས་པ་ལ་བསུ་བ་བྱེད་མཁན་མེད་པ་ལ། རྔོག་དུད་འགྲོ་གདས་ནས་ཡོང་བ་ལ་བསུ་བ་བྱེད་དུ་རེ་བ་འཁྲུལ་བ་ཡིན་གསུང་པས། མིད་ལས་ནང་དུ་བྱོན་པས། ཇོ་མོ་མཉེས་ནས་ཁྱོད་འོངས་སམ་གསུང་། བླ་མ་རྔོག་པ་འབྱོན་གྱིན་ཡོད་ཞུས་པས། རྗེ་བཙུན་དང་མཇལ་ལམ་ཅི་གསུང་ཟེར་འདི་སྐད་གསུང་ཞུས་པས། ཁོང་མི་ཆེན་པོ་འབྱོན་པ་ལ་བསུ་བ་ཅིག་བྱེད་དགོས་པ་ཡིན་
3-3-23a
ཏེ། རང་རེས་ཞུས་ན་ནི་བཀྱོན་དུ་ཡོང་གསུང་ནས། ཇོ་མོ་དང་མིད་ལས་ཕྱིན་པས། ཇོ་མོའི་དྲུང་དུ་རྔོག་གིས་ཕྱག་འཚལ་བ་དང་། ཇོ་མོས་ཕྱག་སྤྱི་སྤྲོད་ཙམ་ཅིག་མཛད་ཅིང་འདུག །དེ་ནས་མར་པ་སྤང་སྐོ་སར་རྔོག་གིས་བྱོན་ནས་ཕྱག་འཚལ་བས། རྗེ་བཙུན་ཞལ་ཕར་གཟིགས་ནས་སྤང་ཡབ་སེ་ཡབ་སེ་རྐོ་ཡིན་འདུག །ཡང་མདུན་དུ་ཕྱིན་ནས་ཕྱག་འཚལ་བས། ཅི་ཡིན་ཆོས་ཀྱི་རྡོ་རྗེ་ཡོངས་སམ། ང་ནི་ཟོག་པོ་རྫུན་མཁན་ཅིག་འདུག་སམ་གསུང་ནས་ནང་དུ་བྱོན་ཏེ། དེ་ནས་ཇོ་མོ་ལ་ཕུད་ཡོད་དམ་གསུང་། ནམ་དགོས་ཆ་མེད་པ་དེས་ཡོད་ཞུས་པས། འོ་ན་རྔོག་ལ་སྣ་ལེན་བྱེད་པ་ཡིན་པས། གྲྭ་པ་རྣམས་སོགས་གསུང་བས། གྲྭ་པ་ཐམས་ཅད་ཚོགས་ནས་མཆོད་པ་ཆེན་པོ་གནང་ནས། བྱིན་པོ་གྱེས་པ་དང་རྗེ་བཙུན་རང་དང་། ཇོ་མོ་དང་། རྔོག་དང་། མིད་ལ་དང་དཔོན་སློབ་བཞི་ལས་མེད་པས། རྗེ་བཙུན་གྱི་ཞལ་ནས་རྔོག་ལ་ངའི་མི་ལ་ལ་གདམས་ངག་བྱིན་ནམ་གསུངས་པ་དང་། རྔོག་ན་རེ་བཀའ་བརྒྱུད་ཀྱི་དབུ་སྐྲ་སྐུར་ནས་བྱུང་བས། གདམས་ངག་བྱིན་ལགས་ཞུས་པས། རྗེ་བཙུན་གྱིས་དབྱུག་པ་ཏོག་བླངས་པ་དང་། ཇོ་མོ་རྒོད་ཅིང་བྲོས་པ་དང་། ཡུག་ནས་རྗེ་བཙུན་གྱི་ཇོ་
3-3-23b
མོ་ལ་ཤོག་གྱིས་གསུང་ནས། ཇོ་མོ་ནང་དུ་བྱོན་པ་དང་། རྗེ་བཙུན་ན་རེ་ཁྱོད་ཇོ་མོ་ལ་ཡང་གྱོད་མེད། མིད་ལ་ལ་ཕན་སེམས་གྱིས་བསྐུར་བ་ཡིན། མིད་ལ་ལ་ཡང་གྱོད་མེད། ཇོ་མོས་བསྐུར་བ་དེ་ཁྱེར་ནས་འགྲོ་བ་ལས་འོས་མེད། ཁྱེད་མ་སྨད་ཀྱི་བར་ནས་རྔོག་འཚེངས་པ་ཡིན་ཏེ། ད་ནི་གང་ཐོད་ཐོད་དུ་བཞག་དུ་(ཏུ་)མི་ཉན་པར་འདུག་གསུང་ནས། དེ་མན་ཆོད་རྟེན་སྐུ་ལུས་ལ་འཆང་གིན་འདུག་ཟེར། དེ་ནས་རྗེ་བཙུན་གྱིས་རྔོག་ལ་ཁྱོད་ཀྱིས་ང་ལ་འབུལ་བ་འདི་དང་འདི་བྱས། བསྙེན་བསྐུར་འདི་བྱས། དེའི་དུས་ན་ངས་གདམས་ངག་འདི་དང་འདི་བྱིན་པ། དེ་རྣམས་ངའི་མིད་ལ་ལ་བྱིན་ནམ་གསུང་། དེ་རྣམས་བྱིན་ལགས་ཞུས་པས། འོ་ན་ཐམས་ཅད་མ་ལུས་པར་བྱིན་འདུག་གསུང་པ་དང་། དེར་མི་ལའི་བསམ་པ་ལ། རྗེ་མར་པས་རྒྱ་གར་དུ་དེ་ཙམ་གྱི་དཀའ་བ་སྤྱད་པའི་གདམས་ངག་རྣམས་བླ་མ་རྔོག་ལ་གནང་འདུག་ལ། བླ་མ་རྔོག་གིས་དེ་ཙམ་གྱི་འབུལ་འདེགས་དང་ཞབས་ཏོག་ཆེན་པོ་བྱས་ནས་ཞུས་པའི་གདམས་ངག་ཟབ་དོན་རྣམས་ཐམས་ཅད་ང་ལ་གནང་འདུག །བླ་མ་གཉིས་ཀར་སངས་རྒྱས་རང་དུ་འདུག་བསམ་ནས། མོས་གུས་ཆེན་པོ་སྐྱེས་གསུང་། དེ་ནས་བླ་མའི་དྲུང་དུ་
3-3-24a
རྔོག་ཡུག་ཙམ་ཅིག་སྡོད་བསམ་པར་འདུག་པ་ལ། མར་པའི་ཞལ་ནས་གྲྭ་པ་རྣམས་ལ་ཆོས་བཤད་དགོས་པས་སོང་གསུང་ནས་སྡོད་དུ་མ་བཅུག །བླ་མ་རྔོག་བཞུགས་དུས་ན། མི་ལ་ལ་ཁྱོད་ད་རེས་འགྲོ་ཡམ་(འམ་)སྡོད་གསུང་པས། རྔོག་གི་ཇོ་མོ་ན་རེ་ཤོག་ཟེར་བས་ལན་ཅིག་འགྲོ་ལགས་ཞུས་པས། རྗེ་བཙུན་གྱི་ཞལ་ནས། འོ་ན་ད་རེས་སོང་ལ། རྔོག་ལ་མ་ཟེར་བར་ཁྱེད་རང་ལ་གདམས་ངག་ཅིག་བསྟན་རྒྱུ་ཡོད་པས། ནམ་ཡོང་སྙིང་འདོད་ཙ་ན་ཤོག་གསུང་པས། བླ་མ་རྔོག་པ་སྐྱེལ་དུ་ཕྱིན་པ་དང་། རྔོག་གི་ཇོ་མོ་ན་རེ་ད་ཁྱོད་རང་མཚམས་ལ་སྡོད་ཟེར་བ་ལ། རྗེ་བཙུན་ན་རེ་ཤོག་གསུང་བྱས་པས། ཐེབས་ཅིག་སོང་ལ་ཕྱིས་ཤོག་ཟེར། དེར་ལྷོ་བྲག་ཏུ་ཕྱིན་པ་དང་། རྗེ་བཙུན་གྱི་ཞལ་ནས། ཇོ་མོ་ལ་ཁྱོད་རང་གི་མིད་ལ་ལ་གདམས་ངག་ཅིག་སྟོན་པ་ཡིན་པས། ཕུད་ཅིག་ཆོས་ཤ་ལ་སོགས་པ་གཞན་འདྲ་ཡང་སྟ་གོན་གྱིས་གསུང་ནས། ས་སྟེགས་དང་ཡུལ་གསལ་ནས་ཡར་གཤེགས་ནས། ཕུ་གྲོ་བོ་ལུང་གི་དགོན་པར་བྱོན་ཏེ། འཁོར་ཐམས་ཅད་ལ་ཡང་ད་ཁྱེད་རྣམས་སུ་ཡང་ང་རང་གི་ལན་མ་བྱུང་གི་བར་དུ་མ་ཡོང་ཅིག །ངེད་གསུམ་མཁར་ལར་ཅིག་གི་ཚེས་གཅིག་ལ་འགྲོ་བ་ཡིན་གསུང་ནས། 
3-3-24b
རྗེ་བཙུན་དང་ཇོ་མོ་དང་མིད་ལ་དང་དཔོན་སློབ་གསུམ་བྱོན་པ་དང་། རྗེ་ལྷོ་བྲག་པའི་མར་སྟོན་ཆོས་ཀྱི་བློ་གྲོས་ཀྱི་ཞལ་ནས། བུ་ཁོ་དེ་མི་ལ་ཐོས་པ་དགའ་མཐུ་ཆེན། དགེ་བསྙེན་རྡོ་རྗེ་རྒྱལ་མཚན། ཁྱེད་སེམས་རྩེ་གཅིག་དུ་(ཏུ་)གྱིས་ལ་ཉོན་ཅིག་དང་། དེ་དེ་ཡིན་ཏེ་དེ་ཉིད་མིན། བྱ་བ་ཡིན་ཏེ། དེ་དེ་ཡིན་ཏེ་བྱ་བ་རྒྱུད་དང་འབྲེལ་བའི་ཐབས་ལམ་གྱི་གདམས་ངག་བྱ་བ། ཁྱོད་རང་ལ་སྔར་བསྟན་པ་དེ་རྣམས་ཡིན་ཏེ། མར་པའི་བུ་ཆེན་བཞི་ལ་སོགས་པ་ཡང་དེ་ལས་མེད་དོ། །དེ་ཉིད་མིན་བྱ་བ་བྱིན་བརླབས་དང་འབྲེལ་པ། སྙན་རྒྱུད་ཀྱི་གདམས་ངག་བྱ་བ་གཅིག་ཡོད་ཏེ(དེ)། རྗེ་ནཱ་རོ་པའི་ཞལ་ནས། འཁོར་ལོ་སྒྱུར་རྒྱལ་རིན་ཆེན་འཛིན། །རིགས་ལྔ་བྱ་འཕུར་ཆོས་ཉིད་རླུང་། །གསུངས་པས། གདམ་ངག་འདི་ཆིག་རྒྱུད་ཡིན་པས། སངས་རྒྱས་རྡོ་རྗེ་འཆང་དང་། ལོངས་སྐུ་ལུས་མེད་མས་ཀྱང་། ཏེ་ལོ་པ་མིན་པ་ལ་གནང་བ་མེད་ལ། ཏེ་ལོ་པས་ཀྱང་ནཱ་རོ་པ་མིན་པ་གནང་བ་མེད་ལ། ནཱ་རོ་པས་ཀྱང་ང་མིན་པ་ལ་གནང་བ་མེད་ལ། ངས་ཀྱང་སྣོད་ལྡན་གཅིག་ཡུན་རིང་པོར་བཙལ་བ་ཡིན་ཏེ། ཁྱོད་ལས་དྲག་པ་མ་མཐོང་ལ། ངའི་བུ་མདོ་སྡེ་དང་ཁྱོད་གཉིས་རྒྱུད་ཆོད་མཉམ་པོ་ཚོད་དམ། མདོ་སྡེ་ཁྱོད་ལས་ཨེན་ཞན་ནམ་ཙམ་དུ་འདུག་ན་ཡང་། དང་པོ་མདོ་སྡེ་ལ་བྱིན་ལ་དེ་ནས་ཁྱོད་ལ་སྦྱིན་འཇུག་བསམ་པ་ཡིན་ཏེ། གང་ས་ཅི་སྒོ་ལུང་བསྟན་དུ་མ་དང་བཅས་ཁྱོད་དྲག་པར་འདུག་པས། ད་ཁྱོད་
3-3-25a
ལ་སྟེར་བ་ཡིན་པས། ག་ལེ་སྦྱིན་བསམ་པ་ཡིན་ཏེ། ཇོ་མོ་དང་ཁྱེད་མ་སྨད་ཀྱིས་ཏུག་ཏུག་ཟེར་བ་དེས། སྦྱིན་ཨེན་སྔས་ཙམ་ཡིན་ནོ། །གདམས་ངག་སྦྱིན་སྔས་པ་དེས། ཁྱོད་ལ་ལོ་ཁ་ཅིག་གྲུབ་རྟགས་འགྱང་བ་ཅིག་ཡོང་དོགས་ཡོད་དེ། ད་རུང་ལོ་ཁ་ཅིག་ནས་བྱིན་ན་ཕྱིས་གྲུབ་ཐག་ཉེ་བ་ཡིན་ཏེ། ད་ཁྱོད་ཀྱི་མདོ་སྡེ་ལས་སྣོད་དྲག་པ་འདུག་ན་དེ་ལ་བྱིན། དེ་ཡང་བླ་མའི་སྲས་ཡིན་བསམ་ནས་ཞོན་པ་དང་བཅས་པས་བྱིན་ན། ཁྱོད་རང་ལ་ཉེས་པ་ཡོང་བ་ཡིན་ནོ་གསུང་ནས། སྙན་རྒྱུད་ཀྱི་དབང་དང་བྱིན་རླབས་དང་གདམས་ངག་ཐམས་ཅད་རྫོགས་པར་གནང་ནས་རྗེ་ནཱ་རོའི་ཞལ་ནས། རིགས་ལྔ་བྱ་འཕུར་ཆོས་ཉིད་རླུང་། །འཁོར་ལོ་སྒྱུར་རྒྱལ་རིན་ཆེན་འཛིན། །གསུང་ནས། གདམས་ངག་མིང་གི་གྲུལ་གྲུལ་འདྲ་བ་ལྔ་ཡོད་པ་ལ། དེ་གང་རྣམས་ཡིན་ཟེར་ན། རིག་པ་ཡེ་ཤེས་སྒྲོན་མེ་དང་། རྩ་རླུང་དྲ་མིག་འཁོར་ལོ་དང་། རོ་སྙོམས་ཕྱིའི་མེ་ལོང་དང་། རང་གྲོལ་ཕྱག་རྒྱ་ཆེན་པོ་དང་། བདེ་ཆེན་གསུང་གི་རིན་ཆེན་དང་། ལྔ་ཡོད་པ་དེ་དངོས་སུ་མ་གནང་ན་ཡང་། དོན་གྱིས་ཁྱོད་རང་གི་གདམས་ངག་གི་ཁོངས་སུ་ཡོད་གསུང་ནས། དངོས་སུ་མ་གནང་བས། ད་ཁྱོད་ཀྱི་ཤེས་
3-3-25b
རབ་དང་སྙིང་རུས་གཉིས་ཀས་ཡོང་བར་འདུག་པས། ད་རུང་རྗེ་ནཱ་རོ་པའི་སློབ་མ་འདྲ་བ་རྒྱ་གར་ན་ཡོད་སྲིད་པས། ཁྱོད་སོང་ལ་ཆོས་ལྔ་པོ་དེ་སྙེད་དམ་ལྟོས་ལ་ཁྱེར་ཤོག་གསུང་ངོ་། །དེ་དུས་ན་མིད་ལ་རས་ཆེན་དགུང་ལོ་སོ་དགུ་པ་ཡིན་གསུང་། དེར་རྒྱ་གར་དུ་འགྲོ་བར་ཆས་པ་ལ་གསེར་མེད་པས་རེ་ཞིག་མ་ཐོན། དེར་བླ་མའི་བཀའ་གཉན་པར་འདུག་བསམ་ནས། ཡར་གུང་ཐང་དུ་འགྲོ་བར་རྩམས་ཏེ། ཕྱི་ཕྱག་གི་ཚོགས་འཁོར་བག་ཙམ་ཅིག་མཆོད་པར་དྲངས་ནས། དེ་དུས་ན་རྗེ་བཙུན་མར་པའི་དྲུང་དུ་མགུར་འདི་སྐད་ཞུས་པར་འདུག །རྗེ་མི་སྐྱོད་ཀྱི་ངོ་བོ་ཐུགས་རྗེ་ཅན། །སྤྲང་ལན་ཅིག་ཡུལ་དུ་གཏོང་བར་ཞུ། །ཨ་མ་ལུས་ཀྱི་སྒྲོམ་བུ་དེ། །ད་ལྟ་ཞིག་གམ་མ་ཞིག་ལྟ། །སྲིང་མོ་པེ་ཏ་མགོན་སྐྱིད་དེ། །ཁྱོ་གནས་ཅིག་རྙེད་དམ་མ་རྙེད་ལྟ། །ཨ་ཁུ་རིན་རྒྱལ་ཕ་སྤད་རྣམས། །ད་ལྟ་དར་རྒུད་ཅིག་འདུག་ལྟ། །གསུང་རབ་མཆོད་གནས་དཀོན་བརྩེགས་དེ། །ཐིགས་པས་རུལ་ལམ་མ་རུལ་ལྟ། །ཁང་པ་ཀ་བཞི་གདུང་བརྒྱད་དེ། །འཇག་སྐྱས་ཆུད་དམ་མ་ཆུད་ལྟ། །ཕ་ཞིང་འོད་ཟེར་གྲུ་གསུམ་དེ། །ཤོ་རུད་ཀྱིས་ཁྱེར་རམ་མ་ཁྱེར་ལྟ། །ཞང་པོ་དགེ་བཤེས་ཙ་པ་དེ། །ད་ལྟ་སྐུ་ཁམས་བཟང་ངམ་ལྟ། །སྤྱིར་འཁོར་བའི་མཚན་ཉིད་འཇའ་
3-3-26a
སྤྲིན་དེ། །བདེན་རྟགས་འདུག་གམ་མི་འདུག་ལྟ། །ཞུས་པས། རྗེ་མར་པའི་ཞལ་ནས། ལར་སྙིང་ནས་རང་ཆོས་གཤའ་མ་ཅིག་བྱེད་ན། ཕ་ཡུལ་གྱི་ཞེན་པ་གཅོད་དགོས་པ་ཡིན་ནོ། །ད་རེས་ཁྱོད་ནི་ང་རང་གིས་ཡར་གཏོང་བ་ཡིན་ཏེ། འོན་ཀྱང་དེར་དགོང་ངས་རྨི་ལམ་ཅིག་བརྟག་དགོས་གསུང་ནས། དེའི་སྔ་དྲོ་རྗེ་མར་པས། རྣལ་ལམ་བརྟགས་དོན་ཀ་ཆེན་བཞི་མ་ཞེས་བྱ་བའི་མ་འོངས་ལུང་བསྟན་མ་འདི་སྐད་གསུངས་སོ། །རྗེ་དུས་གསུམ་སངས་རྒྱས་ཀྱི་ངོ་བོ་ཉིད། །སྒོ་བསྲུངས་ནཱ་རོའི་ཞབས་ལ་འདུད། །ང་ལྷོ་བྲག་གི་མར་པ་ལོ་ཙ་དེས། །མདང་གསུམ་གཉིད་ཀྱི་རྨི་ལམ་ན། །ཉི་མ་ཤར་དུ་ཀ་ཆེན་ཅིག་བཙུགས་པ་རྨིས། །ཀ་ཐོག་དེར་སེང་ཆེན་ཅིག་འགྱིངས་པ་རྨིས། །སེང་གཡུ་རལ་མཐའ་ནས་རྒྱས་པ་རྨིས། །སེང་གངས་དཀར་གྱི་རྩེ་རུ་མཆོངས་པ་རྨིས། །སེང་རྩལ་གསུམ་ལུས་ལ་རྫོགས་པ་རྨིས། །ཤར་གྱི་རྨི་ལམ་+དེ་+མི་ངན་རྨི་ལམ་བཟང་། །ཉི་མ་ལྷོ་རུ་ཀ་ཆེན་ཅིག་བཙུགས་པ་རྨིས། །ཀ་ཐོག་དེར་རྒྱ་སྟག་ཅིག་ངར་བ་རྨིས། །སྟག་འཛོམ་དྲུག་ཕྱི་རུ་བཀྲ་བ་རྨིས། །སྟག་རྩལ་དྲུག་ནང་ནས་རྫོགས་པ་རྨིས། །སྟག་ཐང་ཤིང་རྒྱུད་ལ་འབྲེལ་བ་རྨིས། །སྟག་ཙན་དན་གྱི་ནགས་ལ་མཆོངས་པ་རྨིས། །
3-3-26b
རྩལ་གསུམ་ལུས་ལ་རྫོགས་པ་རྨིས། །ལྷོ་རྨི་ལམ་མི་ངན་རྨི་ལམ་བཟང་། །ཉི་མ་ནུབ་ཏུ་ཀ་ཆེན་ཅིག་བཙུགས་པ་རྨིས། །ཀ་ཐོག་དེར་ཁྱུང་ཆེན་ཅིག་འགྱིང་བ་རྨིས། །ཁྱུང་བྱ་མིག་དབྲལ་བར་འཛུམ་པ་རྨིས། །ཁྱུང་སྡེར་དཔོན་བཟན་ལ་བཀྲམ་པ་རྨིས། །ཁྱུང་བྱ་སྤུ་གནམ་ལ་གཟིངས་པ་རྨིས། །ཁྱུང་དགུང་སྔོན་གྱི་དབྱིངས་སུ་འཕུར་བ་རྨིས། །ནུབ་རྨི་ལམ་མི་ངན་རྨི་ལམ་བཟང་། །ཉི་མ་བྱང་དུ་ཀ་ཆེན་ཅིག་བཙུགས་པ་རྨིས། །ཀ་ཐོག་དེར་རྒོད་པོ་གཅིག་འགྱིང་བ་རྨིས། །རྒོད་ཚང་བྲག་ལ་བྱས་པ་རྨིས། །རྒོད་ཕྲུག་གི་བར་སྣང་གང་བ་རྨིས། །རྒོད་རྩལ་གསུམ་ལུས་ལ་རྫོགས་པ་རྨིས། །རྒོད་གཤོག་དྲུག་མཐའ་ནས་རྒྱས་པ་རྨིས། །བྱང་རྨི་ལམ་མི་ངན་རྨི་ལམ་བཟང་། །གསུངས་པ་དང་། ཡང་མིད་ལ་རས་པས། རྗེ་བཙུན་ལགས་རྣལ་ལམ་དེའི་བརྡའ་གྲོལ་ཅིག་གསུང་བར་ཞུ་ཞུས་པས། ཡང་རྗེ་མར་པས་འདི་སྐད་གསུངས་སོ། །ཉི་མ་ཤར་དུ་ཀ་ཆེན་བཙུགས་པ་དེ། །དོལ་གྱི་ཚུར་སྟོན་དབང་རྡོར་ཡིན། །ཁོང་མི་གཞི་སེང་གེ་འདྲ་བ་ཡིན། །གཡུ་རལ་མཐའ་ནས་རྒྱས་པ་དེ། །ཟག་མེད་ཀྱི་བདེ་ཆེན་རྒྱས་པ་ཡིན། །གངས་དཀར་གྱི་རྩེ་ལ་མཆོངས་པ་དེ། །སྙན་རྒྱུད་ཀྱི་སྟན་པ་དར་བ་ཡིན། །རྩལ་གསུམ་ལུས་ལ་རྫོགས་པ་དེ། །ཆོས་
3-3-27a
ཉིད་ཟད་པར་སྐྱོལ་བ་ཡིན། །ཉི་མ་ལྷོ་རུ་ཀ་ཆེན་བཙུགས་པ་དེ། །གཞུང་གི་རྔོག་སྟོན་ཆོས་རྡོར་ཡིན། །ཁོ་མི་གཞི་སྟག་དང་འདྲ་བ་ཡིན། །འཛུམ་དྲུག་ཕྱི་རུ་བཀྲ་བ་དེ། །བཤད་རྒྱུད་ཀྱི་བསྟན་པ་དར་བ་ཡིན། །ཁོ་འཛུམ་ནང་དུ་རྒྱས་པ་དེ། །བསྒྲུབ་པ་མཐའ་རུ་སྐྱོལ་བ་ཡིན། །ཐང་ཤིང་རྒྱུད་དུ་འབྲེལ་བ་དེ། །མི་རྒྱུད་དང་ཆོས་རྒྱུད་དར་བ་ཡིན། །ཙན་དན་གྱི་ནགས་ལ་མཆོང་པ་དེ། །ནོར་ཟང་ཟིང་ལ་འཛིན་ཆགས་མེད་པ་ཡིན། །ཉི་མ་ནུབ་ཏུ་ཀ་ཆེན་བཙུགས་པ་དེ། །གཙང་རོང་གི་མེ་སྟོན་ཚོན་པོ་ཡིན། །ཁོང་མི་གཞི་ཁྱུང་དང་འདྲ་བ་ཡིན། །བྱ་མིག་དཔྲལ་བར་འཛུམ་པ་དེ། །བསྲེ་འཕོའི་བསྟན་པ་དར་བ་ཡིན། །བྱ་སྤུ་གནམ་ལ་གཟིང་བ་དེ། །སྲོག་རྩོལ་དབུ་མར་ཆུད་པ་ཡིན། །སྡེར་སོན་(སེན་)བཟན་ལ་བཀྲམ་པ་དེ། །འཁོར་བ་ལ་ཕྱི་ཕྱག་བྱེད་པ་ཡིན། །དགུང་སྔོན་གྱི་དབྱིངས་སུ་འཕུར་བ་དེ། །ཚེ་གཅིག་ལ་སངས་ཆུང་རྒྱ་བ་ཡིན། །ཉི་མ་བྱང་དུ་ཀ་ཆེན་བཙུགས་པ་དེ། །གུང་ཐང་གི་མིད་ལ་རས་པ་ཡིན། །ཁྱོད་མི་གཞི་རྒོད་དང་འདྲ་བ་ཡིན། །རྒོད་ཚང་བྲལ་ལ་བྱས་པ་དེ། །ཚེ་ཚད་མཐའ་རུ་སྐྱོལ་བ་ཡིན། །བུ་འགྲན་གྱི་དོ་མེད་ཅིག་ཡོང་བ་ཡིན། །རྒོད་ཕྲུག་གི་བར་སྣང་གང་བ་དེ། །བསྒྲུབ་(སྒྲུབ་)རྒྱུད་ཀྱི་བསྟན་པ་དར་བ་ཡིན། །བྱང་རྨི་ལམ་
3-3-27b
མི་ངན་རྨི་ལམ་བཟང་། །རྗེ་མར་པས་དེ་སྐད་གསུངས་པ་དང་། དེ་ནས་བླ་མ་རྔོག་ལ་ཕྱི་ཕྱག་ལ་བྱོན་པ་དང་། ཇོ་མོ་ན་རེ་རྒྱགས་ནི་ངེད་ཀྱིས་སྟེར། ཆོས་ནི་ཁྱོད་རང་གིས་བྱེད་ལ། ཁྱོད་འདིར་ཡོད་ན་ངེད་ཀྱང་ཁ་དྲག་པ་ལ་ཕན་པ་འདུག་ཟེར་བ་དང་། བློ་འགྱུར་ནས་འོ་ན་རྗེ་བཙུན་གྱི་དྲུང་དུ་ཞལ་ཏ་ཅིག་ཞུར་འགྲོ་བ་དང་། དེ་བཞིན་བྱེད་དགོས་བསམ་ནས་བསྡད་པས། བླ་མ་རྔོག་ཡང་མཉེས་ནས་འདུག་ལ། འཚོ་བ་ཡང་བླ་བར་བྱུང་བས། མི་རྣམས་མོས་ནས་བློ་ཕབ་ནས་བསྡད། ཡར་ཕྱི་བ་ཅིག་འགྲོའི་བསམ་ཙ་ན། ཡར་འགྲོ་དགོས་པའི་རྒྱུ་མཚན་ནི། མཁའ་འགྲོ་མའི་ལུང་བསྟན་ལ་སྟེན་པ་ནི་འོག་ན་གསལ། རྔོག་གི་ཇོ་མོ་ལ་རྗེ་མར་པས་རྒྱ་གར་དུ་སོང་གསུང་བས་མི་སྡོད་བྱས་ནས་ཕྱི་ཕྱག་གི་ཚོགས་འཁོར་གཅིག་བྱས་ནས། ཚུར་རེས་གཉན་སྟོན་དང་རྟ་ནག་གི་བོན་པོ་གཉིས་ནི་གྲོངས་ཚར་གདའ། ཤུལ་མ་རྣམས་ལ་འབུལ་བ་རེ་བྱས་ནས་མིད་ལས་བཤུམས་པས་ཐམས་ཅད་ཡིད་རང་ཟེར། དེ་ནས་ལ་སྟོད་ནས་ཡར་གུང་ཐང་དུ་སླེབ་ནས་རྒྱ་གར་དུ་འགྲོ་འདོད་པ་ལ་གསེར་མེད་པས་རེ་ཞིག་མ་ཐོན། དེར་ཡང་ཡུལ་གྱི་ཞེན་པ་ལེགས་པར་ཆོད་ནས་ཡོད་པ་ལ། ལྷོ་བྲག་དུ་(ཏུ་)མཁའ་འགྲོ་མས་ལུང་བསྟན་བྱུང་བ་ནི། བསྒྲུབ་པ་བྱེད་པ་
3-3-28a
ལ་མི་དང་འདྲིས་ཆོད་དགོས་པས་གཞན་གང་དུ་ཡང་བསྙེན་བསྐུར་ལ་མི་ཐར་བས། རང་ཡུལ་དུ་སོང་ཅིག་དང་། དེར་ཁྱོད་ལ་མི་རྣམས་དད་པ་ལོག་ནས་ཡོད་པས། བསྙེན་བསྐུར་མི་ཡོང་བས་རིག་པ་དངས་པ་དང་། སྐུར་འདེབས་མང་བས་སྒྲིབ་པ་ཟད་པ་སྐྱེན་ཟེར་བས། མཁའ་འགྲོ་མའི་བྱིན་རླབས་འཇུག་གྲུབ་ཐག་ཉེ་ཟེར་ནས། རས་དཀར་པོ་ཡུག་ཅིག་ཡར་རྐྱང་སོང་།
༄། །གཉིས་པ། ཆོས་ཕྱིར་དཀའ་བ་སྤྱད་པའི་ཡོན་ཏན་ནམ། ཏིང་ངེ་འཛིན་དང་འབྲེལ་བ་ཉམས་སུ་མྱོང་བའི་ཡོན་ཏན།
དང་པོ་ཏིང་ངེ་འཛིན་དང་འབྲེལ་བ་ཉམས་སུ་མྱོང་བའི་ཡོན་ཏན་ལ། བླ་མ་གོང་མ་རྣམས་ཀྱིས་བཅོ་བརྒྱད་ལ་སོགས་པ་དུ་མ་རྣམས་མཛད་ནས་འདུག་པ་ལ། ཁོ་བོ་ཞི་བྱེད་རི་ཁྲོད་པས། བརྒྱ་དང་ཉི་ཤུ་རྩ་བདུན་གྱི་དོན་བསྟན་པ་ཡིན་ལ།
༈ དང་པོ། འཁོར་བ་ལ་སྙིང་པོ་མེད་པར་གཟིགས་པའི་ཡོན་ཏན།
དེ་ཡང་དང་པོ་འཁོར་བ་ལ་སྙིང་པོ་མེད་པར་གཟིགས་པའི་ཡོན་ཏན་ནི། ཁོ་རང་གི་ཡུལ་གུང་ཐང་རྒྱལ་ལྔ་ཡུལ་གྱི་རྩ་མཁར་སྒོ་ཐང་ན་བྱོན་པས། སྔར་གྱི་སྒན་(རྒན་)པ་ཐམས་ཅད་ནི་ཤི། གཞོན་པ་ཐམས་ཅད་ནི་ཆེན་པོར་སོང་ནས་ངོ་མི་ཤེས་སུ་སོང་འདུག་ལ། མ་ནི་སྔ་མོ་ནས་ཤི། སྲིང་མོ་ནི་སྤྲང་བ་ལ་སོང་ནས་མི་འདུག་པས། སྔར་གྱི་སློབ་དཔོན་རྙིང་མ་བན་དྷེ་དང་མཇལ་ནས། ཕྱག་འཚལ་བས་ཡུག་ནི་ངོ་མ་ཤེས། དེ་ནས་ཞལ་ལ་སྨེ་བ་ཡོད་པ་དང་། དང་པོ་ཕ་སྤུན་རྣམས་ཀྱི་བརྡུངས་ནས་
3-3-28b
མགོ་བཅག་པའི་རྨ་སྒྲོ་ཡོད་པ་དང་། སོ་བཅག་པའི་སོ་ཚབ་ཡོད་པ་རྣམས་མཐོང་ནས། སིངས་པོ་ལ་སོགས་པ་ཟ་རྒྱུ་བྱིན་ནས་དོ་རེ་འདིར་ཉོལ་གསུང་བ་ལ། ཁོང་རང་གི་ཁང་པར་ཕྱིན་པས་ཐོག་ཀུན་རྡིབས་རྩྭ་སྐྱ་སྐྱེས། གསུང་རབ་དཀོན་བརྩེགས་ཡོད་པ་ཡང་མིད་ལའི་འདྲེ་ཡོད་ཟེར་ནས། ཁོང་རང་གི་བང་བར་སྐྱལ་ནས་ཐིགས་པས་རུལ། ཞིང་ལ་རྩྭ་སྐྱ་ཕུང་པོར་སོང་འདུག །ལ་ལ་ན་རེ་དེ་དུས་ན་མ་ཡོད་ཟེར་དེ་མི་བདེན་ནོ། །མ་ཁོང་ས་ཡར་ལུངས་དང་རྟ་ནག་ན་བཞུགས་དུས་ན་ཤི་གསུང་ངོ་། །དེ་ནས་སྤྱིར་འཁོར་བའི་ཆོས་ལ་སྙིང་པོ་མེད་ཅིང་དགོས་མིད་ལའི་འཁོར་བ་ལ་སྙིང་པོ་མེད་པར་དགོངས་ནས། མགུར་གསུངས་པ། ཀྱེ་མ་སྔོན་ནོར་ཡོད་ཙ་ན་མི་ཡང་མེད། །ད་མི་ཡོད་ཙ་ན་ནོར་ཡང་མེད། །སྔོན་མ་ཡོད་ཙ་ན་བུ་ཡང་མེད། །ད་བུ་ཡོད་ཙ་ན་མ་ཡང་མེད། །སྔོན་ཁུ་བོ་ཡོད་དུས་ཚ་བོ་མེད། །ད་ཚ་བོ་ཡོད་དུས་ཁུ་བོ་མེད། །ལར་གཉིས་ཀ་འཛོམ་ཡང་སྙིང་པོ་མེད། །ཐམས་ཅད་འཛོམས་(འཛོམ་)ཡང་སྙིང་པོ་མེད། །སྤྱིར་འཁོར་བའི་ཆོས་ལ་སྙིང་པོ་མེད། །དགོས་མིད་ལའི་འཁོར་བ་ལ་སྙིང་པོ་མེད། །སྙིང་པོ་མེད་པའི་དུས་འདི་རུ། །རྣལ་འབྱོར་སྙིང་པོ་ཅིས་མི་བཙལ། །ཅེས་གསུངས་སོ། །ཨ་ནེ་ཅིག་ཁང་གོག་གི་ཟུར་ན་
3-3-29a
བསྡད་ནས་འདུག་པའི་རྩར་བྱོན་ནས། ང་ཐོས་པ་དགའ་ཡིན་བྱས་པས། མི་ཤི་བ་ཀུན་ལ་ཡོང་། སྙིང་ཚིམ་མ་སྒྲུབ། སྡུག་པ་སྡུག་ཆུག་ཟེར། དེ་ནས་ཡུག་ཅིག་ནས་ངོ་ཤེས་ནས་གཉིས་ཀས་ངུས་ཤིང་། ཁྱིམ་མཚེས་གཅིག་ལ་ཡུ་བླ་ནས་ཕུལ་དོད་བླངས་ནས་ཟོས་གསུང་། ལ་ལ་ན་རེ་དེ་དུས་ན་པེ་ཏ་ཡང་འདུག་ཟེར་ཏེ་མི་བདེན། ཀུ་ཐང་དུ་སྤྲང་བ་ལ་སོང་འདུག་གསུང་།
༈ གཉིས་པ། ཏིང་འཛིན་ཤར་བའི་ཡོན་ཏན།
གཉིས་-པ་-ཏིང་འཛིན་ཤར་བའི་ཡོན་ཏན་ནི། སློབ་དཔོན་དེ་ན་རེ་ད་ཁྱོད་མཐུ་ཅན་དུ་གྲགས་པས་ཁྱོད་ཀྱི་ཞིང་ལ་སུས་ཀྱང་རེག་མ་ཕོད་པར་ཡོད། ཁུ་བོའི་གཞིས་ཕས་ཆོད་ཉ་ར་བྱས་པས་ཆོག་པ་ཡོད་གསུང་བ་ལ་མི་ལས་མགུར་གསུངས་པ། ཕུ་སྟོང་ཉིད་ཀྱི་ལུང་པ་ཡངས་དང་གཅིག །མདའ་གནད་ཀྱི་ས་འཕྲང་དམ་དང་གཉིས། །བར་ཉམས་མྱོང་གི་རྩི་ཐོག་རྒྱས་དང་གསུམ། །ང་རྣལ་འབྱོར་གྱི་ཕ་ཡུལ་དེ་ལ་ཉན། །ཚུལ་ཁྲིམས་ཀྱི་རྩ་བ་བརྟན་དང་གཅིག །ལྟ་བའི་བྱ་རྐང་བཟང་དང་གཉིས། །ཡོན་ཏན་གྱི་བ་གམ་མཐོ་དང་གསུམ། །ང་རྣལ་འབྱོར་གྱི་ཕ་ཝང་དེ་ལ་ཉན། །དད་པའི་ཞིང་ས་གཤིན་དང་གཅིག །བརྩོན་འགྲུས་ཀྱི་ཆུ་ལུད་འཛོམས་དང་གཉིས། །དགེ་སྦྱོར་གྱི་རྨོ་རྒོ་ལེགས་དང་གསུམ། །ང་རྣལ་འབྱོར་གྱི་ཕ་ཞིང་
3-3-29b
དེ་ལ་ཉན། །བཀའ་བརྒྱུད་ཀྱི་ཆོ་རིས་བཟང་དང་གཅིག །སྙན་རྒྱུད་ཀྱི་ནོར་ཐང་ཆེ་དང་གཉིས། །གདམ་ངག་གི་བསྲི་སོགས་མཁས་དང་གསུམ། །ང་རྣལ་འབྱོར་གྱི་ཆུང་མ་དེ་ལ་ཉན། །ཞེན་ལོག་གི་མིག་རྩ་དྲུང་དང་གཅིག །ཉམས་མྱོང་གི་ཕར་བསྐྱེད་ཆེ་དང་གཉིས། །དོན་གཉིས་ཀྱི་རྒྱལ་ས་ཟིན་དང་གསུམ། །ང་རྣལ་འབྱོར་གྱི་བུ་ཚ་དེ་ལ་ཉན། །གསུངས་ནས་ཞིང་བྱིན་སོ་སློབ་དཔོན་དེ་ལ་ཕུལ། ཞིང་དྲག་པ་ཅིག་ཨ་ནེ་དེ་ལ་གཏད་ནས་རྒྱགས་སྐྱེལ་བར་བྱས་ནས་དབྱར་དེ་ཁོ་རང་གི་ཡུལ་གྱི་ཕུ་ན་བྲག་ནག་བྱ་བ་ལ་བསྒོམ་པས། རྨི་ལམ་ན་ཐ་བ་སྲ་སེ་བ་ཅིག་ལ་ཆུ་བཅུས་ནས་སྨོས་པས་མ་ཕེད་པ་རྨིས་པས། འབར་པ་དང་སྙིང་རུས་བསྐྱེད་དགོས་པའི་བདར་གོ་ནས། མགུར་གསུངས་པ། མཉམ་པ་ཉིད་ཀྱི་ས་གཞི་ལ། །དད་པ་སྔོན་འགྲོའི་ཆུ་བླུགས་ནས། །བདུད་རྩི་ལྔའི་རླན་གྱིས་སྦངས། །འཁྲུལ་རྟོག་མེད་པའི་ས་བོན་བཏབ། །གཉིས་མེད་གླང་ཆེན་ཟུང་སྡེབས་ནས། །ཐབས་དང་ཤེས་རབ་མཐོང་ཤོལ་རྟགས། །བློ་དང་ལྡན་པའི་ཐོང་མཁན་གྱིས། །བརྩོན་འགྲུས་མྱུར་བའི་ལྕག་གིས་གཞུར། །ཐ་བ་སྲ་ཡང་ཕེད་དེ་མཆི། །འབྲས་བུ་དུས་སུ་སྨིན་ཏེ་མཆི། །ཞིང་པའི་དཔེ་དང་སྦྱར་བ་འདི། །རྣལ་འབྱོར་པ་ཡི་རྨི་ལམ་ལགས། །
3-3-30a
ཚིག་ཙམ་དོན་ལ་སྐྱེས་པ་མེད། །སླད་ཀྱི་བྱང་ཆུབ་སྒྲུབ་པ་རྣམས། །ཉམས་སུ་ལེན་ནས་དེ་བཞིན་མཛོད། །གསུངས་ཏེ། དེ་ནས་རྐང་རྩེན་ཕུག་ཏུ་ཟླ་བ་གསུམ་བཞུགས། རྩེ་གསུམ་ཕུག་ཏུ་ཟླ་བ་གསུམ་བཞུགས་པས། སྔར་རྗེ་མར་པས་སྒོམ་ཆེན་པ་མལ་ཅིག་ན་ཡུན་རིང་ན་སྐྱེ་རུའི་ཡོན་ཏན་མི་སྐྱེ་བར་མ་སྐྱེས་ན་རུང་བའི་འཛིན་ཆགས་སྐྱེ་གསུང་པ་དེ་དྲན་ནས། ད་ཡང་གར་ཤེད་འགྲོ་དགོས་བསམ་ཙ་ན། ཨ་ནེ་དང་སྲིང་མོ་གཉིས་ཀྱིས་ཆང་ཅིག་ཁྱེར་ནས་བྱུང་བ་དེ་འཐུངས་པས། ཁོང་གཉིས་ན་རེ་ད་མི་རབས་འཆད་དུ་མ་བཅུག་པར། རང་ཡུལ་དུ་སྡོད་ལ་ཁྱིམ་ཐབ་གྱིས་ཟེར་བ་ལ། མགུར་གསུངས་པ། ཕ་ཡུལ་འདི་དང་པོ་རྟ་རྒོད་ཀྱི་ཤུལ་ཐོག་འདྲ། །བར་དུ་གཤའ་ལུག་གི་ར་བ་ཡིན། །ཐ་མ་དུག་སྦྲུལ་གྱི་ཤུན་ལྤགས་འདྲ། །ང་ཡུལ་མེད་ཀྱི་རྣལ་འབྱོར་བློ་རེ་བདེ། །བློ་བདེ་བས་སྤྲང་པོ་ཉམ་རེ་དགའ། །ཉམས་དགའ་བ་བླ་མའི་བཀའ་དྲིན་ཡིན། །ནོར་འདི་དང་པོ་འཆི་མེད་ཀྱི་བདུད་རྩི་འདྲ། །བར་དུ་སྦྲང་མའི་སྦྲང་རྩི་འདྲ། །ཐ་མར་སྲིན་པོའི་ཁ་ཆུ་འདྲ། །ང་ནོར་མེད་ཀྱི་སྤྲང་པོ་བློ་རེ་བདེ། །བློ་བདེ་བས་རྣལ་འབྱོར་ཉམས་རེ་དགའ། །ཉམས་དགའ་བ་བླ་མའི་སྐུ་དྲིན་ཡིན། །བག་མ་འདི་དང་པོ་ལྷ་
3-3-30b
མོའི་འཛུམ་ཤེས་མ། །བར་དུ་སྲིན་མོ་རག་ཤ་གདོང་། །ཐ་མར་བ་རྒན་འཁྱོག་མེད་མ། །ང་བག་མ་མེད་པའི་རྣལ་འབྱོར་བློ་རེ་བདེ། །བློ་བདེ་བས་སྤྲང་པོ་ཉམས་རེ་དགའ། །ཉམས་དགའ་བ་བླ་མའི་བཀའ་དྲིན་ཡིན། །བུ་འདི་ཆུང་ཚེ་ནོར་བུ་རིན་པོ་ཆེ། །བར་དུ་བུ་ལོན་སྟོས་དྲག་པོ། །ཐ་མར་ཁྱིམ་ཚེས་(མཚེས་)སྙིང་རིང་བོད། །ང་བུ་མེད་ཀྱི་རྣལ་འབྱོར་བློ་རེ་བདེ། །བློ་བདེ་བས་སྤྲང་པོ་ཉམས་རེ་དགའ། །ཉམས་དགའ་བ་བླ་མའི་བཀའ་དྲིན་ཡིན། །ཅེས་གསུངས་སོ།། །།
༈ གསུམ་པ། དཀའ་བས་གཏུམ་མོ་བདེ་དྲོད་འཕྲོད་པའི་ཡོན་ཏན།
གསུམ་པ་དཀའ་བས་གཏུམ་མོ་བདེ་དྲོད་འཕྲོད་པའི་ཡོན་ཏན་ནི། ཨ་ནེ་ལ་མི་རྣམས་ཀྱིས་མིང་པོ་ནས་དེ་མཁན་གྱི་རྒྱགས་སྐྱེལ་བ་བྱས་པས། དགུན་སྨད་དུ་སོང་བ་དང་ནས་ཞོ་ཅིག་ཁྱེར་བྱུང་ནས། སྤྲང་པོ་ཁྱོད་ཀྱི་ཞིང་རིན་འདིས་ཁོར་(འཁོར་)རོ་ཟེར་ནས་སོང་བ་དང་། དེ་སྔོན་ཐག་བྱས་སློབ་དཔོན་དེས་ཙམ་(རྩམ་)པ་དུམ་ཅིག་དང་། མར་དུམ་ཅིག་བྱིན་པ་དང་། མཛེ་པོ་སྤྲང་རྒན་གཅིག་ཤི་བའི་ཐུལ་རུལ་ཅིག་གོན་ནས་བྲག་དཀར་སྤོ་ན་ཡར་ཕྱིན་པས། གྲོ་ཆེན་གྲོ་ཆུང་ཟེར་བའི་མི་ངན་གཉིས་བྱུང་ནས། སྒོམ་ཆེན་བྱ་བ་ས་ཀར་ལ་ས་འདྲ་བ་ལ་ཟེར་བ་ཡིན། ཁྱོད་འདྲ་བ་ལ་སྒོམ་ནི་མེད་ངེས། གཞི་མལ་ཅིག་ན་སྡོད་ནི་མི་ཚུགས་ཟེར་ནས་ཙམ་(རྩམ་)པ་དང་མར་ཕྲོགས་པ་དང་། མིད་ལ་
3-3-31a
ན་རེ་ཁོང་མི་གཞན་གྱིས་ནི་སྒོམ་ཆེན་པ་ལ་འབུལ་འདེགས་བྱེད་པ་ཡང་ཡོད་པ་ལ། ཁྱེད་གཉིས་ཀྱིས་ང་ལ་འཕྲོག་པ་ཞན་གསུངས་པས། ལེན་འདེགས་དགོས་ཟེར་ནས། རྗེ་བཙུན་གྱི་སྐུ་ལུས་བཏེག་ཅིང་ས་ལ་བརྡབས་པས་དོ་གསད་གསུང་། དེ་ཇོ་བོས་གསན་ནས་གྲོ་ཆེན་གྱི་མིག་བཏོན། གྲོ་ཆུང་བྲོས་པར་གཡང་ལ་འདྲིལ་ནས་ཤི་བ་ལ། རྗེ་བཙུན་ན་རེ་ངས་ནི་ཅི་ཡང་མ་བྱས་ཏེ། ཆོས་སྐྱོང་གི་བཀའ་ཆད་ཡིན་ནམ་གསུང་། ལ་ལ་ན་རེ་གྲོ་ཆེན་ལོང་བ་ཆོས་སྒོར་ཞུགས་ནས། དུས་ཕྱིས་རྗེ་བཙུན་ལ་དུག་དྲངས་མཁན་གྱི་དམུ་ལོང་བཙག་ཕུག་པ་ཡིན་ནམ་ཟེར་ཏེ། དེ་ལ་ཐེ་ཚོམ་ཟ་སྟེ། དེའི་བར་ལོ་གྲངས་ཀྱང་སུམ་ཅུ་སོ་ལྔ་ཙམ་སོང་འདུག་པ་དང་། གྲོ་ཆེན་ནི་རྗེ་བཙུན་རྐྱང་འཕན་ནམ་མཁའ་རྫོང་ན་བཞུགས་དུས་ཞབས་ལ་གཏུགས་ཏེ། སྒོམ་བཟང་པོ་སྐྱེས་ནས་ཡོད་ཟེར་ལ། རྩག་ཕུག་པའི་མིག་ནི་ཕ་དྲུག་གི་ཇོ་བོས་བཏོན་པ་ཡིན་ཅིང་། དང་པོ་རང་ནས་མཁན་རྒྱུད་ཡིན་ལ། རྗེ་ཁྱུང་ཚང་བ་དང་། ལྔ་རིག་ཤེས་བྱའི་གནས་ལ་མ་རྨོངས་པ་ཆོས་རྗེ་ལོ་ཚ་(ཙཱ་)བའི་ཞལ་གསལ་ཡང་མི་འདུག་ལ། འདི་རང་མི་འཐད་ལ་འོན་ཀྱང་མཁས་གྲུབ་རྣམས་ཀྱིས་ལེགས་པར་བརྟགས་པར་ཞུ། ང་ཞི་བྱེད་རི་བྱེད་པས་ནི་མིན་པར་བྱེད་དོ། །
3-3-31b
དེ་ནས་བྲག་དཀར་དུ་རྡོ་ཡིས་སྐྱོར་བའི་མལ་ཆུང་གཅིག་རྩས་བཀང་ནས་དེར་རོ་སྨད་བཅུག་སྟེ། རོ་སྟོད་ལ་རློག་རུལ་དེ་བཀབ་ནས། སྟོད་ཟད་པ་དང་སྨད་ནས་བཅད་ཅིང་སྟོད་ལ་རླན་པ་གཅིག་གོན་ནས་ཟའི་ཚོད་མ་ལ་ཐལ་བ་བཏབ་ནས་གསོལ་ཞིང་བརྩོན་འགྲུས་དང་། སྙིང་རུས་བསྐྱེད་ནས་བསྒོམས་པས། ལུས་ཀྱི་ཟུངས་ལེགས་པར་ཟད་ལ། ལག་པའི་རྐང་ཐུར་བྱེ་ནས་ཡོད་ཙ་ན། ཉིན་གཅིག་སྒྲོ་འཐུ་མཁན་བྱུང་པ་ལ་ཞུངས་བསྟན་པས། རྩམ་པ་བག་ཙམ་ཅིག་བྱིན་ནས་ཡོན་བདག་བྱེད་པར་ཁས་བླངས་པ་ལ། ཡང་མི་ལ་ལས་དེ་མལ་གཅིག་ཏུ་སྡོད་ཀྱང་མི་ཚུགས་པ་ཅིག་འདུག་པས། དེ་ལ་སྒོམ་ནི་མེད་ཟེར་བས། སྒོམ་ཆེན་པ་བྱ་བ་ས་དཀར་པ་ལ་འདྲ་བ་ལ་ཟེར་བ་ཡིན། དགོན་པར་སྡད་ཆང་གཙག་སྙལ་སླང་གསུམ་རྒྱུན་མི་འཆད། ཡོན་བདག་ཕོ་མོ་འདུ་ཟེར་བས། ཁོ་བློ་འགྱུར་ནས་ཡོང་མ་ཉན། དུས་ཕྱིས་འགྱོད་པ་དང་བཅས་ནས་བཤགས་པ་བྱས་ཟེར་ཏེ། དེ་ནི་རག་མའི་སྐུ་རིམས་ལྷ་འབར་ཡིན་གསུང་། འོ་ནན་ལྟར་རྒྱལ་བ། ཟ་ཚ་མེད་སྡོར་མེད། རྫ་ཆུང་རུགས་པའི་དང་། དགེ་བཤེས་བཀའ་གདམས་པ་ལ་རྫ་མ་གཡར་བའི་གཏམ་རྒྱུད་ཀྱང་ཡོད་དོ། །དེའི་དུས་སུ་དགུང་ལོ་བཞི་ཅུ་པ་ཡིན་གསུང་། ཡང་ཉིན་གཅིག་
3-3-32a
སྐད་ཅིག་གྲག་ནས་ལྟས་པས། ཁྱི་ར་བ་འདུག་པའི་རྩར་བྱོན་པས། ཁྱོད་མི་རྒོད་ཡིན་ནམ་མི་གཞུང་མ་ཡིན་ནམ་ཅི་ཡིན་ཟེར། མི་རང་ཡིན་ཏེ་བཟའ་རྒྱུ་མ་རྙེད་ནས་འདི་འདྲར་སོང་བ་ཡིན། ང་མིད་ལ་ཤེར་རྒྱལ་གྱི་བུ་ཡིན་པ་ལ། ཁུ་བོ་ཕ་བུ་རྣམས་ཀྱིས་སྡང་པོ་བྱས། དེར་ངས་ཀྱང་སྡིག་པ་མང་རབ་བསགས་པས། ད་ནི་སྐྱེ་ཤིས་འཇིགས་པས་ཆོས་བྱས་པ་ཡིན་བྱས་པས། དེ་རྣམས་ཐོས། དང་པོ་རང་ཁུ་བོ་མི་བདེན་ཏེ་རིང་ནས་ཁྱོད་ཀྱང་དེ་ཙམ་རང་གྲགས་ཙམ་ཡིན། འོ་ན་ཡང་ད་ངོ་མཚར་ཆེ་ཟེར་ནས། ཤ་དང་ཙམ་(རྩམ་)པ་བྱིན་ནས་ཡོན་བདག་བྱེད་པར་ཁས་བླངས་གསུང་། དེས་ཞག་ཁ་གཅིག་འབོལ་སོང་གསུངས། ཕྱིས་ནི་རྗེད་པ་ཡིན་ནམ་ཡོང་རྒྱུ་མ་བྱུང་། མི་གཞན་གྱིས་བསྒྱུར་བ་ཡིན་ནམ་གསུང་། དེ་ནས་སྲིང་མོ་པེ་ཏ་རྒྱལ་ཁམས་སུ་སྤྲང་དུ་སོང་བས་ཀྱང་། མིང་པོ་བྲག་དཀར་ན་འདུག་ཟེར་བ་ཐོས་ནས་མོས་ལྟ་རུ་ཡོངས་(ཡོང་)པ་དང་། མིང་པོ་རིད་པར་སོང་བས་ངོ་མ་ཤེས་ནས། ཕུག་པའི་སྒོ་རྩར་ཁོར་ཁོར་སྡད་པས། མིད་ལས་ཁྱོད་སུ་ཡིན་ཅི་འདོད་གསུངས་པས། སྐད་ངོ་ཤེས་ནས་ངུ་ཡིན་དེ་ནུབ་བསྡད་ནས་སླ་བོ་འདྲ་བྱས། གཞན་ནི་ཅི་ཡང་མེད་ཟ་ཐུག་བླུད་པས་ནི་མོས་མ་འདོད་ནས། ནང་པར་
3-3-32b
ཡང་ངུ་ཡིན་སོང་བ་ལ། ཡང་ཞག་ཁ་ཅིག་ཙམ་ནས་སྤྲང་ཟན་དང་གཏོར་ཟན་ཟོ་བ་གང་རྙེད་ནས་ཁྱེར་བྱུང་བ་ཟོས་ལ། དེ་ནས་ཀྱང་སྤྲང་ཟན་ཡང་ཡང་བསྐྱལ་བྱུང་གསུང་། ཉིན་ཞིག་ནི། ཉ་མ་ཁ་ཅིག་གིས་རྩམ་པ་དང་ཟ་རྒྱུ་འདྲ་ཁྱེར་བྱུང་ནས། ཞལ་ལྟ་བ་ཡིན་པས་ཕུག་སྒོ་འདིར་བྱོན་དང་ཟེར་བ་ལ། གོས་ངན་གྱིས་ཕྱི་ཧྲུལ། ཟས་ངན་གྱིས་ནང་ཧྲུལ། དེར་ཡོངས་ཀྱང་སྐྱུག་ལོག་པ་ལས་ལྟ་རིན་ཆོག་པ་མེད། དེ་ཀ་ནས་མཐོང་བ་དེ་ཡིན་བྱས་པས། སྐྱབས་སུ་མཆི་བ་སྐད་ཟེར་ནས་སོང་གསུང་། ཡང་ཉིན་གཅིག་ཀློང་འདར་འབྲོག་པ་ཁ་གཅིག་བྱུང་བ་ལ་སློང་དུ་ཕྱིན་པས། སྔར་གྱི་ཨ་ནེ་དེར་འདུག་ནས་སྦྲའི་ཚུགས་ཤིང་ཅིག་ཁྱེར་བྱུང་ནས། སྤྲང་པོ་བླ་འཚོང་ངོ་ཁྱོད་འདིར་ཤོག་ཅིག་ཟེར་ནས་དེད་པ་ལ། བྲོས་ནས་ཕྱིན་པས་སྐྲད་དུག་རྡོ་ལ་འཐོག་ནས་འགྱེལ་བས། ཡུན་རིང་རབ་ཅིག་དྲན་མེད་དུ་སོང་གསུང་། ཡང་ལན་གཅིག་པེ་ཏས་ཞག་ཉི་ཤུ་ཙམ་ལྡང་བའི་ཟ་རྒྱུ་རྙེད་ནས་བྱུང་སྟེ། མོ་ན་རེ་ཁོང་མི་གཞན་གྱི་ཆོས་ལུགས་ནི་ལུས་བདེ་ལ་སེམས་ཀྱང་བདེ་བ་ཅིག་ཡོང་གིན་འདུག་པ་ལ། མིང་པོའི་ཕུང་ཆོས་སྡུག་ཆོས་འདི་འདྲ་ཅིག་ཡོང་བ་ཨང་། ལུས་མནར་སེམས་མནར་བའི་ཕུང་ཆོས་གཅིག་ཟེར་ནས་ངུ་ཡིན་སོང་། དེར་མི་ལའི་ཐུགས་
3-3-33a
དགོངས་ལ། མོ་ཡང་བདེན་ཏེ་ཆོས་ཀྱི་དག་མ་དག་ལེན་ཏེ། ང་རང་སྙིང་རུས་ཆུང་བས་ལན་པ་ཡིན་བསམ་ནས། དེའི་དུས་ནས་མཁའ་འགྲོ་མས་སྐུ་མཉེ་བྱས། གནད་ཀྱི་འཁྲུལ་འཁོར་ཉི་ཤུ་པ་སླབས། ཙོག་བུའི་ལུས་ཀྱི་བདེ་བ་སྔོས་མེད་རྩལ། རྒྱ་མདུད་འཆིང་གི་ངོག་གི་སྟེང་རླུང་གི་བདེ་བ་རྩལ། སྦྲུལ་མདུད་ཀྱི་ལྷོད་ཀྱིས་ལུས་ཆ་མཉམ་གྱི་བདེ་བ་རྩལ། དོན་ལ་ཤི་མ་ཤི་མེད་པར་སྒོམ་པས། ཕྱི་ནང་གི་རྩ་རླུང་ཐམས་ཅད་ལེགས་པར་འཁྲུགས་ནས། ཤི་རྟགས་རྣམས་ཚང་ནས་ཤི་བར་ཐག་ཆོད་པ་ལ། ཡར་ཚེས་བདུན་གྱི་ཉི་མ་དམར་ཐག་ཨེན་མ་ཆོད་པ་དེ་ལ། པེ་ཏས་གཏོར་ཟན་ཟོ་བ་གང་རྙེད་ནས་སླེབ་པས། གཏོར་ཟན་ལ་ཆང་འདྲེས་པས། གཏོར་ཤ་དང་གཏོར་མར་དང་དེ་རྣམས་གསོལ་བས། རླུང་ཁམས་ནོན་པས། རྩ་རླུང་རང་སར་རྙེད་ནས་སོང་གསུང་ངོ་། །ཨ་ལ་ལ་པེ་ཏ་མགོན་སྐྱིད་བྱ་བའི་སེམས་ཅན་ལ་སྐུ་དྲིན་ཅན་ཅིག་བྱོན་འདུག་གོ། །དེ་ནས་ཞག་བཅུ་གཅིག་ནས་བདེ་བ་རང་འབར་ལ་སོང་ནས། ཟས་དགོས་མི་དགོས་པའི་ཏིང་ངེ་འཛིན་ལ་སོང་སྟེ། སྔར་གྱི་མལ་ནས་ཐོན་ཏེ། བྲག་དཀར་རྟ་སོ་དབུ་མའི་ནུབ་ངོས་ཀྱི་སྒང་ཟུར་དེར་རློག་གོས་དེ་སྐྱུར་ནས་བཞུགས་པས་ན། བླ་མ་མིད་ལ་རས་
3-3-33b
ཆེན་གྱིས། མ་མྱང་ཟ་དཀར་ལེགས་ཀྱི་ཆུ་ལམ་ནས་བྱོན་ནས། ཞག་གཅིག་རྩིས་གཉིས་རྩིས་བགྲངས་པའི་ལོ་ལྔ་བཅུ་དང་ཞག་བཅོ་བརྒྱད་ཀྱི་ཉི་མ་ཤར་འདལ་དེ་ལ། རླུང་བཅུ་པོ་དེ་གཅིག་ཏུ་འདྲེས་པར་འདུག་པ་ལ། དུས་ཕྱིས་རས་ཆུང་རྡོ་རྗེ་གྲགས་པའི་བཞེད་དགོངས་ལ། རླུང་བཅུ་གསུམ་ཡིན་གསུང་བའི་འབྲུ་ནོན་ཞལ་ལས་ཤེས། བླ་མ་རྗེ་བཙུན་རང་གིས་སྤྲུལ་པའི་དཔའ་མོ་ཚེ་དབང་རིག་འཛིན་མ་ལ་ཞིབ་པར་གསུང་ཞིང་། ཇོ་མོ་ཚེ་རིང་མས། རས་ཆུང་ངམ་སློང་སྟོན་པ་བོ་ཏེ་ཙ་(བོ་དྷི་རྰ་ཛ་)ལ་བཤད་ལ། བྷོ་ཏེ་ར་ཙས(བོ་དྷི་རྰ་ཛས)། རྗེ་རས་ཆུང་རྡོ་རྗེ་གྲགས་པ་ལ་གསུངས། བླ་མ་རས་ཆུང་པས། ཟངས་རི་རྒྱ་རས་དང་། ར་ཤེར་སྣང་དང་། སྒོམ་ཆེན་ཆོས་རབ་དང་། ལྷ་གཅིག་ལྡེམ་བུ་ལ་སོགས་པ་རྣམས་ལ་ཡང་ཅི་རིགས་སུ་གསུངས་ལ། ཁྱད་པར་དུ་རྗེ་ཁྱུང་པ་ཡེ་ཤེས་བླ་མ་ལ་ཞིབ་རྒྱས་སུ་གསུངས་ལ། དྲིན་ཅན་རྣམ་གསུམ་གྱི་ཞལ་གདམས་ཁྱད་པར་ཅན་རྣམས་ལ་རྒྱལ་སྲས་མིའི་སེང་གེ། ལྔ་རིག་ཤེས་བྱའི་གནས་ལ་མ་རྨོངས་པ། ཞང་ལོ་ཙྪ་བ་གྲུབ་པ་དཔལ་བཟང་པོས་ཀྱང་དེར་བཞེད་ཅིང་། ད་ནི་བསོད་ནམས་མཆོག་ཏུ་གྱུར་པ་ཤཱཀྱའི་དགེ་སློང་གཡུང་སྟོན་ཞི་བྱེད་རི་ཁྲོད་པ་ངས་ཀྱང་དེ་ལ་ཁ་དོན་(དན་)
3-3-34a
བཅད་པ་ལགས་སོ། །ཕྱི་རབས་ཀྱི་ཆོས་མཛད་རྣམ་པར་དག་པ་རྣམས་ཀྱིས་ཀྱང་ལེགས་པར་རྟག་པར་ཞུ། དེ་ནས་ཞག་ཁ་ཅིག་ཙམ་ནས་པེ་ཏས་འབྲོག་པའི་བལ་དུག་དང་། ཁྱི་བལ་དང་། བན་བོན་གྱི་ནམ་ཡས་ལ་བྱས་པའི་སྣམ་བུ་སྲེ་མོ་ཅིག་དང་། ཟ་རྒྱུ་ཟོ་བ་གང་ཁྱེར་ནས་བྱུང་བ་ལ། རྗེ་བཙུན་གྱིས་ད་ང་ལ་མི་དགོས་པ་འདུག་གིས། སྣམ་བུ་ཡང་ཁྱོད་རང་གི་གོས་གྱིས། ཟ་རྒྱུ་ཡང་ཁྱོད་རང་ཟོ་གསུངས་པས། པེ་ཏས་རྗེ་བཙུན་གྱི་ཞལ་ལ་ཆེ་རེ་བ་བལྟས་ནས། སྔར་ཡན་ཆད་མོ་ནམ་ཡོངས་དུས་ན། རྗེ་བཙུན་ཤ་ཟད་ཀྱི་ཟས་རུས་མགོ་ལྤགས་པས་གཡོགས་པ། ཐལ་བ་སྐྱ་ཐུལ་ལེ་བ་ཤི་ལ་ཁད་ལས་མེད་པ་ལ། དེ་དུས་ན་རླུང་བཅུ་དབང་དུ་འདུས་པས། བྱང་ཆུབ་སེམས་དཔའི་སྐུ་ཤ་བཀྲག་མདངས་འོད་ཟེར་ཅན་དུ་སོང་བ་མཐོང་བས། པེ་ཏ་ན་རེ་འོ་ན་དག་མིང་པོས་སངས་རྒྱས་སམ་དེར་སོང་བ་མིན་ནམ་ཟེར། དེའི་དུས་སུ་མགུར་བཞེངས་པ་ནི། གནམ་བྲག་དཀར་རྟ་སོ་དབུ་མའི་རྫོང་། །དབུ་མ་རྫོང་གི་དཀྱིལ་ཤེད་ན། །སྟེང་ན་ལྷོ་སྤྲིན་སྨུག་པོ་ལྡིང་། །འོག་ན་ཐང་དཀར་གཤོག་པ་རྐྱོང་། །བར་ན་གཅན་གཟན་རྩེད་མོ་རྩེ། །དེ་ལྟ་བུའི་དབེན་གནས་སུ། །ང་ཉལ་བ་མེད་པའི་འདུག་ལུགས་བདེ། །འཛིན་
3-3-34b
ཆགས་མེད་པའི་འགྲོ་འདུག་བདེ། །ཞུམ་པ་མེད་པའི་རྟུལ་ཞུགས་བདེ། །དེ་ཙམ་ལུས་ཀྱི་འཁྱེར་སོ་ཡིན། །གཉིས་སུ་མེད་པའི་ལྟ་བ་བདེ། །ཐབས་དང་ཤེས་རབ་སྒོམ་པ་བདེ། །ཟུང་དུ་འཇུག་པའི་བསམ་གཏན་བདེ། །དེ་ཙམ་སེམས་ཀྱི་འཁྱེར་སོ་ཡིན། །ལྷ་བསྐྱེད་རྫོགས་གཉིས་ཀྱི་ནང་ཤེད་དུ། །ལྟ་བ་ཐམས་ཅད་འདུས་ན་བདེ། །དབུགས་འགྲོ་འོང་གཉིས་ཀྱི་ནང་ཤེད་དུ། །རྣམ་རྟོག་ཐམས་ཅད་འདུས་ན་བདེ། །ཐབས་ཤེས་རབ་གཉིས་ཀྱི་ནང་ཤེད་དུ། །ཆོས་ཐེག་པ་ཐམས་ཅད་འདུས་ན་བདེ། །ལྟ་སྤྱོད་ཟུང་དུ་སྦྲེལ་ནས་བཞག །གདམས་ངག་ཁ་རུ་བཏོན་ནས་བཞག །ཉམས་རྟོགས་གླུ་རུ་བླངས་ནས་བཞག །སླད་ཀྱིས་བྱང་ཆུབ་བསྒྲུབ་པ་རྣམས། །ཉམས་སུ་ལེན་ན་དེ་ལྟར་ལོངས། །གསུངས་སོ། །དེ་དུས་ན་དགུང་ལོ་ལྔ་བཅུ་རྩ་གཅིག་པ་ཡིན་གསུང་། དེ་ནས་པེ་ཏ་ལ་ད་ཁྱོད་རང་ཡང་ཡུལ་གཞན་དུ་སྤྲང་ལ་སོང་། ང་ཡང་གྲོང་ཡུལ་དུ་འགྲོ་གསུང་ནས། རྒྱ་གར་དུ་འགྲོ་བསམ་ཙ་ན། རྣལ་འབྱོར་པ་ཅིག་དབུས་ནས་ཡོངས་པ་ལ་དྲིས་པས། རྗེ་མར་པ་གྲོངས་ནས་ལོ་གཉིས་སོང་། དེའི་སྔོན་ལ་སྲས་དར་མ་མདོ་སྡེ་གྲོངས་ཟེར་བས། མིད་ལས་སྤྱན་ཆབ་མང་པོ་བྱོན་ནས། གནས་བྲག་དཀར་རྟ་སོ་དབུ་མའི་རྫོང་། །རིག་བཞི་
3-3-34c
མཁའ་འགྲོ་འདུ་བའི་གནས། །གསུང་བའི་མགུར་དེ་བྱོན་ནས། དེར་རྒྱ་གར་དུ་འགྲོ་བའི་སྤྲོས་པ་བཅད་དོ། །དེ་ནས་མིད་ལ་གྲུབ་པ་ཐོབ་འདུག་ཟེར་བའི་སྙན་པ་ཐོས་ནས། གྲོ་ཆེན་ལོང་བ་དང་། རག་མའི་སྐུ་རིམ་ལྷ་འབར་གྱིས་འགོ་བྱས་རྣམས་ཡོངས་(ཡོང་)ནས། ད་མང་ཡུལ་དུ་འབྱོན་འཚལ་ཞུས་པས། མི་འགྲོ་དེར་ངའི་རྒྱུད་པ་འཛིན་པ་ཙམ་མི་ཡོང་གསུང་ནས། ཡར་གུང་ཐང་དུ་བྱོན་པས། པེ་ཏ་ན་རེ་མིང་པོའི་ཕོ་རྟགས་བོང་བུའི་ཙམ་པ་འདི་ངོ་ཚ་བས་སྣམ་བུ་འདི་གོན་མཛོད་ཟེར་བས། རྗེ་བཙུན་གྱིས་འོ་ཁྱོད་པེ་ཏ་ང་ལ་དྲིན་ཆེ་བས་ཁྱོད་ཀྱི་ཁ་ལ་ཉན་དགོས་གསུང་ནས། སྣམ་བུ་བླངས་ནས་དུམ་བུར་བཏང་སྟེ། སྙན་དང་། ཤངས་དང་། ཕྱག་ཞབས་ཀྱི་མཛུ་གུ་རྣམས་དང་། གསང་སྡོར་(དོར་)དང་། ཐམས་ཅད་ལ་ཤུབས་རེ་མཛད་ནས་འདུག་པ་དང་། པེ་ཏ་ན་རེ་ངས་དཀའ་ལས་དེ་ཙམ་བྱས་ནས་བཙལ་བ་དེ། ཕུང་པོ་ཁྱོད་ཀྱིས་ཆུད་གསན་ཟེར་ནས་འཐབས་པས། རྗེ་བཙུན་གྱིས་ངོ་མི་ཚ་བ་ལ་ཚ་ཟེར། འདི་ནི་རང་བྱུང་ཕོ་རྟགས་ཡིན། །ང་དང་པོར་སྐྱེས་ཀྱང་གཅེར་བུར་སྐྱེས། །ཐ་མར་འཆི་ཡང་གཅེར་བུར་འཆི། །ད་ལྟ་གནས་ཀྱང་གཅེར་བུར་གནས། །ཆོས་སྐུ་དྲི་མེད་གཅེར་བུ་ལ། །གཟུང་འཛིན་ངོ་ཚ་སྤྲོས་དང་
3-3-34d
བྲལ། །ཆོས་བརྒྱད་གོས་ཀྱིས་ད་མི་གཡོག །གསུངས་ནས། དཔལ་མ་ན་ཕར་གཤེགས་སོ།། །།
༈ བཞི་པ། ཟས་གོས་ཀྱི་འདུན་པ་རང་གྲོལ་བའི་ཡོན་ཏན།
བཞི་པ་ཟས་གོས་ཀྱི་འདུན་པ་རང་གྲོལ་བའི་ཡོན་ཏན་ནི། དེ་ནས་སྙ་ནམ་ཕྱོགས་སུ་བྱོན་ནས། རྒྱགས་ཕུ་ན་ཇོ་མོ་འདོ་མོ་བས་ཡོན་བདག་བྱས་ནས་བཞུགས་པ་ལ། སློབ་མ་རེ་རེ་ཙམ་བྱུང་ནས། དགོན་པ་བྱེད་དགོས་ཟེར་བ་ལ། སྔར་རྗེ་མར་པས་སྒོམ་ཆེན་པ་མལ་གཅིག་ཏུ་ཡུན་རིང་བ་དེ་མི་དགའ་གསུང་བ་དེ་དྲན་ནས། སྙ་ནམ་ཙར་མ་ལ་བྱོན་པས། སྟོན་མོ་ཞིག་འདུག་པ་ལ་ནང་དུ་མ་ཚུད་པས། ལུད་ཕུང་གཅིག་གི་ཁར་བཞུགས་པས། བུད་མེད་གཅིག་ཆུ་ལེན་དུ་བྱུང་བ་ན་རེ། བླ་མ་མི་སྲུའམ་ཟེར་བས། ང་ལ་སྐལ་བ་ཅིག་འདིར་ཡོང་བ་མེན་(མིན་)ནམ་གསུངས་པས། མོ་ན་རེ་སྒོ་བ་ལ་ངའི་ངོ་ཤེས་ཡིན་བྱས་པས་ཆོག་ལགས། ནང་དུ་གཤེགས་ཟེར་ནས་ཁྲིད་དེ་ནང་དུ་ཚུད་དོ། །བུད་མེད་དེ་ལས་དང་སྐལ་བར་ལྡན་པའི་ལེགས་གསལ་འབུམ་མེ་ཡིན་པར་འདུག་གསུང་། དེ་ནས་སྟོན་གྲལ་ན་མི་རྣམས་ཀྱིས། མིད་ལའི་ལོ་རྒྱུས་མང་པོ་གཏོང་ཤིང་(ཞིང་)འདུག །དང་པོ་མཐུ་བྱས་དེ་ནས་ཆོས་སྔ་འགྱུར་རྣམས་ཞུས། དེ་ནས་མར་པ་ལོ་ཙྪ་ལ་ཆོས་ཞུས། དེ་ནས་བྲག་དཀར་རྟ་སོ་ན་བཞུགས་ནས་བསྒོམས་པས། ད་
3-3-35a
ལྟ་གྲུབ་པ་ཐོབ་འདུག་ཟེར་ཞིང་འདུག་པ་ལ། རྗེ་བཙུན་གྱི་ཐུགས་དགོངས་ལ་མཛོ་བདག་གི་རྩར་མཛོ་རྒྱུས་སམ་བསམ་པ་བྱུང་། དེར་གཅིག་གིས་ངོ་ཤེས་ནས་ཞལ་ལ་ཅེ་རེ་ལྟས་ནས། ངས་མིད་ལ་ཐོས་པ་དགའ་དེ་ལན་གཅིག་མཐོང་བ་ཡིན་ཏེ། དེ་ནི་རྣལ་འབྱོར་པ་འདི་རང་འདྲ་བ་ཅིག་འདུག་ཟེར་བ་དང་། མི་རྣམས་ན་རེ་ཁྱེད་ཡིན་ནམ་ཟེར་བ་ལ། ཡིན་པ་ཡང་སྲིད་བྱས་པས། ངོ་མཚར་ཆེ་ད་ཅི་ནས་ངོ་མ་ཤེས་པ་ཡིན་ཟེར་ནས། གྲལ་མགོར་བཞག་ཕྱག་འཚལ། ཐམས་ཅད་ཀྱིས་སྟོན་སྐལ་དྲངས་ནས། མགུར་གསུང་པར་ཞུས་པས། སྙ་ནམ་པ་ཐམས་ཅད་མོས་ནས། དེའི་དགོང་ཁ་ཙམ་ན། སྔགས་རྡོར་མོ་བྱ་བ་དེས། གོས་སྲབ་ལེགས་གཅིག་གཡང་ལུགས་སུ་བྱས་པ་ཅིག་བྱུང་ནས་མགུར་ཞུས་པས། ནན་ལྟར་མོས་ནས་མཆོད་གནས་སུ་བཏེག་ནས་སྙ་ནམ་རྩར་མ་ན་བཞུགས་པ་ལ། དགུན་སྒང་ཆེན་ལོ་གསར་དུ་སོང་ཡང་། སྙ་ནམ་པ་རྣམས་ན་རེ། ངེད་ལ་འབྲོག་ས་དགའ་མོ་ཞིག་ཡོད་ཏེ་(དེ)། ལྷ་འདྲེ་གདུག་པ་ཅན་གཅིག་གིས་བདག་བྱས་ནས། དེ་ལ་འཇིགས་ཞུས་པས། མིད་ལའི་ཞལ་ནས། ས་ཆ་དང་ལུང་པའི་མིང་ཇི་སྐད་བྱ་བ་ཡིན་གསུང་པས། ཁོང་རྣམས་ན་རེ་འབྲོག་ས་ལ་ཕྱི་འདྲེ་ལུང་
3-3-35b
བྱ་བ་ལགས་ཟེར་བ་དང་། དེར་མིད་ལའི་ཐུགས་ལ་འོ་ན་དེ་ནི། རྗེ་མར་པས་ང་ལ་ལུང་བསྟན་པའི་གནས་ཆེན་ཡིན་ངེས་དགོངས་ནས། ལུང་བསྟན་རྣམས་ཐུགས་ལ་དྲན་ནས། ལ་ཕྱི་གངས་ཀྱི་ར་བར་གཤེགས་གསུང་སྟེ། ཐམས་ཅད་ཀྱིས་ཇི་ཙམ་བཤོལ་ཡང་གསན་དུ་མ་འདོད་པར། སྟོན་པ་ཤག་འགུ་དང་། སྔགས་རྡོར་མོས་མགོ་བྱས་པའི། བན་སྐྱེས་དྲུག་གིས་གཤེགས་སྐྱེམས་བྱས་ནས། རྒྱལ་གྱི་ཡར་ཚེས་བཅོ་ལྔའི་ཉིན། ལ་ཕྱི་རུ་ཕེབས་ཤིང་ཙམ་(རྩམ་)པ་བྲེ་དོ། འབྲས་བྲེ་གང་། ལུག་ཤ་གཟུག་ཕྱེད་དང་གཉིས། མར་རྒྱ་མ་གང་། དེ་རྣམས་དང་རྗེ་བཙུན་བདུད་བརྟུགས་དཔལ་གྱི་ཕུག་མོ་ཆེར་བཞུགས་ནས། ཁོང་རྣམས་ཀྱང་ཞག་འགའ་ནས་རྗེ་བཙུན་གྱི་དགུན་རྒྱགས་སྐྱེལ་བ་དང་། ཁོང་རྣམས་ཡང་དགུན་ཆོས་ཉན་པ་ལ་ཡོང་བའི་ཆད་བྱས་ནས་ཚུར་ཡོངས་པས་གངས་ལ་ཐོག་ནས་ཡུལ་ངན་འཁྲིགས། པུས་གོང་ནས་ཚུར་ཁ་འཚུབ་ཆེན་པོ་དང་འཐབ་ཅིང་ཡོངས་(ཡོང་)པས། མི་ཉལ་ཙ་ན་ཡུལ་དུ་སླེབ་སྐད། དེའི་ཚེ་ཁ་བ་ཉིན་མཚན་བཅོ་བརྒྱད་བབས། རི་ཀླུངས་ཐམས་ཅད་བཀང་། དེར་རྗེ་བཙུན་གྱི་ཐུགས་དགོངས་ལ་འདི་ལ་རེ་ན་ནི་ཤི་བ་ལས་མི་ཡོང་བར་འདུག་བསམ་ནས། རྩེ་གཅིག་ཏུ་དྲིལ་ནས་བསྒོམས་པས་ཏིང་ངེ་འཛིན་
3-3-36a
གྱི་རྒྱུན་ལ་འབྱམས་ནས་གསོལ་མ་དགོས། དེ་ནས་ཟླ་བ་དྲུག་ཏུ་བྲིན་སྣ་ནམ་གཉིས་ཀྱི་འབྲུལ་ཆད་ཏེ་(དེ)། སློབ་འབངས་རྣམས་ཀྱིས་རྗེ་བཙུན་གྲོངས་པར་བྱས་ནས་བདུན་ཚིག་(ཚིགས་)དང་། ཚོགས་འཁོར་བྱས་ནས། ཕྱིས་ལིའུའི་ཟླ་བར་སོང་ཙ་ན། ཡུར་མ་བྱེད་དུས་རྣལ་འབྱོར་པ་ཅིག་སློང་དུ་བྱུང་བ་ལ། སྔགས་རྡོར་མོའི་བྱན་མོས་རྗེ་བཙུན་དྲན་ནས་ངུས་པས། དེ་ན་རེ་ཅི་ལ་ངུ་ཟེར། ངའི་བླ་མ་མིད་ལ་རས་པ་བྱ་བ་ལ་ཕྱི་རུ་བྱོན་ནས། རྒྱག་སྐྱེལ་བར་བྱས་ཙ་ན། ཁ་བ་ཆེན་པོ་བྱུང་ནས་མ་སྐྱོལ་བར་གྲོངས། ཁྱེད་མཐོང་བས་བླ་མ་དྲན་ནས་ངུས་པ་ཡིན་བྱས་པས། དེ་ན་རེ་ཁོང་ལ་ངས་ཀྱང་ཆོས་ཞིག་ཞུས་པའི་བླ་མ་ཡིན། ཁོང་ཡོན་ཏན་ཅན་ཡིན་པས་དེ་རྩུག་མི་འགྲོངས་པས། ད་རུང་ལྟར་སོང་ན་ཡོད་ཟེར་དེར་གཙོ་བོ་ལ་བྱས་པས་གེན་ཟེར་ནས། མི་རྣམས་ཀྱང་ཤི་ཤུལ་དེ་ཡང་མི་ལྟ་བར་ཟེར་ཡོང་ཟེར་སྟེ(ཏེ་)། སྔར་གྱི་བུ་སློབ་ཚོས་གངས་བཤགས་ནས། རྗེ་བཙུན་གྱི་གདུང་སྤྱན་འདྲེན་དུ་ཕྱིན་པས། རམ་ལྡིངས་མར་འདས་ནས་གླང་ལྡིངས་ཀྱི་གོང་འཕྲོད་ལམ་རིང་མོའི་མར་ཟུར་སྒང་སྣ་དེར་ངལ་བསོས་པས། སྟག་འཕྲེད་ཀྱི་མགོའི་ཕ་འོང་དེའི་ཁ་ན་གསའ་ཆེན་མོ་གཅིག་འཛེགས་ནས་བྱ་ར་སྙེང་ངེ་ཡུན་རིང་དུ་བལྟས་+ནས་+
3-3-36b
ནས་སོང་སྐད། དེར་ཁོང་ལ་ལ་ན་རེ་གསའ་མ་གིས་རྗེ་བཙུན་གྱི་སྤུར་ཟོས་ཚར་ཟེར། ད་ནམ་བཟའི་དུམ་བུའམ། དབུ་སྐྲ་འདྲ་ཡོད་དམ་གཞན་མེད་བྱས་ནས་ནན་ལྟར་ཉམས་མ་དགའ་ནས་ངུ་ཡིན་ཕྱིན་པས་གསའ་བབས་པའི་ཤུལ་ན་མིའི་རྐང་རྗེས་ཞིག་འདུག་པས། དེ་བས་ཀྱང་མ་དགའ་ནས་རྟོག་པ་སྐྱེས་ཏེ། ལྷ་འདྲེ་ཡིན་ནམ་བསམ་པས། སྟག་འཕྲེད་ན་སླེབ་ཙ་ན། ལམ་ན་ཕར་སྟག་གཅིག་ཕྱི་ལྟས་བྱེད་ཅིང་སོང་བས་དེ་བས་ཀྱང་སྐྲག་ཅིང་ཕྱིན་པས། གཟིག་འཕྲེད་ན་མར་གཟིག་ཅིག་ཕྱི་ལྟས་བྱེད་ཅིང་སོང་ནས་དེ་བས་ཀྱང་སྐྲག་ཅིང་ཕྱིན་ཙ་ན། ཐང་སྤྲིན་ཕོ་བྲང་གི་ཆུ་འགྲམ་དེར་མི་ཞིག་སོང་བའི་རྗེས་ཅིག་འདུག །འདྲེ་ཡིན་པར་ཐག་ཆོད་བྱས་ནས་ཕྱིན་ཏེ། ར་འུག་ནས་བལྟས་པས་གནས་མཐིལ་ན་དུད་པ་ཅིག་སྔོ་འཁྱུག་བྱུང་བས། འོ་ན་ཅི་ཡིན་བསམ་གྱིན་ཕྱིན་པས། ཚར་ལེབ་ཀྱི་ཆུ་འགྲམ་དེར་སླེབ་ཙ་ན། རྗེ་བཙུན་གྱི་མགུར་དབྱངས་ལྷང་ལྷང་བཞེས་པ་ཐོས་པས། འོ་ན་ཁྱི་ར་བས་རྒྱགས་བྱིན་པའམ། གཅན་གཟན་གྱི་ཐེད་འདྲ་རྙེད་པ་དེས་མ་གྲོངས་པ་སྲིད་དམ་བསམས་ནས་ཕྱིན་ཙ་ན། པད་ཕུག་དང་ཕུག་ཆུང་གི་བར་དེ་ན་ཚུར་རྗེ་བཙུན་བྱོན་ནས་བྱུང་བས། གླེན་པ་ཀུན་ད་ཅི་ད་ཅི་ནས་ཡོང་གིན་འདུག་པས། དའི་
3-3-37a
བར་ལ་མི་སླེབ་པར་དེའི་བར་ལ་ཁྱེད་རྣམས་ཀྱིས་གང་དུ་བསྡད། ད་ཟན་དང་ཚོད་མ་ཡང་དྲངས་པ་ལ་ཕུག་ཏུ་མྱུར་དུ་ཤོག་གསུང་ངོ་། །དེ་ནས་བདུད་བརྟུགས་དཔལ་གྱི་ཕུག་མདོ་ཆེར་ཕྱིན་ནས། དེར་དགའ་ཆེས་ནས་ངུ་བྲོ་བྱ་བ་དེར་བྱུང་སྟེ། ད་ལྟ་དེ་ལ་བྲོ་མོ་ཆེ་ཟེར་བ་དེ་ཡིན། ལ་ལས་རྗེ་བཙུན་ལ་འོ་བྱས། ལ་ལས་ཕྱག་ལ་འཐེན། ལ་ལས་ནམ་བཟའ་ནས་འཇུས། ལ་ལས་ཞབས་ལ་མགོ་བོས་གཏུགས་ནས་མང་པོ་ངུས་ནས་ཕྱག་བྱས་སྙུན་དྲིས། སྔར་གྱི་རྒྱགས་ལ་ཕྱེ་བྲེ་དོ་ལ་བྲེ་གང་ལས་མ་ཟད་པར། བྲེ་གང་ལ་ཟན་ཆང་བྱས་འབྲས་ཕུལ་བཞི་ཟན་དུ་བཙོས། ཤ་གཟུག་ཕྱེད་ལ་ཚོད་མ་བྱས་གདའ་བ་ལ། ཁོང་འདྲེ་བན་བཀྲ་ཤིས། སྒོམ་ཆེན་ཙཀྲ། སྐྱོ་བན་ཁམས་གསུམ། སྐྱོ་སྟོན་དབང་སྙིང་། ཤཀ་མགུ་ཕ་བུ་གཉིས། སྔགས་རྡོར་མོ་དང་བདུན་ཡོད་པས། ངེད་རྣམས་ཡོང་བ་རྗེ་བཙུན་གྱིས་ཇི་ལྟར་མཁྱེན་ཞུས་པས། རྗེ་བཙུན་གྱི་ཞལ་ནས། ངས་ད་ཅི་ཕ་འོང་གི་སྟེང་ནས་བལྟས་པས། ཁྱེད་ཚོས་འཕྲེད་ལམ་ན་ཚུར་ཤེར་བྱུང་ནས་འགོ་དེར་ངལ་བོས་ནས་འདུག་པ་ངས་མཐོང་གསུང་། ཡང་ཞུས་པ། བདག་ཅག་གིས་ཕ་འོང་གི་སྟེང་ན་གསའ་ཅིག་འདུག་པར་མཐོང་ལགས། དེ་ཙ་ན་རྗེ་བཙུན་གང་ན་བཞུགས་
3-3-37b
གྱིན་ཡོད་ཞུས་པས། རྗེ་བཙུན་གྱི་ཞལ་ནས། ད་ཅི་གསའ་གཅིག་བྱ་ར་སྙིང་བྱེད་ཅིང་འདུག་པ་དང་། སྟག་གཟིག་ལ་སོགས་པ་འདུག་པ་དེ་ཀ་ང་རང་ཡིན་མོད། རླུང་སེམས་ལ་དབང་ཐོབ་པའི་རྣལ་འབྱོར་པས། ལུས་མི་སྣང་བར་སྦེད་པ་དང་། ལུས་སྣ་ཚོགས་སུ་སྤྲུལ་བ་དང་། འབྱུང་བ་བཞིའི་སྐྱེ་མཆེད་ཟིལ་གྱིས་གནོན་ནུས་པར་འབྱུང་སྟེ། ད་རེས་ངས་ཁྱེད་ལ་བསྟན་པ་དེ་རྫུ་འཕྲུལ་ལུས་ཀྱི་བཀོད་པ་བྱ་བ་ཡིན། ངས་དེ་ལྟར་བྱེད་ཤིང་(ཅིང་)འདུག་ཟེར་བའི་གཏམ་མི་ལ་མ་ཟློས། ད་རེས་ཁྱེད་རྣམས་བསམ་པ་དག་པས་མཐོང་བར་བཤད་གསུང་། ཡང་སྔགས་རྡོར་མོས་ཞུས་པས། རྗེ་བཙུན་ལགས་ན་ནིང་བས་ཀྱང་སྐུ་མདངས་ཤིན་ཏུ་བཟང་བར་གདའ་བ་ལ། ལ་སྒོ་གཉིས་ཀྱི་ལམ་ནི་ཁ་བས་ཆོད། ལྷ་འདྲེ་ཀུན་གྱི་ཞབས་ཏོག་བྱས་པ་ལགས་སམ་ཞུས་པས། རྗེ་བཙུན་གྱི་ཞལ་ནས། གཞི་ཕལ་ཆེར་ནི་ཏིང་ངེ་འཛིན་གྱི་རྒྱུན་ལ་འཛམ་ནས་ཟ་མ་དགོས། རེས་འགའ་ནི་ཕྱེ་ཐུར་མ་རེ་ཙམ་ལ་སྐྱོ་ཐལ་བྱས། རེས་འགའ་ནི་དུས་བཟང་བའི་ཚེ་རྒྱ་གར་གྱི་མཁའ་འགྲོ་མས་ཚོགས་འཁོར་གྱི་སྐལ་བ་སྐྱལ། ཐང་སྲིན་རྒྱལ་པོ་འདིས་ཀྱང་ཟླ་བ་གསུམ་ཙམ་ཞབས་ཏོག་བྱས་གསུང་། ཡང་རྗེ་བཙུན་གྱི་ཞལ་ནས། ཁ་སིང་ང་འདིར་
3-3-38a
ཡོངས་པའི་ཟླ་བའི་སྨད་དེ་ལ། ཁྱེད་བུ་སློབ་རྣམས་ཀྱི་མཐའ་སྐོར་ནས་བཟའ་བཏུང་རྣམ་པ་སྣ་ཚོགས་དྲངས་པ་སྙམ་བྱེད་པ་ཞིག་ངའི་ཉམས་མ་བྱུང་། དེ་ནས་ཞག་ཉི་ཤུ་ཙམ་དུ་ཟ་སྙིང་ཡང་མི་འདོད་པ་གཅིག་བྱུང་། དེ་ཙ་ན་ཁྱེད་ཀྱིས་ཅི་བྱས་པ་ཡིན་གསུང་། དེར་ཁོང་རྣམས་ཀྱིས་ཞག་གྲངས་རྩིས་པས། བདུན་ཚིགས་བྱས་པ་དང་དུས་མཚུངས་པར་འདུག་ཟེར། རྗེ་བཙུན་གྱི་ཞལ་ནས། བར་དོར་བདུན་ཚིས་(ཚིགས་)སྙག་པ་གལ་ཆེ་ཟེར་བ་དེ་མད་པར་འདུག་སྟེ། དེ་བས་ཀྱང་བར་དོ་ད་ལྟ་བཅད་ན་རླབས་ཆེ་སྟེ་གསུངས་སོ། །དེ་ནས་ཁོང་རྣམས་ཀྱིས་རྗེ་བཙུན་ལ་ནང་པར་སྙ་ནམ་དུ་གཤེགས་པར་ཞུ་འཚལ་ཞུས་པས། རྗེ་བཙུན་གྱི་ཞལ་ནས། ང་འདི་རང་ན་ཉམས་དགའ་ཏིང་ངེ་འཛིན་སྐྱེ་བར་འདུག །ཁྱེད་རང་སོང་གསུངས་པ་ལ། ཡང་ཁོང་རྣམས་ཀྱིས་བླ་མ་ད་རེས་ཕར་མ་གཤེགས་ན། ངེད་ལ་སྙ་ནམ་པ་ཀུན་ན་རེ་ཁྱེད་ཀྱིས་རྗེ་བཙུན་འགྲོངས་སུ་བཅུག་པ་ཡིན་ཟེར་ནས། གཏམ་ངན་ཆེན་པོ་ཡང་བྱུང་ལགས། ཇོ་མོ་འོར་མོས་ཀྱང་ངའི་རྗེ་བཙུན་ཁྱེར་ལ་ཤོག་ཟེར་ནས་ཕྲིན་ངན་ཡང་ཡང་བྱུང་བས། བླ་མ་མི་གཤེགས་ན། ངེད་ཀྱང་ཕར་མི་འགྲོ་བར་ཞུ་ཞུས་པས། རྗེ་བཙུན་གྱིས་ཁོང་ཚོའི་
3-3-38b
ནན་མ་ཐེག་པར་ཞལ་གྱིས་བཞེས་ཏེ། དེའི་ནང་པར་བྱོན་པ་ལས། ཁོང་ཚོས་སྔོན་ལ་འོངས་ནས། རྗེ་བཙུན་བྱོན་ནམ་ལྟས་པས། རྗེ་བཙུན་ནི་གངས་ལ་རྩར་མེ་གཏོང་གིན་བཞུགས་འདུག་པས། དེར་ཁོང་རྣམས་ཀྱིས་རྗེ་བཙུན་ལགས་ནམ་མཁའ་ལ་འཕུར་ནས་བྱོན་པ་ལགས་སམ་ཞུས་པས། མིད་ལའི་ཞལ་ནས། འཕུར་བ་རང་ཡང་མེན་(མིན་)ཏེ། ཁ་བའི་ཐོག་ན་ཕར་རྐང་རྗེས་མ་དོར་ཙམ་དུ་འོང་གསུང་། དེ་ནུབ་རྫ་མ་ཕུག་ན་བསྡད་པས། རྗེ་བཙུན་གངས་ཀྱི་ཐོག་ན་གཟིམས་པས། གངས་སྦྲ་མལ་ཙམ་ཞིག་བཞུ་ནས་འདུག །ཁོང་ཚོ་ནི་ཁ་འདར་ཕད་དེ་སོང་ཟེར། འདིའི་དུས་སུ་རྗེ་བཙུན་འབྲོག་ལ་ཕྱིར་གཤེགས་པའི་ལོ་དེ་སྟག་ལོ་ཡིན་ཟེར་བ་དང་། རྗེ་བཙུན་གྱི་དགུང་ལོའི་གྲངས་དང་མི་མཐུན་པར་སྣང་བས་ངས་ཐེ་ཚོམ་ཅུང་ཟད་ཅིག་ཟ་བས་མཁས་གྲུབ་རྣམས་ཀྱིས་ཀྱང་བརྟག་པར་ཞུ། ལར་རྣམ་ཐར་ལ་མཐུན་ན་གྲུབ་ཐོབ་མིན་བྱ་བ་ཡིན་ནོ། །ཡུལ་ངེས་མེད་ན་གང་ཟག་ངེས་མེད་ལ། སྤྱོད་པ་སྣ་ཚོགས་ངེས་མེད་ཅིག་སྟོན་པ་ཡིན་ནོ། །དེ་ནས་ནང་པར་གངས་ལ་ལ་བྱོན་པས། མིད་ལའི་ཞལ་ནས། རེས་འགའ་ནི་ང་གངས་ལ་ཟུག་པར་འདུག་གསུངས་ནས་ཞབས་གར་བཞགས་པ་ན། ལྕགས་སྲེགས་
3-3-39a
བཞག་པ་དང་ཁྱད་མི་འདུག །རེས་འགའ་ནི་ང་གངས་ལ་འདྲེད་ཅིང་འདུག་གསུང་ནས། ཞབས་གངས་ལ་མ་རེག་པར་འབྱོན་ཞིང་འདུག །རེས་འགའ་ནི་ངས་ཁྱེད་ཚོའི་ལྷགས་བསྲུང་བྱེད་ཀྱི་ཡོར་མོ་བྱེད་གསུང་ནས། སྐུ་ལུས་ནི་མཁར་ཆེན་པོ་ཙམ་མཛད་པར་སྣང་། རེས་འགའ་ནི་ངས་ཁྱེད་ཚོའི་ཉི་མ་སྒྲིབ་པར་འདུག་གསུང་ནས། སྐུ་ལུས་ནི་ནས་འབྲུ་ཙམ་མཛད་པར་སྣང་། དེ་ནས་མར་བྱོན་པས། གདུ་བུའི་བཅུ་བདུན་ལ་སྙ་ནམ་དུ་ཕེབས་པས། དེ་ནས་ཆུ་མིག་མགོ་མང་ན་མར་བྱོན་ནས། ཏིང་གུང་དུ་གྲོ་(འགྲོ་)བྱས་པས། རྗེ་བཙུན་གྱི་ཞལ་ནས། ང་རྣལ་འབྱོར་པ་གངས་ཀྱི་སེང་གེ་འདྲ་བ་སླེབ་པ་ལ། བསུ་བ་ལ་ཤོག་གྱིས་གསུང་བས། སྟོན་པ་ཤག་འགུའི་བུ་སྔོན་ལ་བཏང་བས། ཡུལ་པ་རྣམས་ལ་རྗེ་བཙུན་འབྱོན་ཤིང་ཡོད་པས། བསུ་བ་ལ་ཤོག་བྱས་པས། རྫུན་ཡིན་ཟེར་ནས་ཡིད་མ་ཆེས། གཙོ་བོའི་བུ་རྟ་ཞོན་ནས་ལྟར་སོང་བས། སྣ་ནམ་ཙར་མའི་ཕོ་མེད་མོ་མེད་བུ་ཚ་ཚུན་ཆོད་ཀྱིས་རྗེ་བཙུན་མ་གྲོངས་པར་འབྱོན་ཤིང་འདུག་ཟེར་བ་ཐོས་ནས། ཁོང་ཐམས་ཅད་ཤིན་ཏུ་དགའ་ནས། སྔོན་བསུ་རུ་ཡོངས་ཏེ། ཕ་འོང་དཀའ་ལེབ་ཀྱི་རྩར་འཚོགས་ཏེ་
3-3-39b
བསྐོར་བ་བྱས། ཕྱག་དགུ་ཕྲུག་འཚལ་ཕྱག་རྟེན་བྱས། སྙུན་དྲིས་གསོལ་བས། དེའི་དུས་སུ་བླ་མ་རྗེ་བཙུན་ལ་ཕྱག་འཁར་སྦའི་བེར་མ་ལྕག་ཅིག་ཡོད་པ་དེ། ཕ་འོང་དཀའ་ལེབ་ཀྱི་སྟེང་དུ་ཨོཾ་རྩུགས་སུ་བྱས་ནས། ཁོང་ལྷ་མི་རྣམས་ལ་སྙུན་ལན་མགུར་དུ་གསུངས་པ་འདི་སྐད་དོ། །དཔལ་དེ་རིང་བཀྲ་ཤིས་ཁྲི་གདུགས་ལ། །ཁྱེད་ཕྱག་མཇལ་གྱི་ཡོན་བདག་ཕོ་མོ་རྣམས། །འོ་སྐོལ་མ་ཤི་བར་འཕྲད་པ་བློ་རེ་དགའ། །ང་མི་རྒན་གླུའི་སྐོར་མཛོད་ཡིན། །སྙུན་དྲི་མེད་ཀྱི་ལན་ཀྱང་གླུ་ཡིས་འཇལ། །སྙན་ལྷན་གསན་ཅིག་བུ་སློབ་རྣམས། །ཡོང་སྟག་གི་ལོའི་ལོ་བཞུགས་ལ། །ཡོས་བུ་ལོའི་ལོ་མགོ་ལ། །ཝ་རྒྱལ་ཟླ་བའི་ཉེར་དྲུག་ལ། །འབྲོག་ལ་ཕྱི་གངས་ཀྱི་ར་བར་ཕྱིན། །གནམ་ས་གཉིས་པོ་གྲོས་བྱས་ནས། །འབྱུང་བ་ཆུ་རླུང་གཡོས་གཡོས་ནས། །ལྷོ་སྤྲིན་སྨུག་པོས་འདུན་མ་སྡུས། །ཉི་ཟླ་གཉིས་པོ་བཙོན་དུ་བཟུང་། །རྒྱུ་སྐར་ཉི་ཤུ་སྟོད་ལ་རྒྱུས། །ཁྲིམས་ཀྱི་གཟའ་བརྒྱད་ལྕགས་སུ་བཅུག །དགུ་ཚིགས་སྐྱ་མོ་སྟོད་ལ་གནན། །སྐར་ཆེན་ཡོངས་ལ་བུད་ཀྱིས་བཏབ། །བུད་ཀྱི་ཐང་ལོ་གཡོས་པའི་ཐ་མ་ལ། །ཁ་བ་ཉིན་དགུ་མཚན་དགུ་བབས། །བབས་ཆེ་སྟེ་ཆེ་ལ་བལ་འདབ་ཙམ། །འདབ་ཆགས་ལྟ་བུར་ལྡིང་ཞིང་
3-3-40a
བབས། །ཆུང་སྟེ་ཆུང་ལ་འཕང་ལོ་ཙམ། །བུང་བ་ལྟ་བུར་འཁོར་ཤིང་བབས། །ཡང་ཆུང་སྲན་མ་ཉུངས་དཀར་ཙམ། །ཞུ་འཕང་ལྟ་བུར་འདྲིལ་ཞིང་བབས། །ལར་ཁ་བ་ཆེ་ཆུང་ཚད་ལས་འདས། །མཐོ་གངས་དཀར་གྱི་རྩེ་མོ་དགུང་དང་མཉམ། །དམའ་རྩེ་ཤིང་ནགས་ཚལ་རྒྱ་ཞོ་གནོན། །མཚོ་ཆུ་རླབས་ཅན་ལ་དར་ཆགས་བཏབ། །རི་ནག་པོ་རྣམས་ལ་སྐུ་དཀར་གསོལ། །གཙང་ཆབ་སྔོན་མོ་སྦུགས་སུ་བཅུག །ས་མཐོ་དམན་མེད་པར་ཐང་དུ་མཉམ། །ཁ་བ་དེ་ལྟར་ཆེ་བའི་ངང་ཉིད་ཀྱིས། །སྤྱིར་སེམས་ཅན་མི་ལ་བཟང་བརྩོན་(བཙོན་)བྱུང་། །དགོས་(སྒོས་)རྐང་བཞིའི་ཕྱུག་(ཕྱུགས་)ལ་མུ་གེ་བབས། །དགོས་(སྒོས་)རི་དྭགས་དམན་པའི་ལྟོ་སྐལ་བཅད། །སྟེང་འདབ་ཆགས་བྱ་ལ་རྒྱགས་ཆད་བྱུང་། །འོག་བྲ་བ་བྱི་བའི་ལྡེམ་བུ་རྡིབ། །གཅན་གཟན་རྣམས་ལ་ཁ་ཆིངས་བྱུང་། །དེ་འདྲའི་སྐྱིན་ཐང་སྐལ་པ་ལ། །སྟེང་ནས་བབས་ཀྱི་དགུང་ཡབས་དང་། །ལོ་གསར་སྒང་གི་ལྟག་པ་གཉིས། །ང་རྣལ་འབྱོར་མི་ལའི་རས་གོས་གསུམ། །གངས་དཀར་སྟོངས་སུ་འཁྲུག་པ་ཤོར། །ཁ་བ་བབས་རྒྱལ་ཆབ་དུ་(ཏུ་)ཞུ། །རླུང་འར་འུར་ཆེ་ཡང་རང་ཞིར་ཐལ། །རས་གོས་མེ་ལྟར་འབར་ཞིང་གདའ། །དཔའ་ལ་རྡོར་གྱི་འཁྲུག་པ་དེ་ན་རྒྱལ། །གྱད་དེས་བཞིའི་སྲོག་ཤིང་དེ་རུ་སྣོལ། །མཚོན་རྩེ་རྒྱལ་གྱི་རལ་ཁ་དེ་རུ་སྤྲད། །སྤྱིར་སྒོམ་ཆེན་རྣམས་ལ་ཚད་དེ་བོར། །དགོས་གཏུམ་མོ་རས་ཀྱི་ཆེ་བ་བཏོན། །ནད་འདུ་བ་
3-3-40b
རྣམ་བཞི་སྲང་ལ་མཉམ། །ཕྱིས་ནང་འཁྲུགས་མེད་པར་གཉའ་བརྟན་གྱིས། །རླུང་ཚ་གྲང་གཉིས་པོ་བཅུད་ལ་བཏབ། །ཕྱིས་ཅི་ཟེར་ཉན་པར་ཁ་ཡིས་བླངས། །ཀྱིན་ཐང་ཁ་བའི་རྡོང་སྲི་མནན། །ཕྱིས་གཡོ་མགུལ་མེད་པར་རྩིས་ལ་ཕབ། །སྤྱིར་དམག་ཚོགས་བགྱིད་ཡང་མ་དགོས་པར། །དུས་ད་རེས་ཀྱི་འཁྲུག་པ་དེ་རྒྱལ་ནས་གདའ། །ང་མེས་ཀྱི་ཚ་བོ་སྟག་ལག་ཅན། །སྔར་ཝ་ལག་གོན་ནས་འབྲོས་མ་མྱོང་། །ང་ཕ་ལ་བུ་སྐྱེས་གྱད་ཀྱི་རིགས། །སྡང་དགྲ་ལ་ལྟ་ཟུར་ཤོར་མ་མྱོང་། །ང་གཅན་གཟན་རྒྱལ་པོ་སེང་གེའི་རིགས། །གནས་གངས་ཀོངས་མེན་(མིན་)པར་སྡོད་མ་མྱོང་། །ཤོ་མད་ཀྱང་ཀུ་རེ་བྱས་པ་ལགས། །ང་མི་རྒན་ཁ་ལ་གཏད་ཡོད་ན། །ཕྱིན་ཆད་སྒྲུབ་བརྒྱུད་དར་སྟེ་(ཏེ་)མཆི། །གྲུབ་ཐོབ་ཀྱང་འགའ་རེ་འབྱུང་སྟེ་མཆི། །ཆ་ལ་རྣལ་འབྱོར་རས་པ་འདི། །བོད་རྒྱལ་ཁམས་ཙམ་ལ་གྲགས་སུ་མཐོ། །ཁྱེད་བུ་སློབ་བསམ་གྱིན་མོས་པར་མཆི། །ཤོ་གཏམ་སྙན་ཡོད་པ་ཕྱིས་ནས་ཟློ། །ང་རྣལ་འབྱོར་དབྱར་ཁམས་སྙོམས་པར་གདའ། །ཁྱེད་ཡོན་བདག་པ་སྐུ་ཁམས་བཟང་ལགས་སམ། །ཅེས་གསུངས་ནས། ཕ་འོང་དཀར་ལེབ་དེ་སྦྲ་ཙམ་ཞིག་འདུག་པ་དེ། ཞབས་ཀྱིས་རྫིས་ནས་ཇར་ཇིར་ལ་བཏང་ནས་འདུག །ཞབས་
3-3-41a
རྗེས་ཉི་ཤུ་ཙམ་འདུག །ད་ལྟ་དེ་ལ་བྱིན་རླབས་ཆེན་པོ་འདུག་གོ། །དེ་ནས་མར་བྱོན་ནས་ཡང་འཕུར་ནས་བྱོན། ཧེ་བྱམས་ཀྱི་སྟོད་ཀྱི་རི་རྩ་དེར་སྦྲ་དཀར་ཕུབ་ནས་བཞུགས་པ་དང་། དེའི་ནུབ་མོ་སྔགས་རྡོར་མོས་བྱོན་སྐྱེམས་དྲངས་ནས། ད་ལོའི་ཀྱིན་ཐང་ཆེན་པོ་འདི་འདྲ་ལ་རྗེ་བཙུན་སྐུ་ཁམས་བཟང་པོར་བྱོན་པ་དང་། ངེད་བུ་སློབ་རྣམས་ཀྱང་ཤི་ཆད་མེད་པར་མཇལ་བ་ཤིན་ཏུ་དགའ་བས། རྗེ་བཙུན་གྱིས་ཐུགས་ཉམས་སུ་བཞེས་པའི་གདམ་ངག་ཚིག་བཞི་པ་ཅིག་གནང་འཚལ་ཞུས་པས། གནད་ཀྱི་མདོ་དྲུག་མགུར་དུ་བཞེས། དེ་ནས་བཀྲ་ཤིས་སྒང་གི་དཀར་ལེབ་ཕུག་ན་ཞག་བདུན་བཞུགས་སྐད། དེ་ནས་འཕུར་ནས་བྱོན་ཏེ་འབྲུག་གི་ཕུག་མོ་ཆེར་བཞུགས་སྐད། དེ་ནས་སྟོན་གུང་ཐང་དུ་ཕྱིན་པས་རྩས་མ་བྱེད་དུས་སུ། སྟོན་མོ་གཅིག་ལ་སྲུས་པའི་སར། མི་ཅིག་གི་ངོ་ཤེས་ཏེ་མཆོད་གནས་བྱེད་ཟེར་བ་ལ་བྲོས་ནས་མོན་གྱི་རོལ་ལ་གཤེགས་སོ། །ཡང་རྗེ་བཙུན་མོན་ཡུལ་འབྲོ་ཁ་བཞིར་བྱོན་དུས་ན། ལྟད་མོ་བ་མང་པོ་བྱུང་ནས། སྙད་པ་ཏི་སི་རེ་ཟེར་ནས་ལོག་སོང་། མོན་སྐད་ཤེས་པ་ཅིག་ལ་ཅི་ཟེར་དྲིས་པས། མི་ལ་རས་པ་ཟེར་བའི་དགེ་བཤེས་ཆེན་པོ་ཞིག་ཡོད་ཟེར་ཙ་
3-3-41b
ན། གཟུགས་ཀྱང་ཆུང་སེ་བ་ཅིག་ལས་མི་འདུག །ལྟད་མོ་བ་ལ་གསེར་ཀྱང་(ཡང་)མི་སྟེར་བ་འདུག །དེ་འདྲ་ལ་དགོས་པ་ཅི་ཡོད། དགེ་བཤེས་བྱ་བ་བ་རི་ལོ་ཙྪ་བ་ལ་ཟེར་བ་ཡིན། ལྟད་མོ་བ་ལ་གསེར་ཡང་སྟེར་བར་འདུག །ཁོང་རང་ལ་ཡང་ཟངས་དུང་དང་། ཆ་ལང་དང་། ཅ་སོ་ཡང་འདུག་ཟེར་སྐད། ཕྱི་རེས་ཀྱང་མོན་ཡུལ་ལ་བྱོན། བསྙེན་བཀུར་དྲངས་པས། རྗེ་བཙུན་ན་རེ། ན་ནིང་ནི་ཁྱེད་ཚོ་ང་ལ་མ་དད། ད་རེས་བསྙེན་བཀུར་བྱེད་པ་ཅི་ཡིན་གསུངས་པས། ད་རེས་ཁྱེད་སེང་གེ་ལ་ཆིབས་ནས་ནམ་མཁའ་ལ་བྱོན་བྱུང་བ་ལགས་ཟེར་སྐད། འབྲོ་ཁ་བཞི་ཡང་མིད་ལའི་ཡོན་བདག་ཡིན་གསུངས་སོ།། །།
༈ ལྔ་པ། ཉམས་མྱོང་བདེ་བར་ཤར་བའི་ཡོན་ཏན།
ལྔ་པ་ཉམས་མྱོང་བདེ་བར་ཤར་བའི་ཡོན་ཏན་ནི། ཀུ་ཐང་གི་རྐང་མཐིལ་ཕུག་གི་ཤེལ་ཕུག་ནམ་མཁའ་རྫོང་ན་བཞུགས་དུས་སུ། ཡོན་བདག་ཀུན་གྱིས་གདན་འདྲེན་པ་ལ་ཕྱིན་པས། གཡོས་ཆ་ལ་སོགས་གང་ཡང་མེད་པར་བཞུགས་འདུག་པས། གཤེགས་པར་ཞུས་པས་མ་གནང་པར་མགུར་གསུངས་པ། མེ་ཏོག་སྣ་ཚོགས་སྐྱེ་བའི་གནས། །ཤིང་རྣམས་གར་ཐབས་བསྒྱུར་བའི་གནས། །སྦྲང་སྦྲུལ་གཡང་རྩལ་སྦྱོང་བའི་གནས། །དེ་ལྟ་བུའི་དབེན་གནས་ན། །ཇི་ལྟར་
3-3-42a
འདུག་ཀྱང་བདེ་བ་སྟེ། །འདུ་འཛིས་དབེན་ན་ཡོངས་ཀྱང་བདེ། །ངག་ལ་གླེང་བརྗོད་མེད་ན་བདེ། །སྨྲ་བ་ཉུང་ན་ཡོངས་ཀྱང་བདེ། །ཏིང་འཛིན་བྱིང་རྒོད་མེད་ན་བདེ། །སེམས་ཉིད་གསལ་ན་ཡོངས་ཀྱང་བདེ། །ལུས་ལ་གཏུམ་མོ་འབར་ན་བདེ། །དྲང་དྲོ་མེད་ན་ཡོངས་ཀྱང་བདེ། །དབུགས་ལ་འགྲོ་འོང་མེད་ན་བདེ། །འགྱུ་བ་ཁེགས་ན་ཡོངས་ཀྱང་བདེ། །གཉིས་སུ་མེད་པའི་ལྟ་བ་བདེ། །ཐབས་དང་ཤེས་རབ་སྒོམ་པ་བདེ། །ནོར་ལ་འཛིན་ཆགས་མེད་ན་བདེ། །ཞེན་པ་ཐོངས་ན་ཡོངས་ཀྱང་བདེ། །ཐེག་པ་ཆེ་ཆུང་མེད་ན་བདེ། །གཅིག་ཏུ་རྟོགས་ན་ཡོངས་ཀྱང་བདེ། །སྲ་བའི་འབོལ་སྟན་ཐོག་ན་བདེ། །བལ་པོའི་སྲིན་རས་ཐོག་ན་བདེ། །རང་རིག་བདེ་གསལ་སེམས་ལ་བདེ། །འདི་རྣམས་རྟོགས་པའི་སྤྱོད་ཚུལ་ཡིན། །ཅེས་གསུངས་ནས་གཤེགས་པར་མ་གནང་ངོ་།། །།
༈ དྲུག་པ། རྟོགས་པ་ལམ་མཁན་དུ་ཤར་བའི་ཡོན་ཏན།
དྲུག་པ་རྟོགས་པ་ལམ་མཁན་དུ་ཤར་བའི་ཡོན་ཏན་ནི། ཀུ་ཐང་ཆེ་ཡུལ་གྱི་ཁུ་བྱུག་དབེན་པ་རྫོང་ན་བཞུགས་དུས་སུ་མཇལ་བ་རྣམས་ཀྱིས། ལམ་ལ་མ་ཐར་ནས་ནད་པ་འདྲ་ཡང་བྱུང་ནས། ས་ཆ་བདེ་ས་ཞིག་ཏུ་བཞུགས་པར་ཞུ་ཞུས་པས། ཁྱེད་ཚོ་ལ་ལམ་མི་བདེ་ཡང་། ང་ལ་ལམ་མཁན་
3-3-42b
བཟང་པོ་ཡོད་གསུང་། མགུར་བཞེས་པ། རྗེ་བཙུན་བླ་མ་དམ་པ་དེ། །མུན་པ་སེལ་བའི་ལམ་མཁན་ཡིན། །སྐྱོ་དུབ་མེད་པའི་དད་པ་དེ། །བདེ་འགྲོར་འདྲེན་པའི་ལམ་མཁན་ཡིན། །སྐུ་གསུམ་འབྲལ་མེད་ཏིང་འཛིན་དེ། །རྣམ་ཐར་སྐྱོང་བའི་ལམ་མཁན་ཡིན། །དབང་པོ་དྲུག་གི་ཐུག་ཕྲད་དེ། །རྣམ་རྟོག་སྦྱོང་བའི་ལམ་མཁན་ཡིན། །འདུ་འཛིས་དབེན་པའི་དབེན་པ་དེ། །བསམ་གཏན་སྦྱོང་བའི་ལམ་མཁན་ཡིན། །གྲང་དྲོ་མེད་པའི་རས་གོས་དེ། །ཞེན་པ་སྤོང་བའི་ལམ་མཁན་ཡིན། །ལམ་མཁན་དྲུག་གི་སྣ་དྲངས་ནས། །མཁར་གྱི་རྫོང་ལ་འཇུག་ཀྱང་འཚལ། །འཇིགས་ཀྱིས་དོགས་ནས་མཁར་ཞིག་རྩིགས། །མཁར་ནི་ཆོས་ཉིད་སྟོང་པའི་མཁར། །ད་ཡོང་འཇིགས་སྙམ་མི་བགྱིད་དོ། །སྐྱོ་ཡིས་དོགས་ནས་གྲོགས་ཅིག་བཙལ། །གྲོགས་ནི་བདེ་སྟོང་རྒྱུན་གྱི་གྲོགས། །ད་ཡོང་སྐྱོ་སྙམ་མི་བགྱིད་དོ། །འཁྱགས་ཀྱིས་དོགས་ནས་གོས་ཅིག་བཙལ། །གོས་ནི་གཏུམ་མོ་ལྷུན་གྲུབ་གོས། །ད་ཡོང་འཁྱགས་སྙམ་མི་བགྱིད་དོ། །ནོར་གྱིས་དོགས་ནས་ལམ་ཞིག་བཙལ། །ལམ་ནི་འོད་གསལ་ཡངས་པའི་ལམ། །ད་ཡོང་ནོར་སྙམ་མི་བགྱིད་དོ། །ཅེས་གསུངས་སོ།། །།
༈ བདུན་པ། སྣང་བ་མཐུན་རྐྱེན་དུ་ཤར་བའི་ཡོན་ཏན།
བདུན་པ་སྣང་བ་མཐུན་བརྐྱེན་(རྐྱེན་)དུ་ཤར་བའི་ཡོན་ཏན་ནི། སྐྱིད་པ་ཉི་མ་རྫོང་ན་བཞུགས་དུས་སུ། 
3-3-43a
བུ་སློབ་ཀུན་གྱིས་འདིར་མཐུན་རྐྱེན་གང་ཡང་མི་འཛོམ་པས། འཛོམ་ས་ཅིག་ཏུ་གཤེགས་པར་ཞུ་ཞུས་པས། མགུར་གསུངས་པ། ཆུ་ཤིང་གང་ན་ཡོད་ཙ་ན། །གཡོག་པོ་ཟེར་བ་རྫུན་དུ་གདའ། །ཟ་རོགས་འདིས་ཀྱང་དགོས་རྒྱུ་ཆུང་། །སྐྱེ་འགྲོ་སྒྱུ་མར་རྟོགས་ཙ་ན། །སྒྲ་ཚད་ཟེར་བ་རྫུན་དུ་གདའ། །ཚོགས་སོགས་འདིས་ཀྱང་དགོས་རྒྱུ་ཆུང་། །སེམས་ཀྱི་རིན་ཆེན་གཏེར་རྙེད་ནས། །ནོར་རྫས་ཟེར་བ་རྫུན་དུ་གདའ། །གསེར་དངུལ་འདིས་ཀྱང་དགོས་རྒྱུ་ཆུང་། །སྒོམ་པ་རང་བྱུང་ཤར་ཙ་ན། །དུག་ལྔ་བྱ་བ་རྫུན་དུ་གདའ། །རྣམ་རྟོག་འདིས་ཀྱང་དགོས་རྒྱུ་ཆུང་། །གཏུམ་མོ་ལུས་ལ་འབར་ཙ་ན། །གོས་ལག་ཟེར་བ་རྫུན་དུ་གདའ། །སྣལ་གོས་འདིས་ཀྱང་དགོས་རྒྱུ་ཆུང་། །ཅེས་(ཞེས་)གསུངས་སོ།། །།
༈ བརྒྱད་པ། ཉེ་འབྲེལ་ཆོས་བརྒྱད་རང་གྲོལ་བའི་ཡོན་ཏན།
བརྒྱད་པ་ཉེ་འབྲེལ་ཆོས་བརྒྱད་རང་གྲོལ་བའི་ཡོན་ཏན་ནི། བྲོད་ཕུག་ན་ཟེར་ཏེ་མིན། བྲག་དཀར་སྤོ་མཐོ་རྡོ་རྗེ་རྫོང་ན་བཞུགས་དུས་སུ། གྲྭ་པ་བཅོ་ལྔ་ཙམ་ཡོད་ཙ་ན། སྔར་གྱི་ཨ་ནེ་དེས། གཡག་ཡུ་བོ་ཅིག་ལ་ཤ་མར་ཐུད་གསུམ་མང་པོ་བཀལ་ནས་གཡོག་ཅིག་ཁྲིད་ནས། མོ་རང་བོང་བུ་ཅིག་ལ་ཞོན་ནས་མཇལ་དུ་བྱུང་བ་ལ། ལྕམ་མོ་པེ་ཏ་ན་རེ་ངས་མ་ཀི་ལ་འཐབ་དུ་(ཏུ་)འགྲོ་བ་ཡིན། སྔོན་ཅི་ཡང་མེད་ཙ་ན་ཉེ་འབྲེལ་མེད་པ་ལ། ད་མི་དགོས་ཟེར་ནས་
3-3-43b
མཇལ་དུ་མ་སྟེར་བ་ལ། རྗེ་བཙུན་གྱིས་ཐབས་མཛད་ནས། ཡོལ་བས་བར་མཛད་ནས། ཕྱིར་བཞག་སྟེ་མགུར་གསུངས་པ། སྔོན་རྒྱ་ལྔ་ཡུལ་གྱི་རྩ་དོན་དུ། །ཉེ་འབྲེལ་དགྲར་ལངས་ཀྱི་སྡུག་སྨད་གསུམ། །སྲན་ཕུང་བེར་ཀས་གཏོར་བ་བཞིན། །འདྲིས་མེད་ཡུལ་དུ་འཁྱམས་དུས་སུ། །ཨ་ནེ་ཞེས་པ་ཅིག་ཀྱང་མེད། །བྲག་དཀར་སྤོ་མཐོ་དགོན་པ་རུ། །བཀྲེས་སྐོམ་ལྕག་གིས་བསྐུལ་བའི་ཚེ། །ཨ་ནེ་བཙལ་ཡང་མ་རྙེད་པར། །སྤྲང་པོ་བླ་ཚོང་ཤོག་ཅིག་ཟེར། །ཚུགས་ཤིང་སྟོན་ནས་དེད་དུ་བྱུང་། །ཨ་ནེའི་མིང་ཅན་བདུད་མོར་འདུག །གསུངས་པས། མོ་ན་རེ་བདེན་ཟེར་ནས་ངུ་ཡིན་སོང་སྐད། ཨ་ནེ་མཇལ་བ་དེ། ལ་ལས་སེ་ཤོད་མན་ཤིང་གི་གྲོད་ཕུག་ཡིན་ཟེར། ལ་ལས་བྲག་དཀར་རྡོ་རྗེ་རྫོང་ན་ཡིན་ཟེར་ཏེ་དེ་ཡང་མེད། སྙ་ནམ་གསེར་ཕུག་གིས་སྟག་གི་ཨ་ནེ་མེད་ཕུག་ཟེར་བ་དེ་ཡིན་གསུང་། གཏིང་ནས་ཀྱང་ཐུགས་རྗེས་གཟུང་སྟེ་ཡང་ཡང་མཇལ་གསུང་།། །།
༈ དགུ་པ། ཆོས་བརྒྱད་རང་གྲོལ་བའི་ཡོན་ཏན།
དགུ་པ་ཆོས་བརྒྱད་རང་གྲོལ་བའི་ཡོན་ཏན་ནི། དེའི་དུས་སུ་སེ་བན་རས་པ་ལ་སོགས་པ་བུ་སློབ་རྣམས་ཀྱིས་དགོན་པ་གཅིག་གཟུང་ནས། ལོ་ཞིང་དང་བ་རེ་ཡང་བྱེད་པར་ཞུ་ཞུས་པས། རྗེ་བཙུན་གྱིས་མགུར་གསུང་པ། ཞེན་པ་མེད་པའི་ནགས་ཚལ་དུ། །སྒྱུ་མ་ལུས་ཀྱི་ཞིང་པོ་
3-3-44a
ཆེར། །སེམས་ཉིད་རིན་ཆེན་བ་མོ་བཞོ། །ངོ་བསྲུངས་མེད་པའི་ཡོན་བདག་སྐྱོངས། །ཆོས་བརྒྱད་དགོན་པའི་རྟ་མི་རྒྱུག །ཅེས་གསུང་ནས་མ་གནང་ངོ་། །དེར་སེ་བན་རས་པ་ལ་སོགས་པས་འོ་ན་ལྡོམ་བུ་བྱེད་དམ་ཞུས་པས། རྒྱལ་ཁམས་བ་ཞོ་བཞིན་དུ་སྐྲོགས། །སྐྱིད་སྡུག་སྲང་ཁ་མཐོ་དམན་མཉམ། །མི་སྤྱོད་ཚོད་མའི་ཚ་བཞིན་མྱངས། །ད་ཡོང་ལྡོམ་བུ་མི་བགྱིད་དོ། །གསུངས་སོ།། །།
3-3-44b
འཁྲུད་པའི་དུས་ན། དངོས་སུ་ཁྲུས་བྱས་ལམ་བསྟན་པ་སོགས་ཟིན་པ་དང་། རྗེ་བཙུན་ལ་ཕྱག་འཚལ་ནས་བཀའ་དྲིན་ཆེ་ལགས་སོ་ཟེར་ནས་སོང་བ་དང་། བོན་པའི་བུ་སྨད་ལ་སོགས་པ་ངོ་མཚར་སྐྱེས་པ་དང་། པེ་ཏ་ངོ་ནག་ཏིང་སོང་བས་ཅི་ཉེས་བྱས་པས། མིང་པོ་ལ་ཁྲེལ་མེད། རང་རེའི་ཕ་མ་དམྱལ་བར་བཞག་ནས། མི་གཞན་ལ་འདི་ལྟར་མཛད་པ་ཟེར་བའི་ལན་དུ། མགུར་གསུངས་པ། འཆི་བདག་དབང་པོ་ཕ་མ་ཡི། །ལུས་ཀྱི་ཤིང་དོར་སེམས་ཀྱིས་བྱས། །འདྲིས་ཤེས་མེད་པའི་རྒྱལ་ཁམས་སུ། །ཅིག་པུར་གཉིས་མེད་འཁྱམས་གྱུར་པས། །ཏིང་ངེ་འཛིན་གྱིས་དགུག་གཞུག་བགྱིས། །སྒྱུ་མ་ལུས་ཀྱི་ཧོཾ་ཁུང་དུ། །འགྲོ་དྲུག་སྐྱེ་བའི་བུད་ཤིང་ལ། །སྐྱེ་བ་མེད་པར་མེ་བཅུག་ནས། །རོ་ནི་གསལ་སྟོང་ངང་དུ་སྦྱངས། །བདུན་ཚིག་(ཚིགས་)སྣང་སྟོང་ཉིད་དུ་བྱས། །ཚ་ཚ་སྐྱེ་བ་མེད་པར་བཏབ། །ཟས་ནི་བདེ་བ་ཆེན་པོར་གཏད། །ལམ་ནི་གཉིས་སུ་མེད་པར་བསྟན། །བསྔོ་བ་ཕྱག་རྒྱ་ཆེན་པོ་བྱས། །སྨོན་ལམ་བརྗོད་དུ་མེད་པར་བཏབ། །ཕ་མའི་དྲིན་ལན་འཁོར་ཏེ་མཆི། །གསུངས་སོ།། །།
༈ བཅུ་གཅིག་པ། ལྷའི་ལྷར་གྱུར་པའི་ཡོན་ཏན།
བཅུ་གཅིག་པ་ལྷའི་ལྷར་གྱུར་པའི་ཡོན་ཏན་ནི། ཉིན་ཅིག་འགྲོན་པོ་གཅིག་བྱུང་ནས། རྗེ་བཙུན་དྲིན་དུ་སྐུ་ཁམས་གསེང་བ་ལ་གཤེགས་པ་དེ། སྤྱན་འདྲེན་
3-3-45a
པ་ལ་བྱོན་པས། རས་ངོ་མཚར་ཅན་ཅིག་སྐུ་ལ་གསོལ། ཨ་རུ་རའི་རྒྱལ་པོ་ཅིག་ཕྱག་ན་སྣམས་འདུག་པ་ལ། རས་ཆུང་པས་འདི་རྣམས་གང་ནས་བྱུང་ཞུས་པས། མིའི་བདག་པོར་རིགས་ཀྱི་རྗེ། །ཆོས་རྒྱལ་ཆོས་ཀྱི་སྤྱན་ཅན་གྱིས། །ཤིང་བལ་འཇམ་གྱི་རས་གོས་འདི། །གཏུམ་མོ་ལྷུན་གྲུབ་གྲོགས་སུ་ཕུལ། །གསུང་སྟེ། བལ་པོའི་རྒྱལ་པོ་ཆོས་ཀྱི་སྤྱན་ཅན་གྱིས། །བལ་པོ་འཐིལ་ནས་གཟིགས་སྟངས་ཀྱིས་ཕུལ་བ། །བླ་མ་མི་ལ་རས་པས་གཟིགས་སྟངས་ཀྱིས་བོད་ནས་བླངས་ཟེར། ང་ལྷའི་ལྷ་ཡིན་གསུངས་སོ། །གཞན་ཡང་དེའི་དུས་ན་ཡོངས་སུ་གྲགས་པའི་གྲུབ་ཐོབ་བཞི་བྱ་བ་ཡིན་ཏེ། རྒྱ་གར་ནས་བྱོན་པའི་དམ་པ་རྒྱ་གར། བལ་པོ་ཤི་ལ་བྷ་རོ། སྟོད་མངའ་རིས་ན་བུ་རངས་ཚེམ་ཆེན། སྨད་ན་མི་ལ་རས་པ་དང་བཞི་ཡོད་པ་ལ། ཤི་ལ་བྷ་རོ་དེ། རྒྱ་གར་དྷརྨ་བྷོ་དྷིར་བྱས་ནས། བོད་ཀྱི་མི་ལ་རས་པ་ལ་ཕྱག་ཅིག་འཚལ་དགོས་གསུངས་ནས། བལ་པོའི་རྫོང་ནས་བོད་དུ་འགྲོ་ཟེར་འདུག་པ་ལ། རྒྱ་བོད་ཐམས་ཅད་ཞལ་ལྟ་བ་ལ་བལ་པོ་རྫོང་དུ་འཚོགས་པས། ཡོན་བདག་དང་སློབ་མ་རྣམས་ཀྱིས་མི་ལ་རས་པ་ལ་མི་ཐམས་ཅད་འགྲོ་བར་འདུག་པས། འོ་སྐོལ་ཡང་གཤེགས་པ་ཞུ་བྱས་པས། རྗེ་བཙུན་གྱིས་ང་རྒས་
3-3-45b
པས་མི་འགྲོ་གསུངས་པས། མི་རྣམས་ན་རེ་མི་ལ་རས་པ་ཆོས་པ་བཟང་ཟེར་ཏེ། ཆགས་སྡང་བྱེད་པར་འདུག་ཟེར་ནས་བསྐུར་པ་བཏབ་པས། སེ་བན་རས་པ་ལ་སོགས་པ་རྣམས་ཀྱིས་རྗེ་བཙུན་ལ་འདི་སྐད་ཟེར་བས། རང་རེ་ཡང་གཤེགས་པར་ཞུ་ཞུས་པས། མིད་ལའི་ཞལ་ནས། རྒྱ་གར་དྷརྨ་བྷོ་དྷེ་ལ་ཕྱག་ལེན་དུ་འགྲོ་གསུང་། སེ་བན་རས་པ་ལ་སོགས་བུ་སློབ་རྣམས་ཀྱིས། འོ་ན་ཞག་འགའ་བཞུགས་ནས་གསེར་འདྲ་ཁྱེར་ནས་བྱོན་ནམ་ཞུས་པས། མིད་ལའི་ཞལ་ནས། གསེར་འདོད་ན་ངེད་གཉིས་ཀ་གྲུབ་ཐོབ་མིན་གསུང་ནས་བལ་པོར་བྱོན་པས། ཁྲོམ་རྣམས་མི་ལ་བྱོན་ཟེར་བ་དང་། འུར་ནས་བྱུང་བ་དང་། རྗེ་བཙུན་འཁྱོགས་ནས་རྒྱ་གར་ངོས་སུ་འཕུར་ནས་བཞུད་པ་དང་། དྷརྨ་བྷོ་དྷི་ཁྲོམ་བསེབ་ནས་འཕུར་ནས་མདུན་དུ་བྱོན་པ་དང་། ཡང་མིད་ལ་རས་པས་བོད་ངོས་སུ་འཕུར་ནས་བྱོན་པས་ཤི་ལ་བྷ་རོ་ནམ་མཁའ་ལ་འཕུར་ནས། མིད་ལ་རས་པའི་མདུན་དུ་བྱོན་ནས། བར་སྣང་ལ་ཕྱག་འཚལ་བ་དང་། མི་ལ་རས་པས་ཕྱག་ལན་མ་བྱས། དྷརྨ་བྷོ་དྷེའི་ཞལ་ནས། མི་ལ་རས་པ་བཟང་བར་འདུག་བྱ་བར་གྲགས་སོ། །དེར་མི་རྣམས་ཀྱིས་བསམ་པ་ལ། གྲུབ་ཐོབ་གཉིས་དང་མཇལ་བས་ད་ཆོས་ཞུ་ཙམ་ན། དྷརྨ་བོ་དྷི་འཕུར་ནས་རྒྱ་གར་དུ་གཤེགས། མིད་ལ་རས་པ་
3-3-46a
འཕུར་ནས་བོད་ན་ཕུར་བྱོན་པས། རྗེ་བཙུན་ལ་མང་ཆུང་གི་ཡོན་བདག་རྣམས་ཀྱིས་སྣ་ལེན་བྱས་ནས། མི་ལ་ལ་དྷརྨ་བོ་དྷིའི་ལོ་རྒྱུས་དྲིས་ནས། ཕྱག་ལན་མི་མཛད་པ་ཅི་ཡིན་བྱས་པས། ལན་ལ་རེ་ན་གྲུབ་ཐོབ་མིན། གསུངས་ནས་མགུར་བཞེས་པ། ཡོངས་བལ་པོ་ཡུལ་ཀྱི་ལྗོངས་གསེབ་ཏུ། །བོད་ཀྱི་མི་ལ་རས་པ་ལ། །རྒྱ་གར་དྷརྨ་བྷོ་དྷི་ཡིས། །སྒྱུ་མ་ལུས་ཀྱིས་ཕྱག་བྱས་ནས། །ཟུང་འཇུག་ཐལ་སྦྱར་པུས་བཙུགས་ཏེ། །སྐུ་ཁམས་ཕྱག་རྒྱ་ཆེན་པོ་དྲིས། །བརྗོད་དུ་མེད་པའི་གྲོང་ཁྱེར་ན། །མི་ལ་དབྱར་ཁམས་སྙོམས་པར་མཆི། །གཉིས་སུ་མེད་མེད་པའི་དགོན་པ་ན། །རྣལ་འབྱོར་སྐུ་ཁམས་བདེའམ་བྱས། །གསུངས་པས། དེ་དུས་མི་རྣམས་མེད་ན། དྷརྨ་བྷོ་དྷི་ཁོང་རིང་ཐུང་གི་ཟླ་བ་ཅིག་གམ་ཕྱེད་སྡད་པ་ཡིན་ཏེ་གསུངས་སོ།། །།
༈ བཅུ་གཉིས་པ། རྩོད་པས་མི་རྫི་བའི་ཡོན་ཏན།
བཅུ་གཉིས་པ་རྩོད་པས་མི་རྫི་བའི་ཡོན་ཏན་ནི། རྗེ་བཙུན་གུང་ཐང་ན་བཞུགས་པའི་དུས་སུ། གྲྭ་པ་དང་བསྙེན་བཀུར་མང་དུ་བྱུང་བ་ལ། སྟོན་པ་དར་བློ་བྱ་བ་དང་པོ་མཚན་ཉིད་ཉན། དེ་ནས་བཀའ་གདམས་པ་བྱས་པ་ཞིག་ཡོད་པ་ལ་བག་རེ་གནོད་པ་ཅིག་བྱུང་སྟེ་ཕྲག་དོག་སྐྱེས་ནས་སྡིག་པ་བག་རེ་སོག་པ་ཅིག་ཡོད་པས། ཉིན་ཞིག་ཤ་མར་ཁྱེར་ཏེ། ཕྱག་རྟེན་བྱས་ནས་མཇལ་དུ་བྱུང་བས། 
3-3-46b
རྗེ་བཙུན་གྱིས་ཕྱག་རྣལ་དུ་མ་བླངས་པས། ཁོང་ན་རེ། ཁྱེད་གཟུགས་ནས་རྣམ་མཁྱེན་གྱི་བར་གྱི་ཆོས་རྣམས་རང་ཇི་ལྟར་འདོད། ཕ་རོལ་ཏུ་ཕྱིན་པ་བཅུ་ཉམས་སུ་ཇི་ལྟར་ལེན། ཟེར་ནས་བགྲོ་གླེང་བྱེད་དུ་བྱུང་བ་ལ། རྗེ་བཙུན་གྱི་ལན་ལེགས་པོ་མ་ཐེབས་པ་དང་། ཁོང་ན་རེ་ཐོས་བསམ་སྒོམ་གསུམ་གང་ཡང་མ་བྱས་པའི་རྨོངས་པ་མགོ་བོ་རེ་ནག་གི་གཏུམས་པ་ཅིག །མི་ནག་པའི་དད་ཟས་གཤིན་ཟས་ཐམས་ཅད་ཆུད་གསན་ཟེར་ནས། རྗེ་བཙུན་བརྡུངས་ཞལ་དུ་ས་བཏབ་པ་ལ། འཁོར་རྣམས་ན་རེ། བརྡུང་ལེན་བྱེད་དགོས་ཟེར་བ་ལ་མ་བརྡུང་པར་རས་ཆུང་པས་ངའི་རམ་བུ་འཐེན་ཅིག་གསུང་ནས། མགུར་བཞེས་པ། སེར་སྣའི་མདུད་པ་མ་ཁྲོལ་བར། །སྦྱིན་པ་བཏང་བས་ཅི་ལ་ཕན། །རང་སེམས་གཡོ་སྒྱུ་མ་སྤངས་པར། །ཚུལ་ཁྲིམས་བསྲུངས་པས་ཅི་ལ་ཕན། །ཚིག་རྩུབ་མཚོན་ཆ་མི་ཐུབ་པའི། །བཟོད་པའི་ཕུབ་ཆུང་ཅི་ལ་ཚུགས། །འཁོར་བའི་ལམ་འཕྲང་མི་ཆོད་པའི། །བརྩོན་འགྲུས་རྟ་ཕོ་ཅི་ལ་རྒྱུག །གང་སྣང་ཆོས་སུ་མ་ཤེས་པའི། །བསམ་གཏན་བསྒོམ་པས་ཅི་ལ་ཕན། །ངར་འཛིན་སྡོང་པོ་མི་ཆོད་པའི། །ཤེས་རབ་རལ་གྲིས་ཅི་ཞིག་གཅོད། །རང་སེམས་དུག་སྦྲུལ་མི་ཟིན་པའི། །ཐབས་ཀྱི་ལྕགས་ཀྱུས་ཅི་ཞིག་འཛིན། །ངར་
3-3-47a
འཛིན་མགོ་བོ་མ་ཐུལ་བའི། །སྟོབས་ཀྱི་ཐོ་བས་ཅི་ཞིག་བརྡུང་། །བྱ་སྤྱོད་ཚོགས་སུ་མི་འགྱུར་བའི། །སྨོན་ལམ་བཏབ་པས་ཅི་ཞིག་ཕན། །རང་སེམས་ངོ་བོ་མི་འཕྲོད་པའི། །ཡེ་ཤེས་སྐྱེས་པས་ཅི་ལ་ཕན། །སྒོམས་ཏེ་སངས་རྒྱས་མ་འཚོལ་བར། །ཐོས་པ་ཆེ་བས་ཅི་ལ་ཕན། །ཆ་ལ་མ་སྒོམས་གྱི་ནར་འཁྱམས། །གསུངས་པས་དད་ནས། མིས་ཟེར་བ་ཡང་མི་བདེན་པ་འདུག་ཟེར་ནས། ཆོས་ཞུས་ཏེ་བསྒོམས་པས། བསྒོམ་བཟང་པོ་སྐྱེས་ཏེ་སུ་ལ་ཡང་མི་སྨྲ་བ་ཅིག་བྱུང་ངོ་།། །།
༈ བཅུ་གསུམ་པ། ཡེ་ཤེས་སྒྲོན་མེ་བལྟམས་པའི་ཡོན་ཏན།
བཅུ་གསུམ་པ་ཡེ་ཤེས་སྒྲོན་མེ་བལྟམས་པའི་ཡོན་ཏན་ནི། རྗེ་བཙུན་གྲོད་ཕུག་ན་བཞུགས་དུས་སུ། རས་ཆུང་པ་ལ་ཆོས་ངོ་མཚར་ཅན་ལྔ་ཡོད་པ་དེ་ཁྱོད་ཀྱིས་རྒྱ་གར་དུ་ལེན་ནུས་སམ་གསུངས། བླ་མས་སོང་གསུངས་ན་ནུས་ལགས་ཞུས་པས། འོ་ན་ཁྱོད་རང་ཡང་གསེར་སོགས། ངས་ཀྱང་བསགས་གིས་གསུངས་ནས་བསགས་པས། རྗེ་བཙུན་ནི་གསེར་བཞེས་གྱིན་འདུག་ཟེར་ནས། གསེར་འབུལ་བ་མང་པོ་བྱུང་ནས། རས་ཆུང་པ་རྒྱ་གར་དུ་གཏོང་བྱས་པས། མི་རྣམས་ན་རེ་ཐོས་པ་འདི་ཡང་བག་རེ་དགོས་པ་ཅིག་ཡིན་ཚོད་དུ་འདུག །མི་ལ་ཡང་སྟོན་པ་དར་བློའི་རྩོད་པ་མ་ཐུབ་པས། ད་རས་ཆུང་པ་རྒྱ་གར་དུ་རིག་པ་སློབ་ཏུ་གཏོང་
3-3-47b
པར་ཡོད་པ་འདུག་ཟེར་ནས་འཕྱའ་བ་ལ། བུ་སློབ་རྣམས་ཀྱིས་རས་ཆུང་པ་མི་གཏོང་བར་ཞུས་པས། མགུར་གསུངས་པ། ཐོས་ཆུང་རྩོད་པས་ཕམ་པ་དང་། །ཉམས་མྱོང་ཞན་ཅིང་ཐེ་ཚོམ་སྐྱེས། །རྣལ་འབྱོར་ལྡོག་པའི་འཕྲང་བཞི་ཡིན། །ང་དང་པོ་ཐུག་ས་མ་ནོར་བས། །ནཱ་རོ་པ་ཡི་རྒྱུད་ལ་བཏུགས། །བར་དུ་བསྒོམ་པ་མ་ནོར་བས། །བྲག་དཀར་སྤོ་མཐོའི་རྫོང་ལ་བསྒོམས། །ཐ་མར་ལྡོམས་ས་མ་ནོར་བས། །འདྲིས་མེད་བཤེས་མེད་ཡུལ་དུ་ལྡོམས། །གཅིག་ཏུ་གསང་སྔགས་ཐབས་ལམ་ཆེ། །གཉིས་སུ་བླ་མའི་བྱིན་རླབས་ཆེ། །གསུམ་དུ་ང་རང་སྒོམ་སྲན་ཆེ། །དེ་ལ་ཆེ་བ་རྣམ་གསུམ་མཛོད། །གཅིག་ཏུ་མཁས་ལ་ཞབས་ཏོག་དགོས། །གཉིས་སུ་བླ་མའི་གདམས་ངག་དགོས། །གསུམ་དུ་རང་ལ་ཤེས་རབ་དགོས། །དེ་ལ་དགོས་པ་རྣམ་གསུམ་མཛོད། །གཅིག་ཏུ་ཡོ་བྱད་སྣ་ཚོགས་འདུ། །གཉིས་སུ་མཆེད་ལྕམ་སྣ་ཚོགས་འདུ། །གསུམ་དུ་མཁའ་འགྲོ་སྣ་ཚོགས་འདུ། །དེ་ལ་འདུ་བ་རྣམ་གསུམ་མཛོད། །གཅིག་ཏུ་ལུང་དང་གདམས་ངག་མཐོང་། །གཉིས་སུ་བདེ་བ་དངོས་མེད་མཐོང་། །གསུམ་དུ་སྣང་བ་ཧད་པོར་མཐོང་། །དེ་ལ་མཐོང་བ་རྣམ་གསུམ་མཛོད། །སྤྱོད་པ་གླང་ཆེན་ཐབས་སུ་གཅེས། །རང་རིག་བདེ་གསལ་སེམས་ལ་
3-3-48a
གཅེས། །ཕྱག་རྒྱ་མཚན་ལྡན་གྲོགས་སུ་གཅེས། །དེ་ལ་གཅེས་པ་རྣམ་གསུམ་མཛོད། །གཅིག་ཏུ་ཆོས་ཉིད་ཀློང་དུ་ཆུད། །གཉིས་སུ་སྲོག་རྩོལ་གནད་དུ་ཆུད། །གསུམ་དུ་ཆོས་ལ་བྱན་པོ་ཆུད། །དེ་ལ་ཆུད་པ་རྣམ་གསུམ་མཛོད། །དེ་ནས་རྣལ་འབྱོར་མི་ལྡོག་ཀྱང་། །བླ་མ་སངས་རྒྱས་འདི་སྐད་གསུང་། །རིག་པ་ཡེ་ཤེས་སྒྲོན་མེ་ཅིག །རྩ་རླུང་དྲ་མིག་འཁོར་ལོ་གཉིས། །རོ་སྙོམས་ཕྱིའི་མེ་ལོང་གསུམ། །རང་གྲོལ་ཕྱག་རྒྱ་ཆེན་པོ་བཞི། །བདེ་ཆེན་གསུང་གི་རིན་ཆེན་ལྔ། །ནཱ་རོའི་སློབ་པ་ཡོད་སྲིད་པས། །ང་ན་སོ་རྒས་པས་མ་ཐོན་གྱིས། །རས་ཆུང་མ་འདུག་རྒྱ་གར་སོང་། །གསུང་ནས། ཆོས་རྣམ་ལྔ་བླངས་སོ།། །།
༈ བཅུ་བཞི་པ། སྤྱོད་པས་ཆེ་བའི་ཡོན་ཏན།
བཅུ་བཞི་པ་སྤྱོད་པས་ཆེ་བའི་ཡོན་ཏན་ནི། རྗེ་བཙུན་གུང་ཐང་ན་བཞུགས་དུས་ན། རྫིང་བུ་རྒྱན་གྱི་ཆུ་མིག་པ་བྱ་བའི་སྡེ་པ་ཅིག་གི་སྡིག་པ་སོགས། རས་པ་བྱུང་ཚད་རྡོ་ཁ་ལ་འདོད་པ་ཅིག་ཡོད་པ་ལ། ཉིན་ཅིག་རྗེ་བཙུན་དེར་གཤེགས་གསུང་བ་ལ། བཤོལ་བཏབ་ཀྱང་མ་གསན་པར་གཤེགས་པས། སྒོ་རྩར་སླེབ་པ་དང་། གཏོར་སྐྱེལ་དང་འཕྲད་ནས་མི་ལ་འདུག་བྱས་པས། ཐམས་ཅད་ཀྱིས་བོས་ཕུལ་བ་རྡེག་པ་ལ་སོགས་བྱས་ཏེ། ཁྱོད་ལ་ཟ་མི་དགོས་ན་འདིར་སྡོད་གཅིག་
3-3-48b
ཟེར་ཏེ། ཁྱིམ་ཅིག་དུ་(ཏུ་)བཞག་ནས་སྒོ་ལ་ལྕགས་བཅུག་པས། ཕྱིར་བྱོན་འདུག་པས། ཡིད་མ་ཆེས་ནས། ཁྱིམ་དུ་གཙང་ཁང་གི་ཀ་བ་ལ་བཅིངས་ནས། ལྕགས་བཅུག་བཞག་པས། བཅིང་མཁན་དེ་རང་ཆིང་གི་བཅིངས་ནས་འདུག་པས། ངོ་མཚར་སྐྱེས་པ་དང་། ང་རང་མ་དགའ་ན་ཁྱེད་ཀྱིས་འཕུལ་བས་མི་འཕུལ་གསུང་བས། ཐམས་ཅད་ལོག་ནས་ཕུལ་བས་མ་འཕུལ་བས། ཇི་ལྟར་ལགས་ཞུས་པས། ཤེལ་སྒོང་བར་དོའི་སེམས་བཞིན་དུ། །སྒྲིབ་མེད་ཐོགས་བརྟུགས་ཀུན་དང་བྲལ། །བཟུང་མི་ཟན་ལ་བཏང་མི་ཐོངས། །སྐར་མདའ་ལྟ་བུའི་སྤྱོད་འགྲོས་ཀྱིས། །མ་དད་སེལ་ཕྱིར་བྱས་པ་ཡིན། །ད་ནི་སྤྱོད་པ་མི་བྱེད་དོ་གསུང་། གཞན་སྐབས་གཅིག་ལ། མི་རྣམས་ཀྱི་སྣང་ངོ་ལ་གཉི་(ཉི་)མ་གཅིག་ལ། བྲིན་དུ་སྔོན་(རྔོན་)པས་ནགས་ལ་མེ་ཤོར་བའི་གསེབ་ན་ཚུར་བྱོན་པ་དང་། སྙ་ནམ་དུ་ཟམ་སྡིངས་ནས། ཆུ་ནང་དུ་འཕུར་བ་དང་། གྲོད་ཕུག་ཏུ་ཐག་རིངས་ཀྱི་སྒོམ་ཆེན་པ་ལ་ཆོས་བཤད་པ་ལ་སོགས་པ་མཐོང་སྣང་མི་འདྲ་བ་མང་དུ་བྱུང་བ་ལ། ཐམས་ཅད་ཀྱི་ངོ་མཚར་ཆེ་ནས་ཆོས་སྟོན་ཅིག་ཞུས་པས། མེས་མི་ཚུགས་ལ་ཆུས་མི་ཁྱེར། །སྤྱོད་པ་གླང་ཆེན་འགྲོས་ཀྱི་གར། །དག་པའི་འགྲོ་རྣམས་ཐམས་ཅད་ལ། །ཐ་དད་སྒྲ་ཡང་དེ་ཉིད་མིན། །ཅེས་གསུངས་སོ།། །།
3-3-49a
༈ བཅོ་ལྔ་པ། ནུས་པ་ཆེ་བའི་ཡོན་ཏན།
བཅོ་ལྔ་པ་ནུས་པ་ཆེ་བའི་ཡོན་ཏན་ནི། བྲིན་གྱི་ལ་སོ་དགོན་པ་དེར། ཉིན་མོ་ཡང་སུས་ཀྱང་འགྲོ་མི་འཕོད་པའི་བྲག་ཕུག་ཅིག་དུ་(ཏུ་)གཤེགས་གསུངས་པས། འདྲེ་གཉན་པའི་ལོ་རྒྱུས་ཞུས་ནས་གྲོས་བཏབ་པའི། མ་གསན་པར་རས་ཆུང་པ་དང་དཔོན་སློབ་གཉིས་གཤེགས་སོང་བས། ས་སྲོས་པ་དང་། བུད་མེད་ཆེན་མོ་ཅིག་བྱུང་ནས། ངའི་འདི་ན་སུ་ཡོད་པ་ཟེར་བ་དང་། ཐུགས་དམ་གཏད་པས་བྲོས་ནས་སོང་། དེ་ནས་བྲིན་གཉའ་ནམ་གཉིས་ཀྱི་འདྲེ་རྣམས་བོས་ནས་བྱུང་བས་ཀྱང་མ་ཐུབ་ནས། འཛམ་བུ་གླིང་གི་འདྲེ་རྒྱལ་པོ་གཉིས་ཀྱིས་གཙོ་བྱས་པའི། རྒྱལ་པོ་དང་ཐེ་རང་ཟད་མེད་ཅིག་བྱུང་ནས་གྲོས་བྱས་པས། དེ་གཉིས་ན་རེ། དང་པོ་སོང་བྱ། དེ་ནས་མ་ཉན་ན་དམ་བླངས་ལ། དེ་ལ་མ་ཉན་ན་གཟོད་དམག་དྲོངས་ཟེར་བ་ལ། ཁ་ཅིག་བྱུང་བས། ཁྱེད་འདིར་མ་བཞུགས་པར་བཞུད། མི་བཞུད་ན་འདྲེ་མོ་འདི་ལ་གནས་ཅིག་བླང་ཟེར་བས། རྗེ་བཙུན་གྱིས་མ་གནང་བར། འདྲེ་ཚན་གཉིས་འདུག་སའི། ནག་པོའི་ཕྱོགས་རྣམས་ཀྱིས་དམག་དྲངས་པས་མ་ཚུགས། དཀར་པོའི་རྒྱལ་པོ་དེ་ཡོངས་ནས། ངེད་རྣམས་ལ་ཆོས་ཀྱང་ཞུ། དམ་ཀྱང་བླང་བར་ཞུ་ཞུས་པས། གནང་ནས་སྐྱབས་འགྲོ་སེམས་བསྐྱེད་དང་ཆོས་
3-3-49b
གསུངས་ནས། ད་ཕན་ཆད་ལ་སོ་འདི་རུ་སུ་བྱུང་བས་གནོད་པ་མ་བྱེད་ཅིག་བྱས་པས། ད་ལྟ་སུས་ཕྱིན་ཀྱང་གནོད་པ་མི་ཡོང་ངོ་། །ཞག་བདུན་བཞུགས་པའི་ནང་པར། བྲིན་པས་ཆོས་སྟོན་བྱས་པས། འདིར་སུས་ཀྱང་སྡོད་མི་ཕོད་པ་ལགས་ན། ཅི་ཙུག་ལགས་ཞུས་པས། བྲིན་གྱི་ལ་སོ་དགོན་པ་རུ། །སྒྱུ་མ་ལུས་ཀྱི་དཀྱིལ་ཀྲུང་བཅས། །གཉིས་སུ་མེད་པའི་མཉམ་བཞག་བཅས། །སྐྱེ་བ་མེད་པའི་+དམིགས་པ་+དམིགས་པ་ལ། །ཡེངས་པ་མེད་པའི་བློ་བཞག་ནས། །མ་རུང་སྟོང་ཕྲག་བརྒྱད་བཅུ་ཡི། །གདོན་གསལ་ནད་པ་ཡོ་ནས་སླང་གསུང་ངོ་། །གཞན་ཡང་སྙ་ནམ་པའི་ནད་པ་ཅི་བྱས་ཀྱང་མ་དྲག་པ་ལ། གཉིས་སུ་མེད་པའི་སྨན་སྦྱོར་བྱས། །བཞི་བརྒྱ་རྩ་བཞིའི་ནད་པ་ལ། །དམ་ཆོས་སྨན་གྱི་སྨན་སྦྱོར་བྱས། །བསལ་ན་ནད་ཀྱང་སོལ་སོལ་འདྲ། །གསུངས་སོ།། །།
༈ བཅུ་དྲུག་པ། བྱིན་རླབས་ཆེ་བའི་ཡོན་ཏན།
བཅུ་དྲུག་པ་བྱིན་རླབས་ཆེ་བའི་ཡོན་ཏན་ནི། ཤེལ་ཕུག་ནམ་མཁའ་རྫོང་ན་བཞུགས་དུས་སུ། ཡོན་བདག་གི་བསྙེན་བཀུར་སྐྱེལ་བ་ལ་ཡོངས་བའི་ལམ་ཁར་ནགས་སེབ་(གསེབ་)ནས་སྟག་བྱུང་བས། དེར་བླ་མ་བསྒོམ་པས། སྟག་ཁ་དང་ངེ་ལུས་འདུག་སྐད། དེར་རྗེ་བཙུན་གྱིས་མཁྱེན་ནས་བཞད་པས། དྲུང་ན་ཡོད་པ་རྣམས་ཅིས་ཅི་ལགས་ཞུས་པས། འདི་ལྟར་འདུག་གསུངས། དེ་ནས་ཡོན་བདག་
3-3-50a
ན་རེ། རྗེ་བཙུན་གྱི་བྱིན་རླབས་མིན་ན། སྟག་གི་དོ་གསད་ཟེར་པ་ལ། མིད་ལའི་ཞལ་ནས། རི་ཁྲོད་འགྲིམས་ཀྱི་རྣལ་འབྱོར་གྱིས། །མཐུན་རྐྱེན་སྒྲུབ་ཀྱི་ཡོན་བདག་ལ། །སྟག་ལ་སོགས་པའི་འཇིགས་པ་ཡི། །བར་ཆད་མཁའ་འགྲོ་མ་ཡིས་སེལ། །གསུང་། ཡང་རྗེ་བཙུན་གྱིས་ཤིང་ལ་འཛེགས་པས། ཕྱག་གི་མཐིལ་དུ་ཤིང་ཟུག་པ་ལ་འབྲས་སུ་སོང་བས། ལོ་གཉིས་སུ་ཡང་འདྲག་ཏུ་མ་འདོད་པས། རས་ཆུང་པས་མི་ཤ་བཏང་ཡང་འདྲག་ཏུ་མ་འདོད་པས། རས་ཆུང་པ་བློ་མ་བདེ་བར་ཡོད་པ་ལ། ཁྱོད་བློ་མ་བདེ་འམ་གསུང་། མ་བདེ་ལགས་ཞུས་པས། འོ་ན་བཅོས་དགོས་གསུང་ཙ་ན། ནང་པར་རྗེས་མེད་དུ་སོང་འདུག་པས་ཅི་མཛད་ནས་དྲག་ཞུས་པས། རླུང་གིས་སྐྱོན་གྱིས་བསྐྱེད་པའི་ཤིང་། །སེམས་མེད་ཤིང་གིས་གདོན་བྱས་པའི། །འབྲས་ཀྱི་ཟུག་རྔུ་མི་བཟད་པ། །སྨན་སྦྱོར་མཁའ་འགྲོ་མ་ཡིས་བྱས། །གསུངས་སོ། །ཡང་རྐྱང་འཕན་ནམ་མཁའ་རྫོང་ན་བཞུགས་དུས། ངམ་རྫོང་རས་པ་དང་། རས་པ་ཞི་བ་འོད་ལ་སོགས་པ། བཅུ་ཙམ་གྱིས་རྣལ་འབྱོར་མའི་ཐང་སྐུ་དང་། ཙ་ཀ་ལི་འདྲེས་པ་ཚན་ཅིག་བཞེངས་ནས། རབ་གནས་ཞུས་པས། མེ་ཏོག་འཐོར་དུས་སུ། མི་ལ་རྒས་ནས་མེ་ཏོག་འཐོར་
3-3-50b
མི་ནུས་པས། དགོས་ན་ལྷ་ཁྱོད་རང་ལོངས་གསུངས་པས། རས་གཞི་ལ་གོག་ལངས་ནས་བྱུང་བའི་དབུ་ཐོག་ཏུ་མེ་ཏོག་དོར་བ་དང་ཕར་ཐིམ་པས། ངོ་མཚར་ཆེ་ཞུས་པས། ཐུབ་པ་ཆོས་ཀྱི་སྐུ་ཅན་ཕྱིར། །མེ་ཏོག་གཟུགས་སྐུ་ཞེན་མེད་དག །ལེན་ཡང་དེ་ཉིད་ཡིན་སྙམ་མེད། །གསུངས་སོ། །ཡང་རས་ཆུང་པ་དང་ངམ་རྫོང་རས་པ་དང་། ལེགས་གསལ་ལ་སོགས་བཅུ་ཙམ་གྱིས་བདེ་མཆོག་གི་དབང་ཞུས་པས། བུམ་དབང་བསྐུར་བའི་དུས་སུ། མིད་ལ་རྒས་ནས་ཡོད་པས། དབང་ལྷ་ཁྱེད་རང་གིས་དབང་ཡང་བསྐུར་གསུང་ཤིང་འདུག་པ་དང་། བུམ་པ་ནམ་མཁའ་ལ་འཕུར་བྱུང་ནས། རིམ་པ་བཞིན་དུ་མི་རྣམས་ཀྱི་སྤྱི་བོ་ནས་བུམ་དབང་བསྐུར་བ་དང་། མི་རྣམས་ཀྱིས་ངོ་མཚར་ཆེ་ཞུས་པས། རྗེ་བཙུན་གྱིས། སྙན་རྒྱུད་དྲི་མེད་དཀྱིལ་འཁོར་དུ། །ཞེན་པ་མེད་པའི་མཆོད་བཤམས་ནས། །སངས་རྒྱས་ཡེ་ཤེས་ངོ་སྤྲོད་དག །ཆུ་དབང་དྲི་མེད་བུམ་པས་བསྐུར། །བསྐུར་བ་དེ་ཉིད་ཡིན་སྙམ་མེད། །ཅེས་གསུངས་སོ།། །།
༈ བཅུ་བདུན་པ། ཏིང་ངེ་འཛིན་གྱི་རྩལ་གྱི་ཆེ་བའི་ཡོན་ཏན།
བཅུ་བདུན་པ་ཏིང་ངེ་འཛིན་གྱི་རྩལ་གྱི་ཆེ་བའི་ཡོན་ཏན་ནི། བཀའ་གདམས་པའི་བླ་མ་ཞང་སྣེ་ཟུར་པ་དང་རྗེ་བཙུན་མི་ལ་གཉིས་ནི། དངོས་སུ་ཞལ་མཇལ་མ་བྱུང་སྟེ། ཡིད་ཀྱི་གྲོགས་པོ་ཡིན་པས། གསུང་ཡིག་དང་སྐྱེས་ཁ་ཡར་
3-3-51a
སྐུར་མར་སྐུར་རེ་མོས་མཛད་ཏེ(དེ)། བླ་མ་སྣེ་ཟུར་པས། ཇ་ཤོང་ཟི་སོལ་ཡར་སྐུར་བ་ཡིན། ལར་ཡང་རྗེ་བཙུན་ཇ་དང་ཤ་སྐམ་ལ་ནན་ལྟར་མཉེས་པ་ཡིན་ཟེར། རྗེ་བཙུན་གྱི་རྒྱལ་མོ་ཀ་ར་དང་། ཨ་རུ་ར་རྣམ་པར་རྒྱལ་བ་བསྐུར་བ་ཡིན་ཟེར། བླ་མ་ཞང་སྣེ་ཟུར་བ་དེ་ཀ་ར་དང་ཨ་རུ་ར་ལ་མཉེས་པ་ཡིན་ཟེར། བླ་མ་སྣེ་ཟུར་བའི་སློབ་མ་དད་པ་དང་ཤེས་རབ་ཆེ་བ། ཁྱད་པར་དུ་གསང་སྔགས་ལ་མོས་པ་ཞིག་ཡོད་པ་ལ། བླ་མ་སྣེ་ཟུར་བའི་ཞལ་ནས། གཙང་ལ་སྟོད་ཀྱི་སྙ་ནམ་གྲོད་ཕུག་བྱ་བ་ན། མི་ལ་རས་པ་བྱ་བའི་གྲུབ་ཐོབ་ཞིག་ཡོད་པར་འདུག་པས། ཁྱོད་རང་དེར་གདམས་ངག་ཞུ་རུ་འགྲོའམ་གསུངས་པས། འོ་ན་འགྲོ་ལགས་ཞུས་ནས། ཕྱག་རྟེན་དང་ལམ་རྒྱགས་སྐུར་ནས་ཡར་ཆས་པ་དང་། བླ་མ་སྤྱན་སྔ་བའི་སློབ་མ་ཅིག་བལ་པོར་མཆོད་ཆ་ཉོར་འགྲོ་བ་དང་གཉིས་པོ་དུས་གཅིག་ཡོང་བས། སྙ་ནམ་གྱི་ཕ་འོང་གྲོད་ཕུག་ན་རྗེ་བཙུན་བཞུགས་པ་དང་མཇལ་བས། རྗེ་བཙུན་ན་རེ། ཇོ་བོ་གཉིས་པོ་ཅི་ལ་བྱོན་པ་ཡིན་གསུངས་པས། སྣེ་ཟུར་བའི་སློབ་མ་དེ་ན་རེ། བདག་སྣེ་ཟུར་བས་གདམས་ངག་ཞུར་བཏང་བ་ལགས་ཞུས་པ་ལ། མིད་ལའི་ཞལ་ནས་ཇོ་བོའི་གཏམ་དྲང་གསུང་། སྤྱན་མངའ་བའི་སློབ་མ་དེས་ཀྱང་། ང་ཡང་བླ་མ་སྤྱན་
3-3-51b
མངའ་བས་གདམས་ངག་ཞུར་བཏང་བ་ལགས་ཞུས་པས། རྗེ་བཙུན་གྱི་ཇོ་བོ་རྫུན་མ་བྱེད་བལ་པོར་མཆོད་ཆ་འཚོལ་དུ་འགྲོ་བ་ལ་ལམ་ན་བར་ཆད་མེད་པར་ཚུར་བདེ་མོར་སླེབ་ནས་ཡོང་བར་འདུག་གིས་གསུངས་སོ། །ཡང་རྗེ་བཙུན་ན་རེ་ཁྱེད་ཀྱི་ཡུལ་དབུས་རིག་པའི་འབྱུང་གནས་དེ་རྣམས་སུ་གྲུབ་ཐོབ་བམ་ཁྱད་པར་འཕགས་པ་ཅིག་འདྲ་བཞུགས་གསུངས་པས། སྣེ་ཟུར་བ་དེ་ཁ་རོག་འདུག་པ་ལ། སྤྱན་སྔ་བ་དེ་སྒོ་དྲགས་པར་འདུག་པ་ན་རེ། བླ་མ་སྤྱན་སྔ་བས་ཡི་དམ་གྱི་ཞལ་གཟིགས་ཟེར་བས། དེ་འདྲ་ལ་ཡང་གྲུབ་ཐོབ་དུ་(ཏུ་)བྱེད་དམ། འོ་ན་གྲུབ་ཐོབ་མེད་པར་འདུག་གསུངས་པ་དང་། སེ་བན་རས་པས་བླ་མས་ཀྱང་ཡི་དམ་གྱི་ཞལ་གཟིགས་སམ་ཞུས་པས། རྗེ་བཙུན་གྱིས། སེམས་ཀྱི་ངོ་བོ་མཐོང་གྱུར་ཅིང་། །མ་རིག་མུན་པ་སངས་པ་ན། །ཞལ་དག་མཁའ་འགྲོ་མས་ཀྱང་སྟོན། །ཆོས་ཉིད་བློ་ལ་ལྟ་བསམ་མེད། །དེ་ཡང་གྲུབ་ཐོབ་ཡིན་སྙམ་མེད་གསུང་། ཡང་རྗེ་བཙུན་ན་རེ་དེ་མེན་(མིན་)པ་གཞན་མེད་དམ་གསུངས་པས། སྤྱན་སྔ་བས་ཡི་དམ་གྱི་ལྷ་དང་། ནཱ་ག་བྷོ་དྷི་ལ་ཆོས་གསན་པ་དེ་གྲུབ་ཡིན་ཟེར་བས། མི་ལས། དམིགས་མེད་ཡིད་ལ་མི་བྱེད་ཅིང་། །དྲག་པ་རྡུལ་ཙམ་མེད་པ་ཡི། །རང་རིག་རང་གསལ་རང་བྱུང་གི། །ཆོས་
3-3-52a
དེ་མཁའ་འགྲོ་མས་ཀྱང་སྟོན། །དེ་ཡང་གྲུབ་ཐོབ་ཡིན་སྙམ་མེད། །གསུངས། ཡང་རྗེ་བཙུན་གྱི་ཞལ་ནས། བླ་མའི་བཀའ་ལ་གཉན་པ་མེད་གསུངས་སོ། བླ་མ་སྤྱན་སྔ་བས་མཆོག་དང་ཐུན་མོང་གི་དངོས་གྲུབ་རྣམས་གང་འདོད་པ་བླང་དུ་ཡོད་ཟེར་བས། མིད་ལའི་ཞལ་ནས། མི་ཟད་མཆོག་དང་ཐུན་མོང་ལ་སོགས་པ། དགོས་པ་ཐམས་ཅད་སྒྲུབ་ཅེས་མཁའ་འགྲོ་མས་ཀྱང་གསུངས། དེ་ལ་གྲུབ་ཐོབ་ཡིན་སྙམ་མེད། གསུང་། ཡང་དེ་ན་རེ། ཉན་པོ་སློབ་དཔོན་ལ་ལྷ་ཐང་ལྷས་བཤོས་འདྲེན་ལགས། དེ་གྲུབ་ཐོབ་ཡིན་ཟེར་བས། མིད་ལ་ན་རེ། འདྲེས་ཟན་སྟེར་བ་ལ་ཡང་གྲུབ་ཐོབ་དུ་(ཏུ་)བྱེད་དམ་འོ་ན་གྲུབ་ཐོབ་མི་འདུག་ཟེ་གསུངས། སེ་བན་རས་པས་བླ་མ་ལ་ཡང་དེ་འདྲ་ཡོད་དམ་ཞུས་པས། མི་ལ་ན་རེ། མི་ཟད་ནམ་མཁའི་མཛོད་ལྟ་བུ། །ཏིང་འཛིན་སེམས་ཀྱི་གཡོ་སྐུལ་གྱིས། །བཀྲེས་སྐོམ་སེམས་ཟས་ཀྱི་འདུན་པ་ནི། །བྲལ་བར་མཁར་འགྲོ་མས་ཀྱང་བྱེད། །དེ་ཡང་གྲུབ་ཐོབ་ཡིན་སྙམ་མེད། །གསུང་། གཞན་ཡང་བྲག་དམར་སྤོ་མཐོ་ནམ་མཁའ་རྫོང་ན། དཔོན་སློབ་ཁ་ཅིག་བཞུགས་དུས་ན། བྲག་གི་རྩེ་མོ་ན། སྐུ་ཁམས་གསེང་བ་ལ་བྱོན་པས། རྗེ་བཙུན་རླུང་གིས་བསྐྱོད་པ་ལྟར་དུ་གཡེངས་ལ་ཡར་བས། སློབ་
3-3-52b
མ་རྣམས་ཀྱིས་ངུ་ཡིན་ཕྱིན་པས། རྗེ་བཙུན་མ་གྲོངས་སམ་ཞུས་པས། མིད་ལའི་ཞལ་ནས། ཟུང་འཇུག་ཐང་དཀར་གཤོག་བརྐྱང་ནས། །འཕུར་བ་བྲག་དཀར་རྩེ་ནས་འཕུར། །བབས་པ་རོང་ཁུང་ཤོད་དུ་བབས། །མྱོང་བ་བདེ་སྟོང་གཉིས་མེད་མྱོང་། །གྲོལ་བ་འཁོར་འདས་ཤུགས་ལས་གྲོལ། །ད་ཡོང་འགྲོངས་སྙམ་མི་བགྱིད་དོ། །གསུངས་སོ། །དུས་ཕྱིས་བྲག་དེ་ལ་དྲེས་ཐག་གིས་མཇལ་བས། འདོམ་པ་དགུ་བཅུ་ཐམ་པ་འདུག་ཟེར་ཏེ། དེས་ཚད་པ་མི་འདུག་ལགས། ཡང་ཉིན་ཅིག་བྲག་ཆུང་སེ་བ་ཞིག་གི་མདུན་དུ་རྗེ་བཙུན་བཞུགས་པ་ལ། བུད་མེད་གསུམ་བྱུང་ནས། ཁོང་གསུམ་ན་རེ། རྗེ་བཙུན་དེར་མ་བཞུགས་ཟེར་ནས་བྱུང་ལ། དེའི་ཕྱི་ཉིན་དེ་བས་ཀྱང་མང་བ་ཅིག་བྱུང་ལ། བཞི་པ་ལ་དེ་བས་ཀྱང་མང་གཅིག་བྱུང་ལ། ལྔ་པ་ལ་དེ་བས་ཀྱང་མང་བར་ཐལ་ནས། ཉིན་གཅིག་མང་རབ་ཅིག་བྱུང་ནས། རྗེ་བཙུན་གྱི་ནམ་བཟའ་རས་འགའི་ཟུར་ནས་འཐེན་བྱུང་ནས། བྲག་ཟུར་ཅིག་ན་བྱོན་པ་དང་། བྲག་དེ་ཧྲུལ་ཞིག་སོང་བས། སྒོམ་ཆེན་རྣམས་ངུ་ཡིན་ཡོངས་ནས་བླ་མ་མ་འདས་སམ་ཞུས་པས། མིད་ལའི་ཞལ་ནས། རྣལ་འབྱོར་ལུས་ཀྱི་མེ་ཏོག་གི། །སྲོག་འཇོམས་བྲག་དམར་གཤེད་མ་ལས། །མཁའ་འགྲོ་མ་ཡིས་དྲངས་ནས་ཡོང་། །ད་
3-3-53a
ནི་བདུད་ཀྱིས་ཁྱེར་སྙམ་མེད་གསུང་། གཞན་ཡང་གུང་ཐང་གི་ལིང་པ་བྲག་དམར་ན། བྲག་སྲིན་མོ་མིང་སྲིང་དམ་ལ་བཏགས་པ་དང་། འབྲོག་ལ་ཕྱི་ཆུ་བཟང་དུ་བདུད་མོ་ལ་སོགས་མི་མ་ཡིན་རྣམས་དམ་ལ་བཏགས་པ་དང་། དབེན་པ་བྲིན་དུ་ཚེ་རིང་མ་མཆེད་ལྔ་ལ་སོགས་པ་སྣང་སྲིད་ཀྱི་ལྷ་འདྲེ་རྣམས་དམ་ལ་བཏགས་པ་དང་། མོན་འགྲོའི་ཡུལ་ན་ལྷ་འདྲེ་རྣམས་དམ་ལ་བཏགས་པ་དང་། བལ་པོར་དུར་ཁྲོད་ཀྱི་ཤ་ཟ་དམ་ལ་བཏགས་པ་དང་། ཀུ་ཐང་ན་སྟག་ལ་ཁ་ཆིངས་མཛད་པ་དང་། རག་མ་ན་ཀླུ་བདུད་མོ་དམ་ལ་བཏགས་པ་དང་། རྐྱང་འཕན་ན་གྲིབ་བཙན་དམ་ལ་བཏགས་པ་དང་། བྲག་དཀར་རྟ་སོ་ན་ཐེ་རང་སྐྱ་བོ་དམ་ལ་བཏགས་པ་དང་། བྲག་དཀར་སྤོ་མཐོ་ན་ཀླུ་བཙན་བྲམ་ཟེ་དམ་ལ་བཏགས་པ་དང་། སྨིན་འཁྱུག་གྲིབ་མ་རྫོང་ན་ཐེ་རང་སྔོན་པོ་དམ་ལ་བཏགས་པ་དང་། ཀུ་ཐང་གི་བྲག་སྐྱ་རྡོ་རྗེ་རྫོང་ན་ཀླུ་རྒྱལ་རིགས་དམ་ལ་བཏགས་པ་དང་། ཁྲ་ཚང་སྲིན་པོ་རྫོང་ན་དུག་སྦྲུལ་ལ་ཁྲིད་བཏབ་པ་དང་། སྐྱིད་པ་ཉི་མ་རྫོང་ན་ཉི་མ་བརྟོད་ལ་གནན་པ་དང་། དབེན་པ་ཁུ་བྱུག་རྫོང་ན་བྱ་ཁ་ཏ་ལ་ཁྲིད་བཏབ་པ་དང་། རྩིག་པ་རྐང་མཐིལ་རྫོང་ན་འཕར་བ་ལ་ཁྲིད་བཏབ་པ་དང་། གངས་ཏི་སེ་ན་བོན་པོ་ན་རོ་མིང་
3-3-53b
སྲིང་བཏུལ་བ་དང་། རི་བོ་ག་དྷ་ལི་ན་བྲག་བཙན་དམ་ལ་བཏགས་པ་དང་། རྒྱ་གར་ལྷོ་ཕྱོགས་དཔལ་གྱི་རི་ལ། འགྲོ་བའི་མགོན་པོ་འཕགས་པ་ཀླུ་སྒྲུབ་ཀྱི་སྐུ་ལ་མཇལ་བ་ལ་བྱོན་དུས་ན། ཀུ་མུ་ད་སྦྲ་མའི་ཇག་ས་མེ་ཏོག་དུ་(ཏུ་)སྒྱུར་བ་དང་། བྱང་ཨ་འདར་ཚ་ཁ་ལ་བྱོན་དུས་ན། ཁྲུང་ཁྲུང་ལ་ཆིབས་ནས་ཚ་མཚོ་ལ་མར་སྟོན་པ་དང་། ཤར་ཙོང་ཁ་ལ་བྱོན་དུས་ཙོང་ཁའི་རྒྱལ་པོས་འདམ་སེང་དཀར་མོ་ཞོ་དྲངས་པ་དང་། སློབ་དཔོན་པདྨ་འབྱུང་གནས་ཀྱིས་བྱིན་གྱིས་རླབས་པའི་པད་མའི་རྫོང་དྲུག་དུ(ཏུ)། རྗེ་བཙུན་མི་ལ་རས་ཆེན་གྱི་བཞུགས་དུས་ནས་ཡང་། རྒྱ་བྲག་ནམ་མཁའ་རྫོང་དུ་ནམ་མཁའ་ཆེན་པོའི་རྒྱུད་གཟིགས་པ་དང་། སྦས་ཕུག་མ་མོ་རྫོང་དུ་མ་མོ་འདུལ་བའི་རྒྱུད་གཟིགས་པ་དང་། སྟག་ཕུག་སེང་གེ་རྫོང་དུ་སྟག་མོ་ཁ་འཐབ་ཀྱི་རྒྱུད་གཟིགས་པ་དང་། ལ་ཕུག་པདྨ་རྫོང་དུ་པདྨ་དབང་ཆེན་གྱི་ཞལ་གཟིགས་པ་དང་། ཁྲོ་རྒྱལ་རྡོ་རྗེ་རྫོང་དུ་རྟ་མཆོག་རོལ་པའི་ཞལ་གཟིགས་པ་དང་། གླང་སྒོ་ཀླུའི་རྫོང་ན་ཀླུ་བདུད་ནག་པོ་དངོས་སུ་བཏོན་ནས་དམ་ལ་བཏགས་པ་དང་། འབྲོག་ལ་ཕྱི་གངས་ཀྱི་ར་བར་གླ་བ་ལ་ཁྲིད་བཏབ་པ་དང་། ཆུ་མིག་དངུལ་འབུམ་ན་ཀླུ་བཙན་ཡ་མེད་དམ་ལ་བཏགས་པ་དང་། ཕ་འོང་གྲོད་ཕུག་ཏུ་ལྷ་དཀར་པོ་དམ་ལ་བཏགས་པ་དང་། གངས་
3-3-54a
ཏི་སེའི་ལྷ་བཙན་དཀར་པོ་ལ་རས་ཁྲིད་དུ་བཏབ་པ་ལ་སོགས་བསམ་གྱིས་མི་ཁྱབ་བོ། །བླ་མ་མིད་ལ་རས་ཆེན་གྱི་བུ་ཆེན་ཡང་། གུང་ཐང་ཁྱི་ར་བའི་གཉན་རས་ཆུང་རྡོ་རྗེ་གྲགས་པ་དང་། སླུར་པའི་སྒོམ་སྟག་རས་པ་དང་། བློ་བོའི་ཇོ་དོར་རས་པ་དང་། རྟ་མོའི་འབྲི་སྒོམ་རས་པ་དང་། སྙ་ནམ་མདོ་བཀྲའི་སེ་བན་རས་པ་དང་། རོང་ནག་མོའི་རོང་ཆུང་རས་པ་དང་། སྙ་ནམ་རྩར་མའི་ལེགས་གསལ་འབུམ་མེ་དང་། བྲིན་གདིང་མའི་ལེགས་གསལ་འབུམ་མེ་དང་། ཅུང་པ་ཆེ་ཆུང་གི་ལེགས་གསལ་འབུམ་མེ་དང་། གུང་ཐང་གི་ཡོན་བདག་མོ་ལྕམ་མེ་དང་། རས་མ་ཆོས་ཀྱི་བྱང་ཆུབ་དང་། རས་མ་རིན་ཆེན་བརྒྱན་མཚན་དང་། རས་མ་ཡེ་ཤེས་བྱང་ཆུབ་དང་། རས་མ་ཆོས་ཀྱི་སྒྲོན་མ་དང་། བྲག་རྒྱ་ཞུའི་རས་ཆུང་ཞི་བ་འོད་དང་། རིབ་ཀྱི་ཁྱི་ར་རས་པ་མགོན་པོ་རྡོ་རྗེ་དང་། རྟ་ནག་གི་བླན་སྒོམ་རས་པ་དང་། རོང་ལའི་གཤིན་སྒོམ་རས་པ་དང་། ཟར་འཛོའི་ངམ་རྫོང་རས་པ་དང་། སྙ་ནམ་རྒྱགས་ཕུའི་རས་མ་འོར་མོ་དང་། དེའི་བུ་དམ་རྒྱགས་ཆུང་བ་དང་། སྙ་ནམ་རྩར་མའི་སྔགས་རྡོར་མོ་དང་། རྩར་མའི་སྟོན་པ་ཤག་གུ་དང་། གུང་ཐང་གི་དགེ་བཤེས་སྟོང་ཚབ་དར་མ་བློ་གྲོས་དང་། རྩར་མའི་སྐྱོ་དཔག་ཁམས་གསུམ་རྣམ་རྒྱལ་
3-3-54b
དང་། རྩར་མའི་འདྲེ་བན་བཀྲ་ཤིས་འབར་དང་། ཀུ་ཐང་གི་ཕུག་རོན་ཕྱུག་མོ་ཀླུ་ལྕམ་དང་། མོན་ཡུལ་འབྲོ་ཁ་སྟོད་ཀྱི་གཙོ་བོ་ཆོས་སྐྱབས་དང་། བར་ཚོགས་གི་གཙོ་བོ་དོན་ནེ་དང་། ཁ་སྨད་ཀྱི་གཙོ་བོ་འཕན་རྒྱལ་དང་། མོན་ལའི་གཙོ་བོ་དཀོན་མཆོག་གཟུང་ངེ་དང་། སྐྱིད་གྲོང་རག་མའི་ཀུ་རིམ་ལྷ་འབར་དང་། ལྕིམ་ལུང་གི་ངམ་རྫོང་འབར་དང་། གཙང་ཆུང་རས་པ་དང་། རྡོར་དབང་རས་པ་དང་། མཁར་ཆུང་རས་པ་དང་། དགོན་པ་རྐ་ཀྱོག་གི་ལི་ཁོར་ཁྱར་རུ་པ་དང་། སྙ་ནམ་གྱི་འོར་སྟོན་དགེ་འདུན་སྐྱབས་དང་། རས་ཆུང་པ་བླ་མ་གྲགས་དང་། སེ་བ་ལུང་གི་དྭགས་པོ་ལྷ་རྗེ་བསོད་ནམས་རིན་ཆེན་དང་། བྲིན་སྡིང་མའི་ཡོན་སྒོམ་འབར་བ་སེང་གེ་དང་། བྲིན་སྡིང་མའི་ཡོན་སྒོམ་དཀོན་མཆོག་འབར་དང་། སྡིང་མའི་ཡོན་བདག་མོ་རྒྱལ་མོ་སྐྱིད་དང་། སྙ་ནམ་དུད་སྣའི་རས་ཆུང་སངས་རྒྱས་སྐྱབས་དང་། བོང་ཤོད་ཀྱི་མེར་སྒོམ་རས་པ་དང་། རྐོང་པོའི་ཀོང་སྐུར་རས་པ་དང་། སྣ་བུག་གི་སྐུ་རིམས་དར་མ་རྒྱལ་མཚན་དང་། འབྲིང་མཚམས་ཀྱི་རས་མ་མཁའ་སྤྱོད་མ་དང་། སྙ་ནམ་གྱི་ཡོན་བསྒོམས་བརྩེ་ག་བཀྲ་ཤིས་དཔལ་དང་། སྙ་ནམ་གྱི་སྐྱོ་སྟོན་དབང་ཕྱུག་སྙིང་པོ་དང་། བལ་པོའི་རྒྱལ་པོ་དྷརྨ་པ་ལ་
3-3-55a
དང་། བྲིན་རྟ་རྫི་ཕུག་གི་ཡོན་སྒོམ་ཆོས་འབར་དང་། ཅུང་པའི་ཡོན་སྒོམ་དབང་ཕྱུག་ཤེས་རབ་འབུམ་དང་། དིང་རི་སྣ་དམར་གྱི་ལྷ་རྗེ་གཡེང་དང་། བྲིན་སྡིང་མའི་ཡོན་སྒོམ་བཀྲ་ཤིས་རྩེ་དང་། མི་ཉག་གི་ཚོང་པ་ཨ་མགོན་དང་། ངམ་རྫོང་ཕུའི་ཡོན་སྒོམ་ཤེས་རབ་འབར་དང་། རྨ་ཤོད་ཀྱི་རྒྱལ་བུ་དོན་གྲུབ་དཔལ་དང་། ཟླ་ཤོད་ཀྱི་ཡོན་སྒོམ་འཕན་བཟང་དང་། རྩོང་ཀའི་རྒྱལ་པོ་དར་མ་འབུམ་དང་། གུང་ཐང་གི་འཛངས་མོ་རས་པ་དང་། ལ་སྟོད་བྱང་གི་དགེ་ཤིང་རས་མ་དང་། རྩ་ཡུལ་གྱི་རས་པ་ཤེས་རབ་ཚུལ་ཁྲིམས་དང་། འཁར་ཆུའི་རས་པ་ཤག་བརྩོན་དང་། མཐའ་བཞི་འདུལ་བ་འཛིན་པ་དང་། ཕམ་སྟོན་གྲོག་ར་རས་པ་དང་། ལ་གཡག་གི་ཇོ་སྲས་ཚུལ་ཁྲིམས་རྡོ་རྗེ་དང་། དེའི་མཆེད་ཡ་ཤེས་རབ་གྲགས་པ་དང་། དགེ་ལྔ་ཕུག་པ་བཟང་པོ་དཔལ་དང་། ལུང་སྐམ་རས་པ་བདེ་ལེགས་དཔལ་དང་། དེ་ལ་སོགས་པ་མི་ལས་དང་སྐལ་བར་ལྡན་པ་བསམ་གྱིས་མི་ཁྱབ་པ་རྣམས་ཡང་(ཀྱང་)དག་པའི་ལམ་ལ་བཀོད་པའོ། །ཆོས་ཕར་ཞུ་ཚུལ་མཛད་པའི་སྤྲུལ་སྐུ་ཡང་། ལ་སྟོད་ཕ་དྲུག་གི་ཞ་ཆུང་བསོད་རྒྱན་དང་། ཡུང་གི་དགེ་བཤེས་མེ་སྟོན་དར་མ་མགོན་པོ་དང་། ཕ་
3-3-55b
དྲུག་གི་མངའ་བདག་རྗེ་ཁྲི་བ་དང་། དགེ་བཤེས་འབྲང་ལ་ས་ཤཱཀྱ་འབུམ་དང་། ཡང་སྔགས་པ་སྟོན་པ་དར་མ་འབུམ་དང་། གོ་ལུང་གསེར་ཁང་པ་སངས་རྒྱས་གཟུངས་དང་། ཕུ་འགེགས་པ་དགེ་བཤེས་འཕན་བཟང་དང་། གཡའ་མ་མཁར་གྱི་ཞུ་སྟོན་ཚུལ་ཁྲིམས་བྱང་ཆུབ་དང་། ཕ་དྲུག་གི་ཇོ་མོ་ཇོ་ལྕམ་ཡུལ་སྐྱིད་དང་། སྒྲིག་གི་ཇོ་མོ་སྒྲོན་ནེ་དང་། ཡོན་ཕྱུག་མའི་ལེགས་སྐྱིད་དང་། ཡོན་ཕྱུག་མ་ལུ་བྱུག་དང་། ཡོན་ཕྱུག་མ་འོར་མོ་དང་། སྒོམ་མ་རྒྱ་མཚོ་འདྲེན་དང་། མ་ཅིག་ཞ་མ་ལྷ་རྗེ་མ་དང་། ཤེ་མོ་རྒྱ་ལྕམ་རས་མ་དང་། རྒག་མོ་རས་པ་དང་། སོར་མ་ལེགས་སྐྱིད་དང་། ལྷ་ལྕམ་འོད་དེ་རས་མ་དང་། མཛངས་མོ་སྐྱིད་འདྲེན་རས་མ་དང་། དགེ་མོ་བཙུན་ལྕམ་རས་མ་དང་། ཇོ་མོ་གཡང་ཆུང་རས་མ་དང་། སྤྲུལ་པའི་སྐུ་དེ་རྣམས་ནི་དག་སྣང་གི་མཆེད་གྲོགས་ཡིན་ལ། ལར་རྗེ་བཙུན་གྱི་སྐུ་ཚེ་གང་པོ་དེ་རང་ལ་ཡང་། ལས་དང་སྐལ་བར་ལྡན་པ་དུ་མ་རྣམ་སྨིན་གྲོལ་ལ་བཀོད་པའི་ནང་ནས། རྗེ་བཙུན་ཞལ་བཞུགས་པའི་གོང་དུ་ཡང་། གྲུབ་ཐོབ་ཕོ་ཉི་ཤུ། མོ་ལྔ་དང་ཉི་ཤུ་རྩ་ལྔ་ཡོང་བར་སྙ་ནམ་གྲོད་ཕུག་ན་བཞུགས་དུས་ན། མཁའ་འགྲོ་མ་ཡིས་ལུང་བསྟན་བྱུང་བ་ལ། ལུས་ཁྱེར་བ་ཡང་ལྔ་བྱུང་བ་ལ་ཕོ་གསུམ་ནི། 
3-3-56a
ཞི་བ་འོད་དང་། རོང་ཆུང་རས་པ་དང་། འབྲི་སྒོམ་རས་པ་དང་གསུམ་ཡིན་ལ། ཁ་ཅིག་ནི་རས་པ་སངས་རྒྱས་སྐྱབས་ཡིན་ཡང་ཟེར། མོ་གཉིས་ནི་རས་མ་ཆོས་ཀྱི་བྱང་ཆུབ་དང་། རས་མ་འབྲིང་མཚམས་མ་གཉིས་ཡིན་ནོ། །ལོ་ཁོར་ཆ་རུ་བ་དང་། དྭགས་པོ་ལྷ་རྗེ་ལ་སོགས་པ་ཁ་ཅིག་ནི། རྗེ་བཙུན་གྲོངས་པའི་རྗེས་ན། གྲུབ་ཐོབ་ཆེན་པོར་བྱོན་པར་འདུག་ལ། ཡང་རྐྱེན་ངན་གྲོགས་སུ་ཆོད་ནས་ལམ་སྣ་ཟིན་པ་ཡང་། རྫིང་བུ་རྒྱན་གྱི་དགེ་བཤེས་ཆུ་མིག་པ་དང་། མང་ཡུལ་གྱི་གྲོ་ཆེན་ལོང་བ་དང་། བྲིན་ཨུ་ལུང་གི་དགེ་བཤེས་ལམ་སྟོན་དང་། གུང་ཐང་གི་དགེ་བཤེས་སྟོང་ཚོ་བ་དར་ལོ་དང་། གངས་ཏེ་སེའི་ན་རོ་བོན་ཆུང་མིང་སྲིང་གཉིས་དང་། འདམ་ཤོད་ཀྱི་ལུག་རྫི་དང་། བྱང་ཚ་ཁའི་རི་ཤིང་གི་གཅན་གཟན་རྣམས་དང་། ཤར་ཙོང་ཁའི་བཤན་པ་དང་། དགེ་བཤེས་ཙག་ཕུང་(ཕུག་)པ་དང་། དེ་ལ་སོགས་པ་རྣམས་ཡིན་ལ། གངས་ཏི་སེ་ན་བོན་པོ་བཏོན་པ་ལ་བྱོན་དུས་ན། རྗེ་བཙུན་ལ་སྐུ་འཁོར་ནི། བཤེན་སྒོམ་རས་པ་དང་། ལི་ཁོར་ཕྱག་རུ་བ་དང་། ཅུང་པའི་ཀྲེ་ཕྱག་གི་འཛང་མོ་རས་མ་ཅིག་དང་། གུང་ཐང་གྱེན་ལང་གི་དགེ་བཤེས་ཟ་རས་མ་བཞི་དང་། དཔོན་སློབ་བརྒྱད་བྱོན་པ་ལ། ལི་ཁོར་བ་དང་། 
3-3-56b
མཛངས་མོ་གཉིས་བློ་བོ་ན་མར་བཏང་ནས། དཔོན་སློབ་དྲུག་ཡར་བྱོན་ནས། རྫུ་འཕྲུལ་སྣ་ཚོགས་ཀྱིས་རྩོད་པ་མཛད་ནས་བོན་པོ་བཏོན་ནས། ཏི་སེ་འཕྲོག་པའི་ལོ་རྒྱུས་ཟུར་ན་གསལ། དེ་ནས་རི་བོ་ག་ངྷ་ལར་རས་ཆུང་རྣམས་བཞག་ནས། རྗེ་བཙུན་ཆེན་པོས་རྒྱ་གར་ལྷོ་ཕྱོགས་དཔལ་གྱི་རི་ལ་འགྲོ་མགོན་འཕགས་པ་ཀླུ་སྒྲུབ་ཀྱི་སྐུ་ལ་མཇལ་དུ་བྱོན་ནས། ཞག་བཅུ་བཞི་ལ་ཚུར་ཕེབས་ནས་མར་རེས་ལ་སྟོད་བྱང་དང་ལྷོ་ནས་བྱོན་ཏེ། དཔལ་ཧེ་རུ་ཀའི་ཕོ་བྲང་བྲིན་ཆུ་དབར་དུ་ཕེབས་པ་ལ་སོགས་པ་རྒྱས་པར་ཟུར་ན་གསལ། གཞན་ཡང་བླ་མ་མིད་ལ་རྣལ་འབྱོར་པས། རྒྱ་གར་གྱི་མཁའ་འགྲོ་མ་རྣམས་ལ། དངོས་གྲུབ་ཀྱི་ཏུག་མོ་ཆེ་ཕྱག་རྟེན་དུ་བླངས་ནས། གནས་མཆོག་ཆེན་པོ་འབྲོག་ལ་ཕྱི་གངས་ཀྱི་ར་བ་བཏབ་པ་དང་། ལ་ཕྱི་ན་བདུད་དམག་བྱེ་བ་དུར་ཕྱུར་བཅོམ་ནས། གཅོང་རོང་ཕུག་ལ་སྟིམ་པ་དང་། ལ་ཕྱི་རྣ་གཡོན་དུ་སའི་ཏིང་ངེ་འཛིན་ལ་བཞུགས་པ་དང་། བདུད་བརྡུགས་དཔལ་གྱི་ཕུག་མོ་ཆེར། ཆུའི་ཏིང་ངེ་འཛིན་ལ་བཞུགས་པ་དང་། འཆོང་ལུང་ན་མེའི་ཏིང་ངེ་འཛིན་ལ་བཞུགས་པ་དང་། རི་བོན་པོ་གཉེན་གྱི་རྩེ་མོ་ན། རླུང་གི་ཏིང་ངེ་འཛིན་ལ་བཞུགས་པ་དང་། སྨན་ལུང་ཆུ་དབར་གྱི་ཡང་དབེན་
3-3-57a
དུ། དཔེ་བྲལ་ནམ་མཁའི་ཏིང་ངེ་འཛིན་ལ་བཞུགས་པ་དང་། དེ་ལ་སོགས་པའི་མཛད་པ་དང་འཕྲིན་ལས་བསམ་གྱིས་མི་ཁྱབ་པ་རྣམས་མངའ་ཞིང་། གཞན་གྱི་བློ་རིས་དང་བཏུན་ནས་མགུར་གསུངས་པ་རྣམས་ནི། གྲངས་ལས་འདས་ཀྱང་། ཡོངས་སུ་གྲགས་པ་རྣམས་ཀྱི་ཐོག་མ་དེ་རྗེ་མར་པའི་དྲུང་དུ། རྗེ་མི་བསྐྱོད་ཀྱི་ངོ་བོ་ཐུགས་རྗེ་ཅན། །སྤྲང་ལན་ཅིག་ཡུལ་དུ་གཏོང་བར་ཞུ། །ཨ་མ་ལུས་ཀྱི་སྒྲོམ་བུ་དེ། །འཇིག་གམ་མ་འཇིག་ལྟ་རུ་འགྲོ། །ཟེར་བ་དེ་ཡིན། དེའི་དུས་ན་དགུང་ལོ་སུམ་བཅུ་སོ་དགུ་པ་ཡིན། དེ་ནས་སྔོན་མ་ཡོད་ཙ་ན་བུ་ཡང་མེད། །ཟེར་བ་དེ་ཡིན། དེ་ནས་དགེ་བཤེས་ཙ་པ་ལ་གསུངས་པའི་སྟོང་ཉིད་ལུང་ཡངས་མ་དེ་ཡིན། དེ་ནས་རྨི་ལམ་བརྡའ་སྟོན་མ་ཐ་བ་སྲ་ཡང་ཕེད་དེ་མཆི། ཟེར་བ་དེ་ཡིན། དེ་ནས་ཀོང་རྩེ་མ་དང་། བྲག་དཀར་དུ་སྤྲིན་དཀར་མ་དང་། ལྷོ་སྤྲིན་མ་དང་། ཡང་བྲག་དཀར་སྐོར་གསུམ། དེ་ནས་སྙ་ནམ་རྒྱགས་ཕུར་ཇོ་མོ་འོར་མ་ལ་གནས་ཀྱི་ཞལ་གདམས་གསུངས། འབྲོག་ལ་ཕྱི་ལ་ཤིང་བཟང་སྐོར་གསུམ། རམ་ལྡིང་སྐོར་གསུམ། ཆུ་བཟང་སྐོར་གསུམ། གངས་འགུར་སྐོར་གསུམ་དང་། རྩར་མ་ན་སྔགས་རྡོར་མོ་ལ་གནད་ཀྱི་མདོ་དྲུག །གུང་ཐང་ན་
3-3-57b
རྫིང་བརྒྱན་མ། ལིང་ང་སྐོར་གསུམ། རྐྱང་འཕན་བདུན་ཚིག་མ། རྫོང་བཅོ་བརྒྱད་མ་རྣམས། མོན་ཡུལ་འགྲོ་སྐོར་རྣམས། སིང་ཁ་ནགས་སུ་ཁྱི་ར་བསྐོར་གསུམ། སེ་བན་རས་པ་ལ་ཤི་བྲོད་ཐིགས་ཚགས་མ། ཞི་བ་འོད་ལ་དངུལ་འབུམ་མ། ལྕིམ་ལུང་ན་བྱང་འབར་མ་སྦ་འགུར་སྐོར་གསུམ། ལེགས་གསལ་འབུམ་མེ་ལ་ལོང་མེད་ལྔ་མ། རས་ཆུང་རྡོ་རྗེ་གྲགས་པ་ལ་གཡག་རུ་སྐོར་གསུམ། རྐྱང་མགུར་སྐོར་གསུམ། གངས་ཏི་སེ་ན་གངས་མགུར་རྣམས། ཚེ་རིང་སྐོར་དྲུག །མདོར་ན་འབུམ་ཚོ་གཅིག་དང་། ཁྲི་ཚོ་གཅིག་དང་། སྟོང་ཚོ་ཅིག་དང་བརྒྱ་རྩ་བརྒྱད་གསུངས་པར་གྲགས་ཏེ། རྗེ་ཁྱུང་ཚང་པ་དང་མངའ་རིས་ཞང་ལོ་ཙྪ་བའི་ལོ་རྒྱུས་ལ་གསལ་ཞིང་། ང་ཞི་བྱེད་རི་ཁྲོད་པས་ཀྱང་། ཁྲི་ཚོ་གཅིག་ཙམ་མཐོང་ལགས་སོ། །མགུར་ཞབས་ནི། སྤྲུལ་པའི་དཔའ་མོ་བཀྲ་ཤིས་ཚེ་དབང་རིག་འཛིན་མའི་ཕོ་བྲང་། འབྲོག་སྨན་ལུང་ཆུ་དབར་གྱི་ཡང་དབེན་དུ། འཁོར་ལོ་སྒྱུར་རྒྱལ་མ་གསུངས་པ་དེ་ལགས་སོ། །ཡང་རྗེ་བཙུན་དཔལ་ལྡན་བཞད་པའི་རྡོ་རྗེ་དབང་ཕྱུག་མིད་ལ་རས་ཆེན་དེས། བདག་འཛིན་གཞི་དགོན་གྱི་འཁྲི་བ་བཅད་ནས། གནས་ངེས་མེད་རི་ཁྲོད་པས་མཐའ་འགྲིམ་པ་བསམ་གྱིས་མི་ཁྱབ་སྟེ། ལྷོ་བྲག་ལུང་
3-3-58a
པ་ཕུ་མདའ་དང་། གྲ་དོལ་གཞུང་གསུམ་དང་། རི་བོ་སྒང་དང་ཙ་ཕུ་གུར་དཀར་དང་། ཙ་ཕུ་བྲག་དང་། ཙ་ཕུ་བྲག་དམར་དང་། བྲག་དཀར་སྤོ་མཐོ་དང་། རྟ་སོ་དབུ་མ་དང་། ཟ་འོག་ཕུག་དང་། འོད་གསལ་ཕུག་དང་། རྐང་ཙེ་ཕུག་དང་། རྩེ་མྱང་ཕུག་དང་། ར་གྱང་ཕུག་དང་། ལིང་ང་བྲག་དམར་དང་། སྨིན་འཁྱུག་གྲིབ་མ་རྫོང་དང་། རག་མ་བྱང་ཆུབ་རྫོང་དང་། རྐྱང་འཕན་ནམ་མཁའ་རྫོང་དང་། ཀུ་ཐང་ན་ཡང་བྲག་སྐྱ་རྡོ་རྗེ་རྫོང་དང་། ཁྲ་ཚང་སྲིན་པོ་རྫོང་། ཤེལ་ཕུག་ནམ་མཁའ་རྫོང་། དབེན་པ་ཁུ་བྱུག་རྫོང་། སྐྱིད་པ་ཉི་མ་རྫོང་། རྐང་ཐིལ་ཕུག །རྩིག་པ་ཕུག །མོན་ཡུལ་བྲོའི་རི་ཁྲིད་རྣམས་དང་། ས་དཀར་ཕུག་དང་། པདྨའི་རྫོང་དྲུག་རྣམས་དང་། གཅུང་པའི་རི་ཁྲོད་རྣམས་དང་། སྙ་ནམ་རྒྱགས་ཕུ་དང་། གནམ་ཕུག་དང་། མཁར་ཕུག་དང་། ཆང་རྫ་ཕུག་དང་། རི་སིབ། སི་རིབ་སིང་ཁ་ནགས་དང་། ལ་ཕྱི་གོང་དང་། འབྲུག་དང་། སྐྱིད་དང་། བཀྲ་ཤིས་སྒང་གི་དཀར་ལེབ་དང་། ཧེ་བྱམས་དཀར་ལེབ་དང་། ཨ་ནེ་མེད་ཕུག་དང་། ཕ་འོང་གྲོད་ཕུག་དང་། ཆུ་མིག་མགོ་མང་། པུས་གོང་། རྫ་མ་ཕུག །དཀར་ལེབ། ཆུ་བཟང་ཕུག །ཤིང་བཟང་ཕུག་ཆེན། རམ་སྡིང་
3-3-58b
ཕུག་ཆེན། ར་འུག་ཞལ་དཀར། ར་འུག་ཤར་ནུབ། ར་འུག་བྲག་རྩ། ཚར་ལེབ་གོང་འོག སྦས་པ་ཀུན་གསལ། བདུད་བརྟུགས་དཔལ་གྱི་ཕུག་མོ་ཆེ། དཔའ་ལེ་བྲག་ཐོག པདྨ་ཕུག །བྱང་རྟ་ཕུག །ཟུར་ཕུག །དམ་ཕུག །ལུང་བསྟན་ཕུག །དངོས་གྲུབ་ཕུག །དཀར་ཆུང་ཕུག །གཅོང་རོང་ཕུག །པད་པ་ཡང་དབེན། རྩང་གདོང་གོང་འགོད། རས་ཆེན་ཤར་ནུབ། སེང་རྫོང་གོང་འོག །ཟེ་ཕུག་གོང་འོག །བསིལ་བ་ཚལ། རྣ་གཡོན་སུམ་མདོད། དངོས་གྲུབ་ཀྱི་རུག་པ་གོང་འོག་རྣམས་དང་། ཡང་དབེན་ས་བྲིན་དུ་ཡང་། རྒ་རུ་ཕུག་དང་། དོམ་ཕུག །གཉུག་སྡིངས། རྒྱབ་རི་ཕུག་རྣམས་དང་། བོན་རི་ཕུག་རྣམས་དང་། ཡང་དབེན། ཕུག་མོ་ཆེ། སྤོ་མཐོ་གོང་འོག །སྔོ་རྡོར་ཕུག །དུར་ཁྲོད་དང་། མགུར་ཆུ་ཕུག་རྣམས་དང་། འོམ་ཆུང་དང་། སྐྱེད་དཀར་ཕུག་དང་། ཀྲོང་ཁྲི་བཀྲ་ཤིས་སྒང་དང་། ཤེལ་ཕུག་དང་། བླ་མ་ཕུག་དང་། བྲག་མཁར་དང་། བྲག་དམར་སྤོ་མཐོ་དང་། རྡོ་རྗེ་སྐྱིད་ཕུག །འཆོང་ལུང་དང་། བྲིན་སྨད་ཀྱི་བླ་མ་ཕུག །ལ་སོ་ཕུག་སྟོད་སྨད། བལ་པོའི་རི་ཁྲོད་རྣམས་དང་། མདོར་ན་རྒྱ་གར་དཔལ་གྱི་རི་ཚུན་ཆོད་དང་། སྨད་ཀྱི་ཤར་ཙོང་ཁ་ཡན་ཆོད་དང་། བྱང་
3-3-59a
ཨ་འདར་ཚ་ཁ་ཚུན་ཆོད་ལ། ཡུན་རིང་ཐུང་མ་གཏོགས་པ། བླ་མ་མིད་ལ་རས་པས་མ་བཞུགས་པ་ཙམ་མེད་ལ། རི་ཁྲོད་འགྲིམས་པའི་ཞབས་ནི། སྙིང་མ་བྲག་མཁར་ནས་ཚུར་བྱོན་ནས། བྲིན་སྨན་ལུང་ཡང་དབེན་གྱི་ཆོས་ཁྲི་དཀར་ཆུང་ལ་སྐུ་རྒྱབ་བཏད་ནས་བཞུགས་པ་དེས་བསྡུས་པ་ལགས་སོ། །ཕ་མིད་ལ་རས་ཆེན་བདག་ནི་ཁྱེད་ཀྱི་ཞབས་དང་སྐད་ཅིག་ཀྱང་འབྲལ་བ་མེད་དོ། །གཞན་ཡང་བླ་མ་མིད་ལ་རས་པ་འདིས། འགྲོ་བ་ཤིན་ཏུ་དམན་པ་རྣམས་ཀྱང་། སྨིན་གྲོལ་ལ་བཀོད་པ་ནི་གྲངས་ལས་འདས་སོ། །ཡོན་བདག་དང་སློབ་རིས་ཀྱང་། རག་མའི་སྐུ་རིམ་ལྷ་འབར་ནི། རྗེ་བཙུན་བྲག་དཀར་སྤོ་མཐོ་ན་བཞུགས་དུས་སུ་ལྷ་འབར་སྒྲོ་ཐུ་བ་ལ་ཡོངས་བ་དང་མཇལ་ནས་ཡོན་བདག་བྱས་པ་ཡིན་ཟེར། ཇོ་མོ་འོར་མོ་ནི་ཡུལ་ཕྱོགས་ཀྱི་ཞེན་པ་བྱས་ནས། ཡོན་བདག་བྱས་པ་ཡིན་ཟེར། སྔགས་འདོར་མོ་ཡང་ཡུལ་ཕྱོགས་ཀྱི་ཞེན་པས་ཡོན་བདག་བྱས་པས་ཡིན་གསུང་། སྙ་ནམ་རྩར་མ་ལ་འདྲེ་སྔགས་ཤུད་གསུམ་ཤོ་སྐོང་བཀྲ་ཤིས་རྩེ་ལ་སོགས་པ་རྣམས་ནི། ཡུལ་ཉི་ཤུ་རྩ་བཞིའི་རྣ་བ་གཡོན་པ་གོ་ཏ་ཝ་རི་ཞེས་བྱ་བའི་གནས་མཆོག་ཆེན་པོ། འབྲོག་ལ་ཕྱི་གངས་ཀྱི་ར་བར་
3-3-59b
བཞུགས་དུས་ན་ཡོན་བདག་ཡིན་གསུངས། དཀོན་འབར་དང་། འབར་སིང་ལ་སོགས་ནི། བླ་མ་རྗེ་བཙུན་མིད་ལ་རས་ཆེན་ལ། སྐྱེས་མཆོག་མར་པས་ལུང་བསྟན་པའི། བྲིན་སྨན་ལུང་ཆུ་དབར་སྤྲུལ་སྐུའི་ཕོ་བྲང་དེར་བཞུགས་དུས་ཀྱི་ཡོན་བདག་ཡིན་གསུང་། གཞན་ཡང་བུ་སློབ་རྣམས་འདིའི་དུས་ན་མར་མཇལ་ཟེར་བ་རྣམས། ཁོ་བོ་ལོ་རྒྱུས་ཅི་རིགས་སུ་ཡོད་ཏེ་(དེ་)འདིར་ཡི་གེ་མངས་ནས་མ་བྲིས་པ་ཡིན་ལ། དེ་ཡང་སྐྱེས་མཆོག་མར་པ་ལོ་ཙྪ་ཞེས་བྱ་བའི་ལྷོ་བྲག་པཎ་ཆེན་གྱི་ཞལ་ནས། བླ་མ་མིད་ལ་རས་ཆེན་ལ། རྗེ་ནཱ་རོ་མཻ་ཏྲིས་ཐོག་དྲངས་ནས། བླ་མ་བརྒྱ་རྩ་བརྒྱད་ཀྱི་གདམས་ངག་རྣམས་མ་ལུས་པར་གནང་ནས། འདི་སྐད་གསུངས་ཏེ། འོ་བུ་ཁྱོད་སྒྲུབ་པ་བྱེད་པ་ལ། ཡུལ་ཉི་ཤུ་རྩ་བཞིའི་རྣ་བ་གཡོན་པ། འབྲོག་ལ་ཕྱི་གངས་ཀྱི་ར་བ་ཞེས་བྱ་བ། རིགས་གསུམ་མགོན་པོའི་ཕོ་བྲང་དེར་སོང་ལ་སྒྲུབ་པ་གྱིས་གསུངས་པ་ལ་སོགས་པ་གནས་ཀྱི་དཀར་ཆག་རྣམས་ནི་བདག་གིས་སྦྱར་བ་ཟུར་ན་ཡོད་དོ། །ཡང་རྗེ་མར་པའི་ཞལ་ནས། ཉི་མ་གཙང་ལ་སྟོད་ཀྱི་ལྷོ་ནུབ་ཀྱི་ས་ཆ་ན། བྲིན་བྱ་བའི་ལུང་ཡོད་ན། འབྲོག་རྨ་ཤོད་སྨན་ལུང་ཆུ་བར་ཞེས་བྱ་བ་དབེན་གནས་ཅིག་ཡོད་ལ། དེ་ཡང་རིག་པ་ངང་གིས་དྭངས་པའི་རྟགས་སུ་ར་ཆུ་གཡས་ནས་
3-3-60a
འབབ་པ་དང་། འཆི་མེད་ཕྱག་རྒྱ་ཆེན་པོ་ཡུན་མི་རིང་བར་ཐོབ་པའི་རྟགས་སུ་སྨིན་ཆུ་གཡོན་ནས་འབབ་པ་དང་། ཡུམ་བཅོམ་ལྡན་འདས་མའི་ཕོ་བྲང་ཡིན་པའི་རྟགས་སུ། འོག་ན་ཆོས་འབྱུང་ཟུར་བརྩིགས་ཡོད་པ་དང་། སའི་རྟེན་ཕུར་ལ་རྡོ་ཕ་ཝང་ཁྱུང་སྒོང་ལྟ་བུ་ཡོད་པ་དང་། ལུང་པའི་དབུས་སྟིང་ན་བྲག་དམར་པོ་སྤྲེའུ་ཡི་གདོང་པ་འདྲ་བ་ལ། བྱ་ཁ་ཏའི་ཚང་ཡོད་པ་དང་། ལུང་པའི་མདའ་ན་རྩི་ཤིང་ནགས་ཚལ་སྣ་ཚོགས་ཡོད་ལ། དེ་རྣམས་ཀྱི་ཤིང་ལོ་རེ་རེའི་སྟེང་ན། དཔའ་བོ་དང་མཁའ་འགྲོ་བྱེ་བ་རྣམས་ཀྱིས། རྡོ་རྗེའི་གླུ་གར་དང་བཅས་ནས། གར་སྟབས་སྣ་ཚོགས་བསྒྱུར་བ། དོན་ལ་ཧེ་རུ་ཀའི་ཕོ་བྲང་དེར་གཞན་ཡང་ཡོན་ཏན་དུ་མས་བརྒྱན་པ་དེར་ཁྱོད་ཀྱིས་སོང་ལ་སྒྲུབ་པ་གྱིས་དང་། ཡུན་མི་རིང་བར་མཆོག་དང་ཐུན་མོང་གི་དངོས་གྲུབ་ཐོབ་པ་ཡིན་གསུངས་པ་ལ་སོགས་པ་དཀར་ཆག་རྒྱས་པར་བདག་གིས་སྦྱར་བ་རྣམས་ཟུར་ན་གསལ་ལོ། །ཡང་བོད་ཡུལ་གྱི་ཙ་རི་དང་། ཏེ་སེ་དང་། འདི་པ་གཉིས་ནི། སྔོན་བཅོམ་ལྡན་འདས་རྩ་མཆོག་གི་གྲོང་ཁྱེར་ན་བྱོན་པའི་མདོ་དང་། སློབ་དཔོན་ཆེན་པོ་པདྨ་བོད་ནས་རྒྱ་གར་དུ་བྱོན་པའི་གཏམ་རྒྱུད་དང་། ཇོ་བོ་ཆེན་པོ་རྗེ་ལྷ་ཅིག་ཨ་ཏི་ཤ་མངའ་
3-3-60b
རིས་ན་བྱོན་པའི་གཏམ་རྒྱུད་དང་། པཎྜི་ཏ་ཆེན་པོ་ཤཱཀྱ་ཤྲི་དབུས་ནས་བྱོན་དུས་ཀྱི་གཏམ་རྒྱུད་དང་། རྗེ་མར་པ་ལོ་ཙྪ་བས་ལྷོ་དུག་མཚོ་ཁོལ་མའི་འགྲམ་ན་དཔལ་ཞི་བ་བཟང་པོའི་དྲུང་ན་མཇལ་དུས་ཀྱི་གཏམ་རྒྱུད་རྣམས་ལ་བལྟས་ན། ཙ་འདྲ་དང་། ཏེ་འདྲ་ཡིན་ནམ་བྱ་བ་འདུག་ལ། རྗེ་མར་པའི་ལུང་བསྟན་ནི་མི་འདུག་ལ། ཏེ་སེ་འདི་བོན་པོ་ལ་ཕྲོག་པ་ལ། བླ་མ་རྗེ་བཙུན་རས་ཆེན་དེ། མངའ་བདག་རྩེ་ལྡེས་གདན་དྲངས་ནས། ཞག་གཅིག་ཏེ་སེར་བཞུགས་ནས་ཏེ་སེ་ཕྲོགས། བོན་པོ་མིང་སྲིང་བཏོན་པའི་ལོ་རྒྱུས་ནི་རྣམ་ཐར་ཆེན་མོར་གསལ། ཙ་རི་ལ་ནི་ཡེ་རང་བྱོན་སྐད་མི་འདུག་ལ། ཤཱཀྱ་ཐུབ་པའི་སྤྲུལ་པའི་ཆོས་རྗེ་ས་སྐྱ་པཎ་ཆེན་ལ་སོགས་པའི། བོད་ཀྱི་མཁས་གྲུབ་ཕལ་ཆེ་ཡིས་ནི། བོད་ཡུལ་གྱི་ཙ་རི་ཏི་སེ་འདི་གཉིས་དངོས་མིན། ཙ་འདྲ་ཏེ་འདྲ་ཡིན་པས་དངོས་ཀྱི་གོ་ནི་ཆོད་གསུང་བར་འདུག་ལ། རྗེ་བཙུན་རྒྱལ་བ་རྟེན་ནེ་དང་། ཆོས་རྗེ་ཉི་སེང་ལ་སོགས་ཀྱི་ཞི་བྱེད་པའི་གྲུབ་ཆེན་ཁ་ཅིག་ཀྱང་། དྭགས་པོ་རིན་པོ་ཆེ་ལྷ་རྗེ་པ་རང་གི་ནི་གསུང་སྒྲོས་མི་འདུག་སྟེ། དེ་མན་ཆོད་ཀྱི་དྭགས་རྒྱུད་པ་ཕལ་ཆེ་ཡིས་ནི། གནས་ཆེན་རང་ཡིན་པར་བཞེད་དོ། །འོན་ཀྱང་རྗེ་མར་པ་དང་། རྗེ་བཙུན་མིད་ལ་རས་པ་ཡབ་སྲས་ཀྱི་ཞལ་གསལ་ཡང་མི་འདུག་ལ། རྗེ་ཁྱུང་
3-3-61a
ཚང་ཛྙཱ་ན་གུ་རུ་དང་། མངའ་རིས་ཞང་ལོ་ཙྪ་བའི་ཞལ་གསལ་ཡང་མི་འདུག །ཁོ་བོས་ཀྱང་མདོ་རྒྱུད་དུ་མ་རྣམས་ལ། བྱ་ངང་པ་ཆུ་ལ་མར་ལེན་པ་ལྟ་བུ་ཅིག་བྱས་པ་ལ། ཙཱ་རི་ཏི་སེ་གཉིས་ཀྱི་གསལ་ཆ་ཁ་ཚོན་ཆོད་པ་རང་མ་མཐོང་བས། དེར་ཁ་ཚོན་ཆོད་མ་ཕོད་ལ། ཆུ་བོ་སི་ཏའི་འགྲམ་དང་། རི་བོ་གངས་ཅན་ན་ཡོད་བྱ་བ། རྡོ་རྗེ་མཁའ་འགྲོའི་རྒྱུད་དང་། རྨ་བྱ་ཆེན་མོའི་མདོ་ན་འདུག་ལ། བྱང་ཕྱོགས་ཤམ་བྷ་ལ་དང་། ལྷོ་ཕྱོགས་ཏྲ་ཞེས་བྱ་བ་དང་ཉེ་བྱ་བ་ཡང་འདུག་སྟེ། ཁོ་བོས་ཁ་ཚོན་རྦད་མ་ཆོད་ནས་རང་སོར་བཞག་ལ། བོད་ཡུལ་གྱི་ཙཱ་རི་ཏི་སེ་འདི་གཉིས་ལ་དངོས་སུ་མ་ཕྱིན་ཏེ། ལར་འདི་གཉིས་ཀྱང་སྒྲུབ་གནས་ཁྱད་པར་ཅན་རེ་ཡིན་ངེས་པར་འདུག་པས། ཕུན་སུམ་ཚོགས་བསམ་ནས། བླ་མ་གོང་མ་རྣམས་ཀྱི་གསུང་སྒྲོས་དང་། ཏེ་སེའི་ཉི་མ་བྱང་ཆུབ་དང་། ཙཱ་རིའི་བྱ་བཏང་རས་པ་དང་། དེ་རྣམས་ཀྱི་ཆོས་ཞལ་ཡང་མཐོང་བ་ལ་བརྟེན་ནས། ཁོ་བོས་ཀྱང་དཀར་ཆག་རེ་བྱས་པ་ཡོད་དོ། །གཞན་ཡང་རྗེ་བཙུན་མིད་ལ་རས་ཆེན་གྱི་བཞུགས་གནས་རྣམས་ལ། བདག་གིས་མི་ཤེས་པ་ཙམ་མེད་པས། དཀར་ཆག་རེ་རེ་བྱས་ཡོད་དོ། །ལར་
3-3-61b
བླ་མ་མིད་ལ་རས་པ་འདིའི་རྗེས་སུ་ཞུགས་ནས། འཆི་ཆོས་རང་ཅིག་བྱེད་ན་གནས་ངེས་པ་ཅན་བྱེད་དུ་མེད་དོ། །ཁོ་བོ་ཞི་བྱེད་རི་ཁྲོད་པས་ཀྱང་གནས་མལ་ཅིག་ན་ནག་སེམ་མེ་མི་སྡོད་པ་དེ་ལྟར་ལགས་སོ། །ལར་སྒོམ་ཆེན་པ་རབ་དེ་བར་སྣང་གི་འབྲུག་འདྲ་བ། འབྲིང་དེ་གངས་ཀྱི་སེང་གེ་འདྲ་བ། ཐ་མ་དེ་རི་རྩིབས་ཀྱི་སྤྱང་ཁུ་འདྲ་བ། མཐའ་ཆད་དེ་འགྲོན་ཁང་གི་གནས་པོ་འདྲ་བ་ཅིག་དགོས་ཟེར་རོ། །བླ་མ་མིད་ལའི་ཞལ་ནས། རང་བྱུང་ཡེ་ཤེས་ཚོལ་འདོད་ན། །བྱ་འཇོལ་མོའི་རྣམ་ཐར་མཁྱེན་ལགས་སམ། །ཅེས་(ཞེས་)གསུངས་སོ། ཡང་མིད་ལ་རས་པའི་ཞལ་ནས། ང་ལ་བར་ཆད་ཡོང་དོན་མེད། །ངས་མི་ཟེར་ཁ་ལ་ཉན་མ་མྱོང་། །གསུང་སྐད་དོ། །ཡང་མིད་ལ་རས་པའི་ཞལ་ནས། སྒོམ་ཆེན་པ་སྡོད་ཚུགས་ལ་སྙད་བརྟགས་ནས། དགོན་ཆུང་རེ་བརྩིགས་ནས་མི་གསོག་དགུ་གསོས་བྱེད་ཙ་ན། སྒོམ་དང་བྲལ་ཚར་བ་ཡིན་གསུང་སྐད་དོ། །ཡང་མིད་ལའི་ཞལ་ནས། ངས་མཐའ་རུ་ཐོན་པས་འཐིལ་དུ་སླེབ། །མི་ནས་ཐོན་པས་ལྷ་དང་མཇལ། །སངས་རྒྱས་ཀུན་ལག་པའི་འཐིལ་ན་འདུག །གསུང་སྐད་དོ། །ཡང་མིད་ལ་རས་པའི་ཞལ་ནས། ངས་གཞི་དགོན་མ་བཟུང་བས་འཚེངས། དགོན་ཆུང་ཁྲ་ཅོང་ངེ་
3-3-62a
བ་ཅིག་བརྩིགས་ན་འཛིན་ཆགས་ཤུགས་ལ་སྐྱེ། གང་ཟག་བློ་ཆུང་རྣམས་སྒོམ་དང་བྲལ་གསུངས་སོ། །ཡང་མིད་ལ་རས་པའི་ཞལ་ནས། དྭགས་པོ་ལྷ་རྗེ་ལ་གང་ཟག་རྡོ་ཕུག་པ་ཅན་དང་། ཤིང་ཉ་ག་ཅན་ཕན་ཆད་ཕུགས་ན་ཡར་བཞག་པའི་མི་དང་མ་འགྲོགས་གསུང་ངོ་། །ཡང་རྗེ་བཙུན་མིད་ལའི་ཞལ་ནས། སྒོམ་ཆེན་པ་རྣམ་རྟོག་ཆུང་ལ་གཙང་སྦྲ་ཆེ་བ་ཅིག་དགོས་པ་ཡིན་པས། སྤྱོད་པ་མ་རྩིང་མཛོད་གསུང་། ལྟ་སྒོམ་བཟང་པོ་རྒྱུད་ལ་སྐྱེས་ན། སླར་ལ་སྤྱོད་པ་ཞིབ་ཏུ་འགྲོ་བ་ཡིན་གསུང་། ཡང་རྗེ་བཙུན་གྱི་ཞལ་ནས། སྒོམ་རྒྱུ་ཡོད་རུང་མེད་རུང་གང་སྡོད་ས་དེར་ཚུགས་དགོས་པ་ཡིན། གནས་ལ་ངེས་པ་ཅན་བྱས་ན་འཛིན་ཆགས་སྐྱེ་བས་ཡང་ཡང་མལ་སྤོ་ཞིང་། གང་སྡོད་ས་དེར་གདན་ནོན་འཚལ་ཅེས་པ་སེ་བན་རས་པ་ལ་གསུངས་སྐད་དོ། །ཡང་མིད་ལ་རས་པའི་ཞལ་ནས། དུས་ཕྱིས་ཙ་ན་ངའི་རྒྱུད་འཛིན་ཡིན་ཟེར་ནས། རི་ཁྲོད་སྤངས་ཏེ་དགོན་ཆུང་རེ་བཟུང་ནས། མདུན་ན་ཆང་བུམ་རེ་བཞག་ནས་ལག་པས་རྔ་ཁོག་རེ་བཟུང་། ཁས་མི་ནག་པ་ལ་ཆོས་ནག་སྒྲོག །དེ་ཙམ་ན་ངའི་རྒྱུད་པ་ཆད་པ་ཡིན་གསུང་སྐད། ཡང་མིད་ལའི་ཞལ་ནས། ངས་རྗེ་
3-3-62b
མར་པའི་དྲུང་ན་དཀའ་བ་སྤྱད་ཡུན་དེ་ཐུང་པར་འདུག །དེ་བས་ཀྱང་ལོ་གཅིག་བསྡད་ན། ཕྱིས་ཀྱི་སྡུག་བསྔལ་དེ་ཙམ་བྱེད་མི་དགོས་པར་འདུག་སྟེ། ང་རང་འདོད་པ་ཆེས་པས་ལན་འདུག་གསུངས་སོ། །ཡང་མིད་ལའི་ཞལ་ནས། སྙིང་ཐག་པ་ནས་ཆོས་རང་བྱེད་ན། བླ་མ་མཚན་ལྡན་ཞིག་གི་བཀའ་བཞིན་རང་སྒྲུབ་དགོས་གསུང་སྐད། ངས་རྗེ་མར་པའི་གསུང་ལ་ཚད་མར་བཟུང་བས་ང་རེ་འཚེངས་ན་ཨང་གསུང་སྐད་དོ། །ལྕམ་མོ་པེ་ཏ་མགོན་སྐྱིད་ཀྱང་། རྗེ་བཙུན་མིད་ལ་མ་གྲོངས་པའི་ལོ་ལྔའི་གོང་ནས་གར་སོང་འདིར་སོང་མེད་སྟེ་(དེ་)ལུས་ཁྱེར་ནས་གཤེགས་པར་འདོད་པའོ། །དེ་ལ་ཧ་ལས་རྒྱུ་ཡང་འདུག་གེ །མི་རྒོད་དེའི་སྲིང་རྒོད་མ་ཡིན་ལ། ཡང་རྗེ་བཙུན་བྲག་དཀར་རྟ་སོ་དབུ་མ་ན་བཞུགས་དུས་ན། མཚན་མོ་རྐུན་མ་ཞིག་ཡོངས་ནས་ཕུག་པའི་ནང་དུ་ལག་ཉ་བྱེད་ཅིང་འདུག་པས། མིད་ལའི་ཞལ་ནས། ངས་འདིར་ལོ་བཅུ་གཉིས་བསྡད་ཏེ་(དེ་)བཟའ་རྒྱུའི་རིགས་ཉིན་མོ་ཡང་མ་རྙེད་པས། ཁྱོད་ཀྱིས་ནམ་ཕྱེད་བཙལ་ཡང་མི་རྙེད་དམ་གསུངས་པས། ཁོ་རྒོད་ཤ་བྱས་ནས་བྲོས་སོང་གསུང་། བླ་མ་མི་ལ་རས་པའི་ཞལ་དང་ཤངས་ནས་རླུང་ཚུར་མི་རྒྱུ་བའི་རྟགས་སུ། སྤྱི་གཙུག་གི་ཚངས་བུག་གི་ཐད་དཀར། རླུང་
3-3-63a
བལ་འཁལ་བའི་འཕང་ཙམ་ཞིག་འུར་སྒྲ་དང་བཅས་པ་དུས་རྒྱུན་དུ་ཡོད་པ་ལ། དེ་རལ་གྲི་ངར་མས་བཅད་ཀྱང་མི་ཆོད་སྐད་དོ། །ཡང་བླ་མ་དགེ་བའི་བཤེས་གཉེན་ཁ་ཅིག་ན་རེ། མིད་ལ་རས་ཆེན་གྱིས་ལོ་བཞི་བཅུ་ཞེ་དགུ་པ་ལ་གྲུབ་པ་ཐོབ་པ་ཡིན་ཟེར་ལ། ཁ་ཅིག་ན་རེ་ལྔ་བཅུ་རྩ་གཅིག་ལ་གྲུབ་པ་ཐོབ་པར་འདོད་པ་ལ། རྗེ་ཁྱུང་ཚང་པ་དང་། མངའ་རིས་ཞང་ལོ་ཙྪ་བའི་ཞལ་གསལ་ཁ་ཚོན་ཆོད་པ་མི་འདུག་སྟེ། འོན་ཀྱང་རྗེ་བཙུན་རང་གི་མགུར་ལ་བརྟགས་ན་དགུང་ལོ་ལྔ་བཅུ་དང་ཞག་བཅོ་བརྒྱད་ཀྱི་ཉི་མ་ཤར་འདལ་དེ་ལ། རླུང་བཅུ་པོ་གཅིག་ཏུ་འདྲེས་པ་འདྲ་སྟེ། ལྔ་བཅུ་རྩ་གསུམ་ན་དཔལ་ཆུ་དབར་ཡང་དབེན་ན། ས་དང་པོ་རབ་དགའི་སྔ་ལྟས་རྣམས་ཇི་ལྟ་བ་བཞིན་དུ་གཟིགས་པར་འདུག་པས། རྗེ་རས་ཆུང་པའི་བཞེད་ཀྱིས་ནི། རླུང་བཅུ་གསུམ་དུ་མཛད་འདུག །གང་ལྟར་ཡིན་ཡང་མཁས་གྲུབ་རྣམས་ཀྱིས་བརྟག་པར་ཞུ། མཁས་པ་ཁོ་ནས་ནི་འདི་ལ་གླགས་མཆིའོ། །ཨ་ལ་ལ་མིད་ལ་རས་ཆེན་ཁྱེད་ཀྱི་ཞབས་ལ་གུས་པས་འདུད། དུས་ཕྱིས་གྲུབ་པ་ཐོབ་པའི་རྗེས་ན། སྙ་ནམ་ཐོག་ལའི་སྒྱེར་སོ་ཁང་བུ་ན། རྗེ་དམ་པ་སངས་རྒྱས་དང་མཇལ་ནས། ཡུམ་བཅོམ་ལྡན་འདས་
3-3-63b
མ་སྒྲོལ་མ་དཀར་མོའི་དབང་བཀའ་ལུང་དང་བཅས་པ་ཞུས་གསུང་། རྣལ་འབྱོར་བཞི་གསུམ་བཅུ་གཉིས་ཀྱི་གདམས་ངག་འདི་ཡང་དམ་པ་སངས་རྒྱས་ཀྱི་དྲུང་དུ། རྗེ་བཙུན་མིད་ལས་ཞུས་པ་ཡིན་པར་འདུག་པ་ལ། དེ་མིན་ཏེ་འདི་ནི་དམ་པའི་ཞབས་ལ། དྭགས་པོ་ལྷ་རྗེས་དངོས་སུ་གཏུགས་ནས་ཞུས་པ་ཡིན་ཏེ། དེ་ཡང་རྗེ་བཙུན་མིད་ལ་སྙ་ནམ་གྲོད་ཕུག་ན་བཞུགས་པའི་དྲུང་ན། དྭགས་པོ་ལྷ་རྗེ་པ་དབུས་ནས་བཞུད་པའི་ཚུར་རེས་དིང་རིའི་རྫ་ལུང་འགྲར་ཞུས་པ་ཡིན་གསུང་། ཡང་རྗེ་བཙུན་བྲག་དམར་ན་བཞུགས་དུས་ཉིན་ཅིག་ནི། སྔར་མེད་པའི་རི་ནག་པོ་བང་རིམ་གསུམ་པ་ཞིག་ལ། བསྐོར་བ་མཛད་ཅིང་འདུག་པ་དང་། རས་ཆུང་རྣམས་ཡིད་མ་ཆེས་ནས། འདི་གང་ནས་བྱུང་བ་ཡིན་ཞུས་པས། མིད་ལའི་ཞལ་ནས། སྐྱོབ་པ་ཤཱཀྱ་སེང་གེ་ཡིས། །རི་བོ་ནག་པོ་འབིགས་བྱེད་འདི། །བོད་ཀྱི་མིད་ལ་རས་པ་ལ། །མཆོད་པའི་རྟེན་དུ་གནང་བ་ལགས། །གནང་ཡང་དེ་ཉིད་ཡིན་སྙམས་མེད། །གསུང་། ཡང་ཆུ་དབར་ན་ཉིན་ཅིག་སྔར་མེད་པའི་ཕོ་ཤིང་མོ་ཤིང་གཉིས་ལ། བསྐོར་བ་མཛད་གྱིན་འདུག་པས། རས་ཆུང་རྣམས་ཡིད་མ་ཆེས་པས། ཤིང་འདི་པ་གང་ནས་བྱུང་ཞུས་
3-3-64a
པས། མིད་ལའི་ཞལ་ནས། འཁོར་ལོ་བདེ་མཆོག་ཡབ་ཡུམ་གྱིས། །ཐབས་ཤེས་ཟུང་འཇུག་ཚེ་ཤིང་འདི། །བོད་ཀྱི་མིད་ལ་རས་པ་ལ། །བསྐོར་བའི་རྟེན་དུ་གནང་བ་ལགས། །གནང་ཡང་དེ་ཉིད་ཡིན་སྙམ་མེད། །ཅེས་གསུངས་སོ། །ཡང་ཆུ་དབར་བཞུགས་དུས། ཉིན་ཅིག་རྗེ་བཙུན་གྱིས་འཁོར་རྣམས་ལ་ཆོས་ཞིག་གསུང་ཤིང་(ཞིང་)ཡོད་ཙ་ན། བུད་མེད་ཁ་དོག་སྔོ་ནག་ལ་བརྗིད་ཅན་མི་སྡུག་པའི་རྣམ་འགྱུར་ཅན་གང་ནས་འོངས་ཆ་མེད་བྱུང་ནས། མཆོད་རྟེན་ནག་པོ་རྩེ་མོ་ཐུར་ལ་བསྟན་པ་ཞིག །རྗེ་བཙུན་ལ་ཕུལ་ནས་ཕྱག་ཡང་(ཀྱང་)མི་འཚལ་བར་ནམ་མཁའ་ལ་འཕུར་སོང་བ་དང་། རས་ཆུང་རྣམས་ཡིད་མ་ཆེས་ནས། རྗེ་བཙུན་ལ་མི་མོས་པའི་བུད་མེད་དེ་པ་སུ་ཡིན་གང་ནས་འོངས་པ་ཡིན། རྗེ་བཙུན་ལ་མི་མོས་པའི་རྣམ་འགྱུར་དུ་འདུག་པ་ཞུས་པས། རྗེ་བཙུན་གྱི་ཞལ་ནས། རྒྱ་གར་ཡུལ་གྱི་བསིལ་བ་ཚལ། །དུར་ཁྲོད་ཤ་ཟ་མཆེད་བདུན་གྱིས། །བོད་ཀྱི་མིད་ལ་རས་པ་ལ། །ཕྱི་རབས་དུར་ཁྲོད་དགོས་ཕྱིར་ཕུལ། །འོན་ཀྱང་དེ་ཉིད་ཡིན་སྙམ་མེད། །གསུངས་ནས། གླང་མ་ལུང་གི་བྲག་ལ་རྒྱབ་པས། འདམ་སག་ལ་འདམ་འབྱར་བ་ལྟར་འབྱར་སོང་བས། དུས་ཕྱིས་ཙ་ན་གནས་འདིར་
3-3-64b
སྒོམ་ཆེན་ཤི་ཚད་ཀྱི་དུར་ཁྲོད་དགོས་པ་ཡིན་གསུང་སྐད། ཡང་རྗེ་བཙུན་གྱི་འབྲི་ལྕེ་ཕུག་ན་སྔར་མེད་པའི་རྡོ་བའི་ཆོས་ཁྲི་ཞིག་ལ་བཞུགས་གདའ་བ་དང་། རས་ཆུང་རྣམས་ཀྱིས་འདི་གང་ནས་བྱུང་ཞུས་པས། རྗེ་བཙུན་གྱི་ཞལ་ནས། བོད་ཀྱི་མིད་ལ་རས་པ་ལ། །སྤྲུལ་པའི་དཔའ་མོ་ཚེ་རིང་མས། །རང་བྱུང་དཀར་ཆུང་རྡོ་བའི་ཁྲི། །སྒྱུ་མ་ཙམ་དུ་ཕུལ་བ་ལགས། །འོན་ཀྱང་དེ་ཉིད་ཡིན་སྙམ་མེད། །གསུང་། ཡང་བྲིན་གྱི་ལམ་ཁ་ཅིག་ན། སྔར་མེད་པའི་རྡོ་བའི་ཆོས་ཁྲི་ཞིག་ལ། རྗེ་བཙུན་བཞུགས་ནས་འདུག་པ་དང་། རས་ཆུང་རྣམས་ཡིད་མ་ཆེས་ནས་འདི་གང་ནས་བྱུང་ཞུས་པས། མིད་ལའི་ཞལ་ནས། བོད་ཀྱི་མིད་ལ་རས་པ་ལ། །སྤྲུལ་པའི་ལྷ་མོ་ཚེ་རིང་མས། །རང་བྱུང་རྡོའི་ཆོས་ཁྲི་འདི། །སྒྱུ་མ་ཙམ་དུ་ཕུལ་པ་ལགས། །འོན་ཀྱང་དེ་ཉིད་ཡིན་སྙམ་མེད་གསུང་། །ཡང་ལ་ཕྱི་ན་བཞུགས་དུས་ན། ཉིན་གཅིག་ནི་སྔར་མེད་པའི་ཆོས་ཁྲི་རྒྱབ་ཡོལ་དང་བཅས་པ་ཞིག་ལ་བཞུགས་འདུག་པས། རས་ཆུང་རྣམས་ཡིད་མ་ཆེས་ནས་འདི་གང་ནས་བྱུང་ཞུས་པས། མིད་ལའི་ཞལ་ནས། བོད་ཀྱི་མི་ལ་རས་པ་ལ། །སྤྲུལ་པའི་ལྷ་མོ་ཚེ་རིང་མས། །རང་བྱུང་རྡོ་རྗེའི་ཆོས་ཁྲི་རྒྱབ་ཡོལ་ཅན། །སྒྱུ་མ་ཙམ་དུ་
3-3-65a
ཕུལ་བ་ལགས། །འོན་ཀྱང་དེ་ཉིད་ཡིན་སྙམ་མེད། །གསུང་། གཞན་ཡང་ཤར་ཙོང་ཁའི་རྒྱལ་པོས་གདན་དྲངས་ནས། ཙོང་ཁ་དང་། རྨ་ཤོད་དང་། བྱང་རྒྱབ་དང་། ཨ་འདར་ཚྭ་ཁ་དང་། རྣམ་སྣང་གོང་བུ་རྣམས་སུ་བྱོན་པའི་ལོ་རྒྱུས་རྣམས་ཟུར་ན་གསལ། རྗེ་བཙུན་གྱི་དྲུང་དུ་རས་ཆུང་པས་ལོ་བཅུ་གཉིས་བཞུགས་པར་འདོད་པ་ལ། དོན་དམ་འཆད་པ་ལོ་བཅུ་དགུ་བཞུགས་པ། སྔ་ཕྱི་དྲིལ་བས་མང་རབ་(རབས་)སོང་གདའ། ལ་ལ་ན་རེ་རྗེ་བཙུན་རྒྱ་གར་དུ་དངོས་སུ་བྱོན་ལ། རྫུ་འཕྲུལ་གྱི་བྱོན་པ་ཡང་འདུག་སྟེ། དེས་ཆོག་གོ་མིད་ལ་ཁོས་ལ་ལུང་འབབ་འཛེག་དགོས་པར་མི་འདུག་གོ། །ཁ་གཅིག་ན་རེ་སངས་རྒྱས་དོན་ཡོད་གྲུབ་པའི་སྤྲུལ་པ། སློབ་དཔོན་འཕགས་པ་ཀླུ་སྒྲུབ་ཡིན་ལ། དེའི་སྤྲུལ་པ་རྗེ་བཙུན་མིད་ལ་ཡིན་བྱ་བ་ཡང་འདུག །ཕལ་ཆེ་བས་ནི་སྐུ་ཚེ་འདི་རང་ལ་བརྩོན་འགྲུས་ཀྱིས་གྲུབ་པ་ཐོབ་པར་འདོད་པ་མང་བ་འདུག །བདེ་མཆོག་མཁའ་འགྲོ་སྙན་རྒྱུད་དང་། སེམས་ཁྲིད་ཡིད་བཞིན་ནོར་བུ་ལ་སོགས་རྣམས་ན་ནི། ལུང་བསྟན་ཁ་ཡར་འདུག་ལགས། རྗེ་ནཱ་རོ་པས་ཀྱང་། ལྷོ་བྲག་པཎ་ཆེན་ལ། ཤར་ཕྱོགས་ཏེ་ལོས་བྱིན་གྱིས་རློབས། །ལྷོ་ཕྱོགས་ཀླུ་
3-3-65b
སྒྲུབ་ཀྱིས་བྱིན་གྱིས་རློབས། །ནུབ་ཕྱོགས་ཨིཎ་དྲས་བྱིན་གྱིས་རློབས། །བྱང་ཕྱོགས་ནཱ་རོས་བྱིན་གྱིས་རློབས། །རིགས་ལྔ་བྱ་འཕུར་ཆོས་ཉིད་རླུང་། །འཁོར་ལོས་བསྒྱུར་རྒྱལ་རིན་ཆེན་འཛིན། །མི་རྒྱུད་ནམ་མཁའི་པདྨོ་འདྲ། །སྒྲུབ་རྒྱུད་ཆུ་བོའི་གཞུང་དང་མཚུངས། །བོད་ཀྱི་མར་སྟོན་ལོཙྪ་བ། ཁྱོད་འདི་རུ་མ་འདུག་བོད་དུ་སོང་། །ལྗོངས་ཁ་བ་ཅན་གྱི་བྱང་ཕྱོགས་ན། །ཐོས་པ་ལ་དགའ་བའི་སྣོད་ལྡན་ཡོད་གསུངས་ནས། རྗེ་བཙུན་མིད་ལ་ལུང་བསྟན་གདའ་ལགས་སོ། །ཡང་ལི་འཁོར་ཕྱ་རུ་བ་དང་། དྭགས་པོ་ལྷ་རྗེ་གཉིས་ཀྱིས། གལ་ཏེ་རྗེ་བཙུན་ཞལ་མི་བཞུགས་པ་སྲིད་ན། ངེད་རྣམས་ལ་མ་བདེ་བ་འདྲ་བྱུང་ན་སུ་ལ་འདྲི་ལགས་ཞུས་པས། རྗེ་བཙུན་གྱི་ཞལ་ནས། མ་བདེ་བ་ཙམ་ཡང་མི་ཡོང་གིས། དམ་དུམ་བྱུང་ན་རས་ཆུང་རྡོ་རྗེ་གྲགས་པ་ལ་འདྲི་བ་ལས་འོས་འདུག་གམ་གསུང་། ཡང་ལི་ཁོར་བ་དང་། དྭགས་པོ་ལྷ་རྗེ་དང་གཉིས་པོས། ངེད་གཉིས་བླ་མ་བསྟེན་ཡུན་ཐུངས་པས། གདམས་ངག་མང་པོ་མ་ཐོབ་པས། ཆོས་བཀའ་དང་གདམས་བསྐོར་རྣམས་འདི་དང་འདིའི་བསྐོར་ཡིན་བྱ་བ་རེ་གསུང་པར་ཞུ་ཞུས་པས། རྗེ་བཙུན་གྱི་ཞལ་ནས། དེ་ལ་མི་ཤེས་
3-3-66a
རྒྱུ་མེད་ན་ཡང་། སྐྱེས་མཆོག་མར་པས་བླ་མ་བརྒྱ་རྩ་བརྒྱད་ཀྱི་ཞབས་ལ་བཏུགས་ནས། ཆོས་བཀའ་དང་གདམས་ངག་རྣམས་གསན་པར་འདུག་པ་ལ། ངས་མ་ཐོབ་པ་མེད་ན་ཡང་། ཐམས་ཅད་དྲིལ་བ་རས་ཆུང་རྡོ་རྗེ་གྲགས་པ་ཁོ་ལས་མེད་ལ། ཁྱེད་བུ་སློབ་གཞན་མ་རྣམས་ལ་ཡང་། རང་རང་ལ་གདམས་བསྐོར་རང་རེ་འཚོ་བ་རེ་བྱིན་པ་དེ་ཡིན་མོད་གསུང་། ཡང་ཞུས་པ། འོ་ན་གདམས་བསྐོར་རྣམས་གཅིག་ལགས་སམ་ཞུས་པས། རྗེ་བཙུན་གྱི་ཞལ་ནས། སངས་རྒྱས་ཀྱི་བཀའ་ཡིན་པས་འདྲ་ཡང་། ལམ་ཉམས་སུ་ལེན་ལུགས་ལ་ཁྱད་དུམ་རེ་ཡོད་པས། ཐབས་ལམ་ཆོས་དྲུག་འདི། དཔལ་དགྱེས་པ་རྡོ་རྗེའི་རྒྱུད་ནས་ཀྱི་གདམས་ངག་ཡིན་པས། ཆོས་སྒོ་ཡང་ཀྱེ་རྡོར་དང་བདག་མེད་མ་ལྷ་མོ་བཅོ་ལྔའི་དབང་དང་། བྱིན་བརླབས་ཀྱིས་འབྱེད་པ་ཡིན་ལ། བཀའ་བགོ་བའི་བསྟན་བསྲུང་ཀྱང་(ཡང་)གུར་མགོན་ཡིན་ལ། རྒྱབ་ཆོས་ཀྱང་བརྟག་གཉིས་བཤད་པ་ཡིན་ལ། ངས་ཀྱང་རྗེ་མར་པའི་དྲུང་ན་བརྟག་གཉིས་ཚར་བཅུ་དྲུག་ཉན། བླ་མ་རྔོག་གི་དྲུང་དུ་ཚར་གཉིས་ཉན། ལར་ཚར་བཅོ་བརྒྱད་ཐོབ་གསུང་། ཡང་ཞུས་པས་རྗེ་བཙུན་ཆེན་པོས། བུ་ཆེན་གཞན་སུ་ལ་ཡང་མ་གནང་
3-3-66b
བ་ཅིག་སྐྱེས་བུ་རས་ཆུང་པ་ལ་གནང་པ་འདྲ་བ་དེ་གང་གནང་བ་ལགས་ཞུས་པས། ཡུག་པ་ཞིག་ཞལ་རོག་བཞུགས་པ་དང་། དེ་ལ་དྲི་རྒྱུ་ཅི་ཡོད་གསུང་། ཐོས་ན་དགའ་བ་ལགས་ཕྱིས་ཀུན་ཁོང་གི་དྲུང་དུ་ངེད་ཚོ་ཡང་ཞུ་བ་ལགས་ཞུས་པས། དེ་རང་ཁོས་ཁྱེད་རྣམས་ལ་མི་སྟེར་རམ་གསུང་། དེ་བདེ་མཆོག་མཁའ་འགྲོ་རྒྱ་མཚོ་ནས་ཚུར་དྲངས་པའི་གདམས་ངག་གཅིག་ཡོད་ཏེ(དེ)། རྩ་རྒྱུད་ལེའུ་ལྔ་བཅུ་རྩ་གཅིག་པ་བྱ་བ་ཅིག་དང་། སེམས་ཁྲིད་འཕོ་བ་དང་བཅས་པ་ཁ་ཚང་ཁྱེད་རང་ལ་ལྷ་རྗེ་ལ་བྱིན་པ་དེ་དང་དོན་གཅིག་གསུང་། ཡང་ཞུས་པ་དེའི་ཆོས་སྒོ་གང་གིས་འབྱེད་ཞུས་པས། བདེ་མཆོག་དང་། ཕག་མོ་དང་། རྒྱས་བསྡུས་ཁ་ཅིག་ཡོད་གསུང་། དེའི་ཁྲིད་གང་ལགས་ཞུས་པས། དེ་ལ་འོག་སྒོ་བདེ་ཆེན་གྱི་ཆོས་དྲུག་བྱ་བ་ཅིག་ཡོད་སྟེ(དེ)། ཁྲིད་ལུགས་ནི་ཐབས་ལམ་ཆོས་དྲུག་དང་དོན་འདྲ་གསུང་། རྒྱབ་ཆོས་གང་ལགས་ཞུས་པས། རྒྱུད་པ་ཡིད་བཞིན་ནོར་བུ་བྱ་བ་ཅིག་ཡོད་གསུང་། བཀའ་བགོ་བའི་ཆོས་བསྲུངས་གང་ལགས་ཞུས་པས། གྲི་གུག་ཅན་བྱ་བ་ཡིན་ཏེ། གུར་མགོན་དང་ཇོ་བོ་ཆེན་པོ་རྗེ་ལྷ་ཅིག་ཨ་ཏི་ཤའི་བཀའ་གདམས་པ་གྲི་གུག་ཅན་དང་ངོ་བོ་གཅིག་
3-3-67a
བཅོམ་ལྡན་འདས་དགྱེས་པ་རྡོ་རྗེ་ཁྲོས་པ་ཡིན་གསུང་། ཡང་རྗེ་བཙུན་གྱི་ཞལ་ནས། དབུས་པ་སྟོན་པ་ཁྱོད་དང་པོ་དབུས་ནས་ཡར་ལ་ཡོང་ཁ་དེར་སྤྲང་རྒན་གསུམ་དང་འཕྲད་དམ་གསུང་། འཕྲད་ལགས་ཞུས་པས། དེ་རྣམས་ཀྱིས་ཁྱོད་ལ་ཇི་སྐད་ཟེར་གསུང་། རང་རེ་གསུམ་འདྲ་བའི་བསོད་ནམས་མ་བསགས་པ་ཡོང་བ། རྩོལ་བ་མི་དགོས་པར་ཟན་ལྡོག་མགོ་ཙམ་རེ་དང་། ལོ་ཚོད་ཚྭ་ཁག་པ་རྫ་མ་གང་ཡོད་ན་ཟེར་ཤིང་འདུག་ལགས་ཞུས་པས། དེ་མིན་ཅི་ཟེར་གསུང་། གཅིག་ན་རེ་དེ་འདྲ་ལས་དེ་བས་ཀྱང་མངའ་བདག་རྩེ་ལྟེ་ཡིན་དགའ་ཟེར་ཤིང་འདུག་པ་དང་། གཅིག་ན་རེ་དེ་འདྲ་ལ་སྨོན་རིན་མི་ཆོག །ལོ་ཚོད་དང་ཟན་སྤྲང་པས་རྙེད་འགྲོ་ལ། མངའ་བདག་ལ་ཡང་འཆི་བ་ཡོང་བས་སྨོན་རྒྱུ་མེད་དོ། །སྨོན་པ་བྱེད་ན། རྗེ་བཙུན་མིད་ལ་རས་པ་འདྲ་བ་རེ་ཡིན་ན་དགའ། གོས་ན་རས་རྐྱང་གིས་དྲོས་པ། འཚོ་བ་ནི་མཁའ་འགྲོ་མས་འདྲེན་པ། སེང་གེ་ལ་ཆིབས་ནས་ནམ་མཁའ་ལ་འགྲོ་བ། སངས་རྒྱས་ཤཱཀྱ་ཐུབ་པ་ལ་སོགས་པའི་སྐུ་དུ་མར་སྤྲུལ་པ་བྱེད་ནུས་པ་ཟེར་བས། དེ་རྣམས་ཐོས་པས་ང་བ་སྤུ་ཟིང་བྱུང་ནས། བླ་མ་དེ་ད་ལྟ་གང་ན་
3-3-67b
བཞུགས་དེའི་བླ་མ་སུ་ཡིན། ཆོས་གང་གསུང་བྱས་པས། བླ་མ་དེ་ད་ལྟ་བྲིན་སྙ་ནམ་གཉིས་ཀྱི་རི་ཁྲོད་ལ་བཞུགས། དེའི་བླ་མ་མར་པ་ལོ་ཙྪ་བྱ་བ་ཡིན། མར་པའི་བླ་མ་ནཱ་རོ་པ་བྱ་བ་ཡིན། ཆོས་ནི་ཀྱེ་རྡོར་གྱི་གདམས་ངག་ནཱ་རོ་ཆོས་དྲུག་བྱ་བ་ཞིག་གསུང་། ཟེར་ལགས་ཞུས་པས། སྤྲང་པོ་དེ་རྣམས་སུ་ཡིན་ཤེས་སམ་གསུང་། མ་ཤེས་ལགས་ཞུས་པས། ཅི་ཡང་མི་གསུང་། སྤྲང་པོ་དེ་རྣམས་རིགས་གསུམ་མགོན་པོའི་སྤྲུལ་པ་ཡིན་པར་འདུག་སྐད། ཡང་ཇོ་མོ་ལྷ་སྨན་རྒྱལ་མོ་མཆེད་ལྔས། གལ་ཏེ་རྗེ་བཙུན་ཞལ་དངོས་སུ་མི་བཞུགས་པ་བྱུང་ན། ངེད་ཀྱི་སྤྱོད་ལམ་ཇི་འདྲ་བྱེད་ལགས་ཞུས་པས། རྗེ་བཙུན་གྱི་ཞལ་ནས། ཁྱེད་རྣམས་ལ་གཞན་ཅི་ཡང་བྱེད་རྒྱུ་མེད། ཁྱེད་རང་རྣམས་ཡང་(ཀྱང་)སྐྱབས་འགྲོ་དང་མ་བྲལ་བར་གྱིས་ལ། སྤྱིར་ཡང་སངས་རྒྱས་ཀྱི་བསྟན་པ་རིན་པོ་ཆེའི་ཞབས་ཏོག་ལ་འབད་པ་ཐོན་ཅིག །དགོས་(སྒོས་)སུ་ངའི་སྒྲུབ་བརྒྱུད་རྣམས་ལ་མས་བུ་སྐྱོང་བ་ལྟར་གྱིས་ཤིག །གསུངས་པ་དང་། དགེ་སྦྱོར་ལེ་ལོ་བྱེད་པ་རྣམས་ལ་དྲག་བསྐུལ་བག་རེ་བྱེད་ལགས་སམ་ཞུས་པས། དྲག་བསྐུལ་རང་མ་བྱེད་ཞི་བས་བསྐུལ་ཞིག་གསུངས་སོ། །ཡང་ལི་འཁོར་བ་དང་། དྭགས་པོ་ལྷ་རྗེ་པ་གཉིས་ཀྱིས། རྗེ་བཙུན་
3-3-68a
ཆེན་པོ་ལགས། འོ་ན་རྒྱུད་པ་ཡིད་བཞིན་ནོར་བུ་དེ་རྒྱས་པ་ཞིག་གསུང་པར་ཞུ་ཞུས་པས། ཁར་ཙང་ནས་ཅི་རིགས་སུ་བཤད་པ་དེ་ཡིན་གསུངས་པ་དང་། བླ་མ་རྗེ་བཙུན་མི་ལ་རས་ཆེན་དེ། བྲག་དཀར་རྟ་སོ་དབུ་མ་ན་བཞུགས་དུས་ན། བཀའ་གདམས་པའི་དགེ་བཤེས་ཤེར་སེང་བྱ་བ་དེ། བལ་པོར་རྟེན་མཆོད་སྒྲུབ་པ་ལ་འོང་བས། ཀློང་མདའ་ནས་བལྟས་པས། བྲག་དཀར་ན་དུད་པ་སྔོ་ཁྱུག་བྱུང་བ་མཐོང་ནས་ལམ་འགྲིམ་ལ་དྲིས་ནས། ཡ་ཀིར་སུ་ཡོད་པ་ཡིན་བྱས་པས། ཡ་གི་ན་གུང་ཐང་ཙཱ་པ་མི་ལ་ཤེས་རྒྱལ་གྱི་བུ་ཐོས་པ་དགའ་བྱ་བ། ཁུ་བོ་དང་ཡུལ་པ་ཐམས་ཅད་ཕུང་ལ་གཏོང་མཁན་དེ་ཡོད་པ་ཡིན་ཟེར། དགེ་བཤེས་ཀྱིས་ཡང་དྲིས་པ། འོ་ན་ཁོ་ད་ལྟ་དེར་ཅི་བྱེད་པ་ཡིན་བྱས་པས། ལམ་འགྲིམ་ན་རེ། ལ་ལ་ན་རེ་སྡིག་བཤགས་བྱེད་པ་ཡིན་ཟེར། ལ་ལ་ན་རེ་ད་རུང་མཐུ་སྒྲུབ་པ་ཡིན་ཟེར། ཚོད་ལོངས་པ་མི་འདུག་ཟེར། དེར་དགེ་བཤེས་བལ་པོར་འགྲོ་བ་བཤོལ་ནས་བྲག་དཀར་ན་ཕྱིན་པས། ཕུག་པའི་ནང་ན་མི་གཅེར་བུ་ལུས་ཐལ་སྐྱ་ཐུལ་ལེ་བ་ཞིག་འདུག་པས། དགེ་བཤེས་ཀྱིས་ཁྱེད་འདིར་ཅི་བྱེད་པ་ཡིན། འདིར་བསྡད་ནས་ཅི་ཙམ་སོང་བྱས་པས། མིད་ལ་ན་རེ་ང་
3-3-68b
སྐྱེ་ཤིས་འཇིགས་པས་ཆོས་བྱེད་པ་ཡིན། འདིར་བསྡད་ནས་ལོ་བཅུ་གཅིག་ཙམ་སོང་ཟེར་བས། དགེ་བཤེས་ཀྱི་བསམ་པ་ལ། འོ་ན་ཁོང་གིས་ངའི་སྣ་ལེན་ཅིག་བྱེད་ཡོང་བསམ་ནས་ཡུག་བསྡད་པས། མིད་ལ་ན་རེ་ཁྱེད་རང་བྲག་རྩ་ཕ་གིར་སོང་ལ་བཞུགས་མཛོད་ཟེར་བས། དགེ་བཤེས་ཀྱིས་བྲག་རྩར་ཕྱིན་ནས་བསྡད་པས། མི་ལའི་བསམ་པ་ལ། དགེ་བཤེས་དེ་ལ་ཁུར་བོ་ཆེན་པོ་འདུག་པས། ང་ལ་ཡང་བཟའ་རྒྱུ་འདྲ་སྟེར་རམ་བསམ་ནས་ཡོད་ཙ་ན། ཉིན་ཞིག་ནི་དགེ་བཤེས་ན་རེ་སྒོམ་ཆེན་པ་འདིར་ཤོག་དང་། ངའི་མིག་ལ་རྡུལ་མ་སོང་བ་ལེན་རོགས་གྱིས་ཟེར་བས། མིད་ལས་ཕྱིན་ནས་ཁོང་གི་རྡུལ་བསལ་ནས་ཕུག་ན་ཡར་བལྟས་པས། དགེ་བཤེས་ཀྱི་རྫ་མ་ལ་ཟན་གཡོས་པ་དང་། སྐྱོ་ཚ་བསྐོལ་བའི་ཟན་ཁལ་ལེ་འདུག་པ་དང་། གཞན་ཡང་རྩམ་པ་དང་། མར་དང་། བུ་རམ་ཡང་འདུག་པ་ལ། མིད་ལའི་བསམ་པ་ལ། དགེ་བཤེས་འདིས་ང་ལ་བཟའ་རྒྱུ་བྱིན་པའི་རིགས་སུ་མི་འདུག་པས། རྫ་མ་དེ་གཡར་ནས་བཀྲུས་ལ་འཐུང་དགོས། ཡུག་གཅིག་གི་བཅུད་དུ་འགྲོ་བ་འདུག་བསམ་ནས། ངའི་རྫ་མ་ཆག་པས་དགེ་བཤེས་ཀྱི་རྫ་མ་དེ་ཐེབས་ཅིག་གཡར་དགོས་གསུངས་པས། ཁོང་བའི་བསམ་པ་ལ། 
3-3-69a
སྒོམ་ཆེན་པ་རི་ཁར་ཡུན་རིང་བསྡད་པ་གཙང་སྦྲ་ཆེ་བ་ཡིན་པས། རྫ་མ་བཀྲུས་ནས་གཏད་དགོས་བསམ་ནས། ཉིད་ཅག་ཡུག་ཕར་བཞུད་དང་། དེ་ནས་ངས་སྐད་ཅིག་བཏང་ཙམ་ན་རྫ་མ་ལེན་བྱོན་ཟེར་བས། མིད་ལའི་བསམ་པ་ལ་རྫ་མ་གཡར་བྱས་པ་དེ་ལེགས། ང་ལ་ཟན་མར་གཅིག་དང་སྐྱོ་ཚ་ཅིག་སྟེར་བར་འདུག །དེ་ཡང་ཟན་དང་སྐྱོ་ཚ་དཔགས་ནས་ཟ། བུ་རམ་ལ་བཅུད་བྱེད། མར་ལ་སྐུ་མཉེད་བྱེད་བསམ་སྟེ་དགའ་ནས་ཡོད་ཙ་ན། དགེ་བཤེས་ཀྱིས་རྫ་མ་ལེན་བྱོན་ཟེར་བས་ཕྱིན་ཙ་ན། རྫ་མ་བཀྲུས་ནས་གཙང་སིང་ངེ་གཏད་བྱུང་བས། དེར་མིད་ལ་ངོ་ནག་ཐིང་བྱས་ནས་རྫ་མ་མི་དགོས་ཟེར་ནས་སོང་། འདི་ལ་ནི་བླ་མ་རྗེ་བཙུན་ཆེན་པོ་ལ་དཔལ་ལྡན་བཞད་པའི་རྡོ་རྗེས། དུས་ཕྱིས་ཀྱང་མང་ཡང་དེའི་ཉིན་མོ་ལས་ཡི་མུག་པ་མ་བྱུང་གསུང་སྐད། དེ་ནས་དགེ་བཤེས་རྒྱགས་ཟད་ནས་ཡུལ་དུ་ཕྱིན་སྟེ(ཏེ)། གླེང་ལངས་ཞོར་འཕྲོས་བྱུང་བས། རྐ་ཀྱོག་མཁན་པོ་བ་ན་རེ། སྒོམ་ཆེན་དེ་རྒྱགས་མེད་འཕོངས་པ་ཞིག་ཡོད་པ་མེད་ནམ། ཁྱེད་ཀྱི་རྫ་མ་ལེན་ཤོག་བྱས་དུས་ལག་ན་ཅི་འདུག་གསུང་། ལག་ན་ཕོར་གོག་སྟོང་པ་ཅིག་འདུག་ཞུས་པས། འོ་དེ་ཀ་ཡིན་སྒྲུབ་པ་པོ་རྒྱགས་མེད་གཅིག་ཡིན་པར་འདུག་
3-3-69b
པས། ད་མྱུར་པོར་བསྙེན་བཀུར་མང་པོ་ཁྱེར་ལ་སོང་། ཆོས་ཀྱང་ཞུས་གསུང་ནས་ཡང་བྲག་དཀར་དུ་ཆ་རྐྱེན་མང་པོ་ཁྱེར་ནས་ཕྱིན་པ་དང་། ཁོང་རྣམས་སླེབ་པའི་ཟླ་བ་གཅིག་གི་སྔོན་ཙམ་ན། རྗེ་བཙུན་གྲུབ་པ་ཐོབ་ནས་སྙ་ནམ་ཕྱོགས་སུ་གཤེགས་ཚར་འདུག་ཟེར། དུས་ཕྱིས་ཞབས་ལ་གཏུགས་ཆོས་ཞུས་པས། གྲུབ་ཐོབ་ཆེན་པོ་ཁོར་ཕྱ་རུ་བ་ཡིན་སྐད། གཏམ་རྒྱུད་འདི་རྣམས་གསན་དུས་ནི། སྐྱུ་ར་རིན་པོ་ཆེ་འབྲི་ཁུང་པས་སྤྱན་ཆབ་དཔག་ཏུ་མེད་པ་བྱོན་སྐད་དོ། །དུས་ཕྱིས་ཀྱང་འབྲི་ཁུང་པའི་ཞལ་ནས། རི་པ་རྣམས་ལ་ཁྱེད་ཚོ་རི་ལ་འགྲོ་བ་རྣམས་ཀྱིས། ཕུག་སྟོན་རེ་གྱིས་ལ་འཚོ་བ་མཉམ་པོར་ཟོ་ཞིག །ལ་ལ་ཕྱུག་པོ། ལ་ལ་དབུལ་པོ་མ་བྱེད་ཅིག་གསུང་ནན་ཆེན་པོར་མཛད་པ་ཡིན་ཟེར། ད་ལྟ་ཡང་རི་པ་ཆོས་ཕུག་སྟོན་རེ་བྱེད་པ་གཏམ་རྒྱུད་འདིའི་རྗེས་འབྲེངས་ནས་བྱེད་པ་ལགས་སོ། །ཡང་བྱ་གཅིག་གིས་ལུག་གི་སྲེ་ལོང་བ་གཅིག་ཕུག་སྒོར་སྐྱུར་ནས་སོང་བ་དེས་ཀྱང་ཟླ་བ་གསུམ་ཙམ་ཆུ་དབལ་བསད་པས་ལུས་པོ་མཉེན་ལྕུག་སོང་གསུང་སྐད་དོ། །གྲུབ་པ་ཐོབ་པའི་ཞག་བཅོ་བརྒྱད་ཀྱི་གོང་དུ་ནི། རླུང་སྟོད་འཚངས་ཐུན་པོ་དེ་ཕོག་ནས། གྲོངས་པ་རང་ལ་ཐག་བཅད་པ་ལ་ཉི་མ་ཟེར་ཐག་ཨེན་མ་ཆད་པ་ལ། པེ་ཏ་མགོན་སྐྱིད་ཀྱིས་ཡས་
3-3-70a
ཟས་ཟོ་བ་གང་རྙེད་པ་དེ་ཁྱེར་ནས་སླེབ་པས། གཏོར་མའི་ཞབས་ལ་ཆང་འབྱར་བ་དང་། གཏོར་ཤ་དང་གཏོར་མར་དང་། དེ་རྣམས་གསོལ་བས་མ་གྲོངས་པར་འདུག་གོ། །གཏམ་རྒྱུད་འདི་ལ་ནི་དྭགས་པོ་རིན་པོ་ཆེ་ལྷ་རྗེ་པས། ཆོས་ཚིག་བཞི་པ་གཅིག་གསུང་ན་ཡང་། འདི་ཡང་ཡང་གསུང་ཤིང་། ངའི་བླ་མ་རིན་པོ་ཆེ་དཔལ་ལྡན་བཞད་པའི་རྡོ་རྗེ་གསུང་ནས། སྤྱན་ཆབ་མང་པོ་འབྱོན་པར་འདུག་སྐད་དོ། །ཡང་མི་བླུན་པོ་ལ་ལའི་སྨྱོ་གཏམ་ལ་ལ། བླ་མ་རྗེ་བཙུན་ཆེན་པོས་མང་གུང་བར་དུ་ཨར་ཇག་བྱས་ཟེར་བ་ཡང་ཡོད་པར་འདུག་སྟེ། དེ་བསོད་ཟད་ཀྱི་སྨྱོ་གཏམ་ཡིན་ནོ། །རྗེ་བཙུན་གྱིས་ཡབ་གྲོངས་དུས་ན། ལོ་གསུམ་དང་ཟླ་བ་བཞི་པ་ཡིན། དེ་ནས་ཡུམ་གྱི་རྩར་ལོ་བདུན་གྱི་བར་བཞུགས། དགེ་བཤེས་རྩྭ་པའི་དྲུང་དུ་ལོ་བདུན་བཞུགས། ཡང་ཡུམ་རྩར་ལོ་གསུམ་བཞུགས། ལོ་བཅོ་བརྒྱད་པ་ལ་རྟ་ནག་དང་ཡར་ལུངས་སུ་བྱོན་ནས་མཐུ་མཛད་ཚེ་ལོ་བརྒྱད་བཞུགས། འདྲེ་སྟོན་ལྷ་དགའ་དང་གཞན་བླ་མ་རྣམས་ཀྱི་དྲུང་དུ་ལོ་གཅིག་བཞུགས། ལྷོ་བྲག་ན་ལོ་དགུ་བཞུགས། གཞུང་ན་ལོ་གཅིག་ལྷག་ཙམ་བཞུགས། དེ་ནས་ཙྭ་ན་དགུན་ཅིག་བཞུགས། དེ་ནས་བྲག་དཀར་ན་ལོ་བཅུ་
3-3-70b
གཉིས་བཞུགས། དགུང་ལོ་ལྔ་བཅུ་ནས་འགྲོ་དོན་མཛད་ནས། བརྒྱད་བཅུ་རྩ་བཞི་ལ་དག་པ་ཆོས་ཀྱི་དབྱིངས་སུ་གཤེགས་པ་ཡིན་ནོ། །དེའི་བར་ལ་ཇག་ཁྲམ་མཛད་ལོང་ག་ན་བྱུང་བ། མིད་ལ་རས་ཆེན་གྱི་རྣམ་ཐར་གྱི་ས་བཅད་འདི་ནི། དགེ་སློང་ཞི་བྱེད་རི་ཁྲོད་པས་ཡི་གེར་བྲིས་པའོ། །ཡང་རྗེ་བཙུན་བྲག་དཀར་རྟ་སོ་དབུ་མ་ན་བཞུགས་དུས་སུ། རྐུན་མ་གསུམ་བྱུང་བས། རྗེ་བཙུན་ཟྭ་ཚོད་བསྐོལ་གྱིན་ཡོད་ཙ་ན། ཁོང་གསུམ་ན་རེ། ཐལ་དང་ཚྭ་རྡོར་(སྡོར་)ཐོབ་ལ་ངེད་ལ་ཡང་བླུད་ཟེར་བས། མིད་ལའི་ཞལ་ནས། རྩམ་པ་ཟེར་བའི་མངར་པོ། ཚྭ་ཟེར་བའི་དྲོད་ཅན། རྡོར་(སྡོར་)ཟེར་བའི་བཅུད་ཅན་གཅིག་ཡོད་པར་འདུག་སྟེ། ངས་ཀྱང་མ་མྱོང་ནས་ལོ་བཅུ་གཉིས་ཙམ་སོང་གསུང་སྐད། ཡང་མིད་ལའི་ཞལ་ནས། ཟྭ་ཚོད་ལ་ཟྭའི་ཐལ་བཏབ་པ་དེ་རང་ཞིམ་པར་འདུག་གསུང་སྐད་དོ། །ཡང་མི་ལ་རས་པའི་ཞལ་ནས། ང་ལ་དལ་ཡང་དལ་ཏེ་བྲེལ་ཡང་བྲེལ། མི་གཞན་ཚོས་བལྟས་པས་ང་དལ་བར་མཐོང་། ང་ལ་དལ་བ་སྐད་ཅིག་མེད་གསུང་བ་ནི། དུས་འདི་ནས་བཟུང་སྟེ་རྫོགས་པའི་སངས་རྒྱས་མ་ཐོབ་བར་དུ་སྐད་ཅིག་ཀྱང་ལེ་ལོ་མི་བྱེད་པའི་བརྡ་རུ་གསུངས་པ་ལགས་སོ། །ཡང་རྗེ་བཙུན་གྱི་སྔགས་རྡོར་མོའི་ཚ་བ་མ་གསོལ་ནས། 
3-3-71a
སྟོད་ཐང་ན་ར་རྫི་མ་བུ་ལ་བསྲུས་པའི་གཏམ་རྒྱུད་ཡང་ཡོད་དོ། །ཡང་མིད་ལའི་ཞལ་ནས། ཡོན་བདག་བྲིན་སྙ་ནམ་པས་གོ་བཅད། གཡེང་བ་ལ་ཡང་མ་བསྐུར། སྒྲུབ་རྒྱགས་ཡང་མ་བཅད་གསུང་སྐད་དོ། །ཡང་རྗེ་བཙུན་མི་ལ་རས་པའི་དྲུང་ན། དྭགས་པོ་ལྷ་རྗེ་དང་པོ་མཇལ་དུས་ན། ཇ་དང་གསེར་ཕུལ་བ་ལ། མིད་ལའི་ཞལ་ནས། གསེར་དང་བན་རྒན་ལོ་མི་མཐུན། ཇ་ཡོ་མར་བསྐོལ་བའི་ཟངས་དཀར་མེད་གསུངས་ནས་མ་བཞེས་ཟེར། ལ་ལ་ན་རེ་ཇ་དེ་གསོལ་ཟེར་བས་བརྟག་འཚལ། ཡང་ལྷ་རྗེ་པའི་སྨན་སྒྲོམ་དེ་མིད་ལས་གཟིགས་ནས་ཅི་འདུག་གསུང་པ་ལ། ལྷ་རྗེ་པས་ནད་པ་སྙིང་རྗེ་བ་འདུག་པས་སྨན་སྒྲོམ་འདི་བཟུང་བ་ལགས་ཞུས་པས། མིད་ལའི་ཞལ་ནས། དེ་བར་ཆད་ཀྱི་སྒྲོ་བ་བདུད་ཀྱི་ལག་ཆ་ཡིན་གསུང་ནས། སྨན་སྒྲོ་དབྲལ་ནས་སྨན་ཚོ་གཏོར་སྐད། ཡང་རྗེ་བཙུན་འབྲོག་ལ་ཕྱི་གངས་ཀྱི་ར་བ་ན་བཞུགས་དུས་ན། མགོན་པོ་བྱ་རོག་གདོང་ཅན་ཡང་ཡང་བྱུང་བས། མིད་ལའི་ཞལ་ནས། ཁྱོད་འདིར་ཅི་ལ་ཡོངས་བ་ཡིན། ང་སོ་མ་གསོད་པས་སོང་གསུངས་པ་དང་། ཁོ་ན་རེ། ང་ཆོས་སྐྱོང་ཡིན་ཞུས་པས། མིད་ལའི་ཞལ་ནས། ངས་ཚེ་སྟོད་ལ་མཐུ་ཁོ་ན་
3-3-71b
ལ་ལས་ཀ་བྱེད་དགོས་པ་ཞིག་བྱུང་དུས་ན། ཁྱོད་མི་འདུག་པས་ད་ཁྱོད་ཀྱིས་དགོས་པ་ཅི་ཡོད་གསུང་ནས། གླང་བེར་གཅིག་གིས་བརྡུངས་པས། ཁོ་ན་རེ་དེ་དུས་རྗེ་བཙུན་ཆོས་པ་མིན་པས་ང་འཁོར་ས་མེད་པ་ལགས། ད་ལྟ་ནི་རྗེ་བཙུན་ཆོས་ཁོ་ན་མཛད་པས་ཡང་ཡང་འཁོར་དགོས་པ་ཡིན་གསུང་ནས། མིད་ལས་ཁྱོད་རང་བདེན་གསུང་སྐད་དོ། །ཡང་རྗེ་བཙུན་ཆུ་དབར་ན་བཞུགས་དུས་སུ། ནོར་ལྷ་ཐམས་ཅད་དྲུང་དུ་བྱུང་བས་མིད་ལས་གླང་བེར་གྱི་ཁོང་ཚོ་བརྡུངས་ནས། ངས་ཚེ་སྟོད་ལ་ཟན་ཁམ་རེ་མི་རྙེད་པ་བྱུང་དུས་ཁྱེད་ཚོ་མི་འདུག་པས། ད་ཁྱེད་ཀྱིས་དགོས་པ་མེད་གསུངས་པས། དེ་དུས་ན་རྗེ་བཙུན་འདོད་པས་གདུངས་པས། ངེད་ཚོ་འཁོར་ས་མ་བྱུང་བ་ལགས། ད་ལྟ་ནི་རྗེ་བཙུན་འདོད་པ་ཟད་པས། ངེད་ཚོ་རང་དབང་མེད་པར་འཁོར་བ་ལགས་ཞུས་པས། མིད་ལའི་ཞལ་ནས་ཁྱེད་བདེན་གསུང་། བླ་མ་བ་རི་ལོ་ཙྪ་བས་བྲིན་སྡིང་མ་ན་འབུམ་མོ་ཆེ་བཞེངས་པའི་རབ་གནས་མཛད་དུས་ན། བླ་མ་བ་རི་བས། རྗེ་བཙུན་མིད་ལ་ཁྲི་ཐོག་ཏུ་བཞུགས་དགོས་གསུང་བས། མི་ལ་ན་རེ། དེ་མི་འཐད་པའི་རྒྱུ་མཚན་ནི། ང་རྟེན་རྣལ་འབྱོར་པ་ཡིན་ཅིང་ལྡོམ་བུ་བ་ཡིན་པས་དེས་མི་ཡོང་བ་ལགས། ཁྱེད་རྟེན་རབ་བྱུང་ཡིན་
3-3-72a
ཅིང་། དགེ་བཤེས་ཆེན་པོ་ཡིན་པས་ལོ་ཙྪ་བ་བཞུགས་དགོས་གསུང་པ་ལ། ཙག་ཕུག་པས་ཁྲི་ཐོག་ཏུ་ལོ་ཙྪ་བ་ཆེན་པོ་བཞུགས་པར་ཞུ། མི་ལ་རས་པ་རྒྱལ་ཁམས་ལྡོམ་བུ་བ་ཞིག་གིས་ཚོགས་པ་འདི་ཙམ་གྱི་གྲལ་མགོ་མི་ཡོང་ཟེར་བ་དང་། བླ་མ་བ་རི་བས་རྗེ་བཙུན་ལ་གྲུབ་རྟགས་གཅིག་སྟོན་པར་ཞུ། དགེ་བཤེས་ཙག་ཕུག་པ་མ་དད་པ་བཟློག་པ་ཡིན་གསུང་བས། རྗེ་བཙུན་གྱིས་མིད་ལ་རྒས་པས་གྲུབ་རྟགས་སྟོན་མི་ནུས་ཀྱིས། ཁྱེད་རས་ཆུང་གཅིག་གིས་བླ་མ་ལོ་ཙྪ་བའི་དྲུང་དུ་མཎྜལ་གཅིག་ཕུལ་གསུངས་པ་དང་། རས་ཆུང་ཞི་བ་འོད་ཀྱིས། སྐད་ཅིག་ཡུད་ཙམ་ལ་སྐུ་ལུས་ཀྱི་བཀོད་པ་བདུན་ཙམ་མཛད་ནས། གྲུབ་རྟགས་རྣམས་བསྟན་པས། ཙག་ཕུག་པ་དད་པ་མ་སྐྱེས། བ་རི་བས་དབུ་མཛད་པའི་ཁྲོམ་ཐམས་ཅད་ནི། བསམ་གྱིས་མི་ཁྱབ་པར་མོས་ནས། ཡེ་ཤེས་བབས་ནས་འུར་བ་དང་། པེ་ཏ་ན་རེ་མིང་པོ་ལ་ཁྲེལ་དང་ཕྱི་ཐག་མེད། ངས་མོ་མཚན་ཁྱིས་གྲད་གྲད་ཡས་བླངས་ནས་སྒྲུབ་རྒྱགས་བསྐྱེལ་བ་ལ། ད་མིང་པོས་གྲུབ་པ་ཐོབ་ནས། ང་ལ་གྲུབ་ཐོབ་མི་བྱེད་ནས། མི་གཞན་ལ་གྲུབ་ཐོབ་བྱེད་པ་ཟེར་ནས། འདོམས་ཁྱིས་ཕུག་པའི་རྨ་སྒྲོ་ཁྲོམ་ཐམས་ཅད་ལ་བསྟན་པས། རྗེ་བཙུན་མིད་ལས་
3-3-72b
པེ་ཏ་ལ་ཁྱོད་དྲིན་ཆེ་བ་བདེན་ནོ། །འོན་ཀྱང་ངས་གདམས་ངག་མ་བསྟན་པ་མ་ཡིན། སྲིང་མོ་རང་སྙིང་རུས་ཆུང་བས་ལན་པ་ཡིན། ངས་ཀྱང་འཕོངས་འདི་འདྲར་སོང་སོང་བསྒོམས་པ་ཡིན། ཁྱོད་རང་ཡང་སྙིང་རུས་བསྐྱེད་ལ་བསྒོམས་དང་ཡོན་ཏན་སྐྱེ་གསུང་ནས། ཞབས་བསྟན་པས། ཞབས་ནི་སྤྲེའུའི་འཕོངས་བཞིན་སོང་འདུག་སྐད་དོ། །དེར་པེ་ཏས་ཀྱང་སྙིང་རུས་བསྐྱེད་ནས་བསྒོམས་པས། ཡོན་ཏན་ཆེན་པོ་སྐྱེས་ཏེ་ལུས་ཁྱེར་བར་བཞེད་པ་ཡིན་ནོ། །བླ་མ་བ་རི་ལོ་ཙྪ་བའི་དྲུང་དུ་ཡང་རྗེ་བཙུན་མིད་ལ་རས་པས། དཔལ་རྡོ་རྗེ་སེམས་དཔའི་སྒྲུབ་ཐབས་མན་ངག་དང་བཅས་པ་ཞུས། ཡང་མི་ཐམས་ཅད་ཀྱི་སྨྱོ་གཏམ་ལ། ཁྱིའུ་ཆུང་ཞི་བ་འོད་ཀྱིས་བོང་ཆུ་བརྒལ་བ་ལ། རྗེ་བཙུན་མིད་ལས་རྟ་འཕོངས་གཡར་ཟེར་བ་ནི། མི་ཚོ་སྨྱོ་བ་ཡིན་ནོ། །ཆུ་མིག་དངུལ་བུམ་ནས་ཤར་རྟོགས་སུ་འགྲོ་བ་ལ་བོང་ཆུ་བརྒལ་དོན་ཅི་ཡོད། ར་ཆུ་བརྒལ་དགོས་པ་ལགས་སོ། །བརྟག་ཞིག་མ་བྱས་པའི་སྨྱོ་གཏམ་བྱེད་པ་རྒོད་བྲོ་བར་འདུག་གོ། །མཾ་ག་ལམ་བྷ་ཝ་ཏུ།། །།ཡང་བླ་མ་མིད་ལ་རས་ཆེན་པས། བེ་རི་རུ་བ་ལ་སྲུས་པས། མི་ཚང་དབུལ་པོ་ཞིག་གིས་ཚོད་མ་ཕོར་གོག་གང་ཁྱེར་བྱུང་བའི་
3-3-73a
ནང་དུ། ཤིང་ཐུར་བཅོ་བརྒྱད་འདུག་པས། རྗེ་བཙུན་གྱིས་ཤིང་ཐུར་འདི་རྣམས་བཅུག་པས། ཚོད་མ་འབོངས་སུ་རེ་བ་ཡིན་ནམ་གསུངས་པས། ཡོན་བདག་ན་རེ་ཚོད་མ་མང་དུ་རེ་བ་ལགས་ཏེ། ངེད་བཟའ་ཚོ་བཅོ་བརྒྱད་ཡོད་པའི་འཐུང་འཕྲོ་རྣམ་བསྡུས་པ་ཡིན་ཟེར་བ་དང་། རྗེ་བཙུན་ནན་ལྟར་མཉེས་ནས། འོར་ཆེ་རང་གི་ཁར་ཟ་མི་བྲ་ནས་གཞན་ལ་སྦྱིན་ནུས་པ་གསུང་ནས་གདམས་ངག་གནང་བས་མི་ཚང་དེ་གྲོལ་སྐད་དོ། །གཏམ་རྒྱུད་འདི་ལ་བརྟེན་ནས་ལི་ཁོར་ཕྱ་རུ་བ་དང་། དྭགས་པོ་ལྷ་རྗེ་པ་གྲུབ་པ་ཐོབ་པ་མྱུར་བ་ཡིན་ཅིང་། ཀྱུ་ར་རིན་པོ་འབྲི་གུང་པ་ཡང་འདི་ལ་ཐུགས་བརྩིས་ནན་ཏར་ཆེ་སྐད་དོ། །ལོ་རྒྱུས་རྒྱས་པར་ཞལ་ལས་ཤེས་སོ། །ཡང་རྗེ་བཙུན་འདམ་ན་ཧུ་བ་ལ་བསོད་སྙོམས་ལ་བྱོན་པས། བུད་མེད་གཅིག་གིས་བསོད་སྙོམས་མ་ཕུལ་བར་ཚིག་ངན་མང་པོ་ཟློས་པ་དང་། ཕྱིད་ཉིན་བཀའ་གདམས་པ་ལ་རས་ཆམ་ཞིག་གཡར་ནས་བྱོན་པས། བསོད་སྙོམས་མང་པོ་ཕུལ་སྐད། འདི་ལ་རྟེན་ནས་འབྲི་སྒོམ་རས་པ་གྲུབ་པ་ཐོབ་པ་མྱུར་བ་ཡིན་ཅིང་། རྗེ་ཁྱུང་ཚང་པ་ཡེ་ཤེས་བླ་མ་དང་། དཔལ་ཕག་མོ་གྲུ་པ་རྡོ་རྗེ་རྒྱལ་པོ་ཡང་འདི་ལ་ཐུགས་བརྩིས་ནན་ལྟར་ཆེ་སྐད། ལོ་
3-3-73b
རྒྱུས་རྒྱས་པར་ཞལ་ལས་ཤེས་སོ། །སྙ་ནམ་གྱི་བླ་མ་གཟི་བརྗིད་རྒྱལ་མཚན་པ་ཡང་འདི་ལ་ནན་ཏར་མཉེས་པར་མཛད་པར་འདུག །ཡང་མིད་ལ་རས་པའི་ཞལ་ནས། རས་ཆུང་རྡོ་རྗེ་གྲགས་པ་ལ་འདི་སྐད་གསུངས་སོ། །ཁམས་གསུམ་འཁོར་བའི་རྒྱ་མཚོ་ལ། །ལུས་ཤ་ཁྲག་གི་ཕུང་པོ་སྡིག་པོ་ཆེ། །ལྟོ་གོས་གྱི་ཞེན་པ་སྒྲུབ་སྒྲུབ་ནས། །འཇིག་རྟེན་གྱི་བྱ་བ་ཐོངས་དུས་མེད། །བྱ་བ་བློ་ཡིས་ཐོང་དང་རས་ཆུང་པ། །སྒྱུ་མ་ལུས་ཀྱི་གྲོང་ཁྱེར་དུ། །རང་སེམས་དངོས་མེད་སྡིག་པོ་ཆེ། །སེམས་ཆགས་སྡང་གི་རྗེས་སུ་འབྲེང་འབྲེང་ནས། །གཉིས་མེད་ཀྱི་དོན་ལ་རྟོགས་དུས་མེད། །སེམས་གློད་ལ་ཞོག་དང་རས་ཆུང་པ། །སྐྱེ་འཆི་གཉིས་ཀྱི་སོ་འཚམས་ན། །བར་དོའི་རིག་པ་སྡིག་པོ་ཆེ། །ལུས་མེད་ཀྱི་ལུས་གཅིག་བཙལ་བཙལ་ནས། །སེམས་འཁོར་བར་འཁྱམས་པ་མ་ཚོར་བར། །སྒྱུ་མ་ངོ་ཡིས་བཟུང་ཅིག་རས་ཆུང་པ། །མི་མངོན་ནམ་མཁའི་དབྱིངས་ཤེད་ན། །དུས་གསུམ་གྱི་སངས་རྒྱས་ཞལ་རྫུན་མཁན། །ཆོས་དྲང་དོན་གྱི་བློ་དྲིད་བྱེད་བྱེད་ནས། །ངེས་པའི་དོན་ལ་རྟོགས་དུས་མེད། །སེམས་ཀྱི་རྩ་བ་ཆོད་དང་རས་ཆུང་པ། །ཆོས་ལྟ་བ་དང་སྒོམ་པ་སྤྱོད་པ་གསུམ། །དོན་གཅིག་དུ་(ཏུ་)བསྲེས་ལ་ཉམས་སུ་ལོང་། །ཚེ་འདི་དང་ཕྱི་མ་བར་དོ་གསུམ། །
3-3-74a
དོན་གཅིག་ཏུ་བསྲེས་ལ་འདྲིས་སུ་ཆུག །དོན་དེ་ཀ་ལས་མེད་དོ་རས་ཆུང་པ། །ཅེས་(ཞེས་)གསུངས་སོ། །དགེ་འདིས་འགྲོ་དྲུག་སངས་རྒྱས་ཤོག །སྐྱེས་མཆོག་མིད་ལས་རས་ཆུང་རྡོ་རྗེ་གྲགས་ལ་གསུངས་སོ། །ཡང་མིད་ལའི་ཞལ། རས་ཆུང་པ་དམ་ཆོས་ཐམས་ཅད་གསང་སྔགས་རིགས་ལས་བྱུང་། །འོན་ཀྱང་རང་རྡོ་རྗེ་འཆང་དང་མ་མཉམ་པར། །མི་ནག་ལ་དབང་བསྐུར་མ་བྱེད་ཅིག །ཅེས་གསུངས་སོ། །སྙ་ནམ་ཐོག་ལ་ན་གསུངས་པའི་སྡེ་ཚན་ཡིན་ནོ། །ཡང་རས་ཆུང་བ་ལ། རྡོ་རྗེ་སེམས་དཔའ་རིགས་ལྔའི་བུམ་དབང་དངོས་སུ་གནང་དུས་ན། རས་ཆུང་པས། རྗེ་བཙུན་གྱིས་རྒྱ་གར་དུ་ལན་དུ་བྱོན་ཞུས་པས། ཐེབས་དྲུག་ཕྱིན་གསུང་། དེའི་དུས་ན་སངས་རྒྱས་སམ་གྲུབ་ཐོབ་ཅི་འདྲ་དང་མཇལ་ཞུས་པས། དང་པོ་རེ་ལ་སློབ་དཔོན་འཕགས་པ་ཀླུ་སྒྲུབ་དང་དག་སྣང་གིས་མཇལ། དབུ་མ་ལ་སོགས་ཆོས་མང་པོ་ཐོབ་གསུང་། ལན་གཉིས་པའི་དུས་སུ། རྒྱ་གར་སིཾ་ག་ལ་ན་འཕགས་པ་ཨརྱ་དེ་བ་དང་མཇལ་ནས། ཕར་ཕྱིན་གནང་གསུང་། ལན་གསུམ་པའི་དུས་ན། རྒྱ་གར་གཾ་གཱའི་འགྲམ་ན་སློབ་དཔོན་ཆེན་པོ་ལ་བ་པ་དང་མཇལ་ནས། སྒྱུ་མ་ལྟ་བུའི་ཆོས་གནང་གསུང་། ལན་བཞི་པའི་དུས་ན། ཟླ་བ་གྲགས་པ་
3-3-74b
དང་མཇལ་ནས། ལྷ་མོ་འོད་ཟེར་ཅན་གྱི་སྒྲུབ་ཐབས་གསུངས། ལན་ལྔ་པའི་དུས་ན་མ་ཏང་གི་དང་མཇལ་ནས་དོན་ཞགས་གནང་གསུང་། ལན་དྲུག་པ་ལ། ཌོམ་བྷི་པ་དང་མཇལ་ནས་རྣལ་འབྱོར་གྱི་དབང་ཕྱུག་དཔལ་ལྡན་བིར་ཝ་པའི་ལམ་འབྲས་ཀྱི་གདམས་ངག་རྣམས་གནང་གསུང་། དེར་རས་ཆུང་པས་རྗེ་བཙུན་ཆེན་པོས་རྫུ་འཕྲུལ་གྱིས་བྱོན་པ་ལགས་སམ། དངོས་སུ་བྱོན་པ་ལགས་ཞུས་པས། མིད་ལའི་ཞལ་ནས་དེ་ཅི་ཡིན་འོ་ན་ཡང་ཁྱོད་རང་གང་དགའ་བ་བྱས་པས་ཆོག་པར་མི་འདུག་གམ་+གམ་+གསུངས། ཡང་རས་ཆུང་བརྒྱད་ཀྱིས། རྗེ་བཙུན་ཆེན་པོ་ལགས། མཁའ་འགྲོ་སྙན་རྒྱུད་འདི་གཉན་གྲགས་པ་དང་། ཅིག་རྒྱུད་ལེན་པ་ནི་གནང་ས་མེད་པར་འདུག་པ་ལ། ངེད་རས་ཆུང་བརྒྱད་ལ་གདམས་སྐོར་རེ་རེ་ལགས་སམ། ཞུས་པས་དེ་བཞིན་རང་ཡིན་ལར་ངས་ཁྱེད་ཚོ་མི་སླུ་ཉེན་ཡོད་ལ། གཞན་སུ་ལ་ཡང་མ་ཟེར་ཅིག །སྙན་རྒྱུད་ཚང་བ་རས་ཆུང་བཞིན་ལེགས་པོ་ཁོ་མེན་པ་ལ་སྦྱིན་དབང་མེད་པ་ཡིན་གསུང་། སྙན་རྒྱུད་འདི་ལ་ཐམས་ཅད་ཚང་ན་གདམས་སྐོར་དུ་ཡོད་ཞུས་པས། དེ་རྣམས་རས་ཆུང་བཞིན་ལེགས་པོ་ཁོ་ལ་དྲིས་པས་ཡོང་ངམ། འོ་ན་ཡང་བཤད་པས་ཆོག །རྩ་བའི་ཆིངས་གསུམ་བྱ་བ་ཡིན་ཏེ། 
3-3-75a
ཕྱི་སྤྲུལ་སྐུའི་གདམས་ངག་ལ་བརྟེན་ནས། རྒྱུད་པ་ཡིད་བཞིན་ནོར་བུའི་སྒྲོ་འདོགས་བཅད་པ་གལ་ཆེ་བ་དང་། ནང་ལོངས་སྐུའི་གདམས་ངག་ལ་བརྟེན་ནས། རྨི་ལམ་ཡིད་བཞིན་ནོར་བུའི་སྒྲོ་འདོགས་བཅད་པ་དང་། གསང་བ་ངོ་སྤྲོད་ཡིད་བཞིན་ནོར་བུའི་ཆོས་སྐུའི་གདམས་ངག་ལ་བརྟེན་ནས། ལམ་གྱི་གནས་ལུགས་དེ་ཁོ་ན་ཉིད་ལ་སྒྲོ་འདོགས་བཅད་པ་གལ་ཆེ་གསུང་། དེའི་རྒྱུད་པ་གང་ལགས་ཞུས་པས། རྡོ་རྗེ་འཆང་། ལུས་མེད་མ། ཏེ་ལོ་པ། ནཱ་རོ་པ། མར་པ། མིད་ལ་ང་རང་དང་དེ་རྣམས་ཡིན་གསུང་། ཡང་རས་ཆུང་རྣམས་ཀྱིས་ཞུས་པ། རྗེ་བཙུན་གྱི་སློབ་མ་གཞན་ལ་ནི་སྙན་རྒྱུད་མ་གནང་བ་དེ་རྟགས་ཅན་དེ་ལགས། ངེད་རས་ཆུང་བདུན་པོ་ལ་གདམས་ངག་སྐོར་རེ་རེ་ལས་མ་གནང་བར་འདུག་ལགས་སོ། །གདམས་ངག་གི་རྐང་གྲངས་དུ་བཞུགས་ཅིག་གསུངས་ན་དགའ་སྟེ་ཞུས་པས། དེ་འདྲ་ལ་དགོས་པ་ཡོད་ན་བཤད་པས་ཆོག་གསུང་ནས། མི་ལ་དབང་སྐུར་བ་དང་ལྷ་ལ་རབ་གནས་བྱེད་པ་དང་གཤིན་པོ་ལ་བདུན་ཚིགས་བྱེད་པ་ཡིན་ཏེ། ཧེ་རུ་ཀ་ལ་བརྟེན་ནས་ཤེས་རབ་གཙོ་བོར་བྱས་ནས་བྱིན་རླབས་བྱེད་པ་དང་། རྡུལ་ཚོན་ལ་བརྟེན་ནས་ཐབས་གཙོ་བོར་བྱས་ནས་དབང་བསྐུར་བྱེད་པ་ཡིན་གསུང་། དེ་ལས་གཞན་ཡོད་
3-3-75b
དམ་ཞུས་པས། གདམས་ངག་སྐོར་གསུམ་ལ་ཡང་། མན་ངག་གསུམ་ཡོད་གསུང་། དེ་གང་ལགས་ཞུས་པས། མཐུན་མོང་ཡིད་བཞིན་ནོར་བུ་དང་། དམ་ཚིག་ཡིད་བཞིན་ནོར་བུ་དང་། གནས་ལུགས་ཡིད་བཞིན་ནོར་བུའི་གདམས་ངག་བྱ་བ་ཡོད་གསུང་། དེ་ལ་མན་ངག་ཡོད་དམ་ཞུས་པས། གཉིས་ཡོད་གསུང་། དེ་གང་ལགས་ཞུས་པས་ཡབ་བཀའ་དང་ཡུམ་བཀའ་བྱ་བ་ཡིན་གསུང་། འོ་ན་དེ་ལ་སྐོར་དུ་ཡོད་ཞུས་པས་གསུམ་ཡོད་གསུང་། +གང་+གང་ལགས་ཞུས་པས། རྒྱལ་པོ་ཆོས་ཉིད་མི་འགྱུར་བ་དང་། བློན་པོ་རིགས་གསུམ་ལས་བྱེད་དང་། དམངས་ཕྲིན་ལས་སྒྲུབ་བྱེད་མཐུན་སྦྱོར་བྱ་བ་ཡིན་གསུང་། དེ་ལས་ཡོད་དམ་ཞུས་པས། ཡུམ་སྐོར་ལྟར་ན་རྣལ་འབྱོར་བཅུ་བྱ་བ་ཡོད་གསུང་། དེ་ཡང་གསུང་བར་ཞུ་དང་ཞུས་པས། ཞལ་འཛུམ་པ་ཅིག་མཛད་ནས། ཚད་མེད་སེམས་བསྐྱེད་ལྷ་སྐུ་སེམས་བསྐྱེད་དང་། སེམས་ཅན་དོན་བྱེད་དཔའ་བོ་དཔའ་མོ་འདུལ་བར་བྱེད། ཡིད་ཀྱིས་རྡོ་རྗེ་བཟླས་པ་ངག་གི་རྡོ་རྗེ་བཟླས་པ་དང་། རྫོགས་པའི་རིམ་པ་སྲེ་བོ་རོ་སྙོམས་དང་། འཕྲིན་ལས་གཏོར་མའི་རྣལ་འབྱོར་ཡིན་གསུང་། དེ་ལས་ཡོད་དམ་ཞུས་པས། གཉིས་པ་ལ་ཡང་གསུམ་ཡིན་ཏེ། བླ་མའི་གསོལ་འདེབས་
3-3-76a
ཏིང་འཛིན་དབང་བསྐུར་དང་། ཧེ་རུ་ཀའི་ཡིག་རྒྱས་སྡིག་པ་སྦྱང་ཐབས་ཡིན་གསུང་། དེ་ལས་ཡོད་དམ་ཞུས་པས། གསུམ་པ་ལ་ཡང་བདུན་ཡིན་ཏེ། རྣལ་འབྱོར་ཁ་ཟས་གོས་དང་ནི། འགྲོ་དྲུག་སྤྱོད་ལམ་ཉལ་བ་དང་། ཆོས་སྤྱོད་ཁྲུས་ཀྱིས་རྣལ་འབྱོར་ཡིན་གསུང་། དེ་ལས་ཡོད་དམ་ཞུས་པས། ཡབ་སྐོར་སྔོན་འགྲོ་རྣལ་འབྱོར་གསུམ། དངོས་གཞིའི་རྣལ་འབྱོར་དང་ནི་འཇུག་གི་རྣལ་འབྱོར་གསུམ། །ཀུན་ཏུ་འགྲོ་བ་སྲེ་བ་རོ་སྙོམས་རྣལ་འབྱོར་དང་། །གཉིས་པ་གསུམ་ལ་ཚོགས་ཀྱི་འཁོར་ལོ་དང་། །སྦྱིན་བསགས་སྐྱེད་རིམ་བརྟན་པར་བྱ། །གསུམ་པ་རྣལ་འབྱོར་བདུན་ལ། །ཟ་བ་ཟས་དང་འཐུང་བ་སྐོམ། །བགོ་བ་གོས་དང་འདུག་ས་གནས། །འགྲོ་འདུག་སྤྱོད་ལམ་དག་བྱེད་ཁྲུས། །བསོད་ནམས་སྤེལ་བྱེད་ཚ་ཚའི་རྣལ་འབྱོར་རོ་གསུང་། དེ་ལས་ཡོད་དམ་ཞུས་པས། གཉིས་པ་དམ་ཚིག་ཡིད་བཞིན་ནོར་བུ་ལ་ཡང་བརྒྱད། བག་ཡོད་དྲན་པས་བཟུང་དང་སྒོམ་ཞིང་ངོ་སྤྲད་དང་། །རྟེན་པར་བྱ་དང་གསང་བར་བྱ་བ་དང་། །མི་བསགས་བྱ་དང་མི་བྲལ་བྱ་བ་དང་། །བཟའ་བར་བྱ་དང་སྲུང་བར་བྱ་བའི་དམ་ཚིག་ཡིན་གསུང་། དེ་ལས་ཡོད་དམ་ཞུས་པས། དང་པོ་ལ་ཡང་དྲུག་ཡིན་ཏེ། གཏུམ་མོ་བདེ་དྲོད་ངོ་སྤྲོད་དང་། །འཕོ་བ་གསེར་
3-3-76b
འགྱུར་རྩི་སྦྱོར་དང་། །གྲོང་འཇུག་སྦྲུལ་པགས་འདོར་བྱེད་དང་། །རྨི་ལམ་འཁྲུལ་པ་རང་སངས་དང་། །སྒྱུ་ལུས་ཆོས་བརྒྱད་རང་གྲོལ་དང་། །འོད་གསལ་མ་རིག་མུན་བྲལ་དང་། །གསུང་། དེ་ལས་ཡོད་དམ་ཞུས་པས། གཉིས་པ་འོག་སྒོ་བདེ་ཆེན་ལ་ཡང་ལྔ་ཡིན་ཏེ། རྟེན་གྱི་གང་ཟག་དང་ནི་ཡུལ་དུ་དགོས་བྱེད་དང་། ཐབས་ཀྱིས་ཉམས་སུ་བླང་བའོ། །གསུང་། དེ་ལས་ཡོད་དམ་ཞུས་པས། གསུམ་པ་རང་བྱུང་གཉིས་མེད་ལ་ཡང་གཉིས་ཡིན་ཏེ། བར་དོ་ཡེ་ཤེས་གསལ་འདེབས་དང་། །ཕྱག་རྒྱ་ཆེན་པོའི་ངོ་སྤྲོད་ཡིན་གསུང་། དེ་ལས་ཡོད་དམ་ཞུས་པས། ཡང་གནས་ལུགས་ཡིད་བཞིན་ནོར་བུ་ལ་ཡང་གཉིས་ཡིན་ཏེ། ཐབས་ཀྱི་ལམ་དང་གྲོལ་ལམ་དང་། །དང་པོ་ལ་ཡང་གཉིས་ཡིན་ཏེ། །ལམ་གྱི་གཙོ་དང་ཡན་ལག་གོ། །དང་པོ་ལ་ཡང་གཉིས་སུ་བྱེད། །སྟེང་སྒོ་རྣམ་པར་གྲོལ་བ་དང་། །འོག་སྒོ་བདེ་བ་ཆེན་པོའོ། །ལམ་གྱི་ཡན་ལག་ལ་ཡང་ལྔ་ཡིན་ཏེ། །འཕོ་བ་གྲོང་འཇུག་དང་ནི་རྨི་ལམ་སྒྱུ་ལུས་དང་། །འོད་གསལ་དང་ལྔའོ། །གྲོལ་ལམ་ལ་ཡང་གཉིས་ཡིན་ཏེ། བར་དོའི་ཡེ་ཤེས་གསལ་འདེབས་དང་། །ཕྱག་རྒྱ་ཆེན་པོའི་ངོ་སྤྲོད་དོ། །ལུས་མེད་མཁའ་འགྲོའི་ཆོས་སྐོར་དགུ་ལ་ཡང་ཐོ་ཙ་རེ་གསུངས་པ་དང་། དེར་
3-3-77a
ཚང་བ་རས་ཆུང་རྡོ་རྗེ་གྲགས་པ་མེན་པ། རས་ཆུང་གཞན་རྣམས་ལ་མི་བཞུགས་པར་གསལ་ལགས་སོ། །ཡང་དམ་བློང་རས་པས། སྙན་བརྒྱུད་རྣམས་ང་ལ་ཚང་བ་ཡོད་དམ་ཞུས་པས། ཁྱོད་ལ་ཡང་དགའ་རབ་ནི་ཡོད་དོ། །བཞིན་ལེགས་པོའི་འདྲ་བ་ཨེན་མེད་གསུང་སྐད་དོ། །ཡང་རས་ཆུང་རྣམས་ཀྱིས་རྒྱུད་པ་ཡིད་བཞིན་ནོར་བུ་འདི་ལ་རྒྱས་པ་ཞིག་མཛད་ན་དགའ་ཞུས་པས། དུས་རེ་ཞིག་ནས་བྱེད་མི་གཅིག་ཡོང་བ་ཡིན་གསུངས་ནས་མ་གནང་བར་འདུག །ཡང་རྗེ་བཙུན་སྙ་ནམ་གྱི་གསེར་ཕུག་སྟོད་ན་བཞུགས་དུས། རས་ཆུང་རྡོ་རྗེ་གྲགས་པ་དང་། འབྲི་སྒོམ་རས་པ་དང་། ངམ་རྫོང་རས་པ་དང་། སེ་བན་རས་པ་དང་། ཞི་བ་འོད་དང་། བཤེན་རས་དང་། སངས་རྒྱས་སྐྱབས་དང་། བླ་མ་གྲགས་དང་། སློབ་དཔོན་རྣམས་བཞུགས་ནས་ཡོད་ཙ་ན། སྔར་གྱི་ཨ་ནེ་དེས་བསྙེན་བཀུར་མང་པོ་ཁྱེར་ནས་མཇལ་དུ་བྱུང་བ་དང་། སེ་བན་རས་པས་ཞུ་སྣ་བྱས་པས། རྗེ་བཙུན་གྱི་ཞལ་ནས། མོའི་བཟའ་རྒྱུ་དེ་ས་མེད་ཀྱང་མིད་ལ་སྡུག་ནས་མི་འཆི། ལར་སྒོམ་ཆེན་པ་བྱ་བ་དེ་ཉམས་མྱོང་ཡོད་རུང་མེད་རུང་། མལ་དུ་སྡོད་ཚུགས་དགོས་པ་ཡིན། སྒོ་འགྲམ་ནས་བྱ་ར་བྱེད་ན་ནི་མི་ཉན་གསུངས་པ་
3-3-77b
དང་། དེར་ཐམས་ཅད་ཀྱིས་ཞུ་བ་ཕུལ་བ་ལ་གསན་ནས། འོ་ན་ཤོག་གྱིས་གསུང་བ་དང་། སྲིང་མོ་པེ་ཏ་ཁྲོས་ཏོ། ཨ་ནེ་མཇལ་དུ་བཅུག་ན། ང་སྔར་ཡང་སྤྲངས་པས། ཚེ་ཕྱིད་པ་ཡིན། ད་ཡང་སྤྲང་འགྲོ་བས་ཆོག་ཟེར་ནས་ཁྲེས་པོ་དྲིལ་བ་དང་། རྗེ་བཙུན་གྱི་ཞལ་ནས། ང་ལ་ཕ་མ་གཉིས་ཀས་ཀྱང་པེ་ཏ་འདི་དྲིན་ཆེ་བ་ཡིན་པས། ད་རེས་ཨ་ནེ་འཕྲད་པ་མི་ཡོང་ངམ་གསུངས་པ་དང་། རས་ཆུང་རྣམས་ཀྱིས་པེ་ཏ་ལ་ཁྱོད་ཀྱིས་རྗེ་བཙུན་གྱི་ཞབས་འདྲེན་བྱེད་དམ། ད་ལན་ཨ་ནེ་ལ་མཇལ་ཁ་མ་གནང་ན་ག་ན་ཡོང་བྱས་འཐབས་ནས། ཐུགས་ལ་བཏགས་དགོས་ཞུས་པས། འོ་ན་ཤོག་གྱིས་གསུང་ནས། ཡོལ་བ་ཕྱི་ནང་བྱས་ཏེ། ནང་དུ་རྗེ་བཙུན་དང་པེ་ཏ་བཞུགས། ཨ་ནེས་ཕྱི་ནས་བཟོད་གསོལ་བྱས་ནས་ངུས་པས། པེ་ཏ་རྒོད་ཅིང་འདུག་པ་དང་། རྗེ་བཙུན་གྱི་ཞལ་ནས། ད་ཡོལ་བ་འདི་ཕར་སོལ་ལ་ཐོང་། ལར་ཉེ་འབྲེལ་ལ་ཆགས་ཞེན་བྱེད་མི་ཉན་པ་ཡིན། ད་ང་དང་འགྲོགས་པས་ཆོག་གསུང་ནས། མཇལ་ནས་ཕྱག་དབང་གནང་ལ། བསྙེན་བཀུར་ཡང་ཡང་བྱས་ནས་ཐུགས་རྗེས་བཟུང་བས་སྒོམ་ཡང་བཟང་པོ་སྐྱེས་སོ། །ཡང་མིད་ལའི་ཞལ་ནས། ང་དང་པོ་ལྷོ་བྲག་ན་སྡོད་དུས་སུ། རྗེ་མར་པའི་དྲུང་དུ་
3-3-78a
དབང་ཞུ་བ་ལ་དབང་ཡོན་མེད་པ་ལ་ཡུམ་བདག་མེད་མས་ང་ལ་ཡབ་ཡུམ་གྱི་ཕག་ནོར་གཡུ་འདི་གནང་ནས་ཕྱིས་ཀུན་དགོས་པ་སྲིད་གསུང་བ་ཡིན་ཏེ་ད་དགོས་ངེས་ཀྱང་མེད་ལ། གལ་ཏེ་དགོས་པ་བྱུང་ན་ཡང་། བུ་སློབ་མི་ཆེན་རེ་རེ་ལ་ཟླ་རྒྱགས་རེ་བླངས་པས་ཆོག་པས། གཡུ་འདི་ཁྱོད་ཀྱི་དབང་ཡོན་གྱིས། གསུང་ནས་གནང་ནས་དབང་ཐོབ། དེ་མན་ཆོད་རྒྱུད་མང་རབ་ཐོས་པ་ལགས་སོ། །ལར་ཡང་ཡུམ་བདག་མེད་མས་ཚེ་རབས་མང་པོ་ནས་ཐུགས་རྗེས་བཟུང་བ་ཡིན་གསུང་། ཡང་རྗེ་བཙུན་གྱི་ཞལ་ནས་རས་པ་སངས་རྒྱས་སྐྱབས་ལ། ཆོས་པ་བྱ་བ་དེ་ཆོས་བྱ་བསམ་གྱིས་མི་ཆོག་སྙིང་རུས་དགོས། སྲུབས་པར་གྱུར་ན་ཤིང་ལ་མེ་ཡང་ཐོན། བཙལ་ན་ངང་པས་ཆུ་ལ་མར་ཡང་རྙེད། བསྒོམས་པར་གྱུར་ན་མི་ལ་སངས་རྒྱས་ཡོང་། གསུང་། ཡང་རྗེ་བཙུན་གྱི་ཞལ་ནས། དམ་པ་རྒྱགས་ཆུང་བ་ལ། ངས་ལྷོ་བྲག་ནས་ཡར་ཡོངས་ནས། ཤིང་ལྕགས་བུ་ཙམ་ཅིག་དང་། རྡོ་ཆབ་རྡུལ་ཙམ་ཅིག་གི་ཁང་པ་བྱེད་མ་མྱོང་། ཆོས་པའམ་སྒོམ་ཆེན་པས་ལུང་སྟོང་གི་གཡེང་བ་འདི་ཡང་འཚར་རྒྱུ་མེད་གསུང་། ཡང་རྗེ་བཙུན་ཕྱི་ཞལ་ནས། 
3-3-78b
འཛངས་མོ་རས་མ་གཉིས་ལ་ཁྱེད་གཉིས་ངའི་ཕྱག་རྒྱ་མ་ཡིན་ཟེར་ནས་བུ་རྫུན་བྱེད་ཀྱིན་ཡོད་པར་འདུག །ངས་འཁོར་བ་སྤེལ་མ་མྱོང་གསུང་། ཡང་རྗེ་བཙུན་གྱི་ཞལ་ནས། ལས་ཡང་(ཀྱང་)ཆོས་པ་དང་། སྒོམ་ཆེན་པ་བྱ་བ་དེ་ཤིས་རྒས་ཐུག་ཙམ་ན་འཛིན་ཆགས་ཇེ་ཆུང་ལ་འགྲོ་དགོས་པ་ཡིན་པ་ལ། དུས་ད་ལྟའི་ཆོས་པ་དང་སྒོམ་ཆེན་པ་ཕལ་ཆེར་ནི། རྒས་ཁ་ཤི་ཁར་སོང་བ་དང་འཛིན་ཆགས་ཇེ་ཆེ་ཇེ་ཆེར་འགྲོ་བར་འདུག་གསུང་། ཡང་རྗེ་བཙུན་ཅུང་པ་ན་བཞུགས་དུས་སུ། ཡོན་བདག་མོ་ལེགས་གསལ་འབུམ་མེས། རྗེ་བཙུན་ལ་མདོ་རྒྱུད་རྣམས་ན་ལུང་བསྟན་འདྲ་ཡོད་ལགས་སམ་ཞུས་པས། རྗེ་བཙུན་གྱི་ཞལ་ནས་ལུང་བསྟན་ཀུན་ཡོད་རུང་མེད་རུང་སྤྱིར་ཡང་ངས་བླ་མ་སློབ་དཔོན་རྣམས་ཀྱི་གསུང་ལ་འགོང་མ་མྱོང་ལ། ཁྱད་པར་དུ་རྗེ་མར་པའི་བཀའ་བཞིན་སྒྲུབས་པས། རང་གཞན་ཀུན་ལ་ཕན་པར་བྱུང་གསུང་། ཡང་རྗེ་བཙུན་ལ་བྱང་ནས་ཡོན་བདག་དའུ་ཕྱུག་པོས་རྟ་ཅིག་ཕུལ་བས། རྗེ་བཙུན་གྱི་ཞལ་ནས། མིད་ལ་སྤྲང་པོ་ལ་རྟས་དགོས་པ་མེད་དེ། འོ་ན་ཡང་ལེགས་གསུངས་ནས་རྟ་ལ་ཁྲིད་བཏབ་པས་སྒོམ་རབ་ཅིག་སྐྱེས་ཡོད་པར་འདུག །ཡང་དུས་ཕྱིས་རྗེ་བཙུན་ལྷོ་བྲག་དུ་(ཏུ་)རྗེ་མར་པའི་གཟིམ་ཁང་ལ་ཕྱག་འཚལ་བ་ལ་བྱོན་དུས་ན། སྤྱན་ཆབ་མང་པོ་བྱོན་
3-3-79a
པ་ལ། རས་ཆུང་རྣམས་ཀྱིས་མི་ཤུམས་པར་ཞུས་པས། རྗེ་མར་པ་ཡབ་ཡུམ་གྱི་བཀའ་དྲིན་དྲན་པ་ཡིན་གསུང་སྟེ། དེ་རེས་ཞག་བདུན་བཞུགས་ལར་སྔ་ཕྱི་ལན་བཅོ་ལྔ་བྱོན་གདའ། ཡང་རྗེ་བཙུན་གྱི་གཉག་གཡུང་སྟོན་ཁྲོ་རྒྱལ་དང་། ཤངས་རྟ་ནག་གི་བོན་པོའི་གདན་ས་ན་ཡར་བྱོན་ནས། ཤུལ་མ་རྣམས་ལ་མགུར་མང་རབ་གསུང་ཤིང་སྤྱན་ཆབ་མང་པོ་བསིལ་བ་ལ། རས་ཆུང་རྣམས་ཀྱིས་མི་བཤུམས་པར་ཞུ་ཞུས་པས། རྗེ་བཙུན་གྱི་ཞལ་ནས། ཇོ་སྲས་དང་མཇལ་བས། བླ་མ་རྔོག་མཁའ་སྤྱོད་ལ་གཤེགས་པའི་ལོ་རྒྱུས་རྣམས་མཛད་པས། རྗེ་བཙུན་གྱི་སྤྱན་ཆབ་མང་པོ་བྱོན་པས། བླ་མ་རྔོག་གི་སྲས་ཀྱང་བཤུམས་པ་ལ། རས་ཆུང་རྣམས་ཀྱིས་མི་བཤུམས་པར་ཞུ་ཞུས་པས། རྗེ་བཙུན་གྱི་ཞལ་ནས། ཁྱེད་རྣམས་ཀྱིས་མིད་ལ་རྒས་འཆལ་དུ་སོང་འདུག་བསམ་པ་ཡིན་ཏེ། ངས་ནོར་ཟང་ཟིང་གི་ཞབས་ཏོག་ནི་ནས་འབྲུ་གཅིག་ཙམ་ཡང་བྱས་པ་མེད་ལ། རྗེ་ལྷོ་བྲག་པའི་ཆོས་སྐོར་ལ། བདེ་མཆོག་མཁའ་འགྲོ་སྙན་རྒྱུད་དང་། སེམས་ཁྲིད་ཡིད་བཞིན་ནོར་བུ། འཕོ་བ་སྡིག་སྡུགས་དང་བཅས་པ་དེ་མ་ལགས་པ། ཐམས་ཅད་ནི་བླ་མ་རྔོག་གི་སྐུ་དྲིན་ཡིན་གསུང་། གཞན་ཡང་
3-3-79b
རོང་ཁུ་ལུང་དུ་བླ་མ་ཡེ་ཤེས་གཟུངས་ཀྱི་གདན་སར་བྱོན་པ་དང་། ཉང་སྟོད་ཁོ་རེ་ན་བླ་མ་བྱང་ཆུབ་རྒྱལ་པོའི་གདན་སར་བྱོན་པ་དང་། ཉང་སྟོད་རྒྱན་མཁར་ན་བླ་མ་དགྱེར་སྟོན་དབང་ཕྱུག་རྒྱ་མཚོའི་གདན་སར་བྱོན་པ་དང་། ཡར་འབྲོག་གླང་བུ་དོ་རུ་བླ་མ་མར་པ་འབྱུང་གནས་ཡེ་ཤེས་ཀྱི་གདན་སར་བྱོན་པ་དང་། རོང་གི་གཡུང་སྟོན་ཕུག་པ་དང་། ཉང་སྟོད་ཁུ་ལ་ན་བླ་མ་འདྲེ་སྟོན་ཧ་རྒའི་གདན་སར་བྱོན་པ་ལ་སོགས། སྤྱན་ཆབ་བྱོན་ཞིང་མགུར་གསུང་བའི་ལོ་རྒྱུས་ཀྱང་ཡོད་དོ། །ལར་སྐྱེས་མཆོག་མིད་ལ་ཁྱེད་ཀྱི་མཛད་པ་དང་ཕྲིན་ལས་དྲན་པས། སྤྲང་པོ་ཞི་བྱེད་རི་ཁྲོད་པ་ཁོས་ཚེ་འདི་བློས་མི་གཏོང་བའི་རང་དབང་མི་གདའ་ཨང་། ཡང་རས་ཆུང་བྱང་ཆུབ་རྒྱལ་པོ་དེ་འཁྲུངས་ས། ལྕིམ་ལུང་ཕུའི་ངམ་རྫོང་ཡིན་པ་དང་། དུས་ཕྱིས་དབུས་ཀྱི་ངམ་རྫོང་ཅིག་གི་བྲག་ལ་བཞུགས་པས། ངམ་རྫོང་རས་པ་ཟེར་བའི་མཚན་བྱུང་བ་ཡིན་པ་ལ། ད་ལྟ་ནི་བླུན་པོ་བསོད་ཟད་ལ་ལས། ངན་སོང་རས་པ་ཟེར་བ་ཡི་གེ་ལ་བཏབ་གདའ། ད་མན་ཆད་ནི་སྒྲ་ལོག་དེ་འདྲ་མ་བྱེད་ཅིག །ཡང་རྫོང་བཙུན་གྱི་ཞལ་ནས། མི་ངན་པའི་སློབ་མ་ལས། མི་མ་ཡིན་གྱི་སློབ་རིས་རྣམས་ཕྱི་ཐག་དང་དམ་ཚིག་ཆེ་བར་འདུག་
3-3-80a
ཙ་ལུང་པའི་གུར་དཀར་དང་། བྲག་ནག་དང་། བྲག་དམར་དང་། བྲག་སྦལ་པ་ཁ་གདངས་ལ་སོགས། ཙ་རོན་གུང་གསུམ་གྱི་གཞི་བདག་གིས་ང་རང་དགའ་ཨ་ཅང་ཆེ་སྟེ། ངའི་སློབ་རིས་རྣམས་ལ་ཡང་ཕན་ཅི་ཐོགས་བྱེད་གྱིན་(ཀྱིན་)འདུག་གསུང་། ཡང་རྗེ་བཙུན་གྱི་དྲུང་ན། འབྲི་སྒོམ་རས་པས། མི་རྣམས་ངན་རེ། རྗེ་མར་པའི་ཇོ་མོ་ཡུམ་བདག་མེད་མ་དང་། བླ་མ་རྔོག་གཞུང་བའི་ཇོ་མོ་དང་། དེ་བས་རྗེ་བཙུན་ལ་སྐུ་ལུས་ཀྱི་དཀྱིལ་འཁོར་གནང་བ་ཡིན་ཟེར་བ་ཡང་འདུག་སྟེ། དེ་འདྲ་བདེན་ནམ་མི་བདེན་ལགས་ཞུས་པས། རྗེ་བཙུན་གྱི་ཞལ་ནས། མི་ངན་པའི་ཁ་དང་། ནམ་ཟླ་དཔྱིད་ཀའི་རླུང་ཚུབ་ལ་གཏད་པ་མེད་པ་ཡིན། ང་ལ་དེ་འདྲའི་སེམས་ཡོད་ན་མཁའ་འགྲོ་མའི་བཀའ་ཆད་ཡོང་། གསུང་། ཡང་རྗེ་བཙུན་གྱི་དྲུང་དུ། རས་ཆུང་ཞི་བ་འོད་ཀྱིས། རྗེ་བཙུན་གྱིས་ལྷོ་བྲག་རྗེ་མར་པའི་དྲུང་དུ་ཇི་ཙམ་བཞུགས་ཞུས་པས། སྔ་རེས་ལོ་ངོ་བརྒྱད། ཧྲིལ་བ་བདུན་ཙམ་བསྡད། ཏིང་རེས་དང་བཅས་ལོ་ངོ་དགུ་ལྷག་པ་ཅིག་ཙམ་སྡད། དེ་ལ་རྗེ་མར་པའི་ཕྱག་རྫས་ནས་ཐེབས་ལྔ་ལས་ཟ་མ་མྱོང་གསུང་། ཡང་གཤེན་སྒོམ་རས་ཆུང་གིས། རྗེ་བཙུན་ཆེན་པོ་ལགས། རྗེ་དྲུང་
3-3-80b
ན་ཡོད་པ་རྣམས་ལ་གསུང་ཙམ་མི་འབྱོན་པ་དང་། ཞལ་བཞད་པ་ཡང་མི་མཛད་པར་འདུག་པ་དེ། ངེད་རྣམས་ལ་མ་མཉེས་པ་ལགས་སམ་ཞུས་པས། རྗེ་བཙུན་གྱི་ཞལ་ནས། ཁྱེད་རྣམས་རང་ལ་མ་དགའ་བ་ཡང་མིན་ཏེ། ལར་སྙིག་དུས་ཀྱི་ཆོས་པ་ཅི་རིགས་ལ་ཡང་རྒོད་རང་མི་བྲོ་ལ། ང་རང་གི་ཚེ་སྟོད་ཀྱི་སྡུག་བསྔལ་རྣམས་དྲན་པ་དང་། སྤྱིར་འགྲོ་བ་རིགས་དྲུག་གི་སྡུག་བསྔལ་དང་། བསམ་སྤྱོད་རྣམས་མཐོང་བས། ང་རྒོད་ཡང་མི་བྲོ་བར་འདུག་ལ། དོན་མེད་ཀྱི་ལོང་གཏམ་བྱེད་རང་མི་འདོད་གསུང་། ཡང་རས་ཆུང་བླ་མ་གྲགས་ཀྱིས། རྗེ་བཙུན་ལ་ད་རྣལ་ཡོད་དམ་མེད་ཞུས་པས། གཏི་མུག་རང་རྒྱུད་པ་དེ་མེད་པ་ཡིན། འོད་གསལ་དང་སྦྱར་བའི་གཉིད་དུམ་རེ་ཡོད་གསུང་། ཡང་ཁྱི་ར་རས་པ་མགོན་པོ་རྡོ་རྗེ་ན་རེ་བདག་ཅག་འདྲ་བའི་སྡིག་ཅན་ལ་ཡང་སྒོམ་ཐོབ་པ། རྗེ་བཙུན་སངས་རྒྱས་རང་ལགས་ཞུས་པས། མི་ལའི་ཞལ་ནས། ཁྱོད་རང་སྔར་གྱི་སྦྱངས་པ་བག་ཙམ་ཡང་ཡོད་པ་ཅིག་འདུག །དེ་མིན་ང་དང་འཕྲད་པ་ཡང་དཀའ་བ་ལགས་ཏེ། འཕྲད་ཀྱང་རྗེས་སུ་ཞུགས་པ་དཀའ་བ་ཡིན་གསུང་། ཡང་ལི་ཁོར་ཕྱར་དུ་བས། ང་དང་པོ་བྲག་དཀར་ན་ཡོངས་དུས་ན། རྗེ་བཙུན་གྱི་ཐུགས་ལ་བཏགས་ཐང་བ་ལ་ཞུས་པས། མིད་
3-3-81a
ལའི་ཞལ་ནས། ཉིད་ཅག་རང་དང་པོ་ནས་ཀྱང་སྦྱངས་པ་ཅན་གྱི་ཅིག་ཡིན་པར་འདུག་པ་དང་། ང་དང་ཡང་ལས་འབྲེལ་བཟང་པོ་ཡོད་པ་ཡིན་ཏེ། སྨོན་ལམ་གྱིས་མཚམས་ཡུན་རིང་ཐུང་དམ་དུམ་ཡང་ཡོང་བ་ཡིན་གསུང་། ཡང་རོང་ཆུང་རས་པས། རྗེ་བཙུན་ལགས། སྒོམ་པ་དང་། བླ་མ་ལ་གསོལ་བ་བཏབ་པ་བོགས་གང་ཆེ་ལགས་ཞུས་པས། མིད་ལའི་ཞལ་ནས། བླ་མ་ཚད་ལྡན་ཅིག་ལ་སློབ་མ་གུས་ལྡན་ཅིག་གིས་གསོལ་བ་བཏབ་ན། སྒོམ་ཞོར་ལ་ཡོང་གསུང་། ཡང་རྩང་ཆུང་རས་པས། རྗེ་བཙུན་གྱི་མཐུའམ་གདམས་ངག་སུ་ལ་ཡང་མ་གནང་ལགས་སམ་ཞུས་པས། རྗེ་བཙུན་གྱི་ཞལ་ནས། བསྟན་པ་ལ་སྣོད་(གནོད་)པ་བྱེད་པ་རྣམས་ལ། ངས་མཐུ་མ་བྱས་ཀྱང་ཤུགས་ཀྱི་སྡིག་པར་འདུག །ངས་སུ་ལ་ཡང་བྱིན་པ་མེད་གསུང་། ཡང་རས་པ་བྱང་ཆུབ་རྒྱན་ནས། སྙིང་རང་ནས་ཆོས་ཅིག་བྱེད་ན་ལུས་སྐྱེས་དམན་ཡིན་ཡང་མི་སྟོ་བར་འདུག་ཞུས་པས། རྗེ་བཙུན་གྱི་ཞལ་ནས། རི་ཁྲོད་འགྲིམ་པ་དང་། རྒྱལ་ཁམས་སྐོར་ན་ཁྱད་དུམ་རེ་ཡོད། དེ་མིན་ཤུབ་ཀྱི་སེམས་ལ་ཕོ་མོ་མེད་གསུང་། རས་མ་ཆོས་ཀྱི་བྱང་ཆུབ་ཀྱིས། ང་ལ་དྲོད་སྐྱེ་བླ་(སླ་)བར་བྱུང་ལགས། སྙིང་རུས་
3-3-81b
ཙམ་ཡང་མ་བྱས་ཏེ། རྗེ་བཙུན་གྱི་བྱིན་རླབས་ཡིན་ཞུས་པས། མིད་ལའི་ཞལ་ནས། སྐྱེས་པ་ལས་བུད་མེད་དྲོད་ཆེ་བ་ཡིན། ཉོན་མོངས་ཆེ་བ་ཙམ་གྱི་རྩ་བཟང་བ་ཡིན། དེ་ཡེ་ཤེས་སུ་འགྲོ་བ་ཡིན་གསུང་། ཡང་རས་མ་ཡེ་ཤེས་བྱང་ཆུབ་ཀྱིས། ང་རྗེ་བཙུན་རང་མ་མཇལ་ན་འཁོར་བར་འཁྱམས་དོ་ཞེས་ཞུས་པས། མིད་ལའི་ཞལ་ནས། ཁྱོད་རང་རྗེ་བཙུན་མ་སྒྲོལ་མས་བྱིན་གྱིས་རླབས་པར་འདུག་གསུང་། ཡང་འབྲིང་མཚམས་གྱི་རང་མ་མཁའ་སྤྱོད་མས། རྗེ་བཙུན་ལོ་དྲུག་བརྟེན་ནས་མཁའ་སྤྱོད་ལ་གཤེགས་པར་འདུག །ཡང་ཇོ་མོ་འོར་མོས། ངས་སྒོམ་ཙམ་མ་བྱས་པ་ལ་སེམས་རྒྱུད་ལ་མ་རྟོགས་རང་བཞིན་པ་མི་སྐྱེ་བར་འདུག་ཞུས་པས། རྗེ་བཙུན་གྱིས་ཞལ་ནས། བླ་མའི་བྱིན་རླབས་ཞུགས་ན། རྣམ་རྟོག་རང་སར་ཞི་ནས། ཕྱག་རྒྱ་ཆེན་པོ་ལ་ངོ་སྤྲད་པ་ཡང་ཅི་རིགས་ཡོད་གསུང་། ཡང་བྲིན་པ་མོ་ལེགས་གསལ་འབུམ་མོས། ང་ད་འཁོར་བར་འཁྱམས་འམ་མི་འཁྱམ་ཞུས་པས། རྗེ་བཙུན་གྱི་ཞལ་ནས། ཁྱོད་ཀྱང་ད་རེས་ལས་འཁོར་བ་ལ་ཕྱི་སྙོག་མི་དགོས་པ་འདྲ། འོན་ཀྱང་ད་རུང་ཚོགས་གཉིས་ལ་འབད་པ་ཐོན་གསུང་། སྙ་ནམ་ཚར་མའི་ལེགས་གསལ་འབུམ་མེས། ངས་ནི་དང་པོ་རང་ཡང་མི་ནག་
3-3-82a
མོར་སོང་ཡང་ཚེ་འདི་ལ་ཞེན་པ་ཆེ་རྒྱུ་ཙམ་མེད་པས། རང་རེས་དྲན་པའི་ཁྲམ་ཟོག་མང་པོ་བྱས་སུ་མ་ཚོར་ཞུས་པས། རྗེ་བཙུན་གྱི་ཞལ་ནས། ཁྱོད་སྐྱེ་བ་ཅི་རིགས་ཀྱི་གོང་ནས། མ་སྐལ་པ་ཟང་མོ་དང་ལས་འབྲེལ་ཡོད་པ་འདྲ་གསུང་། ཅུང་པའི་ལེགས་གསལ་འབུམ་མེས། ང་ནི་ཡུལ་འབྲོག་མང་རབ་ཀྱི་བདག་པོར་སོང་བས། སྡིག་པ་ཡང་ཞོར་ལ་འགོ་བར་འདུག་སྟེ། དགེ་བ་ཡང་དམ་དུམ་འབད་ནས་བྱས། རྗེ་བཙུན་དང་མཇལ་བས། འཁོར་བ་ན་མི་འཁྱམས་ལགས་སམ་ཞུས་པས། རྗེ་བཙུན་གྱི་ཞལ་ནས། སྡིག་པ་ཤེས་བཞིན་དུ་བྱས་ན་ནན་ལྟར་ལྕི་བ་ཡིན་ཏེ། ཁྱོད་རང་འགྱོད་སེམས་སྐྱེས་པས་འདགས་པ་ཡིན་གསུང་། ཡང་རྗེ་བཙུན་གྱི་དྲུང་དུ། རས་ཆུང་རྡོ་རྗེ་གྲགས་ཀྱིས། ཆོས་སྔ་འགྱུར་འདི་ལ། ལ་ལས་འཐབ་ཅིང་འདུག་པ། འདི་ལ་སངས་རྒྱས་ཀྱི་ནི་གསུང་ངོ་ཤེས་སམ་ཞུས་པས། མིད་ལའི་ཞལ་ནས། ཡང་དག་པར་རྫོགས་པའི་སངས་རྒྱས་ཀྱི་ཞལ་ནས་མ་གསུངས་པའི་ཆོས་ཅིག་ལོ་པཎ་སྤྲུལ་སྐུ་རྣམས་ཀྱིས་ཁྱེར་ནས་ག་ན་ཡོང་སྟེ། བར་དུ་ཆོས་རྒྱུད་འཛིན་པར་རྫུས་པའི་གང་ཟག་ཅི་རིགས་པས། གོ་མ་ཆོད་ནས་གདམས་ངག་ཉམས་སུ་ལེན་མ་ཤེས་ནས། ར་ཆོད་
3-3-82b
ཟུ་ལུམས་བྱས་ཤིང་སླད་པས། བཀའ་བརྒྱུད་གོང་མ་ཕན་ཆོད་ཀྱི་ཞབས་འདྲེན་བྱས་པ་ཡིན་གསུང་། དེར་རས་ཆུང་པས། འོ་ན་རྗེ་བཙུན་གྱིས། ཆོས་སྔ་འགྱུར་ཞུས་ཚད་དང་། དེའི་བླ་མ་རྒྱུད་རིམ་དང་བཅས་པ་ང་ལ་གནང་འཚལ་ཞུས་པས། ལར་ཁྱོད་ཤེ་རྒྱ་མང་པོ་བས། གཅིག་ལ་དྲིལ་ན་དེ་དགའ་བ་ཡིན་ཏེ། ཅིས་ཀྱང་འདོད་ན་ཡང་ཆོས་རྒྱུད་མི་ནུབ་པ་དང་། ཆོས་རྒྱུད་ཀྱི་ཕྱོགས་ཆ་དང་། ཁ་འཛིན་ལ་བརྟེན་ནས་དེ་ལ་སྡིག་པ་མི་སོག་པ་ལ་ཕན་པ་ཡིན་པས། བཤད་དགོས་ན། ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་མ་གསུངས་པའི་ཆོས་ནི་གང་ཡང་མེད་པ་དེ་ཡིན་ལ། གདུལ་བྱའི་སྣང་ངོ་དང་། མཚན་ཉིད་ཀྱི་བྱེ་བྲག་ལ་བསམ་གྱི་(གྱིས་)མི་ཁྱབ་པ་ཅིག་ཡོད་པས། དེ་ཚོ་བརྗོད་ཀྱིས་མི་ལང་ལ། ངས་ཆོས་སྔ་འགྱུར་ཐོབ་པའི་བླ་མ་རྒྱུད་རིམ་དང་། གདམས་ངག་གི་དོན་རྣམས་ལ། བཀའ་བརྒྱུད་ནི་སྤྱི་དང་འདྲ་སྟེ། ཆོས་སྐུ་ཀུན་བཟང་ཡབ་ཡུམ། ལོངས་སྐུ་ཞི་ཁྲོ་རབ་འབྱམས། སྤྲུལ་སྐུ་རྡོ་རྗེ་འཆང་ཆེན། སྟོན་པ་རྡོ་རྗེ་སེམས་དཔའ། བསྡུད་པ་ཕྱག་ན་རྡོ་རྗེ། རིག་འཛིན་དགའ་རབ་རྡོ་རྗེ། བླ་མ་འཇམ་དཔལ་བཤེས་གཉེན། རིག་འཛིན་ཤྲི་རི་སིང་ཧ། དེ་ནས་རྒྱལ་བ་ཡེ་ཤེས་འོད་ཟེར་དང་། སློབ་དཔོན་པདྨ་འབྱུང་
3-3-83a
གནས་དང་། མཁས་པ་བི་མ་མི་ཏྲ་དང་། དེ་རྣམས་མཆེད་གྲོགས་ཡིན་ལ། ཁོང་གསུམ་དང་མཁན་ཆེན་བོདྷི་སཱཏྭ་དང་། གཞན་ཡང་རྒྱ་གར་གྱི་སྤྲུལ་སྐུ་མང་རབ་ཀྱིས། ཆོས་རྒྱལ་ཁྲི་སྲོང་ལྡེ་བཙན་ལ་གནང་ཤིང་། མཁའ་འགྲོ་ཡེ་ཤེས་མཚོ་རྒྱལ་གྱིས། ཆོས་རྒྱལ་ཁྲི་སྲོང་སྡེ་(ལྡེ་)བཙན་ལ་ཡང་མང་རབ་གནང་ཡོད་ལ། ཆོས་རྒྱལ་གྱིས་གནས་བརྟན་ལྡན་མ་ལྷུན་གྲུབ་ལ་གནང་། ཡང་ཉང་ཤའི་སྤྱན་ཅན་གྱིས་རྒྱལ་པོ་ལ་གནང་། ཡང་བཻ་རོ་ཙ་ན་དང་། སྐ་ཅོག་རྣམ་གཉིས་དང་། གཉའ་ན་ཀུ་མཱ་ར་དང་། རྨ་རིན་ཆེན་མཆོག་དང་། རྒྱལ་བུ་གཡུ་སྒྲ་སྙིང་པོ་དང་། སྣུབས་རྣམ་གཉིས་དང་། དེ་རྣམས་ཀྱིས་རྒྱལ་པོ་ལ་བཤད་ནས། ཆོས་ཀྱི་རྒྱལ་པོས། ལྷ་སྲས་མུ་ཏིག་རྩད་པོ་དང་། གནས་བརྟན་ལྡན་མ་ལ་སོགས་པ་ལ་གནང་བ་ཡིན། གནས་བརྟན་ལྡན་མས། གྲུབ་ཐོབ་སེང་གེ་དབང་ཕྱུག་ལ་གནང་། དེ་ནས་ལྷ་རྗེ་ཡེ་ཤེས་གཟུངས་དང་། བ་མི་བྱང་རྒྱལ་དང་། དགྱེར་སྟོན་དབང་ངེ་དང་། མར་པ་འབྱུང་ཡེ་དང་། འདྲེ་སྟོན་ཧ་རྒ་དང་། བླ་མ་དེ་རྣམས་ཀྱི་དྲུང་དུ་ངས་ཞུས་པ་ཡིན་པས་ངས་ཁྱོད་ལ་བཤད་པ་ཡིན། ཁྱོད་ཀྱིས་ཀྱང་རྒྱུད་པ་མ་བཅད་ཅིག་གསུང་ནས་སྔ་འགྱུར་རྣམས་གནང་ངོ་། །
3-3-83b
རྗེ་རས་ཆུང་པས་ངམ་ཤོད་བཙན་པོ་ཡབ་སྲས་དང་། ཤེས་སྣང་བ་དང་། སྒོམ་ཆེན་ཆོས་རབ་དང་། ཟངས་རི་རྒྱ་རས་དང་། བྱར་སོ་བ་རྒན་རྒོན་གཉིས་དང་། རྒྱལ་བ་ལོ་དང་། མང་རབ་ལ་གནང་བར་འདུག་ལ། དེ་རྣམས་ནས་རིམ་གྱིས་རྒྱུད་པ་ལ། ཞི་བྱེད་རི་ཁྲོད་པས་ཀྱང་མ་ཐོབ་པ་ཚད་མེད་ཏེ(དེ)། གཏམ་རྒྱུད་རྒྱས་པར་ཟུར་ན་གསལ། གཉག་གཡུང་སྟོན་ཁྲོ་རྒྱལ་དང་། ཤངས་རྟ་ནག་གི་བོན་པོ་ལ་ཞུས་པའི་དྲག་སྔགས་གཟའ་གདོང་དམར་ནག་དང་། མུ་སྟེགས་བོང་ཝ་ཁྲག་འཛུལ་ཡང་ཞུས་པས་མ་གནང་གདའ། ཡང་རས་ཆུང་པས་དབུ་མ་དང་ཚད་མའི་རྒྱུད་པ་གང་ལགས། དེ་ཡང་གནང་བར་ཞུ་ཞུས་པས། རྗེ་བཙུན་གྱི་ཞལ་ནས། སངས་རྒྱས་བསྟན་གཙོ། བྱམས་པ། ཐོགས་མེད་སྐུ་མཆེད། ཀླུ་གྲུབ་(སྒྲུབ་)ཡབ་སྲས། ཕྱོགས་གླང་ཆོས་གྲགས། ཡོན་ཏན་འོད་དང་། ཤཱཀྱ་འོད་ལ་སོགས་ནས། ཇོ་བོ་ཆེན་པོ་རྗེ་ལྷ་གཅིག་ཨ་ཏི་ཤ་དང་། ནག་ཚོ་པཎ་ཆེན་དང་། དགེ་བཤེས་འབྲོམ་དང་། དེ་ནས་བྱང་སེམས་ཟླ་བ་རྒྱལ་མཚན། དགེ་བཤེས་ཙ་བ་གྲགས་པ་བསོད་ནམས། དེས་ང་ལ་གནང་བ་ཡིན་ལ། ངས་ཁྱོད་ལ་བཤད་པ་ལགས་པས། སྤྱིར་རང་རེ་བཤད་བརྒྱུད་པ་མིན་ཡང་རྒྱུད་པ་མ་ཆད་ཙམ་གྱིས་གསུངས། 
3-3-84a
ཡང་རས་ཆུང་པས། ཐབས་ལམ་དང་སྙན་རྒྱུད་ཀྱི་ཆོས་བསྲུང་ནི་ཤེས་པར་འདུག་ལ། ཕྱག་བཞི་པ་གཏེར་མ་དང་བཀའ་མ་གཉིས་ཡིན་པའི། གསར་མ་འདི་ལ་ཁོང་ལ་ལ་ན་རེ། ཡེ་ཤེས་པ་མ་ཡིན། ནོར་ལྷ་གནོད་སྦྱིན་ཅིག་ཡིན་བྱ་བ་ཡང་འདུག་པ་དེ་གང་ལྟར་ལགས་ཞུས་པས། རྗེ་བཙུན་གྱི་ཞལ་ནས། འདི་ཡང་མགོན་པོ་སྔོན་འབྱུང་ནས་ཡང་ཡེ་ཤེས་པར་གསུངས་འདུག་ལ། རྗེ་མར་པས་ང་ལ་ཡང་གནང་གསུང་། འོ་ན་ཡེ་ཤེས་པ་གང་འཁྲོས་པ་ཡིན་ཞུས་པས། བདེ་མཆོག་འཁྲོས་པ་ཡིན་གསུང་། ཡང་རས་ཆུང་པས། རྗེ་བཙུན་གྱི་དབུ་སྐྲ་དཀར་པོར་འགྲོ་བ་དང་། ཚེམས་འབྱོན་པ་དེ་མི་ཐང་སྟེ་ཞུས་པས། རྗེ་བཙུན་གྱི་ཞལ་ནས། འོ་ན་ནི་ང་ལས་ཡོན་ཏན་དུ་མས་ལྷག་པའི་གནས་བརྟན་ཆེན་པོ་བཅུ་དྲུག་ལ་ཡང་ངའི་ཆོས་འབྱོན་པ་དང་དབུ་སྐྲ་དཀར་པོར་སོང་བ་འདུག་པ་དེ་མ་ཚོར་རམ་གསུང་། ངེད་རྣམས་ཀྱང་གདུལ་བྱའི་སྣང་ངོ་དང་། མཛད་པའི་འཕྲིན་ལས་ཡིན་པར་མི་འདུག་གམ་གསུང་། ཡང་རས་ཆུང་པས། རྗེ་བཙུན་གྱིས་ཆོས་གསུངས་བ་དང་གསུང་གང་བྱོན་ཡང་། ཐུགས་འཁྲོས་ཐབས་སུ་གསུང་བ་དེ་ཅི་ལ་དགོངས་པ་ལགས་ཞུས་པས། མིད་ལའི་
3-3-84b
ཞལ་ནས། དེ་ཅིག་ཏུ་ན་ཁམས་རིགས་ཀྱང་ཡིན་ལ། གཉིས་སུ་ན་ང་དང་མི་ཕལ་ཆེར་སྤྱོད་པ་ཡེ་རང་མི་མཐུན་ལ་འདུག་པ་དེས་ལེན་པ་ཡིན་ནམ་གསུང་། ཡང་རས་ཆུང་པས། སྤྱིར་ཡང་རྗེ་བཙུན་སངས་རྒྱས་རང་ཡིན་ལ། ཁྱད་པར་དུ་གསར་རྙིང་ཐམས་ཅད་མཁྱེན་པ་དང་། དགོས་(སྒོས་)སུ་རྗེ་མར་པའི་ཆོས་སྐོར་རྣམས་ཐུགས་སུ་ཆུད་པས། གང་ཡང་མི་མཁྱེན་པ་མེད་པས། དེ་རྣམས་མ་ལུས་པར་ང་ལ་གནང་བ་ཞུ་ཞུས་པས། ཁྱོད་གཅིག་པུ་མིན་པ་ངའི་སློབ་མ་གཞན་རྣམས་དགའ་བ་མེད་པ་ཡིན་ནམ་གསུང་། ཁོང་རྣམས་ལ་ཡང་སྙན་པ་དག་ཡོད་སྟེ་(དེ)། ཁོ་ལ་ལས་ནི། རྗེ་བཙུན་གྱིས་གང་གནང་བ་དེས་ཆོག་ཟེར་ནས་འདུག་ཞུས་པས། གཅིག་ཤེས་ཀུན་གྲོལ་བྱ་བ་དེ་དགའ་བ་ཡིན། འོ་ན་ཡང་ང་རང་གི་གང་ཤེས་རྣམས་ཁྱོད་ལ་སྟོན་པ་ཡིན་གསུང་། བཀའ་སྔ་འགྱུར་གྱི་རྡོ་རྗེ་མཁའ་འགྲོ་དང་། གསར་མའི་རྡོ་རྗེ་མཁའ་འགྲོ་ལ་ཁྱད་ཡོད་དམ་ཞུས་པས། རྗེ་བཙུན་གྱི་ཞལ་ནས། སངས་རྒྱས་ཀྱི་འཕྲིན་ལས་དང་། གང་ཟག་གི་དབང་པོའི་རིམ་པ་ཡིན་དོན་ལ་ཁྱད་མེད་གསུང་། གསར་མའི་རྡོ་རྗེ་མཁའ་འགྲོའམ། རྒྱུད་རིམས་(རིམ་)གྱི་བླ་མ་ནི། ཐབས་ལམ་གྱི་དེ་ལགས་
3-3-85a
སྔ་འགྱུར་དེ་གང་ནས་རྒྱུད་པ་ལགས་ཞུས་པས། སྔར་ལན་ཁ་ཡར་བཤད་པ་ཡིན་ཏེ། བརྗེད་པ་ཡིན་ནམ་གསུང་། ཆོས་སྐུ་ཀུན་ཏུ་བཟང་པོ། ལོངས་སྐུ་རྡོ་རྗེ་སེམས་དཔའ། སྤྲུལ་སྐུ་དགའ་རབས་རྡོ་རྗེ། བླ་མ་འཇམ་དཔལ་བཤེས་གཉེན། ཏིང་འཛིན་ཤྲི་རི་སིང་ཧ། མཁས་པ་བི་མ་ལ་མི་ཏྲ། ལོ་ཚ་བ་ཛྙཱ་ན་སྐུ་མ་ར། ཉང་ཤའི་སྤྱན་ཅན། ཆོས་རྒྱལ་ཁྲི་སོང་ལྡེ་བཙན། རྨ་བློ་གྲོས་དབང་ཕྱུག །ཡེ་ཤེས་འབར། ལྡན་མ་ལྷུན་གྲུབ་རྒྱལ། སེང་གེ་དབང་ཕྱུག །ཟླ་བ་རྒྱལ་མཚན། ཉི་མ་རྒྱལ་མཚན། གྲུབ་པ་རྒྱལ་མཚན། དགེ་བཤེས་ཙ་པས། ང་ལ་གནང་། ངས་ཁྱོད་ལ་བཤད་པ་དེ་ཡིན་པས། རྒྱུད་པ་མ་ཆད་པ་གྱིས་གསུང་། ཡང་རས་ཆུང་པས། རྗེ་མར་པ་དེ་ལ་ལས་ཀུན་ཏུ་བཟང་པོའི་སྤྲུལ་པ་ཡིན་ཟེར། ལ་ལས་ཀྱཻ་རྡོར་གྱི་སྤྲུལ་པ་ཡིན་ཟེར་བ་གང་ལགས་ཞུས་པས། མིད་ལའི་ཞལ་ནས། རང་རང་གང་མོས་ཡིན་ལ། འོན་ཀྱང་བཅོམ་ལྡན་འདས་དགྱེས་པ་རྡོ་རྗེ་རང་ཡིན་པར་འདུག་གསུང་། ཡུམ་བདག་མེད་མ་ནི་ཤེས་པར་འདུག་ཞུས་པས། དེ་ཡིན་གསུང་། ཡང་རས་ཆུང་པས། གཉག་གཡུང་སྟོན་ཁྲོ་རྒྱལ་གྱི་ཆོས་བསྲུངས་འཛིན་མགོན་
3-3-85b
པོ་དེ་གང་འཁྲོས་པ་ལགས་ཞུས་པས། རྗེ་བཙུན་གྱི་ཞལ་ནས། བཅོམ་ལྡན་འདས་སྔོན་རྫོགས་གཤིན་རྗེ་ཁྲོས་པར་འདུག་གསུང་། ཡང་རས་ཆུང་པས། སྙན་རྒྱུད་གྱི་རྒྱུད་པ་ཡིད་བཞིན་ནོར་བུ་དེ་ལ། འདི་ལས་གསལ་བ་རྒྱས་པ་ཅིག་ཐུགས་ལ་བཏགས་ན་ཞུས་པས། རྗེ་བཙུན་གྱི་ཞལ་ནས། དེ་ད་ལྟ་ངས་བཤད་ནས་ཁྱེད་རྣམས་ཀྱིས་བྱས་ཀྱང་ཇི་ལྟ་བ་བཞིན་དོན་དུ་འདྲིལ་བར་དཀའ། དུས་ཕྱིས་ཀུན་དེ་རང་ལ་སྨོན་ལམ་བཏབ་པའི་གདམས་ངག་འདིའི་རྗེས་སུ་འཇུག་པ་འདྲ་ཡོང་ཉིན་ཡོད་གསུང་། གདམས་ངག་འདི་སྣོད་ལྡན་ཁ་ཡར་ལ་བསྟན་དུ་ཡོད་ན་དགའ་བར་འདུག་པ་ལ་ཞུས་པས། རྗེ་བཙུན་གྱི་ཞལ་ནས། གདམས་ངག་ཟབ་མོ་བྱ་བ་དེ་དང་པོ་རང་གི་མྱོང་དགོས་པ་ཡིན། དེ་ནས་གཞན་ལ་སྟོན་དགོས་པ་ལ། དུས་ད་ལྟའི་ཆོས་པ་ཅི་རིགས་པས་རང་གིས་མ་མཐོང་བར་གཞན་ལ་སྟོན་འདོད་པ་མང་པོ་འདུག་གསུང་། ཡང་རྗེ་བཙུན་གྱི་ཞལ་ནས། རས་ཆུང་པ་ལ། དམ་ཆོས་ཐམས་ཅད་གསང་སྔགས་རིགས་ལས་འབྱུང་། །གསང་སྔགས་བརྡ་ཡིས་མཚོན་པ་ལ། །བརྡ་དང་བརྡ་ལན་མ་ཕྱེད་ན། །རང་རྡོ་རྗེ་འཆང་དང་མ་མཉམ་པར། །མི་ནག་པ་ལ་དབང་བསྐུར་མ་བྱེད་ཅིག །གསུངས་པ་དང་། རས་ཆུང་པས། རང་རེས་སེམས་བཟང་
3-3-86a
པོ་དང་། ཆོ་ག་ཚང་བར་བྱས་ན་ཉེས་པ་ཙམ་མི་ཡོང་ངམ་ཞུས་པས། རྗེ་བཙུན་གྱིས་ཞལ་ནས། སེམས་བསྐྱེད་བཟང་པོ་དང་། ཆོ་ག་ཚང་བ་དང་། སྐྱེད་རིམ་གསལ་བ་བརྟན་པ་དང་། ལྷ་སྐོན་ཚད་དུ་སྐྱོལ་བ་དང་། དེ་རྣམས་ཡོད་ན་དག་དེས་ཆོག་སྟེ། ལར་དབང་བྱ་བ་འདི་ལ་རྣམ་པ་མང་སྟེ། སྣང་བ་དང་བསླུ་ཁྲིད་ཀྱི་དབང་དང་། བཏགས་པ་མིང་གི་དབང་དང་། བསམ་པ་རྫས་ཀྱི་དབང་དང་། ཆོ་ག་ཚང་ཙམ་གྱི་དབང་དང་བཞི་ཚང་དགོས་གསུང་། དེ་ནི་དབང་བསྐུར་ལ་ཐོབ་པ་དང་། བསྐུར་ཡང་མ་ཐོབ་པ་དང་། བསྐུར་ཡང་བསྐུར་ལ་ཐོབ་ཡང་ཐོབ་པ་དང་། བསྐུར་ཡང་མ་ཐོབ་པ་དང་། གང་ཟག་དབང་པོ་ཐ་མ་ལ་རྫས་དབང་མིག་ལ་བསྐུར་བ་དང་། དབང་པོ་འབྲིང་ལ་ཚིག་དབང་རྣ་བར་བསྐུར་བ་དང་། དབང་པོ་རབ་ལ་ལྷ་དབང་ལུས་ལ་བསྐུར་བ་དང་། དབང་པོ་ཡང་རབ་ལ་ཆོས་དབང་སེམས་ལ་བསྐུར་བ་དགོས་པ་ཡིན་གསུང་། ཡང་རྗེ་བཙུན་གྱི་ཞལ་ནས། སྙིང་རང་ནས་ཆོས་ཞིག་བྱེད་ན། ཚེ་འདིའི་རྣམ་པར་རྟོག་པ་དང་། གཤེད་མ་ཡིས་བསླུ་བར་བྱེད་པའི་སྡུག་བསྔལ་གྱི་རྒྱ་མཚོ་ཐམས་ཅད་ནི། བདག་མེད་ཀྱི་ཡེ་ཤེས་བདེ་བ་ཆེན་པོ་མཉམ་ཉིད་ཀྱི་དོན་ཕྱིན་ཅི་
3-3-86b
མ་ལོག་པར་སྟོན་པའི་བླ་མ་དམ་པ་མཁས་ཤིང་གྲུབ་པ་ཐོབ་པ་ཅིག་དང་མཇལ་དགོས་ལ། བླ་མ་དམ་པ་དེས་གཉིས་འཛིན་གྱི་མདུད་པ་ཐམས་ཅད་རང་སར་བཅད་ནས། བདུད་བཞིའི་སྟོབས་རྣམས་ཕམ་པར་མཛད་ནས། དཔའ་བོ་དང་དཔའ་མོའི་གྲལ་དུ་ཚུད་ནས། སྒྱུ་མ་རིག་པའི་ལིང་ཏོག་རང་སར་དག་ནས། ཡེ་ཤེས་ཀྱི་མདངས་དང་ལྡན་པར་ཐེ་ཚོམ་མེད་པ་ཡིན་ཏེ། སྙིགས་དུས་ཀྱི་རྨོངས་པ་རྣམས་ལ་དཀའ་བར་འདུག་གསུང་། ཡང་མིད་ལའི་ཞལ་ནས། ངས་སྔར་རྗེ་མར་པའི་དྲུང་ན་བསྡད་དུས་ན། མཆེད་གྲོགས་གོང་མ་རྣམས་ལ་གདམས་ངག་གི་དྲི་མ་མང་རབ་བཅད་པས། ད་ལྟ་ཡང་གདམས་ངག་ལ་ཐེ་ཚོམ་མེད་པ་དེའི་བྱིན་རླབས་ཡིན་གསུང་། ཡང་རྗེ་བཙུན་གྱི་ཞལ་ནས། དྭགས་པོ་ལྷ་རྗེ་ལ་དབུས་པ་ཁྱོད་དང་པོ་ཡར་ཡོང་དུས་ན། བླ་མ་དང་སློབ་དཔོན་ཐམས་ཅད་ལ་ཞལ་ཏ་ཞུས་སམ་གསུང་པས། ཞལ་ཏ་ཞུས་ལགས། བླ་མ་སྙུག་རུམ་པའི་ཞལ་ནས། ང་ཡང་ད་ན་སོ་རྒས་པ་དང་། ཅི་དྲག་ལྟོས་ལ་གྱིས་གསུང་ལགས། བླ་མ་ཤ་བ་གླིང་པས་མི་འཐད་མི་གསུང་ལགས། བླ་མ་བློ་ལྡན་ཤེས་རབ་པས་ཀྱང་སོང་ལ་གདམས་ངག་བརྩད་ཆོས་གསུངས་ལགས། མཁས་བཙུན་ཆེན་པོ་རྒྱ་སྟོན་པས་ཀྱང་། རྣལ་འབྱོར་པ་
3-3-87a
ཡིན་ཡང་མི་སྟོ་གདམས་ངག་ཟབ་མོ་འདུག་ན་དེས་ཆོག་པ་ཡིན། སེར་ཁ་ལ་ཕན་ན་ཁྱི་ཚལ་བྱ་བ་ཡིན་པས་སོང་ལ་གདམས་ངག་ཞུས་གསུང་ལགས་ཞུས་པས། མིད་ལའི་ཞལ་ནས། དབུས་པ་སྟོན་པ་ལར་ནི་ཁྱོད་སྔར་གྱི་སྦྱངས་པ་ཅན་ཅིག་ཡིན་པར་འདུག་སྟེ། འོན་ཀྱང་ད་རེས་ང་དང་མ་འཕྲད་ན་ལྷ་ཅིག་ཏུ་སྐྱེ་བར་འདུག །དེ་ནས་མིར་སྐྱེས་ནས་རིམས་ཀྱིས་ལམ་རྫོགས་འགྲོ་བར་འདུག་གསུང་། དྭགས་པོ་རིན་ཆེན་པ་དབུས་ནས་ཡར་བྱོན་དུས། ས་ཆེན་ཀུན་དགའ་སྙིང་པོའི་དྲུང་དུ། བརྟག་གཉིས་ཆོས་འབྱུང་ཕྱི་མ་གསུམ་གསན་པ་དང་། ཕྱིས་རྗེ་བཙུན་གྱི་དྲུང་དུ་གསན་པ་དང་ཁྱད་མི་འདུག་གསུང་། ཡང་རྗེ་བཙུན་གྱི་ཞལ་ནས། སེ་བན་རས་པ་ལ། ཁྱོད་ཀྱང་སྐྱེ་བོ་ཅི་རིགས་གོང་ནས་གསང་བའི་བདག་པོ་ཕྱག་ན་རྡོ་རྗེའི་དབང་དང་བྱིན་རླབས་ཐོབ་པ་ཅིག་འདུག་སྟེ། གནས་སྐབས་སུ་བག་ཆགས་ངན་པ་ཅིག་གིས་འཕྲོ་སླང་ནས། ཚེ་འདིར་ཡང་ཁྱི་ར་བྱེད་དགོས་པར་བྱུང་འདུག་པ་ད་རེས་ང་དང་འཕྲད་པས་གོ་ཆོད་པ་ཡིན་གསུང་། ཡང་རྗེ་བཙུན་གྱི་ཞལ་ནས། དགེ་བཤེས་ལམ་སྟོན་པ་ཉིད་ཙག་སྐྱེ་བ་སྔ་མ་ཡང་དགེ་སློང་ཁྲིམས་གཙང་མར་བསྲུངས་པའི་བག་ཆག་(ཆགས་)བཟང་པོས། 
3-3-87b
ཚེ་འདིར་ཡང་མཁས་བཙུན་དུ་སྐྱེས་པར་འདུག་ལགས། དེ་བཞིན་ཡིན་ཡང་དཀར་པོའི་ལས་འཕྲོ་ང་དང་འཕྲད་པས་སླང་བ་ཡིན་གསུང་། ཡང་རྗེ་བཙུན་གྱི་ཞལ་ནས། སྟོང་ཚ་དར་བློ་ལ་ཉིད་ཅག་ང་དང་མ་ཕྲད་ན་ད་རུང་ངག་འཁྱལ་བག་རེ་བྱེད་པས། དོན་མེད་ལས་རྣམས་སྨིན་བག་རེ་སོགས་པ་འདུག་སྟེ། ད་ཁྱོད་རང་གིས་དག་སྣང་སྦྱངས་པས་ཚེ་ཕྱི་མ་ལ་འཕགས་པ་སྤྱན་རས་གཟིགས་ཀྱི་ཞིང་ཁམས་སུ་སྐྱེ་བར་འདུག་གསུང་། ཡང་རྗེ་བཙུན་གྱི་ཞལ་ནས། སྙ་ནམ་གྱི་དམ་པ་རྒྱགས་ཆུང་བ་ལ། ཁྱོད་སྔར་གྱི་སྦྱངས་སྟོབས་ཆེན་པོ་ཅན་ཅིག་ཡིན་པ་འདྲ་ལ་འདིར་ཡང་ཕྱིར་མི་ལྡོག་པའི་དངོས་གྲུབ་ཐོབ་པར་འདུག །ཁྱོད་ཚོའི་དུས་བྱེད་དུས་ཀྱང་རྟེན་ཁྱད་པར་ཅན་མང་རབ་བྱོན་པར་འདུག་གསུང་། ཡང་རྗེ་བཙུན་གྱི་ཞལ་ནས། རས་ཆུང་རྡོ་རྗེ་གྲགས་པ་ལ། ད་ནི་ང་ཡང་ཞིང་ཁམས་གཞན་འདྲ་རུ་འགྲོ་ཡང་རན་པས། ཁྱོད་བུ་སློབ་རྣམས་ལ་ཡང་། ས་ས་སོ་སོར་གདམས་ངག་དྲི་བ་མ་ཆོད་པ་ཡང་མེད་དམ་བསམ། དགོས་(སྒོས་)སུ་ཁྱོད་ལ་ང་རང་གི་ཤེས་པའི་ཆོས་སྐོར་རྣམས་ཡང་(ཀྱང་)མ་ལུས་པར་བསྟན་པ་དེ་ཡིན་ལ། ངའི་བུ་སློབ་རྣམས་ལ་ཆོས་ཀྱི་དྲི་བ་དང་རྩད་བཅད་རྒྱུ་དམ་དུམ་འདུག་ན། ཁྱོད་ཀྱིས་ས་ས་སོ་
3-3-88a
སོར་སྟོན་གསུང་། ཡང་རས་ཆུང་པས། རྗེ་བཙུན་ཆེན་པོ་ལགས་ལུས་མེད་མའི་སྙན་རྒྱུད་ཆོས་སྐོར་དགུ་པོ་དེ་ལ། ད་རུང་ནན་ཆགས་ཅིག་མཛད་པར་ཞུ་ཞུས་པས། རྗེ་བཙུན་གྱི་ཞལ་ནས། དེ་ལ་ནན་ཆགས་བྱེད་རྒྱུ་ཅི་ཡོད་སྔར་ཡང་ནས་ཡང་དུ་བཤད་པ་དེ་ཡིན། དུས་དང་རྣམ་པ་ཐམས་ཅད་དུ། །དམ་ཚིག་རང་སེམས་མེ་ལོང་ལྟོས། །སྨིན་གྲོལ་སེམས་ཀྱི་རྒྱ་མདུད་ཤིག །སྤྱོད་པ་ཆུ་ལ་རལ་གྲི་རྒྱོབ། །དམ་རྫས་རྟོགས་པའི་ཉི་མ་འདིས། །རིག་པ་ཡེ་ཤེས་སྒྲོན་མ་ལྟོས། །རྩ་རླུང་དྲ་མིག་འཁོར་ལོ་བསྐོར། །རོ་སྙོམས་ཕྱི་ཡི་མེ་ལོང་ལྟོས། །རང་གྲོལ་ཕྱག་རྒྱ་ཆེན་པོ་ཆོངས། །བདེ་ཆེན་གསུང་གི་རིན་ཆེན་ལྟོས། །གསུངས།། །།
༈ བཅོ་བརྒྱད་པ། ཕྱག་རྒྱ་ཆེན་པོ་ངོ་འཕྲོད་པའི་ཡོན་ཏན།
བཅོ་བརྒྱད་པ་ཕྱག་རྒྱ་ཆེན་པོ་ངོ་འཕྲོད་པའི་ཡོན་ཏན་ནི། རྗེ་བཙུན་གྱི་ཞལ་ནས། ལྷ་མོའི་འབྲི་སྒོམ་རས་པ་ལ། ཁྱོད་གཏམ་གླེང་དྲང་བ་རང་ཡིན་པས། ང་ཤི་ཙ་ན་ཅི་འདྲ་ཡོང་གསུང་པས། འབྲི་སྒོམ་རས་པ་ན་རེ། རྗེ་བཙུན་སངས་རྒྱས་རང་ལགས་པས། འགྲོངས་པ་མི་ཡོང་ངམ་བསམ་ལགས། དུས་གསུམ་སངས་རྒྱས་རྣམས་ལ་ཡང་འདས་གྲོངས་འདྲ་བྱུང་འདུག་པས། རྗེ་བཙུན་ལ་ཡང་འདས་གྲོངས་ཡོང་ངམ་ཡང་བསམ་ལགས་ཞུས་
3-3-88b
པས། དེ་ལ་རྗེ་བཙུན་མཉེས་ནས། ཁྱོད་ཀྱི་གཏམ་དེ་དྲང་གསུང་སྐད། ཡང་རས་ཆུང་པས་དབུས་ནས་རྗེ་བཙུན་དྲན་ནས་ཕྱག་མཇལ་ལ་བྱོན་པས། དེའི་དུས་ན་རྗེ་བཙུན་གྱི་ཞལ་ནས། རྣལ་འབྱོར་ལུས་ཀྱི་མེ་ཏོག་འདི། །འཆི་བདག་རྐྱེན་གྱི་བ་མོ་ཡིས། །བཅོམ་ཏེ་ཕ་རོལ་འགྲོ་དུས་སུ། །བར་དོ་མཐོང་མེད་རྣལ་འབྱོར་བདེ། །གསུངས་པ་དང་། ཆོས་རྗེ་བ་རི་ལོ་ཙྪ་བ་ཆེན་པོ་དང་གསུང་གླེང་མཛད་དུས་ཀྱང་། རྣལ་འབྱོར་མིད་ལ་རས་པས་བར་དོ་མི་མཐོང་བར་འདུག་གསུངས་པ་དང་། གཞན་ཡང་དབེན་པ་བྲིན་གྱི་སྨན་ལུང་ཆུ་དབར་གྱི་ཡང་དབེན་འབྲི་ལྕེ་སྐྱིད་ཕུག་ན། བུ་སློབ་ཡོན་བདག་ལ་ཆོས་ཅིག་གསུང་དུས་ན། རྗེ་བཙུན་གྱི་ཞལ་ནས། མིད་ལ་སྤྲང་པོ་ལ། ཡོན་ཏན་རྫོགས་ཀྱི་བར་དོ་རུ། །སྙན་རྒྱུད་ཟབ་མོས་མཚམས་སྦྱར་ནས། །བླ་མ་ཡི་དམ་འོད་གསལ་གྱིས། །བསྐྱེལ་བསུ་སྐྱེད་མེད་ལམ་ཁྲིད་ནས། །སེམས་ཀྱི་མའུ་མཇལ་དུས་སུ། །ང་ལ་མཐོང་བ་སྣ་ཚོགས་ཡོང་། །གསུངས་ནས། མི་ལ་སྤྲང་པོ་ཤི་ཙ་ན་ཆོ་འཕྲུལ་ཆེན་པོ་ཡོང་གསུངས་སོ། །སྐུ་འདས་པའི་དུས་ན་ཡང་། མི་བཅུ་གཉིས་དྲུང་ན་ཡོད་པ་ལ། སྣང་བ་དག་པ་དང་སྣང་བ་མ་དག་པའི་ལོ་རྒྱུས་གཉིས་ཡོད་པ་ལ། སྣང་བ་དག་པ་རྣམས་ཀྱིས་ནི་སྐུ་
3-3-89a
འདས་ཟེར་བའི་དུས་ན་ཡང་། རས་དགའ་དེ་གཟིམས་མལ་ན་འདུག་པ་ལས། རྗེ་བཙུན་གར་གཤེགས་ཆ་མེད་པར་གཤེགས་ཏེ། སྐུ་ལུས་ཁྱེར་བར་འདུག་བྱ་བར་གསུངས་སོ། །སྣང་བ་མ་དག་པ་རྣམས་ནི་འོག་ནས་གསལ་བར་སྟོན་པའོ། །གཞན་ཡང་རས་ཆུང་རྣམས་ཀྱིས། གལ་ཏེ་རྗེ་བཙུན་གྲོངས་ན་རྗེས་ཀྱི་གཤེགས་རྫོངས་ཅི་འདྲ་བྱེད་ལགས་ཞུས་པས། རྗེ་བཙུན་གྱི་ཞལ་ནས། ང་རང་ཉལ་བའི་ལྷོ་ངོས་འདི་ནས་མར་རྐོས་དང་། ནོར་མང་པོ་ཡོད་པས་དེ་ཡང་མ་བཞག་ཅིག །ཁྱེད་རྣམས་ཀྱིས་ཡང་མ་གཏོང་ཅིག །ཁྱེད་ཚོས་ནོར་བཏང་ན་དམ་ཚིག་ཉམས་པ་ཡིན་གསུངས་པ་དང་། མི་རྣམས་ན་རེ་འོ་ན་རྗེ་བཙུན་གྲུབ་ཐོབ་ཆེན་པོ་ཡིན་པས། རྫུ་འཕྲུལ་སྣ་ཚོགས་མཛད་པས་ཡོན་བདག་མི་ཆེན་དང་། འབྱོར་བ་ཆེ་བ་དད་པ་ཅན་རྣམས་ཀྱིས་ཕུལ་བའི་གསེར་གཡུ་ལ་སོགས་པ་ནོར་ཆེན་པོ་མང་རབ་ཡོད་པར་འདུག་གོ། །དེ་ཚོ་ཅིག་རེ་ཡང་རེ་ཟེར་ནས་གྲོངས་པའི་དུས་ན་ཐམས་ཅད་ཚོགས་ནས་རྐོས་ནས་ལྟས་པས། བུ་རམ་རྡོག་མ་གསུམ་དང་། མར་འགྲོན་བུ་ཙམ་ཅིག་དང་། གྲི་གུ་སོར་བཞི་པ་ཅིག་བཞག་ནས་འདུག་པས། མིད་ལ་སྤྲང་པོ་ལ་ནོར་གྱི་ཡོང་ས་ཅི་ཡོད། བུ་རམ་དང་མར་འདི་ལ་གོ་ར་གྱིས་
3-3-89b
ལ་གྲི་གུག་འདིས་ཆོད་ལ་ཟོ་ཟེར་བ་ཅིག་གཡམ་པ་ཅིག་ལ་བྲིས་འདུག་པས། དེར་ཐམས་ཅད་ཀྱིས་རྗེ་བཙུན་ཤིན་ཏུ་སྤྲོས་མེད་མཛད་པ་ལ་ནོར་ཡོང་ས་ཅི་ཡོད། རང་རེ་རྣམས་ཚོད་ཆུང་ས་པ་ཡིན་ཟེར་སྐད་དོ། །དེ་ལ་སོགས་པའི་གསུང་ངོ་མཚར་ཅན་མང་རབ་བཞུགས་པ་ཟུར་ན་གསལ། དེ་ན་སྐུ་ཚེ་འདིར་མཛད་པ་དང་འཕྲིན་ལས་བསམ་གྱིས་མི་ཁྱབ་པ་རྣམས་རྒྱལ་བའི་བཀའ་དྲི་མ་མེད་པ་དང་ཐ་དད་མེད་པར་མཛད་ན། ད་ནི་ཇི་ལྟར་སྲེག་བྱ་བུད་ཤིང་ཟད་པས་བསྲེག་བྱེད་མེའི་རྒྱུན་ཆད་པ་ལྟར་དུ། མཛད་པ་ཐ་མའི་ཚུལ་སྟོན་པ་ནི་འདི་ལྟར་ལགས་སོ། །སྤྱིར་དུ་ན་དུས་གསུམ་གྱི་རྒྱལ་བ་སྲས་བཅས་རྣམས་ཀྱང་། མཛད་པ་དང་འཕྲིན་ལས་མ་རྫོགས་ཀྱི་བར་དུ་དུས་མིན་ལ་མྱ་ངན་ལས་འདའ་བར་མི་མཛད་ཅིང་། འཕྲིན་ལས་རྫོགས་ནས་བཞུགས་པར་མི་གནང་བའི་ཚུལ་བསྟན་ནས། སྙིང་རུས་ཅན་གྱི་བླ་མ་མིད་ལ་རས་པས་ཀྱང་། གདུལ་བྱ་བསམ་གྱིས་མི་ཁྱབ་པ་རྣམས་ཀྱིས་སེམས་ཅན་སྨིན་གྲོལ་ལ་ཡང་དག་པར་བཀོད་ནས། ད་ནི་སེམས་ཅན་ལེ་ལོ་དང་རྟག་པར་ལྟ་བ་རྣམས་སུན་ཕྱུང་བའི་ཕྱིར་དུ་མཛད་པ་ཐ་མའི་ཚུལ་སྟོན་པ་ལས། དེ་ཡང་རིགས་ཆད་ཀྱི་གང་ཟག་ངན་པ་རང་བཞིན་གྱི་རྨུ་ལོང་ཙག་ཕུག་གི་མཁན་པོ་དེ་དང་པོ་ནས་ཁོ་རྗེ་
3-3-90a
བཙུན་ལ་མི་དད་ལ་བསྐུར་པ་བཏབ་པ་ཅིག་ཡོད་པ་ལ། ཁོའི་འཁོར་རྣམས་ཀྱིས་ནན་མ་ཐེག་པར། ཉིན་ཅིག་དབང་མེད་ཤ་མར་འདྲ་ཁྱེར་འོང་ནས། རྗེ་བཙུན་ལ་མཇལ་དུ་བྱུང་བ་དང་། ཁོས་ཆོས་གཏམ་ལུང་མ་བསྟན་ཁ་ཡར་བྱས་པ་ལ། རྗེ་བཙུན་གྱི་ཞལ་ནས། ལོང་བས་རབ་ཏུ་བྱུང་བའི་བསླབ་པ་ཕོག་པ་དང་། སྐུ་གསུང་ཐུགས་ཀྱི་རྟེན་ལ་རབ་གནས་ཀྱི་ཆོ་ག་བྱེད་པ་ནི། བཀའ་མདོ་རྒྱུད་ནས་མ་གནང་བ་ལགས་པས། དགེ་བཤེས་པས་དེ་ལྟར་མ་མཛད་ན་འཐད་ཙམ་ཡིན་པ་དང་། གསང་སྔགས་བླ་མེད་ཀྱི་ལུགས་ཀྱིས། དབང་བསྐུར་བ་དང་། རྒྱུད་བཤད་པ་དང་། ཁྲིད་འདེབས་པ་དང་། སེམས་བསྐྱེད་པ་དང་། དེ་རྣམས་ནི་བཀག་པ་ཙམ་མེད་ན་ཡང་། རང་རེའི་རྒྱུད་ཚོད་དང་སྦྱར་འཚལ་བས། དེ་ལྟར་མཛད་འཚལ་གསུངས་པས། རྗེ་བཙུན་གྱི་གསུང་དེ་ཐོས་པས། ཁོ་ལ་ཆགས་སྡང་བྱེད་པར་གོ་ནས། ཁོ་ལོག་ལྟ་ཆེན་པོ་སྐྱེས་ནས། སླར་ཁོ་རང་གི་ཁང་པར་ཕྱིན་ཏེ། འཁོར་རྣམས་བསྡུས་ནས་དུང་བཏང་སྟེ་ཐམས་ཅད་ཉོན་ཅིག །བྲིན་སྙ་ནམ་གྱི་ས་ཆ་ན་མདོ་སྔགས་བཤེད་གསུམ་དང་། ཆོ་གཉན་བཙུན་གསུམ་ཐམས་ཅད་ཀྱིས་ང་ལ་གུས་པ་མི་འདུད་པ་མེད་པ་ལ། མི་ལ་རས་པ་ཟེར་བའི་ཁྱི་ཀྲོག་འདིས། 
3-3-90b
ང་ལ་ཆགས་སྡང་བྱེད་པར་འདུག་ལ། དགོས་པའི་དགོན་ཆུང་ཅིག་བཟུང་ནས། འཁོར་སློབ་ཀྱི་སྐྱོང་རན་ནི་མེད། མི་དགོས་པའི་གླུ་མ་དབྱངས་བྲོ་མ་གཞས་ཅིག་རྒྱུན་མི་འཆད་པ་འདིས། ང་སོ་མ་བསོད་པར་རྣ་བ་ན་བར་འདུག་པས། ང་ལ་གཏོགས་པའི་འཁོར་རྣམས་སོང་ལ། མིད་ལ་རས་པ་འདྲ་བའི་ཁྱི་ཀྲོག་དེ་ལ་བརྡུང་བཏག་ཅིག་གྱིས་ལ་སྤུ་སེ་ལ་ལ་ཕར་ཐོན་ལ་ཐོང་ཟེར་བས། འཁོར་རྣམས་ན་རེ་དེ་འདྲ་བྱས་ན་དགེ་བཤེས་ཙག་ཕུག་པས། རྗེ་མིད་ལ་རས་ཆེན་བརྡུང་ནས་བྲིན་ནས་བཏོན་ཟེར་བའི་གཏམ་ངན་ཆེན་པོ་ཡོང་ངོ་། །གཅིག་དུ་(ཏུ་)ནི་ཁོང་ལ་ནི་རྫུ་འཕྲུལ་མངའ་བས་རང་རེས་བརྡུངས་མི་ཐུབ་པས། དེ་ལས་ཁོང་གི་གང་གསུང་བྱས་པ་དྲག་བྱས་པས། ཁོང་བསམ་ངན་སྐྱེས་ནས། བརྡུང་བཏག་བྱས་ན་ང་བཤེས་གཉེན་ཆེན་པོ་ཡིན་པས། གྲགས་པ་ངན་པར་འགྲོ་ལ། ངའི་གྲགས་པ་ཉམས་པས། ད་འདི་ལ་དུག་གཅིག་བླུད་ལ་བསད་དགོས་བསམ་ནས། བྱ་ལོ་ཤིང་མོ་རྟ་ཟླ་བའི་ཡར་ཚེས་དྲུག་གི་མཚན་མོ་ནི། ཁོང་རང་གི་ཁྲིམ་འཕྲོག་བྱི་མོ་ཅིག་ལ་མཛེ་བྱུང་བ་ཅིག་ཡོད་པས། དེ་ལ་ཤོག་བྱས་ནས། བཟའ་བཏུང་བཟང་པོ་བྱིན་ནས། རང་རེ་གཉིས་སྔར་ལུས་འབྲེལ་བྱས་པས། ཤ་ཕོབས་པའི་སྙིང་གཏམ་ཡིན་
3-3-91a
པས། ད་ལྟ་ཁྱོད་ལ་ནད་མཛེ་བྱུང་ན་ཡང་། ང་ཁྱོད་ལ་སེམས་རྩེ་(བརྩེ་)བ་འདི་སེང་ཡིན་པས་ད་ཁྱོད་ཀྱིས་མི་ལ་རས་པ་ལ་དུག་ཅིག་ཐོང་དང་། ངས་གཡུ་འདི་སྟེར་བྱས་ནས་གཡུ་ཆེན་པོ་གཅིག་བསྟན་པས། མཛེ་མོ་བསོད་ཟད་མས། དེ་ལོས་ཀྱང་བྱེད་ཟེར་ཏེ། ཡར་ཚེས་བདུན་གྱི་སྔ་དྲོ་དོ་བའི་རྩ་བ་བཏགས་པའི་དོ་ཁོད་བཞི་ཤིང་ལེབ་གཅིག་གི་ཁར་བཞག་ནས། རྗེ་བཙུན་ཀྲོང་ཏི་བཀྲ་ཤིས་སྒང་ན་བཞུགས་པའི་དྲུང་དུ་ཁྱེར་བྱུང་བ་དང་། མཛེ་མོ་ན་རེ་ངེད་ཀྱི་དགེ་བཤེས་པ་རྗེ་བཙུན་ལ་ཡེ་མི་མོས་པ་ལགས་ཏེ། ངེད་འཁོར་རྣམས་མོས་པར་ཡོད་ན་ཡང་། ང་ལ་དྲང་རྒྱུ་གཞན་ཅི་ཡང་མེད་པས། དོ་བ་འདི་གསོལ་བ་ཞུ་ཟེར་བ་དང་། རྗེ་བཙུན་ཆེན་པོས་མོའི་ལག་དུ་གཡུ་མ་སླེབས་པར་མཁྱེན་ནས། འོ་ཁྱོད་དད་པ་ཆེ་བ་དེ་བཟང་། ད་ནང་ནི་ཡོན་བདག་མོ་ལེགས་གསལ་འབུམ་མེས་ཚ་བ་དྲངས་བྱུང་བ་དེ་ཟོས་ཚར། ནང་པར་དང་གནངས་གཉིས་འབར་སིང་དང་དཀོན་འབར་གཉིས་ཀྱིས་འདྲེན་པར་ཡོད་པས། ཁྱོད་རང་དྲང་རྒྱུ་ཡོད་པ་དེ་བཞེས་སྔ་དྲོ་ཁྱེར་ལ་ཤོག་གསུངས་པས། མཛེ་མོ་ན་རེ་འོ་ན་བཞེས་སྔ་དྲོ་འོང་བར་ཞུ། རྗེ་བཙུན་ཐུགས་མི་འགྱུར་བར་གསོལ་བར་ཞུ་ཟེར་ནས་སོང་སྐད། དེ་ནས་ཡར་ཚེས་
3-3-91b
བཅུའི་སྔ་དྲོ་མཛེ་མོའི་ལག་ཏུ་གཡུ་སླེབ་པར་མཁྱེན་ནས། རྗེ་བཙུན་སྡིང་མ་བྲག་མཁར་ན་བྱོན་པ་དང་། མཛེ་མོ་དགའ་ནས་ཙ་ཕུག་པ་ཅན་དུ་ཕྱིན་ནས་ཞོ་བྱ་བོ་གང་ལ་དུག་བཏབ་པ་ཅིག་བླངས་ནས། རྗེ་བཙུན་ལ་དྲངས་པས། རྗེ་བཙུན་ཞལ་འཛུམ་མཛད་ནས། ཁྱོད་ཀྱི་ལག་ཏུ་གཡུ་དེ་སླེབ་སམ་གསུང་པ་དང་། མཛེས་མོ་སྐྲག་ནས་འོ་ན་རྗེ་བཙུན་གྱིས་མཁྱེན་ནས་འདུག་བསམ་ནས། གསང་མ་ཕོད་ནས་གཡུ་སླེབས་ལགས་ཞུས་པས། རྗེ་བཙུན་གྱི་ཞལ་ནས། གཡུ་དེ་ཁྱོད་ལ་ཕན་པའི་ཕྱིར་དུ་བྱས་པ་ཡིན། ཁྱོད་ལ་ཉེས་པ་མི་ཡོང་གསུངས་ནས། ཕྱག་གཡས་པས་ཤངས་དེ་བཀབ་ནས། ཕྱག་གཡོན་པས་ཞོ་དེ་གསོལ་ནས། འདི་སྐད་གསུངས་ནས་མགུར་བཞེས་པ། ན་བོ་ཅོག་ནི་ན་ནས་འཆི། །བོད་ཀྱི་མིད་ལ་རས་པ་ང་། །ད་ལན་གྱི་ནད་འདིས་འཆི་འཆི་འདྲ། །གསུང་ནས། བུ་སློབ་རྣམས་ལ་ང་ཁོང་དུ་དུག་སོང་བའི་ནད་པ་ཡིན་པས། འབྲོག་ལ་ཕྱི་གངས་ཀྱི་རྭ་བར་ཤིར་འགྲོ་གསུང་ནས། ལྷ་བྲོ་ན་ཡར་བྱོན་པས་བྲིན་པ་ཐམས་ཅད་ཀྱིས་གཤེགས་སྐྱེམས་དྲངས་ནས་སྐུ་ཁམས་ཞུས་པས། རྗེ་བཙུན་གྱི་སྐུ་མདུན་ན་མར་ལ། བུད་མེད་སྨ་ར་སེར་ཁྱུག་སེ་བ་ཅིག་བྱུང་ནས། དུས་གསུམ་བདེ་གཤེགས་ཀུན་གྱིས་སྲས། །འགྲོ་བ་མ་ལུས་འདྲེན་
3-3-92a
པའི་དཔལ། །དེ་བོད་ཀྱི་མིད་ལ་རས་པ་མ་ལགས་སམ། །བྲིན་སྨན་ལུང་ཆུ་དབར་སྤྲུལ་སྐུའི་ཕོ་བྲང་ན་ཕར་སོང་ཟེར་བ་དང་། ཡོན་བདག་མོ་རྒྱལ་མོ་སྐྱིད་ཀྱིས། རྗེ་བཙུན་གྱི་སྐུ་སྟོད་ལ་ཕང་པ་གཏད་ནས་ངུས་པས། བུ་སློབ་གཞན་རྣམས་དང་ངུ་ཤིང་། རྗེ་བཙུན་འགྲོངས་ས་ཆུ་དབར་ན་མཛད་དགོས་ཟེར་ནས་གསོལ་བ་བཏབས་(བཏབ་)པས། དམུས་ལོངས་ཙག་ཕུག་པ་ཡང་བྱུང་ནས། མིད་ལ་རྣལ་འབྱོར་པ་ཁྱེད་ན་ཤིང་འདུག་གམ་ཟེར་བ་དང་། རྗེ་བཙུན་གྱི་ཞལ་ནས། ཨེན་ཙམ་མ་བདེ་གསུང་བ་ལ། ཁོང་ན་རེ་འོ་ན་རྣལ་འབྱོར་པ་འོ་རྒྱལ་བས། ཁྱེད་ཀྱི་ནད་དེ་འདིར་ཚོགས་ཚད་ལ་དུམ་རེ་དགོད་ཉན་ན་དགའ་བ་ལ། ངས་ཀྱང་སྐལ་བ་ཅིག་ལེན་པ་ཡིན་ཏེ་ཟེར་བས། རྗེ་བཙུན་ཆེན་པོས་དེ་བགོ་ཉན་པ་བྱས་པས་ཆོག་གསུང་ནས། ཐམས་ཅད་ལ་བགོ་བ་ལྟར་མཛད་པས། ཙག་ཕུག་པ་ལ་ཉ་བྱེ་ཚན་ལ་ཡར་བ་ལྟ་བུའི་ཟུག་གཟེར་ལངས་པ་དང་། ཁོ་འགྱོད་པ་ཆེན་པོ་སྐྱེས་ནས། རྗེ་བཙུན་ཆེན་པོ་ཐུགས་རྗེས་ཟུངས་ཤིག །ང་ལས་ངན་པོས་ཅི་ཡང་གི་ལས་ངན་བསགས་འདུག་ཟེར་ནས། རྗེ་བཙུན་གྱི་ཞབས་ལ་མགོ་བསྟུགས་ནས་ངུ་ཤིང་ཉ་བྱེ་ཚན་ལ་ཡར་བ་འདྲ་བའི་ངུ་འབོད་བྱས་པས། རྗེ་བཙུན་གྱི་ཞལ་
3-3-92b
ནས། ང་ནམ་མཁའ་སྟོང་པ་དང་འདྲ་བའི་རྣལ་འབྱོར་པ་ལ་དུག་གི་གནོད་པས་ག་ན་ཚུགས། དགེ་བཤེས་པ་རང་གིས་ཆོས་དང་འགལ་བའི་ལམ་ལོག་རྣམས་བྱེད་ཅིང་འདུག་པ། དེ་འདུལ་བའི་ཕྱིར་དུ་བྱས་པ་ཡིན་ནོ། །ད་ཁྱོད་རང་འགྱོད་སེམས་དྲག་པོ་སྐྱེས་པ་དེས། ལས་སྒྲིབ་མང་པོ་འདག་པ་ཡིན་ནོ། །ད་ཐམས་ཅད་རང་རང་གི་སར་བཞུད་ཅིག །ང་ཡང་ཆུ་དབར་དུ་ལུས་པོ་འདི་བཞག་ནས་འགྲོ་གསུངས་ནས། རྗེ་བཙུན་ཆེན་པོ་ཅང་རི་ར་འཁྲོལ་ཤིང་ནམ་མཁའ་ལ་འཕུར་ནས་ཆུ་དབར་སྤྲུལ་སྐུའི་ཕོ་བྲང་དུ་གཤེགས་པ་དང་། བུ་སློབ་རྣམས་དང་ཆུ་དབར་དུ་ཕྱིན་ལ། མཁན་པོ་ཙག་ཕུག་པ་ཡང་། འཁོར་གཡོག་རྣམས་ཀྱིས་ཁུར་ནས། ངུ་འབོད་བྱེད་ཅིང་ཆུ་དབར་དུ་ཡོངས་ནས་ཡོད་པ་དང་། དགེ་བཤེས་ཙག་ཕུག་པས། བླ་མ་རྗེ་བཙུན་གྱི་རྒྱལ་པོ་མིད་ལ་རས་ཆེན་ལ་དུག་དྲངས་ནས་ཡོད་པར་འདུག་ཟེར་བའི་གཏམ་ངན་ཆེན་པོས། རྒྱལ་ཁམས་ཁྱབ་པ་བྱུང་བས། ཐམས་ཅད་དཔལ་ཧེ་རུ་ཀའི་ཕོ་བྲང་བྲིན་སྨན་ལུང་ཆུ་དབར་སྤྲུལ་སྐུའི་དབེན་གནས་སུ་འཚོགས་པ་དང་། དགེ་བཤེས་ཙག་ཕུག་བློ་གྲོས་དབང་ཕྱུག་ཁོང་ངོ་ཚ་ནས་ལྕེབ་རྩིས་བྱས་པས། རྗེ་བཙུན་ཆོས་ཀྱི་སྐུ་ལ་སྙུང་
3-3-93a
བ་མི་མངའ་བར་མགུར་བཞེས་པ། ཡོང་ན་བོ་ཅོག་ནི་མི་འཆི་སྟེ། །ཤི་བོ་ཅོག་ནི་ན་ནས་འཆི། །བོད་ཀྱི་མི་ལ་རས་པ་ང་། །ད་རེས་ཀྱི་ནད་འདིས་འཆི་འཆི་འདྲ། །ང་ལ་ཕོ་གདོན་དུ་གསང་བ་འདུས་པ་གནོད། །མོ་གདོན་དུ་མ་ཧཱ་མ་ཡ་གནོད། །སྲི་གདོན་དུ་རྡོ་རྗེ་འཆང་ཆེན་གནོད། །རྒྱབ་རྟེན་དུ་བླ་མ་དཀོན་མཆོག་གནོད། །མགོ་བོ་དེ་ཚངས་པའི་གཞུང་ལམ་གས། །རོ་སྟོད་དེ་སྟོང་ཉིད་ཀྱི་གཟེར་གྱིས་ཐེབས། །རོ་སྨད་དེ་ཕྱག་ཆེན་སྲན་གྱིས་གང་། །སྲོག་རྩོལ་དེ་ཨ་ཐུང་མེ་རུ་འབར། །ང་ད་རེས་ཀྱི་ནད་དེས་འཆི་འཆི་འདྲ། །གསུངས་པ་དང་། ཡར་ཚེས་བཅུ་དང་བཅུ་གཉིས་ལ་བུ་སློབ་དང་ཡོན་བདག་རྣམས་འཚོགས་ནས། སྐུའི་རིམ་འགྲོ་ཅིག་བྱེད་པར་ཞུ་ཞུས་པས། རྗེ་བཙུན་གྱི་ཞལ་ནས། མིད་ལ་སྤྲང་པོ་ལ་རིམ་འགྲོ་དགོས་པ་ཅི་ཡང་མེད་ཀྱང་། ཁྱེད་རང་རྣམས་འཚོགས་རྫོགས་པ་ཡིན་གསུང་ནས་བཀའ་གནང་ངོ་། །དེ་ནས་དགེ་བཤེས་ཙག་ཕུག་པ་གདོང་མཆི་མས་གཡོགས་ནས། འདི་སྐད་ཞུས་པར་འདུག་སྟེ། རྗེ་བཙུན་ཆེན་པོ་ལགས། ད་ངས་ཅི་འདྲ་བྱས་ན་ངན་སོང་ནས་ཐར་པ་འདྲ་སྲིད་དམ་ཞུས་པས། མིད་ལ་རྣལ་འབྱོར་གྱི་དབང་ཕྱུག་ཁོང་གིས། 
3-3-93b
མགུར་གསུངས་པ། ཡོང་སྐྱེས་ཕོ་རབ་རྣམས་ཀྱིས་ཆོས་བྱེད་དགོས། །སྐྱེས་ཕོ་རབ་ཀྱིས་ཆོས་བྱེད་མ་ཤེས་ན། །སེང་ཆེན་གང་ལ་འགྱིང་བ་འདྲ། །ཉམས་རྩལ་ཆེ་ཡང་དགོས་རྒྱུ་ཆུང་། །སྐྱེས་ཕོ་འབྲིང་རྣམས་ལ་ཆོས་བྱེད་དགོས། །སྐྱེས་ཕོ་འབྲིང་གི་ཆོས་བྱེད་པ་མ་ཤེས་ན། །ཀླག་གིས་ཚང་རྩི་སོགས་དང་འདྲ། །བཙན་ཕྱུག་འཛོམ་ཡང་དགོས་རྒྱུ་ཆུང་། །སྐྱེས་ཕོ་ཐ་རྣམས་ཀྱིས་ཆོས་བྱེད་དགོས། །སྐྱེས་ཕོ་ཐ་རྣམས་ཀྱིས་ཆོས་བྱེད་མ་ཤེས་ན། །སྤྱང་ཁུས་རི་སྟོང་འགྲིམ་པ་འདྲ། །སྡིག་སྡུས་བསགས་ཀྱང་དགོས་རྒྱུ་ཆུང་། །ཟ་མ་མོ་རབ་རྣམས་ཀྱིས་ཆོས་བྱེད་དགོས། །མོ་རབ་ཀྱིས་ཆོས་བྱེད་མ་ཤེས་ན། །རྨ་བྱ་མདོངས་ལ་ལྟས་པ་འདྲ། །ཁ་དོག་ལེགས་ཀྱང་དགོས་རྒྱུ་ཆུང་། །ཟ་མ་མོ་འབྲིང་རྣམས་ལ་ཆོས་བྱེད་དགོས། །མོ་འབྲིང་གིས་ཆོས་བྱེད་མ་ཤེས་ན། །སྦྲང་མས་སྦྲང་རྩི་བསགས་པ་འདྲ། །བསི་སོགས་མཁས་ཀྱང་དགོས་རྒྱུ་ཆུང་། །ཟ་མ་མོ་ཐ་རྣམས་ཀྱིས་ཆོས་བྱེད་དགོས། །མོ་ཐ་ཡིས་ཆོས་བྱེད་མ་ཤེས་ན། །ཁྱི་མོ་ཚང་མའི་ལུས་ངན་འདྲ། །ཁྲུད་ཕྱིར་ལས་ངན་བསགས་ཡང་(ཀྱང་)དགོས་རྒྱུ་ཆུང་། །ལར་རང་རེ་ཤི་བདུད་ཀྱིས་ཟིན་ཙ་ན། །བཙན་པོས་ངར་སྐད་བྱེད་ས་མེད། །ཁ་ཞན་གྱིས་ལྐོག་ཉལ་བྱེད་ས་མེད། །ཕྱུག་པོས་ནོར་གྱིས་བསླུ་ས་མེད། །དབུལ་པོས་མེད་ཁ་
3-3-94a
གདར་ས་མེད། །དཔའ་བོས་རལ་ཁ་འགྱེད་ས་མེད། །བསྡར་མས་ཝ་བྲོས་བྱེད་ས་མེད། །མཛངས་མས་གཏམ་གྱི་བཤད་ས་མེད། །གྱད་པས་ཤེད་ཀྱིས་འཇུག་ས་མེད། །བཟོ་ཅོས་གྲ་སྲུབས་བྱེད་ས་མེད། །མགར་བས་ལྕགས་མཁར་རྩིག་ས་མེད། །འཚོ་བྱེད་སྨན་གྱིས་གསོ་ས་མེད། །བན་བོན་གྱི་རིམ་འགྲོ་བྱེད་ས་མེད། །སྣང་ལོག་བར་དོའི་འཇིགས་འཁྲང་དེར། །དུས་གསུམ་གྱི་རྒྱལ་བས་ཀྱང་སྐྱབས་དཀའ་བས། །དེ་བས་དམ་པའི་ལྷ་ཆོས་མཛད་དོ། །ཅེས་(ཞེས་)གསུངས་སོ། །དེའི་སྔ་མོའི་དུས་ཅིག་ན། རྗེ་བཙུན་གྱི་ཞལ་ནས། རི་བོན་པོ་གཉན་གྱི་རྩེ་མོ་དེར། །རང་རེ་བྱ་བ་བཏང་བའི་མི་དགུ་ཡོད། །བུ་སྐྱིད་དུ་ཚོར་རམ་རས་ཆུང་རྣམས། །ཕ་ང་ནི་ཉམས་དགའ་ཤེས་པ་བདེ། །བུ་ཞི་བ་འོད་དང་ཞི་བདེ་བ་སྐྱོང་། །ཚུར་ཤོག་ཕ་ཡི་རམ་བུ་ཐེག །བོད་ཀྱི་མི་ལ་རས་པ་ངས། །རི་བོ་གདུང་མོ་གཞིབས་འདྲ་མཐོང་། །ཉི་ཟླ་ཆ་ལང་སྡེབས་འདྲ་མཐོང་། །ཅེས་(ཞེས་)གསུངས་པ་ནི། བླ་མ་རྗེ་བཙུན་གྱི་རྒྱལ་པོ་མིད་ལ་རས་ཆེན་གྱིས་ས་དང་པོ་རབ་དགའི་སྔ་ལྟས་གཟིགས་པར་འདུག་གོ། །དེ་ནས་ཉི་མ་ཕྱེད་དང་གསུམ་སོང་བ་དང་། དཔལ་ལྡན་བཞད་པ་རྡོ་རྗེའི་ཞལ་ནས། ང་ལ་ན་བ་མེད་པས་ཐམས་ཅད་སོ་སོར་
3-3-94b
གྱེས་གསུངས་པས། གཞན་མ་རྣམས་སོང་ནས། མི་བཅུ་གཉིས་དྲུང་ན་བསྡད་པ་ནི། སེ་བན་རས་པ་དང་། ཞི་བ་འོད་དང་། ཁྱི་ར་རས་པ་དང་། གླན་རས་དང་། བཤེན་རས་དང་། ངམ་རྫོང་རས་པ་དང་། འབྲི་སྒོམ་རས་པ་དང་། རས་ཆུང་རྡོ་རྗེ་གྲགས་ནི་དབུས་ན་བཞུགས་པ་ཞག་དགའ་མ་སླེབ་ལ། ཡོན་བདག་སྡིང་མ་བ་འབར་བ་སེང་གེ་དང་། ཆམ་པོ་ཆེ་བ་དཀོན་མཆོག་འབར་དང་། ཡོན་བདག་མོ་ལེགས་གསལ་འབུམ་མེ་དང་། ཡོན་བདག་མོ་རྒྱལ་མོ་སྐྱིད་དང་། དགེ་བཤེས་ཙག་ཕུག་པས་རྗེ་བཙུན་གྱི་ཞབས་ལ་མགོ་བརྟུགས་ནས་ཕྱིར་ལང་མ་ཉན་པ་དང་། མི་བཅུ་གཉིས་ན་ཡོད་པ་ལ། དེ་ནས་ཡར་ཚེས་གསུམ་གྱི་ཉིན་པར་ནི། མིད་ལ་རྣལ་འབྱོར་གྱི་དབང་ཕྱུག་དཔལ་ལྡན་བཞད་པའི་རྡོ་རྗེས། སྐད་ཅིག་ཡུད་ཙམ་ལ། བཅོམ་ལྡན་འདས་རྡོ་རྗེ་སེམས་དཔར་དངོས་སུ་གྱུར་ནས། དགེ་བཤེས་ཙག་ཕུག་པ་ལ་བུམ་དབང་བསྐུར་ནས་རྒྱུད་ངན་པའི་སྒྲིབ་པ་དག་པར་མཛད་ཅིང་། ཡང་སྐད་ཅིག་ཡུད་ཙམ་ལ། ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དངོས་སུ་གྱུར་ནས། ཉན་ཐོས་ཀྱི་འདུལ་ཁྲིམས་ཕོག་པར་མཛད། ཡང་སྐད་ཅིག་ཡུད་ཙམ་ལ་བདེ་དགྱེས་གསང་གསུམ་ལ་སོགས་པའི་ཡི་དམ་གྱི་ལྷ་ཚོགས་
3-3-95a
བསམ་གྱིས་མི་ཁྱབ་པར་སྤྲུལ་ནས། ཙག་ཕུག་པ་ལ་དབང་བྱིན་བརླབས་དང་བཅས་པ་གནང་བ་ཡིན་ཏེ། དེ་དག་ཡང་ཅིག་ཏུ་ན། རྐྱེན་དྲག་པོ་དགེ་བའི་བསྐུལ་མ་ཡིན་ཅིང་། བྱ་བ་ངན་པ་ལ་འགྱོད་པའི་སེམས་དྲག་པོ་སྐྱེས་པ་དེ། སྡིག་པ་འདག་མྱུར་བ་ཡིན་ཏེ། ཆོས་ཀྱི་རྒྱལ་པོ་མ་སྐྱེས་དགྲ་ལྟ་བུ་ཡིན་ལ། བྱ་བ་ངན་པ་རྣམས་ལ་འགྱོད་སེམས་མེད་ལ་སླར་ལ་རྙོག་པ་བཞིན་བྱེད་པ་ནི། དཔེར་ན་མི་དགེ་བའི་སྟོན་པ་ལྷ་སྦྱིན་ལྟ་བུ་ཡིན་ལ། ད་ལྟ་ཡང་དེ་བཞིན་བྱེད་པ་མང་རབ་ཡོད་དོ། །དེ་ནས་ཉི་མ་དགོངས་མོར་སོང་བ་དང་། རྗེ་བཙུན་ཆེན་པོ་ནི་སྐུའི་བཀོད་པ་སྣ་ཚོགས་མཛད་ཅིང་འདུག་པ་དང་། ངམ་རྫོང་རས་པ་ལ་སོགས་པ་རྣམས་ཀྱིས། རྗེ་བཙུན་ཆེན་པོ་ལ་འདས་གྲོང་མི་མངའ་ན་ཡང་། ད་ལྟ་རྫུ་འཕྲུལ་སྣ་ཚོགས་མཛད་པ་དེ་ལ་ལྟས་ན་གཞན་དོན་ལ་གཤེགས་བཞེད་པ་ཡིན་ནམ་བསམ་པ་ལགས་པས་གལ་ཏེ་འདས་གྲོང་བྱུང་ན། ངེད་རྣམས་ཀྱིས་རྗེས་ཀྱི་བྱ་བ་ཅི་འདྲ་བྱེད་ལགས་ཞུས་པས། རྗེ་བཙུན་ཞལ་ནས། འོ་ཁྱེད་དགེ་བཤེས་ཙག་ཕུག་པས། དེ་རེས་ཀྱི་མིག་ལོང་བ་དེས་མི་ཆོག་པར། ནམ་ཞག་གཏན་གྱི་ལོང་བ་ཅིག་དོ་ཟླ་བྱས་པ་ཡིན་ཏེ། ད་རེས་ང་མིད་ལ་སྤྲང་པོ་དང་འཕྲད་པས་
3-3-95b
འཚེངས་པ་ལགས་སོ། །ལར་རང་རེ་ཤི་བའི་ལམ་རོགས་ལ་ཆོས་མིན་པ་གཞན་གང་གིས་ཀྱང་མི་ཕན་ལ། ཆོས་རང་ཡང་རྒྱ་ཤེས་པ་ལས་ཀྱང་གཅིག་གྲུབ་པ་དགའ་བ་ཡིན་པས། ཐམས་ཅད་ཀྱིས་སྒོམ་ཅིག །ང་མིད་ལ་སྤྲང་པོ་ནང་པར་འཆི་བ་ཅིག་ཀྱང་དོ་རེ་ཡང་སྒོམ་བྱེད་པ་འདི་ཡིན་ནོ། །སྐལ་ལྡན་ཀུན་རེ་རེ་ལ་ཐམས་ཅད་ཀྱིས་བསྒོམ་ཅིག་གསུང་ནས། མགུར་འདི་སྐད་གསུངས་སོ། །ལར་བཙན་ཕྱུག་འཛོམས་པའི་ཕོ་རྒོད་ཙོ། །འཆི་ཁར་འགྱོད་པ་མང་པོ་མཐོང་། །རང་རེ་འཆི་བའི་དུས་ལ་བབ་པ་ན། །ལོ་བརྒྱ་ཐུབ་པའི་ནོར་ཡོད་ཀྱང་། །འཆི་བའི་ནང་པར་ལག་སྟོང་འགྲོ། །ལོ་བརྒྱ་ཐུབ་པའི་ཟས་ཡོད་ཀྱང་། །ཤི་བའི་ནང་པར་ལྟོག་པར་འགྲོ། །ལོ་བརྒྱ་ཐུབ་པའི་གོས་ཡོད་ཀྱང་། །ཤི་བའི་ནང་པར་གཅེར་བུར་འགྲོ། །ལོ་བརྒྱ་ཐུབ་པའི་རྟ་ཡོད་ཀྱང་། །ཤི་བའི་ནང་པར་རྐང་ཐང་འགྲོ། །ལོ་བརྒྱ་འགྲོགས་པའི་གཉེན་ཡོད་ཀྱང་། །ཤི་བའི་ནང་པར་གཅིག་པུར་འགྲོ། །གསུང་ཞིང་སྐུ་ལུས་ཀྱི་བཀོད་པ་སྣ་ཚོགས་སྟོན་ཅིང་འདུག་པ་དང་། ཡང་རས་ཆུང་རྣམས་ཀྱིས། རྗེ་བཙུན་ཆེན་པོ་ལ་འདས་གྲོང་མི་མངའ་ན་ཡང་། གལ་ཏེ་འགྲོངས་པ་འདྲ་བྱུང་ན་སྤུར་གང་དུ་སྦྱང་། རྗེས་ཀྱི་གཤེགས་རྫོང་ཇི་འདྲ་བྱེད་ལགས་ཞུས་པས། ཕ་མིད་ལ་
3-3-96a
རས་ཆེན་གྱི་མགུར་གསུངས་པ། ཡོང་ཆུ་དབར་སྤྲུལ་སྐུའི་དབེན་གནས་སུ། །བོད་ཀྱི་མིད་ལ་རས་པ་ཁོ། །མི་ང་ཤི་བའི་དུས་ན་འདི་བཞིན་གྱིས། །མ་སྲུ་བུ་སྲིང་མ་ལགས་པས། །གྲགས་སྟོང་བརྗོད་བྲལ་ངུ་དབྱངས་གྱིས། །ཐག་རུལ་འབྲེང་རུལ་མ་ལགས་པ། །རྩ་ཨ་ཝ་དྷུ་ཏིས་རོ་ཚུར་ཁྱིགས། །ཕ་ཅིག་སྲིད་སྡེ་མ་ལགས་པ། །དཔའ་བོ་མཁའ་འགྲོས་རོ་ཡང་ཁུར། །ཕ་མེས་ཀྱི་དུར་ས་མ་ལགས་པ། །རྡོ་རྗེ་འཆང་གི་དུར་སར་སྐྱོལ། །བུ་ཚ་སྣབས་བཤལ་མ་ལགས་པ། །བསྒྲུབ་(སྒྲུབ་)རྒྱུད་ཆུ་བོའི་གཞུང་དང་སྙོམས། །ཤིང་ནག་འགལ་དུམ་མ་ལགས་པ། །འོད་གསལ་ཞུན་མེས་རོ་ཡང་བསྲེགས། །ཁྱེངས་གྲགས་སྟོན་འགྱེད་མ་ལགས་པ། །སྐུ་གསུམ་འབྲལ་མེད་དགའ་སྟོན་གྱིས། །རས་བྲིས་ལུགས་སྐུ་མ་ལགས་པ། །འཁོར་གཞི་རྩད་གཅོད་ཀྱི་སྐུ་གདུང་ཐོབ། །གསུང་། ཡང་རས་ཆུང་རྣམས་ཀྱིས་རྗེ་བཙུན་ཆེན་པོ་ལགས། འདི་ནས་གཤེགས་ནས་གང་དུ་སྐུ་འཁྲུངས་ལགས། ངེས་ཚོ་གསོལ་བ་གང་དུ་འདེབས་ལགས་ཞུས་པས། མི་ལ་རས་ཆེན་གྱིས་མགུར་གསུངས་པ། ཡོང་ཆུ་དབར་དཔལ་གྱི་དབེན་གནས་སུ། །བོད་ཀྱི་རྣལ་འབྱོར་རས་པ་ངས། །རི་བོ་མདུང་མོ་གཤིབས་འདྲ་མཐོང་། །ཉི་ཟླ་ཆབ་ལོང་གཏོར་འདྲ་
3-3-96b
མཐོང་། །རིགས་ལྔ་བྱ་འཕུར་ཆོས་ཉིད་རླུང་། །འཁོར་ལོ་སྒྱུར་རྒྱལ་རིན་ཆེན་འཛིན། །ང་ལ་ཞིང་ཁམས་ངེས་པ་ཅན་མེད་པས། །ཁྱེད་རང་རྣམས་གང་མོས་སར་གསོལ་བ་ཐོབ་གསུང་། ཡང་རས་ཆུང་རྣམས་ཀྱིས། རྗེ་བཙུན་ཆེན་པོ་ལ་སྐུ་ཉེ་ནི་མེད་པས། ཇོ་མོ་འོར་མོ་དང་། སྔགས་རྡོར་མོ་ལ་སྐད་རེ་བཏང་ལགས་སམ་ཞུས་པས། ཕ་མི་ལ་རས་ཆེན་གྱི་ཞལ་ནས། ང་ལ་གཉེན་དང་ཡུལ་ཕྱོགས་དགོས་པ་ཅི་ཡང་མེད་དོ། །ལར་རང་རེ་ཤི་བའི་དུས་ན་ཆོས་མིན་པ་གང་གིས་ཀྱང་མི་ཕན་པས། ངའི་འདི་ལ་ཉོན་གསུང་ནས་མགུར་བཞེས་པ། རང་རེ་ཤི་བའི་དུས་སུ་གྱུར་པ་ན། །རང་དང་འདྲ་བའི་ཕ་མས་ཀྱང་། །སྔ་དྲོ་ངུ་འབོད་གཡེར་མཁན་བྱེད། །དགོང་མོ་སྙིང་ཁུ་སྐྱོགས་རྒན་འཐུང་། །རང་དང་འདྲ་བའི་སྤུན་ཟླས་ཀྱང་། །སྔ་དྲོ་ངུ་འབོད་གཡེར་མཁན་བྱེད། །དགོང་མོ་ནོར་ལ་ཞེ་སྒོམ་བྱེད། །རང་དང་འདྲ་བའི་ཆུང་མས་ཀྱང་། །སྔ་དྲོ་ངུ་འབོད་གཡེར་ངན་བྱེད། །དགོང་མོ་སེམས་ཀྱི་གཏད་རོགས་ཚོལ། །རང་དང་འདྲ་བའི་བུ་ཚས་ཀྱང་། །སྔ་དྲོ་ངུ་འབོད་གཡེར་ངན་བྱེད། །དགོང་མོ་ཁང་བུ་ཁང་རྩེད་བྱེད། །མིད་ལ་སྤྲང་པོ་ལ་གཉེན་ཚན་མེད་པ་དེ་ལེགས་པ་ཡིན་གསུངས་སོ། །དེ་ནས་ཡར་ཚེས་བཅུ་གསུམ་གྱི་ཉི་མ་ལ་རྒལ་ལ་ཁད་
3-3-97a
པ་དང་། རྗེ་བཙུན་དཔལ་ལྡན་བཞད་པའི་རྡོ་རྗེའི་ཞལ་ནས། འོ་ཐམས་ཅད་ཀྱིས་བསྒོམས་ཅིག །ང་ནང་པར་སྔ་དྲོ་འཆི་བས་ཀྱང་། དོ་རེ་ཡང་སྒོམ་བྱེད་པ་ཡིན་ནོ། །གསུངས་ནས། ཉུང་རྟོག་གི་ཀོང་བུ་ཆེན་པོ་ཅིག་མཛད་ཏེ་(དེ)། དེའི་ནང་དུ་སྣང་གསལ་ལྟམ་ནས། དབུའི་ཐོག་ན་བཞག་སྟེ། སྐུ་ལུས་རྡོ་རྗེ་སྐྱིལ་དཀྲུང་ལ་བཞུགས་ཅིང་། གསེར་གྱི་དོང་རྩེ་རྩེགས་པ་ལྟར་མཛད་ལ། སྐུའི་བརྗིད་ནི་རྣམ་པར་སྣང་མཛད་གངས་ཆེན་མཚོ་དང་ཐ་དད་མི་མངའ་ལ། ཞལ་གྱི་དཀྱིལ་འཁོར་ནི། ཉ་རྒྱས་གྱི་ཟླ་བ་ལ་སྤྲིན་ཚོགས་གཡའ་དང་བྲལ་བ་ལྟར་དུ་འོད་མདངས་ཟེར་དང་བཅས་པར་བཞུགས་ལ། གཡོ་མེད་རྒྱ་མཚོ་ལ་ཕ་འོང་སྐྱུར་བ་ལྟར་དུ་དགོངས་པ་ལ་བཞུགས་སོ། །དྲུང་ན་ཡོད་པའི་མི་བཅུ་གཉིས་པོ་དེས་མར་ངོས་ན་ཡར་ལྟས་པས། བླ་མའི་སྐུ་ཆོས་དྲུག་རྡོ་རྗེའི་ཏིང་ངེ་འཛིན་ལ་བཞུགས་ནས་གཡོ་འགུལ་མི་མངའ་ཞིང་། ནམ་སྐྱ་སལ་ལངས་པ་དང་། དབུ་ཐོག་གི་སྣང་གསལ་དེ་ཡང་། ཇེ་གསལ་ཇེ་གསལ་ལ་སོང་ནས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཁྱབ་པར་གསལ་བ་བྱུང་བ་དང་། བླ་མ་རྗེ་བཙུན་རས་ཆེན་ཡང་། ཐུགས་དམ་ལ་བཞེངས་ནས། ཤངས་གཉིས་ནས་རླུང་
3-3-97b
སི་རི་རི་མཛད་ཏེ་(དེ)། འོ་ཐམས་ཅད་ཀྱིས་སྒོམས་ཅིག །ང་ད་ནང་འཆི་བ་ཅིག་གིས་ཡང་མདང་ཡང་སྒོམ་བྱས་པ་ཡིན་གསུང་ཙ་ན། དབུ་ཐོག་གི་སྣང་གསལ་དེ་ནམ་མཁའ་ལ་དཔག་ཆེན་གྱི་མདས་ཀྱང་མགྱོགས་པར་ཡར་ནས་སོང་བ་དང་། མིད་ལ་རྣལ་འབྱོར་གྱི་ཞལ་ནས། རྗེ་མར་པ་བྱོན་ཡོད་དོ། །མཎྜལ་ཕུལ་གསུང་ནས། ཡོངས་ཆུ་དབར་དཔལ་གྱི་ཕོ་བྲང་ན། །ང་མི་ལ་རས་པ་ན་སོ་རྒས། །ཐ་མལ་གཟུགས་ཀྱི་ཕུང་པོ་འདི། །གཡར་པོ་ཡིན་གྱིས་གང་དགར་ཞོག །འཁོར་ལོ་སྒྱུར་རྒྱལ་རིན་ཆེན་འཛིན། །རིགས་ལྔ་བྱ་འཕུར་ཆོས་ཉིད་རླུང་། །བུ་བཛྲ་ཀཱིར་ཏི་ལ་དེ་སྐད་བཟློས། །ང་རིག་པ་ཆོས་ཀྱི་དབྱིངས་སུ་འཕོ། །ཤེས་རྒྱུད་ཚངས་པའི་ལམ་ནས་འདོན། །གསུང་ཙ་ན། སྤྱི་གཙུག་ཡར་ལ་འོད་ཆང་རྫ་ཙམ་ཅིག་ཐོན་ནས། ནམ་མཁའ་ན་ཡར་སོང་བ་དང་། བྱའི་ལོ་རྟ་པ་ཟླ་བའི་ཡར་ཚེས་བཅུ་བཞིའི་ཉི་མ་རི་རྩེ་ལ་སེར་ལྷག་ཤར་བ་དང་། དུས་ཁ་མཉམ་པ་ལ། བླ་མ་རྗེ་བཙུན་མིད་ལ་རྣལ་འབྱོར་དབང་ཕྱུག་དཔལ་ལྡན་བཞད་པའི་རྡོ་རྗེ་མཚན་ཡོངས་སུ་གྲགས་པའི་མི་ལ་རས་ཆེན་དེ་ཆོས་ཀྱི་དབྱིངས་སུ་གཤེགས་སོ། །དགུང་ལོ་བརྒྱད་བཅུ་རྩ་བཞི་པ་ཡིན་ནོ། །དེ་ནས་པུར་གང་སྦྱང་ལ་བྲིན་པ་དང་། སྙ་ནམ་པ་མ་འཚེ་ནས། 
3-3-98a
གཙོ་བོ་རྣམས་གྲོས་བྱས་ཏེ། ཞག་གསུམ་གྱི་ཉིན་མོ་བྲིན་དང་། ལ་ཕྱི་གཉིས་ཀྱི་བར་དུ་སྦྱང་བར་བྱས་ནས། སོ་སོར་གྱེས་པ་ལ། བྲིན་པས་ལམ་ནས་ཚུར་ལོག་ནས། པུར་བྲིན་དུ་གདན་དྲངས་ནས་སོང་བ་དེ། སྙ་ནམ་པས་ཚོར་དེ་དམག་སོགས་ཆེན་པོ་བྱས་ནས་འཁྲུག་པ་ཆེན་པོ་ཡོང་བར་འདུག་པ་ལ། རྗེ་བཙུན་གྱི་སྐུ་གསུམ་དུ་སྤྲུལ་ཏེ། ཅིག་ནི་ཡུལ་ཉི་ཤུ་རྩ་བཞིའི་སྣ་བ་གཡོན་པ། འབྲོག་ལ་ཕྱི་གངས་ཀྱི་ར་བར་གདན་དྲངས་ནས། བདུད་བརྟུགས་དཔལ་གྱི་ཕུག་མོ་ཆེའི་ཁྱུང་རང་བྱོན་གྱི་གཤོག་པ་གཡོན་པའི་འོག རུས་སྦལ་གྱི་ཁོག་པའི་མདུན། ཕ་འོང་ཁྱུང་སྒོང་གི་སྟེང་དུ་སྦྱངས་ལ། གཅིག་ནི་བྲིན་སྡིང་མ་ན་གདན་དྲངས་ནས། གར་སྦྱང་གི་ཁ་ཚོན་མ་ཆོད་པ་ལ། ཀླུ་བདུད་ནག་པོ་མཐོང་བ་དུག་ཅན་གྱི་མགོ་ཐོག་ན། བུ་ཆུང་གླེན་པ་ལོ་བརྒྱད་པ་ཅིག་གིས་འདིར་སྦྱོངས་ཟེར་བའི་མཛུ་གུ་བཙུགས་པས། དེར་སྦྱངས་ལ་བུ་ཆུང་དེ་ཡང་དེ་ནས་རང་ལ་མཁའ་སྤྱོད་ལ་སོང་གདའོ། །གཅིག་དཔལ་ཧེ་རུ་ཀའི་ཕོ་བྲང་སྨན་ལུང་ཆུ་དབར་གྱི་ཡང་དབེན་འབྲི་ལྕེ་སྐྱིད་ཕུག་དུ་(ཏུ་)སྦྱངས་ལ། པུར་གསུམ་ག་ལ་མེ་དུས་གཅིག་ཕུལ་བས། བྲིན་སྡིང་མ་བར་ཁང་དུ་སྦྱངས་པ་དེ་ལ་མེ་མཆེད་མ་འདོད་
3-3-98b
པས། རྗེ་བཙུན་རང་གི་གསུང་བར་སྣང་ལ་སྒྲ་བྱུང་ནས། སྣང་བ་དག་པ་རྣམས་ཀྱིས་ཕ་ཚད་ནས་གསོལ་བ་ཐོབ་པ་དང་གསུངས་ནས། དེ་ལྟར་བྱས་པས་མེ་རང་འབར་ལ་སོང་ནས་འཇའ་ཚོན་དང་། བཀྲ་ཤིས་གཡུ་དྲུང་འཁྱིལ་བ་དང་། དེ་ལ་སོགས་པའི་མེ་སྟག་འཕྲོས་པ་ནི་མཆོད་པར་མེ་སྒྲ་ནི་རོལ་མོའི་སྒྲ་ལྡན་དུ་བྱུང་། ལྷའི་བུ་དང་བུ་མོ་དང་། དཔའ་བོ་དང་མཁའ་འགྲོ་མ་རྣམས་མངོན་སུམ་དུ་བྱུང་ནས། གདུང་བསྡུས་ནས་སོང་བ་དང་། མཁའ་འགྲོ་མ་རྣམས་ན་རེ། ཡིད་བཞིན་ནོར་བུ་གཤེགས་དུས་སུ། །ལ་ལ་བརྒྱལ་ཏེ་ལ་ལ་དག །ངུ་ཞིང་མྱ་ངན་བྱེད་དུས་སུ། །རང་བྱུང་མེ་ནི་འབར་གྱུར་ནས། །དུ་བ་འཇའ་ཚོན་ལྟར་འཁྱིལ་ཅིང་། །གདུགས་དང་རྒྱལ་མཚན་བ་དན་དང་། །བཀྲ་ཤིས་དཔལ་བེ་གཡུ་དྲུང་འཁྱིལ། །མེའི་སྒྲ་རྣམས་ཆ་ལང་སྒྲ། །གླིང་བུ་པི་ཝང་ཏིང་ཏིང་ཤག །ཅང་ཏེའུ་སྒྲ་དང་ཌཱ་མ་རུའི་སྒྲ་འཁྲོལ་ཞིང་། །མེ་སྟག་སྐར་མདའ་ལྟར་འཁྲིགས་པས། །ཕྱི་ནང་གསང་བའི་མཆོད་པ་བྱེད། །ཡིད་འོང་མཁའ་འགྲོ་དུ་མ་ཡིས། །པུར་སྦྱངས་གདུང་ནི་ཁྱེར་རྣམས་ནས། །བླ་མ་ཆོས་སྐུའི་ནམ་མཁའ་ལས། །ལོངས་སྐུ་སྨོན་ལམ་སྤྲིན་གཏིབས་ཏེ། །སྤྲུལ་སྐུའི་འཕྲིན་ལས་ཆར་རྒྱུན་གྱིས། །གདུལ་བྱའི་ལོ་
3-3-99a
ཏོག་སྨིན་པར་བྱེད། །གང་ལ་སྐྱེ་བ་མེད་པ་ཡིས། །ཆོས་ནི་སྐྱེ་མེད་སྟོང་པ་ཉིད། །སྟོང་ཉིད་སྐྱེ་འགག་དང་བྲལ་བ། །ཐེ་ཚོམ་ཡིད་གཉིས་ཅི་བྱར་ཡོད། །ཅེས་པའི་སྒྲ་དོན་དང་བཅས་པ་བྱུང་སྟེ། ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པའོ། །དེ་ལྟར་ན་ཕྱིས་རྗེ་བཙུན་ཆེན་པོ་ལ་འདས་པའི་ཚུལ་ཡོད་པར་འདོད་པ་དང་། འདས་པའི་ཚུལ་མེད་པར་མཐོང་བའི་བྱེ་བྲག་དེ་ལྟར་བྱུང་བའི་སྣང་བ་བྱུང་སྟེ། དེ་ལྟར་བླ་མ་མཁའ་སྤྱོད་ལ་གཤེགས་ནས། སྤྱོད་པ་སྣ་ཚོགས་མཛད་ཅིང་རྫུ་འཕྲུལ་མང་པོ་བསྟན་པས། ལ་ལས་ནི་བླ་མ་སེང་གེ་ལ་ཆིབས་ནས་མཁའ་འགྲོ་མ་དུ་མ་དང་བཅས་ནས་བཞུད་པར་མཐོང་བ་རྣམས་ནི་དབང་པོ་རབ་ཀྱི་དག་སྣང་ཡིན་ནོ། །ལ་ལས་ནི་བླ་མ་འདས་ཚུལ་བསྟན་ནས་མཁའ་འགྲོ་མ་དཔག་ཏུ་མེད་པ་བྱོན་ནས། ཕྱི་ནང་གསང་བའི་མཆོད་པ་དཔག་མེད་བཤམས་ནས། གདུང་བཞུས་པས་བཀྲ་ཤིས་པའི་རྟགས་རོལ་མོ་དང་། འཇའ་ཚོན་གྱི་འོད་དང་། གདུགས་དང་རྒྱལ་མཚན་ལ་སོགས་པའི་མཆོད་པའི་བྱེ་བྲག་དཔག་ཏུ་མེད་པ་རྣམས་བྱུང་སྟེ། གདུང་རུས་རྣམས་ཐམས་ཅད་ནི་རིང་བསྲེལ་གྱི་ཕུང་པོར་གྱུར་པ་ནི། ནམ་མཁའ་ལ་མཁའ་འགྲོ་མས་གདན་དྲངས་པར་མཐོང་ངོ་། །
3-3-99b
དེ་ལྟར་བླ་མ་ཆོས་སྐུ་མངོན་དུ་གྱུར་ཅིང་། ལོངས་སྤྱོད་རྫོགས་པའི་སྐུ་ཤུགས་ལ་ཤར་ནས། སྤྲུལ་པའི་སྐུ་སྣ་ཚོགས་པས་ཕྱོགས་བཅུར་ཁྱབ་པས། འགྲོ་བ་འདྲེན་པའི་འཕྲིན་ལས་སྣ་ཚོགས་མཛད་པའོ། །ཨ་ལ་ལ་སྐུ་གསུམ་ལྷུན་གྱིས་གྲུབ་པའི་བླ་མ་མིད་ལ་རས་པའི་གོ་འཕང་སེམས་ཅན་ཐམས་ཅད་ཀྱིས་ཐོབ་པར་གྱུར་ཅིག །བླ་མ་མིད་ལ་རས་པ་རང་གི་ཞལ་ནས་གསུངས་ངེས་པ་དང་། བུ་ཆེན་རས་ཆུང་རྡོ་རྗེ་གྲགས་པ་ལ་སོགས་པ་རྣམས་ཀྱི་གསུང་སྒྲོས་ཁྱད་པར་ཅན་རྣམས་འཕྲ་ཞིབ་ཏུ་མཐོང་བ་དང་། སྤྱིར་ཡང་ཞི་བྱེད་རི་ཁྲོད་པ་བདག་གིས། བོད་གངས་ཅན་ཁྲོད་ན་འགྱུར་ཚད་ཀྱི་བཀའ་མདོ་རྒྱུད་དང་། ལུང་མན་ངག་རྣམས་ཕལ་ཆེར་མཐོང་ཞིང་། ཐོས་པ་དང་ཁྱད་པར་དུ་ཞི་བྱེད་ནི་ས་སྟེང་དུ་འགྱུར་ཚད་དང་། རྗེ་བླ་མ་འཁོན་ས་སྐྱ་བའི་ཆོས་སྐོར་རྣམས་ཡོངས་སུ་རྫོགས་པ་དང་། སྐྱེས་མཆོག་མར་པ་ལོ་ཙྪ་བའི་གདམས་ངག་རྣམས་ཡོངས་སུ་རྫོགས་པ་དང་། དེ་ལ་སོགས་པའི་བཀའ་བརྒྱུད་རྣམས་ལ་ཕྱོགས་རིས་མེད་པར་གསོལ་བ་འདེབས་པ་ནི། ཤཱཀྱའི་དགེ་སློང་ཞི་བྱེད་རི་ཁྲོད་པ་བདག་གི་ལས་སྐལ་ཡིན་པ་དང་། ཁྱད་པར་དུ་བླ་མ་མིད་ལ་རས་པ་འདིའི་
3-3-100a
བཀའ་སྲོལ་གྱི་བརྒྱུད་པ་ཇི་ལྟ་བ་བཞིན་དུ་འཛིན་པ་ནི། ཁོ་བོ་རང་ཙམ་མང་པོ་ཡང་མི་འདུག་གོ། །ཆོས་པ་དྲག་ཏུ་རེ་བ་རྣམས་ཀྱིས་ཡང་རྒྱུག་ཐུགས་ཙམ་ན་ངོ་སྲུང་སེམས་འཛིན་རེ་བྱེད་པར་འདུག་ལ། དགོན་ཆུང་རེར་ཤི་ཉལ་རྟག་ཚམས་རེ་བྱས་ནས་སྟོད་པར་འདུག་སྟེ། དོན་ལ་སྙིང་རུལ་བ་རང་ཡིན་ལ། ཕ་མིད་ལ་རས་ཆེན་གྱི་བརྒྱུད་པ་བཙོན་པ་ཡིན་ནོ། །དོན་ཏིག་པ་ལ་རྗེ་མིད་ལའི་རས་ཆེན་གྱི་རྣམ་ཐར་བཞིན་བྱས་ན། བཀའ་མདོ་རྒྱུད་དང་ཡང་དེ་མཐུན་པ་ཡིན་ནོ། །སྤྱིར་ཡང་རྒྱ་དཀར་ནག་བོད་གསུམ་ན་འགྱུར་ཚད་ཀྱི་བཀའ་མདོ་རྒྱུད་དང་། ལུང་མན་ངག་རྣམས་ཕལ་ཆེར་ཁོ་བོས་མཐོང་ཞིང་ཐོས་པ་དང་། རང་གི་ཉམས་ལེན་གྱི་མཐིལ་ལ་ལམ་འབྲས་དང་ཞི་བྱེད་དང་། རྗེ་ཁ་རག་སྒོམ་ཆུང་བའི་ཕྱག་ལེན་དང་། སྐྱེས་མཆོག་ལྷོ་བྲག་པའི་གདམ་བསྐོར་རྣམས་ཡོངས་སུ་རྫོགས་པར་ཐོབ་ཅིང་། དབང་ཕྱུག་མིད་ལ་རས་ཆེན་གྱི་རྣམ་ཐར་ཡི་གེར་བཀོད་པ་རང་ཡང་། བརྒྱ་དང་ཉི་ཤུ་རྩ་བདུན་ཙམ་མཐོང་ཤིང་། རྟོགས་པར་བྱ་བའི་དོན་གྱིས་ན། ཤཱཀྱའི་དགེ་སློང་གཡུང་སྟོན་ཞི་བྱེད་རི་ཁྲོད་པ་ངའི་ལས་སྐལ་ནི། ཚེ་འདི་བློས་བཏང་ནས་མི་ཚེ་རི་ཁྲོད་ལ་སྐྱལ་བ་དེ་རང་ཡིན་པས་ན། གང་ཟག་
3-3-100b
ཚེ་འདི་དོན་དུ་གཉེར་བ་རྣམས་དང་། ངའི་བློ་སྣ་རྩ་བ་ནས་མཐུན་པ་རང་མེད་དོ། །བླ་མ་རྗེ་བཙུན་ཆེན་པོའི་རྣམ་ཐར་འདི་ལ། འདི་ལས་རྒྱས་པ་ཅིག་བྱེད་བསམ་པ་ཡིན་ནའང་། ཡི་གེ་མང་བས་འཇིགས་ནས་འདི་ཙམ་ལ་བཞག་པ་ཡིན་ནོ། །འདི་ནི་ད་ལྟའི་ལོ་དྲངས་མང་རབ་ཀྱི་གོང་ནས། ཆོས་རྗེ་རིན་པོ་ཆེ་དཔལ་ལྡན་གླང་འཁོར་བའི་དྲུང་ནས་ཀྱང་ཞལ་ཏ་གནང་བ་དང་། འཕགས་པ་སྤྱན་རས་གཟིགས་ཀྱི་སྤྲུལ་སྐུ་ས་བརྗེ་ལ་ཤིང་གི་མཁན་ཆེན་དབང་ཕྱུག་ཤེས་རབ་པའི་དྲུང་ནས་ཀྱང་ཞལ་ལྟ་ཡང་ཡང་བྱོན་པ་དང་། བླ་མ་མཁས་བཙུན་བཟང་གསུམ་དང་ལྡན་པའི་ཁྱད་པར་ཡང་སྙན་རྒྱུད་ཀྱི་དོན་ལ་སྦྱངས་པའི་གཟི་བརྗིད་རྒྱལ་མཚན་པའི་གསུང་གིས་ཀྱང་ཡང་ཡང་དུ་བསྐུལ་བ་དང་། བླ་མ་རི་ཁྲོད་ཀྱི་དབང་ཕྱུག་སྐྱེས་མཆོག་ཆེན་པོ་མ་ཎི་པའི་དྲུང་ནས་ཀྱང་། ཞལ་ཏ་ཡང་ཡང་བྱོན་པ་དང་། གཞན་ཡང་གནས་གསུམ་གྱི་རི་པ་རྣམས་ཀྱི་ཡང་བསྐུལ་བ་དང་། ཁྱད་པར་དུ་ཡང་ཏི་ཤྲི་ཆེན་པོ་རིན་ཆེན་གྲགས་པ་དང་། གོ་ཤྲི་ཆོས་བློའི་དབོན་པོ་སྤྲུལ་པའི་སྐུ་བླ་མ་ཀུན་དགའ་རྒྱལ་མཚན་དཔལ་བཟང་པོ་དེས། འཇིག་རྟེན་བློས་བཏང་ནས་གནས་ཆེན་དང་རི་ཁྲོད་འགྲིམས་ནས་གངས་ཏི་སེ་ནས་མར་བྱོན་ནས་འབྲོག་ལ་ཕྱི་ན་ཚུར་ལ་བྱོན་ཏེ། 
3-3-101a
རྒྱ་ནག་རི་བོ་རྩེ་ལྔ་ལ་བཞུད་པ་ཡིན་གསུངས་ནས་དཔལ་དིང་རི་གླང་འཁོར་དུ་ཁོར་གི་ཕྱག་གིས་ངའི་ལག་པ་ལ་བཟུང་ནས། བླ་མ་རྗེ་བཙུན་མིད་ལ་རས་ཆེན་གྱི་རྣམ་ཐར་ལོ་རྒྱུས་ལ། ཁྱེད་ལས་རྒྱུས་ཆེ་བ་ནི་གངས་ཏི་སི་མན་ཆད། རྒྱ་ནག་རི་བོ་རྩེ་ལྔ་ཡན་ཆད་ན་མི་འདུག་པས། འདི་ལ་ཡིག་ཆ་རྣམ་ཐར་རྒྱས་པ་ཅིག་ཁྱེད་ཤེས་གསུང་ནན་ཆེར་མཛད་པ་དང་། ཡང་དུས་ཕྱིས་དབུས་ནས་ཀྱང་བླ་མ་དམ་པ་ཆོས་རྗེ་བསོད་ནམས་རྒྱལ་མཚན་དཔལ་བཟང་པོའི་ཞབས་རྗེས་གཅིག་དང་། བླ་མ་ཀུན་རྒྱལ་བ་དང་རང་གི་གསུང་ཤོག་ཅིག་དང་། དགེ་སློང་བྱང་སྐྱབས་འཕགས་པ་ཤིང་ཀུན་གྱི་ཆུས་འཁོར་འབུལ་དུ་ཡོང་བ་ལ་བསྐུར་བྱུང་ནས་དེ་དུས་ཀྱང་གསུང་ནན་ཆེན་པོ་མཛད་འདུག་པ་དང་། དཔལ་ཧེ་རུ་ཀའི་ཕོ་བྲང་སྨན་ལུང་ཆུ་དབར་གྱི་གདན་ས་ལ། བླ་མ་རི་ཁྲོད་དབང་ཕྱུག་བྱང་སེམས་སངས་རྒྱས་དཔལ་གྱིས་ཡང་དོ་རམ་ཆེར་མཛད་པ་དང་། སློབ་དཔོན་ཏི་སི་ཏུ་བྱང་རྒྱལ་བས་ཀྱང་གསུང་ཤོག་རྟེན་དང་བཅས་པ་ཐེབས་གསུམ་བསྐུར་བྱུང་བ་དང་། གཞན་ཡང་མང་རབ་ཀྱི་(ཀྱིས་)བསྐུལ་ཅིང་། ལར་ཡང་རྗེ་བཙུན་མིད་ལ་རས་ཆེན་འདིའི་སྐུ་དྲིན་དྲན་ནས། རྣམ་ཐར་འདི་བྱས་པ་ཡིན་ཅིང་། སྤྱིར་མིད་ལ་རས་ཆེན་གྱི་རྣམ་
3-3-101b
ཐར་ལ་མཛད་པ་མི་གཅིག་པ་བརྒྱ་དང་ཉི་ཤུ་རྩ་བདུན་ཙམ་མཐོང་བ་དང་། ཁྱད་པར་དུ་རྗེ་ཁྱུང་ཚང་བ་ཛྙཱ་ན་གུ་རུ་དང་། ལྔ་རིག་ཤེས་བྱའི་གནས་ལ་མ་རྨོངས་པ། ཆོས་རྗེ་ཞང་ལོ་ཙྪ་བ་གྲུབ་པ་དཔལ་བཟང་པོ་དང་། དེ་རྣམས་ཀྱི་གསུང་སྒྲོས་ལ་གཞི་བླངས་ནས་བྱས་པ་ལགས་ཅིང་(ཤིང་)། ཚིག་ལ་གོང་འོག་ནོར་བ་འདྲ་བ་དང་། འདྲ་མིན་དུམ་རེ་སྣང་སྟེ། གྲུབ་ཐོབ་ཀྱི་སྤྱོད་ཡུལ་ལ་ངེས་པ་མེད་པ་ལགས་པས། ད་མན་ཆད་རྟོག་གེ་པས་མ་བཅོས་ཅིག །བྱིན་རླབས་ཉམས་པ་ཡིན་ནོ། །གོང་མ་རྣམས་ཀྱི་གསུང་སྒྲོས་མ་ཡིན་པའི་སྙན་ངག་དང་སྡེབ་ཚིག་ནི་བྱིན་རླབས་ཉམས་དོགས་མ་བྱས་པ་ཡིན་ནོ། །རྗེ་བཙུན་ཆེན་པོ་གྲོངས་པ་ནི་དཔལ་སྨན་ལུང་ཆུ་དབར་གྱི་ཡང་དབེན་འབྲི་ལྕེ་སྐྱིད་ཕུག་གི་གཡོན་ཟུར། ཀླུའི་རྒྱལ་པོ་དུང་སྒྲའི་སྣ་(རྣ་)བ་གཡོན་པའི་སྟེང་གི་རྡོ་བའི་ཆོས་ཁྲི་དཀར་ཆུང་ལ་སྐུ་རྒྱབ་གཏད་ནས་གྲོངས་པ་ཡིན་ལ། པུར་གསུམ་བཞག་པའི་གཅིག་དེ་ཧེ་རུ་ཀའི་ཕོ་བྲང་འབྲི་ལྕེ་ཕུག་གི་མདུན་དེར་སྦྱངས་པ་ཡིན་ལ། པུར་སྦྱངས་པ་གསུམ་ག་ན། གདུང་རུས་ནི་བྱོན་རྒྱུ་མ་བྱུང་ལ། གསུམ་ཁ་ན་རིན་པོ་ཆེ་ཁ་དོག་སྣ་ལྔ་ལས་གྲུབ་པའི། གདུང་ཤ་རི་རམ་ལ་སོགས་པ་འདུས་པ་བྱ་མ་གསར་གྱི་སྒོ་ང་ཙམ་གསུམ་བྱོན་པ་ནི། ཡུམ་སྤྲུལ་པའི་
3-3-102a
དཔའ་མོ་བཀྲ་ཤིས་ཚོའི་དབང་ཕྱུག་མས་འཇའ་ལམ་ལ་གདན་དྲངས་ནས། གངས་ཟུར་གསུམ་དུང་གི་གཞལ་ཡས་ཀྱི་ཁྱུང་མགོ་ཤེལ་གྱི་ཟུར་ཕུད་ན་བཞུགས་པའོ། །འབྲོག་ལ་ཕྱི་ན་སྦྱངས་པ་དེ་ལ་དབུ་སྐྲ་དུམ་ཅིག་དང་ཡིག་དྲུག་བྱོན་པ་ཡིན་ཟེར། སྡིང་མ་བར་ཁང་ན་སྦྱངས་པ་དེ་ལ་དུང་གི་འཁོར་ལོ་རྩིབས་ལྔ་པ་གཅིག །ལ་སྟོད་བྱང་པ་བཙུན་མ་ཅིག་གིས་རྙེད་དམ་ཟེར། ཆུ་དབར་ཡང་དབེན་ན་སྦྱངས་པ་དེ་ལ། རྡོ་བ་ལ་ཨོཾ་ཨཱཿཧཱུྃ་བྱོན་པ་ནི་ད་ལྟ་ཡང་གནས་ཆེན་ཆུ་དབར་དཔལ་གྱི་ཕོ་བྲང་ན་བཞུགས་སོ། །གདུང་ཐལ་ཆ་བཞི་རུ་བགོས་ནས། ཆ་གཅིག་ལ་སྐུ་འདྲ་ཆུང་སེ་བ་ཅིག་བཞེངས་ནས། ལ་ཕྱི་གནས་ནང་དུ་བཞུགས་པ་ཡིན་སྟེ(ཏེ)། ལ་ཕྱི་རླན་ཆེས་པས་སྙ་ནམ་བཀྲ་ཤིས་སྒང་ན་གདན་དྲངས་ནས་བཞུགས་པ་དེ་ཡིན་ལ། ཆ་ཅིག་ལ་སྐུ་འདྲ་ཅིག་བཞེངས་ནས། དཔལ་ཧེ་རུ་ཀའི་ཕོ་བྲང་སྨན་ལུང་ཆུ་དབར་ན་བཞུགས་ཅིང་། ཆུ་དབར་གྱི་གསེར་འབུམ་དེ་ནི། དཔལ་ཕག་མོ་གྲུབ་པ་རྡོ་རྗེ་རྒྱལ་པོས་ཞལ་ཆེམས་བཞག་ནས། བླ་མ་སྐྱུ་ར་རིན་པོ་ཆེ་འབྲི་གུང་པ་རིན་ཆེན་དཔལ་གྱི་བཞེངས་པ་ཡིན་ཟེར། འབྲི་གུང་པ་རང་ནི་བྱོན་པ་མེན། རི་པ་རྣམས་ལ་ཆ་རྐྱེན་བསྐུར་ནས་ཞལ་ཏ་མཛད་པ་ཡིན་ནོ། །ཆ་ཅིག་ལ་དགེ་བཤེས་
3-3-102b
ཙག་ཕུག་པས་གཞི་ལེན་བྱས་ནས། ཡོན་བདག་རྣམས་ཀྱིས་སྡིང་མ་བར་ཁང་གི་ལྷ་ཁང་དེ་བཞེངས་པ་ཡིན་གསུངས། དགེ་བཤེས་ཙག་ཕུག་པ་རང་གི་སྡིག་གཤགས་ལ་སྐུ་འབུམ་ཆེན་མོ་གཅིག་བཞེངས་འདུག །དུམ་གནོན་འདུག་པ་ལ་བྲིན་པ་རྣམས་ཀྱིས་གསོས་འདུག །གདུང་ཐལ་ཆ་ཅིག་ནི་བུ་སློབ་རྣམས་ཀྱིས་གདན་དྲངས་ནས། རང་རང་གི་སར་རྟེན་རྣམས་བཞེངས་འདུག །རྗེ་བཙུན་རྟ་པ་ཟླ་བའི་ཡར་ཚེས་བཅུ་བཞིའི་ཉི་མ་རི་རྩེ་ལ་ལྷག་ཤར་བ་དང་གྲོངས་ཚུལ་བསྟན་པ་དང་། དུས་ཁད་མཉམ་པར། རས་ཆུང་རྡོ་རྗེ་གྲགས་པ་དབུས་ཀྱི་སྙལ་ལོ་རའི་མགོ་པ་ཚེ་སྤོང་གི་དགོན་པར་བཞུགས་པའི་སར། རྗེ་བཙུན་མིད་ལ་རས་པ་བྱོན་ནས། ཁོ་དེ་རས་ཆུང་པ་མིད་ལ་རས་པའི་གཟུགས་ཀྱི་ཕུང་པོ་ནི་བྲིན་སྨན་ལུང་ཆུ་དབར་ན་བཞག་ཡོད་དོ། །ང་རང་ཉལ་བའི་རྒྱབ་ཀྱི་བྲག་ཐེམ་དེར་མེ་ལྕགས་དེ་ཡོད་པས། དེ་ཁྱོད་རང་ལེན་དུ་སོང་གསུང་བ་དང་། དེར་རས་ཆུང་པ་ཐུགས་ཚུབ་རིལ་སོང་ནས། རླུང་བཟུང་ནས་ཕར་བྱོན་པས། ཟླ་ལམ་ཙམ་ཡོད་པ་ལ། ཞག་གསུམ་གྱི་སྔ་དྲོ་བྲིན་ཆུ་དབར་ན་སླེབ་ལ་ཁད་པའི་སར། ཡར་ཚེས་བཅུ་བདུན་ལ་པུར་སྦྱོང་དང་མཇལ་བ་ལ། དང་པོ་ཆོས་ཁྲི་དཀར་ཆུང་ན། རྗེ་བཙུན་བཞུགས་པ་
3-3-103a
དང་མཇལ་ནས་ཕྱག་འཚལ་བས། རྗེ་བཙུན་ནི་ཞལ་འཛུམ་མེ་མཛད་ནས་ང་ཡང་ཡོང་གིས་ཁྱོད་རང་ཨེན་མགྱོགས་པར་སོང་གསུང་པ་དང་། རས་ཆུང་པ་སྤྱན་ཆབ་ཐོན། སྐུ་བྲང་བརྡུངས། དབུ་སྐྲ་བལ། ཞལ་དུ་ས་གསོལ་ཤིང་མར་བྱོན་པ་དང་། བུ་སློབ་རྣམས་ཀྱིས་རས་ཆུང་པ་ལ་འཐབ་ཏུ་བྱུང་སྟེ། ཁྲིམས་མེད་དམ་མེད་པོ། ཁྱོད་ལ་བླ་མས་ཐུགས་ཅིགས་ཅི་ཙམ་ཅིག་མཛད་ན། ལར་ཡང་ཞབས་དྲུང་དུ་མི་སྡོད་པར། ཁ་སང་ཡང་སྔ་སེ་མི་ཡོང་ཤིང་། ད་ལྟའི་བར་ལ་མི་སླེབ་པ་ཟེར་ནས་ཡོང་མ་བཅུག་པས། རས་ཆུང་པས་ཕ་མི་མངོན་དབྱིངས་ནས་ཐུགས་རྗེས་གཟིགས། ཅེས་པའི་མགུར་དེ་ཕུལ་བས། གདུང་ཁང་གི་སྟེང་ན་མེ་ལྕེ་པདྨ་འདབ་བརྒྱད་དུ་གྱེས་པའི་སྟེང་ན། རྗེ་བཙུན་སྐུ་ཟིལ་པ་ཁྲོམ་མེ་བཞུགས་ནས་འདུག་པས། ཁྱེད་རྣམས་དེ་འདྲ་མ་བྱེད་མཆེད་གྲོགས་ལ་དམ་ཚིག་ཉམས་པ་ཡིན། ཁོ་ཐག་རིང་ནས་འོང་པ་ཐང་ཆད་ཁམས་འདུས་པ་དེ་ལ་སེམས་བསོས་བྱོན་སྐྱེམས་གྱིས་གསུངས་པ་དང་། དེ་ནས་རས་ཆུང་པ་བྱོན་ནས་གདུང་དབྱངས་རིང་མོ་ཕུལ་བས། མེ་ཏོག་གི་ཆར་པ་ཡང་བབས་སོ། །གཞན་ཡང་དྭགས་པོ་ལྷ་རྗེ་པ་དབུས་ན་བཞུགས་པའི་བླ་མའི་སྐུ་དྲིན་དྲན་ནས་ཡར་བྱོན་པས། ལམ་ཁ་
3-3-103b
ནས་གཏམ་ངན་གསན་པས། ད་རུང་ཐག་མ་ཆོད་ནས་ཡར་བྱོན་པས། ཡར་ལུང་མདའ་ནས་བདེན་པར་ཐག་ཆོད་པས། ཡུག་ཅིག་ཐུགས་དྲན་མེད་དུ་སོང་། དེ་ནས་རྒྱལ་བ་སང་པ་དང་། སྐུ་བྲང་བརྡུངས། དབུ་སྐྲ་བལ། ཞལ་དུ་ས་གསོལ་ནས་བཤུམས་ཤིང་བཞུགས་པས། ནམ་མཁའ་ལ་རྗེ་བཙུན་གྱི་གསུང་གཅིག་གྲག་ནས་ཡར་བལྟས་པས། རྗེ་བཙུན་སེང་གེ་ལ་ཆིབས་ནས་བར་སྣང་ལ་བཞུགས་འདུག་པས། བུ་སྟོན་པ་ཁོ་དེ། དེ་བཞིན་མ་བྱེད་དྲན་པས་བཟུང་གསུང་བ་དང་། དེར་སྤྱན་ཆབ་ནི་མ་ཐུབ་སྟེ། གསོལ་འདེབས་ཀྱི་གདུང་དབྱངས་འདི་ལྟར་ཕུལ། ན་མོ་རཏྣ་གུ་རུ་བྷྱཿ རྗེ་དུས་གསུམ་སངས་རྒྱས་ཐམས་ཅད་ཀྱི། །སྐུར་གྱུར་མཚན་ལྡན་རས་པའི་རྗེ། །ཕ་ནམ་མཁའི་དབྱིངས་སུ་གཤེགས་ཙམ་ན། །ཁྱུང་ཆེན་ལྟ་བུའི་རྣལ་འབྱོར་པ། །ཆུ་བོའི་གཏིང་དུ་གཤེགས་ཙ་ན། །ཉ་ཆེན་ལྟ་བུའི་རྣལ་འབྱོར་པ། །གངས་དཀར་གྱི་རྩེ་ལ་གཤེགས་ཙ་ན། །སེང་ཆེན་ལྟ་བུའི་རྣལ་འབྱོར་པ། །འགྲོ་དྲུག་གི་ནང་དུ་གཤེགས་ཙ་ན། །པདྨ་ལྟ་བུའི་རྣལ་འབྱོར་པ། །རྗེ་ཆོས་ཀྱི་དབྱིངས་སུ་གཤེགས་ཙ་ན། །སངས་རྒྱས་ལྟ་བུའི་རྣལ་འབྱོར་པ། །རྗེ་སྔར་ཡང་སྐུ་དྲིན་མི་ཆུང་ཆེ། །ད་རུང་དབང་བསྐུར་བྱིན་གྱིས་བརློབས། །ཅེས་(ཞེས་)གསུངས་ནས། ཡར་ལ་
3-3-104a
ཕྱི་ཆུ་དབར་དུ་བྱོན་རྩིས་མཛད་པས། རྗེ་བཙུན་གྱི་སྐུ་མི་མངོན་པར་གསུང་བར་སྣང་ལ་འདི་སྐད་བྱོན་ཏེ། ངའི་ཞྭ་དེ་ཁྱོད་ལ་སྐུར་བྱས་ཡོད། ད་ཡར་མ་འགྲོ་བར་ཕར་སོང་གསུང་པའི་སྒྲ་བྱོན་ནས། དེ་ནས་ཕར་ལོག་ནས་བྱོན་པ་ལ། ཕྱིས་རས་ཆུང་པའི་དྲུང་དུ་བྱོན་དུས་དབུ་ཞྭ་ཡང་གནང་ངོ་། །གཞན་ཡང་དེའི་དུས་སུ་ཕྱོགས་ཐམས་ཅད་ན་བུ་སློབ་དང་ཡོན་བདག་ལ་སོགས་པའི་རྒྱལ་ཁམས་ན། འགྲོ་བ་མི་དང་མི་མ་ཡིན་པའི་སེམས་ཅན་རྣམས་ལ་དག་སྣང་དང་བྱིན་རླབས་གནང་བ་ལ་ཚད་མེད་པའོ། །ཁྱད་པར་དུ་གདན་ས་དཔལ་གྱི་སྨན་ལུང་ཆུ་དབར་སྤྲུལ་སྐུའི་ཕོ་བྲང་དེ་ཡང་། བཀའ་བརྒྱུད་ཀྱི་བླ་མ་རྣམས་དང་། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ལུང་བསྟན་དུ་མ་ཐོབ་པ། ཆོས་ཀྱི་དབྱིངས་ཀྱི་ཕོ་བྲང་དང་ཁྱད་པར་མེད་པ་གཅིག་པུར་གཉིས་མེད་སྒོམ་པའི་ལྡུམ་ར་ལྟ་བུ། ནགས་ཚལ་དབེན་པའི་ཀུན་དགའ་ར་བ། ཀུན་ཏུ་བཟང་པོའི་ཚལ་རབ་ཆེན་པོ། དཔའ་བོ་དང་མཁའ་འགྲོ་མས་བསྔགས་པ་དུ་མ་བརྗོད་པའི་གྲུབ་གནས་རྟགས་ཅན། སྒོ་གསུམ་མི་དགེ་བའི་ཕྱོགས་མཐའ་དག་དང་བྲལ་བའི་ས་ཕྱོགས་དཀར་པོ་དགེ་བའི་བག་ཆགས་རྣམས་རང་བཞིན་གྱིས་འཐུག་པ། ཉོན་མོངས་པ་དུག་ལྔ་མ་སྤངས་
3-3-104b
པར། ཡེ་ཤེས་ལྔ་ལྷུན་གྱིས་གྲུབ་པ། རང་བྱུང་བྱང་ཆུབ་ཆེན་པོ་སྒྲུབ་པའི་འོད་ཁང་ཆེན་པོ། ལྷ་ཀླུ་གནོད་སྦྱིན་དྲི་ཟའི་ཚོགས་ཀྱི་བཀའ་སྡོད་བྱེད་པ། སྐྱེས་བུ་དམ་པ་རྣམས་ཀྱི་བསོད་ནམས་དཔག་མེད་ལས་གྲུབ་པ། སྨན་དང་རྩི་ཤིང་སྣ་ཚོགས་ཡིད་དུ་འོང་ཞིང་མཛེས་པ། གཙང་ཆབ་གཉིས་ཀྱི་སྒྲ་སྙན་ཡིད་དུ་འོང་བ། གངས་རི་མུ་ཏིག་གི་ཕྲེང་བས་བསྐོར་བ། ས་ལ་པདྨ་འདབ་བརྒྱད་ཀྱི་དབུས་སུ། ཆོས་འབྱུང་སྣོལ་མ་ཟུར་རྩེགས་སུ་བྲིས་པ། རྒུང་ལ་འཁོར་ལོ་རྩིབས་དགུའི་ཕྱི་རིམ་དུ། མི་(མེ་)རི་དང་རྡོ་རྗེའི་ར་བས་སྐོར་བ། རྒྱབ་རི་དུང་གི་ཟླ་མཚན་ཚེས་པ་འདྲ་བས་རིག་པའི་དངས་སྙིགས་ཕྱེད་ཅིང་། མ་རིག་པའི་མུན་པ་རང་བཞིན་གྱིས་སེལ་བ། མདུན་དུ་བོན་རི་མཆེད་གསུམ་སྒོ་གསུམ་གུས་པས་འདུད་པས་ངན་སོང་རྟོག་པས་གནོན་པ། གཡས་ན་གནས་སོ་དགེ་བསྙེན་རིན་ཆེན་བྱང་ཆུབ་སེང་གེའི་འགྱིང་ཚུལ་དུ་འདུག་པས། མཆོག་སྒྲུབ་པའི་བར་ཆད་བསལ་བ། འོག་ན་ཀླུའི་རྒྱལ་པོ་དུང་སྒྲའི་ཕོ་བྲང་ཡོད་པས། འདོད་པའི་ལོག་སྲེད་མེད་པ། ཡང་དབེན་འབྲི་ལྕེ་སྐྱེད་ཕུག་གི་འགྲམ་ན། ཀླུའི་རྒྱལ་པོ་དུང་སྒྲའི་རྣ་བ་གཡོན་པ་ཡོད་པས། སྒྲུབ་པ་པོ་ལ་ཕྱི་ནང་གི་བར་ཆད་མི་འབྱུང་བ། དོན་ལ་ཕྱག་རྒྱ་ཆེན་པོའི་
3-3-105a
སྒྲུབ་གནས་དེར། བླ་མ་རྗེ་བཙུན་ཆེན་པོ་མིད་ལ་རས་ཆེན་གྱིས་རྡོ་རྗེའི་གདན་དུ་བྱིན་གྱིས་བརླབས་པ་ཡིན་ལ། གཞན་ཡང་བླ་མ་མིད་ལ་རས་ཆེན་དཔལ་ལྡན་བཞད་པའི་རྡོ་རྗེ་དེས། རྒྱ་གར་ལྷོ་ཕྱོགས་དཔལ་གྱི་རི་བོ་དང་། བོད་དང་། ཤར། ཙོང་ཁ་དང་། རྨ་ཤོད་དང་། བལ་པོ་དང་། མོན་དང་། ཧོར་སེར་ལ་སོགས་ཀྱི་གནས་ཆེན་དང་། རི་ཁྲོད་དང་། བས་མཐའ་རྣམས་ལ་ཞབས་ཀྱིས་བཅགས་ནས། འགྲོ་བ་མཐའ་དག་ལ་སྐྱབས་འགྲོ་སེམས་བསྐྱེད་ནས། ཕྱག་རྒྱ་ཆེན་པོ་མཆོག་གི་དངོས་གྲུབ་གནང་བ་བྱིན་པ་ནི་ཚད་ལས་འདས་པའོ། །དེ་རྣམས་ཀྱིས་ནི་སྐུ་ཚེ་འདི་དང་། མྱ་ངན་ལས་འདས་པ་ཡན་ཆད་ཀྱི་མཛད་པ་དང་ཕྲིན་ལས་རྫོགས་པར་བཀོད་པ་ཡིན་ཅིང་། ད་ལྟ་ནི་འོག་མིན་ཆོས་ཀྱི་ཕོ་བྲང་ན། བྱང་ཆུབ་སེམས་དཔའ་དང་སེམས་དཔའ་ཆེན་པོ་ཀུན་དགའི་བློ་གྲོས་ཞེས་བྱ་བའི་མཚན་བཟུང་ནས་ཆོས་སྐུ་དྲི་བྲལ་རྟོགས་པ་དང་ལྡན་པར་དག་པ་ཡེ་ཤེས་ཀྱི་ས་ཐོབ་ནས། སངས་རྒྱས་བཅོམ་ལྡན་འདས་དྲུག་པ་རྡོ་རྗེ་འཆང་ཆེན་པོའི་དྲུང་དུ། དམ་པའི་ཆོས་གསན་ཅིང་བཞུགས་པ་ཉིད་ཡིན་ཏེ། དེ་ཡང་སྔོན་ལོངས་སྐུ་ལུས་མེད་མ་དང་། ཏེ་ལོ་པ་དང་། ན་རོ་པ་ལ་སོགས་པ་གོང་མ་རྣམས་ཀྱི་(ཀྱིས་)ལུང་བསྟན་དང་། རྗེ་བཙུན་ལྷོ་བྲག་མར་པ་པཎ་ཆེན་
3-3-105b
གྱི་ཞལ་བཞེས་དང་། རྗེ་བཙུན་ཆེན་པོ་མིད་ལ་རས་ཆེན་རང་གི་ཞལ་ནས་གསུང་ངག་ཁྱད་པར་འཕགས་པ་རྣམས་དང་། ཐུགས་ཀྱི་སྲས་མཆོག་རས་ཆུང་རྡོ་རྗེ་གྲགས་པ་ལ་སོགས་པའི་བུ་ཆེན་རྣམས་ཀྱིས་ཀྱང་གསུངས་ལ། ཁྱད་པར་དུ་རྗེ་ཁྱུང་ཚང་པ་ཛྙཱ་ན་གུ་རུ་དང་། ལྔ་རིག་ཤེས་བྱའི་གནས་ལ་མ་རྨོངས་པ། ཆོས་རྗེ་ཞང་ལོ་ཙྪ་བའི་གསུང་ལ་གསལ་བར་བཞུགས་ཅིང་(ཤིང་)། དཔལ་ཕག་མོ་གྲུབ་པ་རྡོ་རྗེ་རྒྱལ་པོའི་སྐྱེས་རབ་ལས་ཀྱང་གསལ་བར་བསྟན་པ་ཉིད་དོ། །ལོངས་སྐུ་སྤྲུལ་སྐུ་གཉིས་ཀྱི་སྐུ་ནི་བསམ་གྱིས་མི་ཁྱབ་ལ། ད་ལྟ་ཡང་ལོངས་སྐུ་ལུས་མེད་མཁའ་འགྲོའི་སྙན་རྒྱུད་ཡིད་བཞིན་ནོར་བུ་འཛིན་པའི་སྤྲུལ་སྐུ་རྣམས་དང་། ན་རོ་ཆོས་དྲུག་མགོ་རྩ་མ་ལོག་པར་འཛིན་པའི་གང་ཟག་དམ་པ་རྣམས་ནི། བླ་མ་མིད་ལ་རས་ཆེན་གྱི་སྤྲུལ་སྐུ་ལགས་སོ། །གཞན་ཡང་བླ་མ་མིད་ལ་རས་པའི་རྗེ་བཙུན་རང་ཞལ་བཞུགས་གོང་གི་བུ་ཆེན་གྲུབ་ཐོབ་ཆེན་པོ་ཕོ་མོ་ཉི་ཤུ་རྩ་ལྔ་ནི། དེ་ཡང་ཕོ་ཉི་ཤུ། མོ་ལྔ་ཡིན། ཐུགས་ཀྱི་སྲས་བཞི་ནི། ཁབ་གུང་ཐང་ར་བའི་གཉན་ཆུང་རས་པ་རྡོ་རྗེ་གྲགས་པ་དང་། ལྕིམ་ལུང་གི་ངམ་རྫོང་རས་པ་དང་། མདོ་བཀྲའི་སེ་པཎ་རས་པ་དང་། སྟ་མོ་གླིང་ཁའི་འབྲི་སྒོམ་རས་པ་དང་བཞི་ནི་ཐུགས་ཀྱི་སྲས་བཞི་ཡིན་ནོ། །ཉེ་བའི་སྲས་བརྒྱད་ནི། རས་
3-3-106a
ཆུང་ཞི་བ་འོད་དང་། རས་ཆུང་སངས་རྒྱས་སྐྱབས་དང་། རས་ཆུང་རྡོ་རྗེ་དབང་ཕྱུག་དང་། རས་ཆུང་ཙང་ཡུ་བ་དང་། རོང་ཆུང་རས་པ་དང་། གླན་སྒོམ་རས་ཆུང་དང་། བཤེན་སྒོམ་རས་ཆུང་དང་། མཁར་ཆུང་རས་པ་དང་། བརྒྱད་ཡིན་ནོ། །དམ་པ་རྒྱགས་ཆུང་བ་དང་། ལི་ཁོར་ཕྱག་རུ་བ་དང་། དྭགས་པོ་ལྷ་རྗེ་པ་དང་། སྐྱོ་སྟོན་ཤག་འགུ་དང་། འོ་ན་སྟོན་དགེ་འདུན་དང་། འདྲེ་བན་བཀྲ་ཤིས་དང་དྲུག་ནི། སྐུ་བགྲེས་ཁའི་སྲས་དྲུག་ཡིན་ལ། དེ་བཞིན་དུ་ཞལ་སློབ་རྣམས་དང་། གཞན་ཡང་མཁས་གྲུབ་དུ་མ་རྣམས་ཀྱི་གསུང་སྒྲོས་ནོར་བུ་རིན་པོ་ཆེའི་ཐུམ་བུའམ། ཟ་འོག་གི་རས་མའམ། མཁལ་མ་དང་སྙིང་གི་དུམ་བུ་འདྲ་བ། དོན་ལ་སྐྱུར་རྒྱུ་མེད་པ་རྣམས་ལ། ལོ་གྲངས་མང་རབ་ཀྱི་གོང་ནས། དགེ་སློང་གཡུང་སྟོན་ཞི་བྱེད་རི་ཁྲོད་པས། བརྟགས་གཞིག་ལེགས་པར་བྱས་པ་ནི། དཔེར་ན་མདའ་མཁན་གི་(གྱི་)མིག་གམ། ཁབ་མིག་དུ་(ཏུ་)སྐུད་པ་འཛུད་པ་བཞིན་ནམ། རི་ལ་བུག་པ་རྐོ་བའམ། ཤན་པ་ཚི་པ་འཁྲུད་པའམ། རྒྱ་རྩིས་པ་གབ་ཚེ་བཀྲམ་ནས་ཇུ་ཡག་རྩི་བ་བཞིན་བྱས་པ་ཡིན་པས། འདི་ལ་ཐེ་ཚོམ་ཟ་མི་དགོས་པར་ཡོད་པའམ། སྤྱིར་ཡང་རྒྱ་དཀར་ནག་བོད་གསུམ་དུ་འགྱུར་ཚད་
3-3-106b
ཀྱི་རྒྱལ་བའི་བཀའ་མདོ་རྒྱུད་ལུང་མན་ངག་གི་རིགས་ལ་ངས་མ་མཐོང་བ་དང་། མ་ཐོས་པ་ཙམ་མེད་ལ། བླ་མ་མིད་ལ་རས་ཆེན་གྱི་ཆོས་བསྐོར་ལ་གསུང་ཚིག་གཅིག་ཙམ་ཡང་མ་ལུས་པར་ཐོབ་ཅིང་། དེ་ཡང་ཐོག་མར་སྐྱེས་ནས་ཟླ་བ་བཅུ་གཅིག་ལོན་ཙ་ན། མ་སྐུ་དྲིན་ཅན་དེའི་དྲུང་ན་རྗེ་བཙུན་མིད་ལ་རས་ཆེན་གྱིས་མགུར་རྣམས་ཐོབ། དེ་ནས་ལོ་ངོ་གསུམ་པའི་དུས་ན་རིམ་པ་བཞིན་དུ་བླ་མ་རི་པ་དཀོན་རྒྱལ་བ་དང་། བླ་མ་རི་པ་པདྨ་དབང་པ་དང་། བླ་མ་རི་པ་བྱང་བསོད་པ་དང་། རིས་སད་ཡེ་བ་དང་། བླ་མ་ནམ་མཁའ་སྙིང་པོ་དང་། འགྲོ་བའི་མགོན་པོ་ཐུགས་རྗེ་ཡེ་ཤེས་པ་དང་། བླ་མ་ཆུ་རས་པ་དང་། ཆུ་དབོན་པ་དང་། ཧོར་དཀར་རེག་བཤེས་དང་། ལྷ་རྗེ་བདེ་བ་དང་། རི་པ་དབང་བཟང་དང་། བླ་མ་བདེ་མཆོག་དཔལ་དང་། བླ་མ་རྒྱལ་དགོན་པ་དང་། དགེ་བཤེས་སྟབས་དགོན་པ་དང་། བླ་མ་ནམ་མཁའ་རྡོ་རྗེ་དང་། གདན་ས་དཔལ་གྱི་ཤོ་དགོན་པ་དང་། དེའི་མཁན་པོ་པ་དང་། ལ་ས་མཁན་ཆེན་པ་དང་། དགེ་བཤེས་གུ་རུ་མདོ་པ་དང་། སྟག་ལུང་པའི་བླ་མ་འོད་བདེ་བ་དང་། བླ་མ་ཀམ་ཚང་རྒྱལ་བ་དཔལ་དང་། བླ་མ་རྒྱུ་ཤལ་བ་དང་། བླ་མ་ནམ་དགོད་པ་དང་། སྐུ་དྲིན་ཅན་དཔལ་སྒྲ་རས་ཆེན་དང་། སྐུ་དྲིན་ཅན་
3-3-107a
བླ་མ་གཅོད་པ་དང་། ཀརྨ་པའི་རི་པ་དགེ་འདུན་གཞོན་ནུ་དང་། དགེ་བཤེས་ཡེ་འབུམ་དང་། དགེ་བཤེས་ཤེར་བཟང་དང་། རྒུ་ལུང་དགེ་བཤེས་དང་། རས་པ་ཟང་རྒ་བ་དང་། བླ་མ་མགོ་སྟོན་འཇམ་པའི་དབྱངས་དང་། བླ་མ་ལྷ་སྟོང་རི་དབོན་པ་དང་། དེ་ལ་སོགས་པ་རྣམས་ཀྱི་དྲུང་དུ། རྗེ་བཙུན་མི་ལ་རས་ཆེན་གྱི་ཆོས་བསྐོར་དང་། རྣམ་ཐར་དང་། མགུར་འབུམ་རྣམས་ཞུས། ཀརྨ་དང་། ལྷ་སྡིང་དང་། བྲག་དཀར་དང་། སྒ་ལུང་དང་། སྤུང་རི་དང་། ཡུལ་ཕུག་དང་། རྟ་རྣ་དང་། འབྲི་ཁུང་དང་། འཚལ་གུང་ཐང་དང་། མཚུར་ཕུ་དང་། འུ་རི་དང་། དེ་རྣམས་ཀྱི་རིན་པོ་ཆེ་རྣམས་དང་། མཁན་སློབ་རི་དགེ་ལ་སོགས་དགེ་འདུན་དང་བཅས་པ་དང་གསུང་གླེང་ཞིབ་མོ་རང་བྱས་པ་ལགས་ཏེ། བདག་ཅག་རང་ཞིབ་པར་འདུག་ལ། རྗེ་མར་པ་ལོ་ཙྪ་བའི་ཆོས་སྐོར་ཕལ་ཆེ་བ་ནི། ཆོས་རྗེ་རིན་པོ་ཆེ་དཔལ་ལྡན་གླང་འཁོར་བ་སྐུ་མཆེད་ཀྱི་དྲུང་དུ་ཐོབ་པ་ཡིན་ལ། རྗེ་ལ་ཤིང་པ་མཁན་ཆེན་ཤ་རི་པྲཛྙཱའི་དྲུང་དུ་ཡང་མང་རབ་ཐོས་ལགས། རྗེ་ལ་སྟོད་པའི་དྲུང་དུ་ཡང་མང་རབ་ཐོས། རྗེ་རིན་པོ་ཆེ་ཟུར་ཁང་པའི་དྲུང་དུ་གདན་བཞིའི་འཕོ་བ་ཐོབ། བདེ་མཆོག་མཁའ་འགྲོ་སྙན་རྒྱུད་ཀྱི་ཉམས་ཁྲིད་དང་ཞིབ་རྒྱས་རྣམས་ཕལ་ཆེར་ནི། བླ་མ་
3-3-107b
རི་ཁྲོད་ཀྱི་དབང་ཕྱུག་སྐྱེས་མཆོག་མ་ཎི་བའི་དྲུང་དུ་ཐོབ་པ་ཡིན་ལགས། དེ་རྣམས་ཀྱི་ཐོབ་ཡིག་དང་། རྒྱུད་ཡིག་རྣམས་ཟུར་ན་གསལ། དོན་ལ་རྗེ་མར་པ་ལྷོ་བྲག་པཎ་ཆེན་གྱི་ཆོས་སྐོར་རྣམས་ལ་ཤཱཀྱའི་དགེ་སློང་གཡུང་སྟོན་ཞི་བྱེད་རི་ཁྲོད་པས། མ་ཐོབ་པ་རང་མེད་པ་འདྲ་ལགས། རྗེ་མར་པའི་སྐོར་ལ། སྙ་ནམ་འབྲུག་གི་བླ་མ་གཟི་བརྗིད་རྒྱལ་མཚན་པ་ལས་མཁས་པ་ནི་བོད་གངས་ཅན་ཁྲོད་ན་མི་འདུག་སྟེ། རྟེན་འབྲེལ་ཅིག་གི་གནད་ཀྱིས། ངས་ཞུ་བ་མ་བྱུང་ལགས། རྗེ་བཙུན་མིད་ལ་རས་ཆེན་རང་གི་རྣམ་ཐར་ལ། བླ་མ་མཁས་བཙུན་གཟི་བརྗིད་རྒྱལ་མཚན་པ་ལས་ཀྱང་། ང་རྒྱུས་ཆེ་ཆེ་ཙམ་འདུག་ལགས། དོན་ལ་རྗེ་མར་པའི་རྒྱུད་པ་འཛིན་ཚད་ལ་ག་དར་ལེགས་པར་བཅད་པ་ཡིན་ནོ། །སངས་རྒྱས་རྡོ་རྗེ་འཆང་ཆེན་དང་། ལོངས་སྐུ་ལུས་མེད་ཡེ་ཤེས་མཁའ་འགྲོ་མ་དང་། ཏེ་ལོ་པ་དང་། ནཱ་རོ་པ་དང་། མར་པ། མིད་ལ་རས་ཆེན་ཡབ་སྲས་ཀྱི་ཆོས་སྐོར་ལ་མོས་པ་རྣམས་ཀྱིས་མིད་ལའི་བརྒྱུད་པ་འཛིན་པ་སྐད་ཟེར་ནས། དོན་ལ་ཐུགས་ཙམ་ན་རྒྱབ་ལོགས་(ལོག་)མ་བྱེད་པར་འབད་པ་ཐོབ་པ་ཐོན་ཅིག །གནས་ངེས་མེད་དུ་འདུག་པས་ཡང་ཡང་སྤོས་ཅིག །(ཤིག)རང་དོན་ཡིན་ནོ། །ཆོས་དང་གང་ཟག་བརྒྱབ་ལོག་བྱེད་པ་མང་རབ་འདུག་གོ། །
3-3-108a
རེ་ཅིག་འཆི་ཁར་མི་འཚེར་བ་རེ་དགོས་སོ། །དེ་དོན་ཐམས་ཅད་ཧྲིལ་གྱིས་དྲིལ། འུབ་བསྡུས། བཅངས་བཅངས། བཙིར་བཙིར་ནས་ལག་ལེན་དུ་བྱེད་ན། སྤྱིར་བཀའ་མདོ་རྒྱུད་དང་ཡང་དེ་མཐུན་པ་དང་། དགོས་བླ་མ་མིད་ལ་རས་པའི་རྣམ་ཐར་ནི། ཆོས་དེ་རང་འཇིག་རྟེན་མ་འདྲེས་པར། དངུལ་ཆུའམ་རྒུན་འགྲུམ་གྱི་ཆང་བཞིན་དུ་ཁོ་རང་བཞིན་རྗེན་པ་རང་བཞིན་དུ་ཉམས་སུ་ལེན་དགོས་གསུང་པའོ། །དེ་བཞིན་དུ་ཡ་རབས་རྣམས་ཀྱི་ཐུགས་ལ་བཅངས་པར་ཞུ། དེ་ནི་བླ་མ་མིད་ལ་རས་པའི་རྣམ་ཐར་ལོ་རྒྱུས་འདི་མཐོང་ཞིང་ཐོས་པའི་དུས་ན་མཆི་མ་རང་དབང་མེད་པར་འབྱུང་བ་དང་། ལུས་ཀྱི་བ་སྤུ་གཡོ་བ་དང་། མི་རྟགས་(རྟག་)པ་བཙན་ཐབས་སུ་སྐྱེས་ན། བསྐལ་པ་སྟོང་གི་སྡིག་པ་དག་ཅིང་། མ་འོངས་པའི་དུས་ན་ཡང་། བླ་མ་མིད་ལ་རས་ཆེན་གྱི་ཐུགས་ཀྱི་སྲས་དམ་པར་འགྱུར་བ་ནི་གདོན་མི་ཟ་བ་ཡིན་ནོ། །དུས་ཀྱི་མཆོད་པ་བྱེད་ན། རྟ་པ་ཟླ་བའི་ཡར་ཚེས་བཅུ་བཞི་ལ་ཡིན་ནོ། །མངོན་རྟོགས་སྒོམ་པར་འདོད་ན། སྐུ་ལུས་གྲུ་བཞི་ལ། སྐུ་བོང་རིང་རྒྱུ་ཙམ་མེད་ལ། ཞལ་རས་ཁྱིལ་ལེ་བ་ལ་ཤངས་ལེབ་ལེ་བ། སྤྱན་ཀྱུས་ཕྲ་སེ་བ་ལ་སྤྱན་རྩ་དམར་ཆིལ་ལེ་བ། 
3-3-108b
དབུའི་སྐྲ་མཚམས་ཡར་ལ་ཞུར་བག་ཙམ་ཡོད་པ། ཚེམས་ཟུར་དུམ་སྔོ་རྩལ་དཀར་སེ་བ། ཞལ་གྱི་གཡས་གཡོན་སྟེང་ན་སྨེ་བ་སྲན་མ་ཕྱེད་ཙམ་ཡོད་པ། དབུ་སྐྲ་ར་ཙ་པ་ཁྲིན་བུངས་ས་ལེ་བ་ནག་ལ་སྨུག་པ། སྐུ་ཤ་སྔོ་སྨུག་ལ་དམར་བའི་མདངས་ཆགས་པ། འདི་སྣམས་(རྣམས་)གསུང་ལྷད་མེད་ཡིན་པས། དེ་མན་ཆད་ཡི་གེ་ལ་ཕྲི་བསྣན་ལ་སོགས་དང་། ཚུལ་མ་ཡིན་པའི་དཔེ་རྐུན་ནམ། བཀའ་ལུང་མེད་པར་ཇ་ཆོད་དང་གཟུ་ལུམས་སམ། མ་རབས་པ་བྱ་བ་བྱས་ན། དཔལ་མ་ཧཱ་ཀཱ་ལ་གྲི་གུག་ལྕམ་དྲལ་འཁོར་བཅས་ཀྱིས་སྙིང་ཁྲག་ཐོན་ཅིག །རང་བཞིན་ལྟ་བ་སུས་འདྲས་ཀྱང་སྐྱོན་མེད་ན་ཡང་བག་ཡོད་པར་བྱོས་ཤིག །ཆོས་འདིའི་བསྐོར་བདག་ནི་སྤྲུལ་པའི་དཔའ་མོ་བཀྲ་ཤིས་ཚེ་རིང་མ་སྐུ་མཆེད་འཁོར་བཅས་ཡིན་ལ། བཀའ་སྡོད་ཕོ་ཉ་ལས་མཁན་ནི། རྩ་མཁར་སྒོང་གི་བྲག་སྦལ་བ་ཁ་གདངས་དང་། རྩའི་བྲག་དམར་དང་། ཤངས་ཀྱི་གཟའ་གདོང་དམར་ནག་དང་། ཡར་ལུང་སྐྱུར་པོ་གྲོང་གི་ཀླུ་བཙན་དང་། ལྷོ་བྲག་གི་ཆུ་མོན་ཁྲོད་དང་། གཞུང་རི་བོ་སྒང་གི་ལྷ་བཙན་དང་། བྲག་དཀར་གྱི་ལྷ་ཐོས་བཙན་དང་། འབྲོག་ལ་ཕྱིའི་རྒྱལ་པོ་ཐང་སྲིན་དང་། ཆུ་དབར་གྱི་གནས་པོ་རིན་ཆེན་བྱང་ཆུབ་དང་། ཀླུ་རྒྱལ་དུང་
3-3-109a
སྒྲ་དང་། དུར་ཁྲོད་ཀྱི་ཤ་ཟ་སྤུན་བདུན་དང་། ཆུ་མིག་དངུལ་འབུམ་གྱི་ཀླུ་མགོན་ཡ་མེད་དང་། སྟེང་ཤོད་ཀྱི་ཀླུ་དུང་སྲས་དང་། ཕ་ཝང་གྲོད་ཕུག་གི་ལྷ་རྒྱལ་བཙན་པོ་དང་། ལ་ཕྱི་ཆུ་བཟངས་མ་དང་། གངས་ཏེ་རྩེའི་ལྷ་བཙན་དཀར་པོ་ལ་སོགས་པའི་བཀའ་སྡོད་གཉན་པོ་རྣམས་ཡོད་པས། བག་ཡོད་པར་གྱིས་ཤིག །བཀའ་ལུང་ལེགས་པར་ཞུ་བ་གལ་ཆེའོ། །རས་ཆུང་སྙན་རྒྱུད་ཀྱི་ཁྲིད་དང་བཀའ་ལུང་ཐོབ་པ་ཡིན་ན། འདིའི་ཟུར་དུ་ལུང་མ་ཐོབ་ཀྱང་གཞན་ལ་ལུང་བྱས་པས་ཆོག་པ་ཡིན་ནོ། །དཔེ་ཆ་བཞེངས་ན་རིན་པོ་ཆེས་བཞེངས་དགོས་སོ། །སྒོམ་ཆེན་པ་བློས་བཏང་རི་ཁྲོད་འགྲིམ་པ་ཅིག་ཡིན་ན་ཤོག་སྐྱ་ལ་སྣག་ཚས་བྲིས་ན་ཡང་རུང་བས་འབྲི་བར་ཞུ། ལར་ཐམས་ཅད་ཀྱི་བླ་མ་མིད་ལ་རས་པའི་སྙིང་རུས་དང་། དཀའ་སྤྱད་ལ་སེམས་ལ་ཆོས་ཕྱིར་འབད་པ་ཐོན་ཅིག །བཀའ་བརྒྱུད་མ་ནོར་བ། བླ་མ་མ་ནོར་བ། གདམས་ངག་མ་ནོར་བ། སྒྲུབ་གནས་མ་ནོར་བ། ཉམས་ལེན་མ་ནོར་བ། འཕྲིན་ལས་མ་ནོར་བ། གདུལ་བྱ་མ་ནོར་བ། བསྔོ་བ་དང་སྨོན་ལམ་མ་ནོར་བ། འདི་རྣམས་གལ་ཆེ་བ་ཡིན་ནོ། །ལམ་ཚང་ལ་མ་ནོར་བ་ལྷུན་གྱིས་གྲུབ་པར་ཤོག །དེ་དག་གིས་ནི་སྙིང་རུས་དང་སྡུག་སྲན་ཅན་གྱི་
3-3-109b
ཡར་དེས་ཡར་རྩེར་གྱུར་པའི་བླ་མ་རིན་པོ་ཆེ་སྐྱེས་མཆོག་མི་ལ་རས་ཆེན་ཞེས་བྱ་བའི་དཔལ་ལྡན་བཞད་པའི་རྡོ་རྗེ་རྣལ་འབྱོར་གྱི་དབང་ཕྱུག་རྩོད་ཟླ་ཐམས་ཅད་དང་བྲལ་བ། སངས་རྒྱས་གཉིས་པ་ལྟ་བུའི་ལོ་རྒྱུས་རྣམ་པར་ཐར་པ། གསལ་བྱེད་ཉི་ཟླའི་འོད་ཟེར་གྱི་སྒྲོན་མེ་ཞེས་བྱ་བ་འདི་ནི། རྗེ་བཙུན་ཆེན་པོ་མྱ་ངན་ལས་འདས་ནས། ལོ་གྲངས་ཉིས་བརྒྱ་དང་དྲུག་བཅུ་རྩ་དགུ། ཆུ་མོ་གླང་གི་ལོ་འདིས་འགྲོ་བར་འདུག་ཅིང་། དེའི་དུས་ན་སྨོན་འཇུག་གཉིས་ཀྱི་སྦྱོར་བ་ཉེ་བར་བསྒྲུབས་པ་དང་ནི། སྤྱིར་བཀའ་དྲིན་ཅན་གྱི་བླ་མ་དང་། སློབ་དཔོན་ཉིས་བརྒྱ་དང་བདུན་བཅུའི་ཞབས་ཀྱི་པདྨོ་དྲི་མ་མེད་པ་ལ་གུས་བཏུགས་ནས། རྒྱ་དཀར་ནག་བོད་གསུམ་ན་ཡོངས་སུ་གྲགས་ཚད་ཀྱི་བཀའ་མདོ་རྒྱུད་དང་། ལུང་མན་ངག་ཕལ་ཆེར་མཐོང་ཞིང་ཐོས་ལ། ཁྱད་པར་དུ་ཡང་ཆོས་ཀྱི་རྗེ་རིན་པོ་ཆེ་དཔལ་ལྡན་གླང་འཁོར་བའི་ཐུགས་ལ་སྐྱེས་ནས། ལམ་དམ་པའི་ཆོས་ཡིན་པ་དང་། མ་ཡིན་པ་ཕྱེད་པར་ནུས་པའི་མིག་དང་ལྡན་པ། ཤཱཀྱའི་དགེ་སློང་གཡུང་སྟོན་ཞི་བྱེད་རི་ཁྲོད་པས། འཕགས་པ་སྤྱན་རས་གཟིགས་ཝ་ཏི་བཟང་པོའི་བཞུགས་གནས་མང་ཡུལ་སྐྱིད་གྲོང་གྲའི་རྩེ་མོ་ངང་པའི་རི་ཁྲོད་དུ། ཆུ་མོ་གླང་གི་ལོ་རྟ་པ་ཟླ་བའི་ཡར་ཚེས་
3-3-110a
བརྒྱད་ཀྱི་ཉིན་མོ་ནས། ཡི་གེར་བཀོད་པའི་དགེ་བས་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱིས་ནི། བག་ཆགས་དྲི་ཟའི་གྲོང་ཁྱེར་བཅོམ། །གཉིས་སྣང་མཚན་མ་རྣམ་པར་དག །སྐྱེ་མེད་འོད་གསལ་ཆེན་པོར་རྟོགས། །བླ་མ་མིད་ལ་རས་པའི་གོ་འཕང་ཐོབ་པར་གྱུར་ཅིག །སྐྱེ་རྒ་ན་འཆིའི་ཆུ་བོ་དེ། །མ་སྤངས་རང་རིག་རྣམ་པར་དག །ཡེ་ཤེས་དབང་ཕྱུག་ཅོད་པཎ་ཅན། །བླ་མ་མིད་ལ་རས་པའི་གོ་འཕང་ཐོབ་པར་གྱུར་ཅིག །དྲག་པོའི་འགལ་རྐྱེན་གསེར་འགྱུར་ཅིང་། །ཞེ་སྡང་ཆོས་དབྱིངས་འཇའ་ལྟར་ཡལ། །བསམ་གྱི་(གྱིས་)མི་ཁྱབ་སྤྲུལ་པའི་སྐུ། །བླ་མ་མིད་ལ་རས་པའི་གོ་འཕང་ཐོབ་པར་གྱུར་ཅིག །ལུས་སྲོག་ཡལ་དོར་ཆོས་ཕྱིར་དཀའ་བ་སྤྱད། །འཇིག་རྟེན་སྐྱོན་བྲལ་བླ་མའི་བཀའ་བཞིན་སྒྲུབས། །ཚེ་གཅིག་མངོན་པར་བྱང་ཆུབ་བརྙེས་པ་ཡི། །བླ་མ་མིད་ལ་རས་པའི་གོ་འཕང་ཐོབ་པར་གྱུར་ཅིག །རྟག་ཚམས་(མཚམས་)འཛིན་པའི་ཕྱོགས་རྣམས་དུག་ཅན་ཟས་ལྟར་སྤངས། །སྡོད་གནས་ངེས་མེད་འཇོལ་མོའི་རྣམ་ཐར་བཞིན། །གནས་ཆེན་བས་མཐར་སངས་རྒྱས་སེམས་ལ་རྙེད། །བླ་མ་མིད་ལ་རས་པའི་གོ་འཕང་ཐོབ་པར་གྱུར་ཅིག །མཐོང་དང་ཐོས་དང་
3-3-110b
དྲན་དང་རེག་པ་རྣམ་པ་རྣམས། །ཡུན་རིང་མི་ཐོགས་བདེ་ཆེན་ས་ལ་འགོད། །དཔལ་ལྡན་ཡིད་འོང་སྐྱེ་དགུའི་ཡུམ་གཅིག་ལྟར། །བླ་མ་མིད་ལ་རས་༴ །མཛད་མཆོག་རྨད་བྱུང་མཐར་ཕྱིན་དོན་དང་ལྡན། །སྣང་དང་མི་སྣང་སྲིད་པའི་དྲྭ་བ་རབ་ཏུ་འཇོམས། །སྐུ་དང་ཡེ་ཤེས་འདུ་འབྲལ་ཡོང་མི་མངའ། །བླ་མ་མིད་ལ་རས་༴ །གངས་རིའི་ཁྲོད་འདིར་སྐྱེས་མཆོག་འགའ་བྱོན་ཡང་། །དཀའ་ཐུབ་མཐར་ཕྱིན་ཡར་དཔེ་ཡོངས་ཀྱི་གནས། །དོན་ལྡན་རྒྱལ་སྲས་སྐྱེས་བུ་མཚུངས་པ་མེད། །བླ་མ་མིད་ལ་རས་༴ །སྡུག་བསྔལ་བའི་གདངས་རྣམས་འགག་མེད་པར། །ཐབས་དང་ཤེས་རབ་རྣམ་པར་དག་བྱེད་ཅིང་། །ཡོན་ཏན་རྒྱལ་བའི་དགོངས་པ་རབ་རྫོགས་པའི། །བླ་མ་མིད་ལ་རས་༴ །གང་ཞིག་བླ་མའི་བཀའ་ལས་མི་འདའ་ཞིང་། །ཞེན་དང་བཅས་པའི་གདུང་སེམས་དབྱིངས་སུ་ཡལ། །ཐེག་མཆོག་མཁའ་འགྲོའི་གསང་རྒྱུད་བཀའ་ལུང་འཆང་། །བླ་མ་མིད་ལ་རས་༴ །རིམ་གཉིས་རྒྱལ་བའི་དགོངས་པ་ཡོངས་བསྡུས་ནས། །ཚུལ་མིན་ལས་རྣམས་རིང་དུ་རབ་སྤངས་ནས། །སྐུ་གཉིས་མངོན་གྱུར་ཆོས་སྤྱན་རྣམ་པར་གཟིགས། །བླ་མ་མིད་ལ་རས་༴ །འདོད་ཡོན་དུག་ལོ་སྤངས་ནས་ཟ་ཐུགས་བདུད་རྩིར་གསོལ། །དམ་ཆོས་རྒྱལ་
3-3-111a
བའི་གསུང་རྣམས་ཡོངས་སུ་བསྡུས། །སྙན་རྒྱུད་ཡིད་བཞིན་ནོར་བུའི་གསུང་མངའ་བ། །བླ་མ་མིད་ལ་རས་༴ །བཅུ་གསུམ་རྡོ་རྗེ་འཛིན་པའི་སྨོན་ལམ་འདི་བཏབ་པས། །འགྲོ་བ་མ་ལུས་རྡོ་རྗེ་འཛིན་པའི་ས་ཐོབ་ཤོག །ཀྱེ་ཧོ་རྣལ་འབྱོར་དབང་ཕྱུག་མིད་ལ་རྗེ། །རས་པའི་རྒྱལ་པོ་སྙན་སྒྲ་ཅན། །དཔལ་ལྡན་བཞད་པའི་རྡོ་རྗེ་དེ། །མི་བཞུགས་ཆོས་དབྱིངས་གཤེགས་ཤུལ་དུ། །རྗེས་འཇུག་ཆུ་བྲན་གྲངས་མང་ཡང་། །ཡན་ལག་བརྒྱད་ལྡན་བདག་ཉིད་ཡིན། །ཤཱཀྱའི་དགེ་སློང་གཡུང་སྟོན་ལ། །དུས་ད་ལྟ་ཞི་བྱེད་རི་བར་གྲགས། །བདག་ནི་འདི་ནས་ཤི་འཕོས་འགྲོ་དུས་ན། །རྒྱལ་བ་སྲས་བཅས་རྣམས་ཀྱི་ཞིང་ཁམས་མཆོག །དགའ་ལྡན་ཨིད་(ཡིད་)བྱེད་ཕོ་བྲང་དམ་པ་དེར། །མི་དབང་བྱམས་མགོན་རྒྱལ་བའི་དྲུང་དུ་འགྲོ། །དེར་ཡང་རང་ཉིད་ཞི་བདེའི་ཐེག་ཆུང་མི་འཛིན་པར། །དྲི་མེད་ཐེག་ཆེན་རྣམ་ཐར་ལེགས་སྤྱད་ནས། །ཟབ་ཡངས་བསྟན་པའི་སྙིང་པོ་རབ་སྒྲགས་ནས། །མ་རྒན་འགྲོ་བ་མ་ལུས་མཐའ་ཡས་རྣམས། །བླ་མེད་རྡོ་རྗེ་འཆང་གི་ས་ལ་འགོད་པར་ཤོག །རྩོད་བྲལ་ནམ་མཁའ་ཆེན་པོའི་གྷ་རྗེ་ར། །མཚན་དོན་ལྡན་སྐྱེས་མཆོག་གླང་འཁོར་བ། །དཔལ་ཀུན་མཁྱེན་ཆོས་རྗེ་མན་ཆད་ནས། །ཚིག་
3-3-111b
བཞིའི་ཆོས་འབྲེལ་ཡན་ཆད་དུ། །གུས་པས་འགྲོ་བའི་དོན་དུ་ཞུས། །དྲིན་ཐོབ་ཉིས་བརྒྱ་བདུན་ཅུ་ཡི། །དྲི་མེད་པད་ཞབས་གུས་པས་བླངས། །རྒྱལ་དང་དེ་སྲས་འཕགས་ཚོགས་རྒྱུད་པར་བཅས། །བཀའ་དང་བསྟན་ཆོས་མན་ངག་བོད་འགྱུར་རྣམས། །ཡོངས་འཛིན་གཡུང་སྟོན་ཞི་བྱེད་རི་ཁྲོད་པས། །རྒྱ་ཆེན་རྣམ་དག་སྨོན་ལམ་བཏབ་པ་རྣམས། །ཤི་མེད་པོས་དང་གསེར་འགྱུར་རྩི་བཞིན་དུ། །འགྲོ་ལ་ཕན་ཕྱིར་རྣམ་མཁྱེན་མྱུར་ཐོབ་ཤོག །ན་མོ་སངས་རྒྱས་བདེན་ཅིང་(ཞིང་)ཆོས་ཀྱང་བདེན། །དེ་བཞིན་དགེ་འདུན་བདེན་པ་ཡིས། །ཇི་ལྟར་བསམས་(བསམ་)བཞིན་འགྲུབ་པར་ཤོག །གཞན་ཡང་ཕྱོགས་དུས་ཐམས་ཅད་ན། །མི་མཐུན་ཕྱོགས་རྣམས་ཞི་བ་དང་། །བདེ་ལེགས་བཀྲ་ཤིས་ཕུན་ཚོགས་ཞིང་(ཤིང་)། །འགྲོ་ཀུན་རྡོ་རྗེ་འཆང་དབང་ཐོབ་པར་ཤོག །དང་པོ་རྗེ་བཙུན་ཆེན་པོ་གྲོངས་ནས་ལོ་ཉིས་བརྒྱ་དང་དྲུག་བཅུ་རྩ་དགུ་སོང་བའི་དུས་དང་། ཉི་ཟླ་འོད་ཟེར་མ་རྒྱས་བསྡུས་གཉིས། མངའ་རིས་མང་ཡུལ་སྐྱིད་གྲོང་གི་རྩེ་མོ་ངང་པའི་རི་ཁྲོད་དུ་ཡི་གེར་བཀོད་པ་ཡིན་ལ། ཡང་རྗེ་བཙུན་ཆེན་པོ་གྲོངས་ནས་ཉིས་བརྒྱ་དང་བདུན་ཅུ་རྩ་བདུན་སོང་དུས་ན། ཧེ་རུ་ཀའི་ཕོ་བྲང་སྨན་ལུང་ཆུ་དབར་ཞེས་བྱ་བའི་གནས་མཆོག་ཆེན་པོ་
3-3-112a
བླ་མ་མིད་ལ་རས་པའི་གདན་ས་ཡི། བླ་མ་རི་ཁྲོད་པ་རྡོ་རྗེ་འཛིན་པ་བསོད་ནམས་རིན་ཆེན་པ་དང་། དེའི་ཡང་སྐུ་དྲིན་ཅན་གྱི་བླ་མ་རི་ཁྲོད་ཀྱི་དབང་ཕྱུག་རྟོགས་པ་མཆོག་ཏུ་གྱུར་པ་དང་ལྡན་པའི་མཚན་རིན་ཆེན་གཞོན་ནུར་གྲགས་པའི་སྐྱེས་བུ་དམ་པ་དེས་ཀྱང་། ཐུགས་དགོངས་ཡོངས་སུ་དག་པར་མཛད་པ་དང་། དེ་བཞིན་དུ་གནས་གསུམ་གྱི་རི་པ་རྣམས་ཀྱིས་དྲག་ཏུ་བསྐུལ་བ་དང་། ཁྱད་པར་དུ་ཡང་རིགས་རྒྱུད་ཅན་ཏའི་སི་ཏུ་ཆོས་ཀྱི་རིན་ཆེན་ཞེས་བྱ་བ། འཕགས་པ་དཀོན་མཆོག་གསུམ་ལ་གུས་པ་དང་ལྡན་པ་དེའི་ཆོས་སྐྱོང་བའི་བློན་པོ་རིན་པོ་ཆེ་ལྟ་བུའི་དགེ་སློང་ནི་བྱང་སེམས་དང་ལྡན་པའི། དཔོན་བསོད་ནམས་མགོན་པོས་ཀྱང་བརྟན་པའི་ཞབས་ཏོག་དང་། སེམས་ཅན་གྱི་བདེ་སྐྱིད་ལ་རྒྱུད་དཀར་པོ་ཡོངས་སུ་དག་པ་བཟུང་ནས། འབད་པ་ཆེན་པོས་བསྐུལ་ཞིང་། སྨོན་འཇུག་གི་རྣམ་པར་དཀར་བ་ལ་བརྟེན་ནས་སྔར་བས་ཀྱང་ཅུང་ཟད་རྒྱས་སུ་བཏང་བ་ཡིན་ལ། ཡང་ལ་ལ་ན་རེ། རྗེ་བཙུན་ཆེན་པོ་རྒུང་རྟ་སྟག་ལོ་པ་ཡིན་པ་ལ་ཐེ་ཚོམ་མེད་ལ། བྱའི་ལོ་ལ་གྲོངས་པ་ཡང་ཐེ་ཚོམ་མེད་ལ། དེའི་བར་ལོ་བརྒྱད་བཅུ་གྱ་གཉིས་ལས་མི་འགྲོའམ་ཟེར་བ་ལ། རྗེ་བཙུན་ཆེན་པོ་རང་གི་གསུང་དྲི་མ་མེད་པ་དང་། 
3-3-112b
རས་ཆུང་རྡོ་རྗེ་གྲགས་པ་ལ་སོགས་པའི་བུ་ཆེན་རྣམས་དང་། ཁྱད་པར་དུ་རྗེ་ཁྱུང་ཚང་པ། ཛྙཱ་ན་གུ་རུ་དང་། དེའི་བུ་ཆེན་ཁམས་པ་དར་མ་དཔལ་དང་། མངའ་རིས་པ་ཡེ་ཤེས་གྲགས་དང་། མ་ཅིག་ཨོང་ཅོ་དང་། མར་སྟོན་ཚུལ་འབྱུང་དང་། སྟད་སྒོམ་ཞིག་པོ་བློ་གྲོས་དང་། དེ་རྣམས་གསུང་མཐུན་ལ། མངའ་རིགས་ཤེས་བྱའི་གནས་ལ་མ་རྨོངས་པ། ཆོས་རྗེ་ཞང་ལོ་ཙྪ་བ་གྲུབ་པ་དཔལ་བཟང་པོའི་དགོངས་པ་ལ། རྒྱ་རྩིས་བོད་རྩིས་དང་། སྔ་ཤུལ་ཕྱི་ཤུལ་གྱི་ཁྱད་པར་ཡིན་ལ། དོན་ལ་སྐུ་འཁྲུངས་ནས་མྱ་ངན་ལས་འདས་ཀྱི་བར་ལ། ཞག་གཅིག་རྩིས་གཉིས་གྲངས་ཀྱིས་དགུང་ལོ་བརྒྱད་བཅུ་བཞི་བྱོན་པ་ལ་ཐེ་ཚོམ་མི་ཟ་བར་བྱེད་དོ། །ད་ནི་དོན་ཧྲིལ་གྱིས་དྲིལ་ན། བླ་མ་མིད་ལ་རས་ཆེན་གྱི་སྐུ་ཚེ་གང་ལ། ཞབས་ཀྱི་གོམ་པ་གང་དུ་བྱོན་པ་དང་། གསུང་ཚིག་གཅིག་གང་དུ་བྱོན་པ་རྣམས་ལ། ལྷག་ལུས་སྐྲའི་རྩེ་མོ་ཙམ་ཅིག་ཀྱང་མ་ལུས་པར་གཡུང་སྟོན་ཞི་བྱེད་རི་ཁྲོད་པ་བདག་གིས་ཡི་གེར་བཀོད་ནུས་པ་ཡོད་དོ། །དུས་ངན་སྙིགས་མའི་སེམས་ཅན་ངན་པ་སངས་རྒྱས་སྟོང་གིས་ཀྱང་མ་ཐུལ་བ་རྣམས་སླར་ལ་ལས་ངན་གནས་སོགས་མི་ཤེས་པས་འདི་ཙམ་ལ་བསྡུས་པ་ཡིན་ནོ། །ཡང་ཉིན་གཅིག་རྗེ་བཙུན་ཆུ་དབར་རྒྱབ་རི་ན་ཡར་གཤེགས་སོང་བ་
3-3-113a
དང་། རས་ཆུང་རྣམས་ཀྱིས་ཡང་(ཀྱང་)ཕྱིན་པས། རི་གདོང་སྐམ་པོ་ཅིག་ན། སྔར་མེད་པའི་ཆུ་མིག་སྔོ་སིལ་ལེ་བ་ཅིག་འདུག་པ་དང་། རས་ཆུང་རྣམས་ཡིད་མ་ཆེས་ནས། ཆུ་མིག་འདི་གང་ནས་བྱུང་བ་ཡིན་ཞུས་པས། མིད་ལའི་ཞལ་ནས། བོད་ཀྱི་མི་ལ་རས་པ་ལ། །དངོས་གྲུབ་བདུད་རྩིའི་ཆུ་མིག་འདི། །ཞིང་སྐྱོང་སྒ་རུས་ཕུལ་བ་ཡིན། །འོན་ཀྱང་དེ་ཉིད་ཡིན་སྙམ་མེད། །གསུངས། ཡང་ལ་ལ་ན་རེ། རྗེ་བཙུན་ཆེན་པོས། རྒྱ་གར་དུ་རྫུ་འཕྲུལ་གྱི་བྱོན་པ་མ་རྟོགས་པ། དངོས་སུ་མ་བྱོན་ཟེར་བ་ཡང་འདུག་སྟེ། རྒོད་བྲོ་རྫུ་འཕྲུལ་གྱིས་ནམ་མཁའ་ལ་འཕུར་ཞིང་གཤེགས་པས་ཀ་ཆོག་ཉེན་ཡོད་དོ། །ལ་ལུང་ཁ་ཅིག་རྒལ་ནས་རྡུལ་ཙ་རེ་འགྲོ་དགོས་པར་མི་འདུག་གོ། །ཡང་ལ་ལ་ན་རེ། རྗེ་བཙུན་ཆེན་པོ་གྲོངས་པ་ད་ལྟ་སྐུ་འབུམ་བཞུགས་པ་དེར་ཡིན་བྱ་བ་འདུག་ཏེ(སྟེ)། དེ་ནི་མ་ལགས་སོ། །ཡང་དབེན་གྱི་གཡོན་ཕྱོགས་ཀྱི་ཆོས་ཁྲི་དཀར་ཆུང་ལ་སྐུ་རྒྱབ་གཏད་ནས། དེར་གྲོངས་ཚུལ་བསྟན་ནས་གདུང་གསུམ་བཞག་པའི་གདུང་ཅིག་པོ་དེ་ཡང་དབེན་གྱི་ནང་དུ་གདན་དྲངས་ནས། སྤྲུལ་པའི་འབྲི་ལྕེའི་མདུན་དེར་བཞུས་པར་འདུག་གོ། །རྗེ་བཙུན་གྱི་ཚེམས་གཅིག་འབྲི་གུང་པའི་བླ་མ་ལྷོ་པ་རིན་པོ་ཆེ་རྡོ་རྗེ་དཔལ་བའི་
3-3-113b
ཕྱག་ན་བཞུགས་ཅིང་(ཤིང་)འདུག་ཟེར་ལ། ཡང་ཚེམས་གཅིག་གར་ཤེད་ཀྱི་དགོན་པ་ཞོག་ན་བཞུགས་ཅིང་(ཤིང་)འདུག་ཟེར་ཏེ། ངས་རྩད་མ་ཆོད་ལ། ཚེམས་དེ་ལ་དང་པོ་ཁུ་བོ་ཕ་འུས་བརྡུངས་ནས་བཅགས་ཟེར་བ་དེ་ཀུན་ཡིན་ནམ། ཡང་ན་དུས་ཕྱིས་སྐུ་སྒྲོས་ནས་བྱོན་པ་ནི་མི་སྲིད་དམ། རྗེ་ཁྱུང་ཚང་བ་དང་། ཆོས་རྗེ་ཞང་གི་ཞལ་གསལ་ནི་མི་འདུག་ལགས། བྱང་གི་ར་རྫིས་ཕུལ་བའི་བལ་གྲ་དཀར་པོ་དང་། རྒྱ་ཐུལ་རང་མགར་ནག་གི་ཕུལ་བའི་མེ་ལྕགས་དང་། གསོལ་ཞལ་བ་མེན་གྱི་ར་ཕོར་དང་། ཨ་བན་ཚོང་པས་ཕུལ་བའི་རྦའི་བེར་ལྕག་དང་། བལ་པོའི་ཆོས་རྒྱལ་གྱིས་ཕུལ་བའི་ནམ་བཟའ་རས་འགའ་དང་། དེ་རྣམས་ནི་མདོ་ཁམས་ཀྱི་དཔལ་གྱི་རི་བོ་ཆེའི་དགོན་པར་བཞུགས་པར་འདུག་ཟེར་ཏེ་མཐོང་བ་ནི་མེད་ལ། རྗེ་ཁྱུང་ཚང་བ་དང་། ཞང་ལོ་ཚ་བའི་ཞལ་གསལ་ཡང་མི་འདུག །ཤར་ཙོང་ཁའི་རྒྱལ་པོས་འདམ་སེང་དཀར་མོའི་འོ་མས་བཀང་ནས་ཕུལ་བའི་གསོལ་ཞལ་ཤིང་ཕོར་དང་། ཕྱག་གཤན་གྲི་ཆུང་སོར་བཞི་པ་དང་། དེ་གཉིས་བདག་ཅག་གི་ལག་དུ་(ཏུ་)བྱོན་ནས་བཞུགས་པའི་བྱོན་ཚུལ་རྒྱུད་ཡིག་དང་བཅས་པ་ཡོད་དོ། །ཡང་བླ་མ་ཀྱུ་ར་རིན་པོ་ཆེ་འབྲི་གུང་པ་ལ་སོགས་པ་ཁ་ཅིག་ནི། བཅོམ་ལྡན་
3-3-114a
འདས་དོན་ཡོད་གྲུབ་པའི་སྐུའི་སྐྱེ་བ་སློབ་དཔོན་འཕགས་པ་ཀླུ་སྒྲུབ་སྙིང་པོ་ཡིན་ལ། དེའི་སྐུའི་སྐྱེ་བ་རྗེ་བཙུན་མིད་ལ་རས་ཆེན་ཡིན་གསུང་བ་ཡང་འདུག་ལ། རྗེ་ཁྱུང་ཚང་བ་དང་། ཞང་ལོ་ཙྪ་བའི་ཞལ་གསལ་ནི་མི་འདུག །ཡང་ལ་ལ་ན་རེ་སེམས་ཁྲིད་ཡིད་བཞིན་ནོར་བུ་དང་། འཕོ་བ་ན་རོ་སྡིག་རྡུག་གཉིས་རྗེ་མར་པས་རྗེ་བཙུན་མིད་ལ་རས་པ་ལ། ལྷོ་བྲག་རང་དུ་དངོས་སུ་གནང་བ་ཡིན་བྱ་བ་ཡང་འདུག་སྟེ། དེ་རང་ཡིན་པ་འདྲ་སྟེ། སྲས་དར་མ་མདོ་སྡེ་གྲོངས་པའི་རྗེས་ནས། ཡེ་ཤེས་མཁའ་འགྲོ་ལ་བསྐུར་བར་བྱེད་དོ། །རྗེ་ཁྱུང་ཚང་པ་དང་ཞང་ལོ་ཙྪ་བའི་ཞལ་གསལ་འདུག་ལགས། ཡང་དྭགས་པོ་ལྷ་རྗེ་པས། རྗེ་བཙུན་གྱི་དྲུང་དུ། ཟླ་བ་དགུ་དང་ཞག་བཞི་ལས་མ་བཞུགས་པར་བྱེད་པ་ལ། རྗེ་ཁྱུང་ཚང་པ་དང་ཞང་ལོ་ཙྪ་བའི་ཞལ་ནས། དེ་མཁའ་འགྲོ་མའི་གསང་རྐུ་བའི་ཕྱིར་དུ་ཕྱེད་ཕྱེད་གནང་བ་ཡིན་ལ། དོན་ལ་ཟླ་བ་བཅོ་བརྒྱད་ཞག་བརྒྱད་བཞུགས་པར་འདུག་གསུང་བར་གདའ་ལགས། ཡང་རྗེ་བཙུན་གྱི་ཞལ་ནས། དུས་ཕྱིས་ཙ་ན་ངའི་རྒྱུད་པ་འཛིན་པ་རྣམས་ཀྱིས་ཆོས་སྐོར་གདམས་ངག་གི་རྒྱུད་པ་མ་བཅད་ཅིག་གསུངས་སོ། །བླ་མ་མིད་ལ་རས་པས་གསུངས་པའི་ཆོས་འདིའི་རྒྱུད་པ་ནི། 
3-3-114b
སངས་རྒྱས་རྡོ་རྗེ་འཆང་། ལུས་མེད་མ། ཏེ་ལོ་པ། ནཱ་རོ་པ། མར་པ། མི་ལ་རས་པ། རས་ཆུང་རྡོ་རྗེ་གྲགས་པ། ཁྱུང་ཚང་པ། མངའ་རིགས་པ་ཡེ་ཤེས་གྲགས། སྲས་གྲུབ་ཆེན་ཞིག་པོ་རྡོ་རྗེ་དཔལ། ཡབ་བཀའ་ཡིན། ཡུམ་བཀའི་རྒྱུད་པ་ནི། ཁམས་པ་དར་མ་དཔལ། རྗེ་འདུལ་དཀར་བ། མཁས་གྲུབ་རམ་བྷེ་པ། བླ་ཆེན་རོག་ཤེབ་འོད། དེས་ཆོས་རྗེ་ཉི་སེང་དང་། ཆོས་རྗེ་བརྩོན་སེང་གཉིས་ཀ་ལ་གནང་། དེས་ཆོས་རྗེ་ཐམས་ཅད་མཁྱེན་པ་ལ་གནང་། དེས་ཆོས་རྗེ་ཀུན་དགའ་འོད་ཟེར་དང་། ཀུན་དགའ་དོན་གྲུབ་ལ་གནང་། དེས་རྗེ་ལ་སྟོད་པ་ལ་གནང་། དེས་ཆོས་རྗེ་གླང་འཁོར་བ་སྐུ་མཆེད་ལ་གནང་། དེས་བདག་ཞི་བྱེད་རི་པ་ལ་གནང་། ཡང་ལུགས་གཅིག་ལ། རས་ཆུང་པ་ཡན་ཆད་གོང་དང་འདྲ། རས་ཆུང་པས་རྒྱལ་བ་རྟེན་ནེ་ལ་སྒོས་སྐྱེལ་མཛད་ནས་གནང་བར་འདུག་སྟེ། གནས་ལུགས་ཀྱང་། སྤྲུལ་སྐུ་ཇོ་སྲས་སྐྱབས་པ་ལ། རས་པ་དང་དྭགས་པོ་ལྷ་རྗེ་གཉིས་ཀས། ཁྱེད་ཀྱི་སྲས་འདི་ལ་གྲུབ་ཐོབ་ཆེན་པོ་རྣམས་ཀྱི་ནང་ནས་ཁྱུ་རྒྱན་ཅིག་འབྱོན་པར་འདུག་པས། ངེད་ཀྱི་ཡང་རྒྱུད་པ་འཛིན་པར་ཞུ་གསུངས་ནས། བླ་མ་མིད་ལ་རས་པའི་ཆོས་རྣམས་གདའ་འོ། །རྗེ་བཙུན་
3-3-115a
རྒྱལ་བ་རྟེན་ནེ་དགུང་ལོ་བརྒྱ་རྩ་ལ་ཉེ་བར་བྱོན་དུས་ན། ཆོས་རྗེ་ཐམས་ཅད་མཁྱེན་པ་སྐུ་འཁྲུངས་ནས། ཟླ་བ་དགུ་སོང་བ་དེ་ལ་གནང་གདའ། དེས་ཆོས་རྗེ་ཀུན་དགའ་འོད་ཟེར་དང་། ཀུན་དགའ་དོན་གྲུབ་ལ་གནང་གདའ། དེས་ལ་སྟོད་པ་ལ། དེས་ཆོས་རྗེ་གླང་འཁོར་བ་སྐུ་མཆེད་ལ། དེས་བདག་ཞི་བྱེད་རི་པ་ལ་གནང་། ཡང་ལུགས་གཅིག་ལ་མིད་ལ་ཡན་ཆད་གོང་དང་འདྲ། དེས་ངམ་རྫོང་རས་པ་ལ། དེས་གུང་ཐང་རས་ཆུང་པ་ལ། དེས་རྒྱ་འཕོ་བ་ལུང་པ་ལ། དེས་རྗེ་བཙུན་འཕྲང་པ་ལ། དེས་ཆོས་རྗེ་ཐམས་ཅད་མཁྱེན་པ་ལ། དེ་མན་ཆད་སྔར་དང་འདྲ། འདི་རྣམས་ལུས་མེད་མའི་སྙན་རྒྱུད་ཡིན། ཡང་ལུགས་གཅིག་ལ། ཁྱུང་ཚང་པ་ཡན་ཆད་གོང་དང་འདྲ། དེས་མ་ཅིག་ཨོང་ཅོ་དང་། མར་སྟོན་ཚུལ་འབྱུང་དང་། སྟར་སྒོམ་ཞིག་པོ་དང་གསུམ་ག་ལ་གནང་། དེ་གསུམ་ཀའི་ཞབས་ལ་མངའ་རིགས་ཞང་ལོ་ཙྪ་བ་གྲུབ་པ་དཔལ་བཟང་པོས་ཐུག་གདའ། དེས་འཚོ་བྱེད་དྷ་ར་ཤྲི་ལ། དེས་འགྲོ་མགོན་བསོད་རྒྱལ་ལ། དེས་ཡེ་ཤེས་མཁའ་འགྲོ་ཀུན་ལྡན་དཔལ་ལ། དེས་ཆོས་རྗེ་བྱ་བྲལ་བ་བདེ་ལེགས་རིན་ཆེན་ལ། དེས་མཁས་གྲུབ་གཟི་བརྗིད་རྒྱལ་མཚན་ལ། དེས་སྐྱེས་མཆོག་རི་
3-3-115b
ཁྲོད་ཀྱི་དབང་ཕྱུག་མ་ཎི་པ་ལ། དེས་བདག་ཞི་བྱེད་རི་པ་ལ་གནང་ངོ་། །ནཱ་རོ་པའི་འཕོ་བ་དོན་གྱི་གྲོང་འཇུག་དང་། སེམས་ཁྲིད་ཡིད་བཞིན་ནོར་བུ་དང་། ནཱ་རོ་སྡིག་བརྡུགས་ཀྱི་རྒྱུད་པ་ནི། རྡོ་རྗེ་འཆང་། ལུས་མེད་མ། ཏེ་ལོ་པ། ནཱ་རོ་པ། མར་པ། མིད་ལ། དྭགས་པོ་ལྷ་རྗེ་པ། ཀ་ལ་དུང་ཚོ་བ། མཁས་བཙུན་དམོག་སྟོན་པ། དེས་བདག་ཞི་བྱེད་རི་པ་ལ་གནང་ངོ་། །བདག་མེད་མ་ལྷ་མོ་བཅོ་ལྔའི་བརྒྱུད་པ་ནི། རྡོ་རྗེ་འཆང་། བདག་མེད་མ། ཏེ་ལོ་པ། ནཱ་རོ་པ། མར་པ། རྔོག་གཞུང་པ། རྔོག་ཀུན་དགའ་གཟི་བརྗིད། ལྷོ་སྐྱིད་པ་ཁམས་པ་རིན་རྒྱལ། བཞི་སྡེ་པ་གྲགས་པ་ཤེས་རབ། རྩང་སྟོན་བླ་མ་རྒྱལ་མཚན། བྲག་གདེང་པ་རྡོ་རྗེ་དཔལ། ཞང་སྟོན་དཀོན་མཆོག་དཔལ། ཞང་སྟོན་མཆོག་ལྡན། པཎ་ཆེན་ཚུལ་ཁྲིམས་འོད། ཆོས་རྗེ་གླང་འཁོར་བ་སྐུ་མཆེད། དེས་བདག་ཞི་བྱེད་རི་པ་ལ་གནང་ངོ་། །ཡང་ལུགས་གཅིག་ལ། མར་པ་ཡན་གོང་དང་འདྲ། དེ་ནས་ཡུམ་བདག་མེད་མ་ནས་ཀྱང་དེད་ལ། རྔོག་གཞུང་པ་ནས་མིད་ལ་རས་པ། དེ་ནས་ནཱ་རོ་ཆོས་དྲུག་གི་ཁྲིད་འདེབས་ན། དབང་ཀ་འདི་བྱེད་དགོས་པ་ཡིན་པ་ལ། དུས་ད་ལྟ་ནི་དྭགས་པོ་ལྷ་རྗེའི་རྒྱུད་པར་རྫུས་པའི་རྨོངས་པ་རེས་རྡོ་རྗེ་རྣལ་འབྱོར་མ་ལ་སོགས་ལྷ་ཕོ་རེང་མོ་རེང་རེའི་སྒོ་ནས། 
3-3-116a
དབང་བསྐུར་ཞིང་ཆོས་སྒོ་འབྱེད་པར་སྣང་ཏེ(སྟེ)། དེས་དབང་བསྐུར་ཡང་དབང་ཐོབ་ནི་མི་ཐོབ། དཀྱིལ་འཁོར་གྱི་ལྷ་དང་གདན་གསུམ་མ་ཚང་ན་དབང་བསྐུར་དུ་མི་འགྲོ་སྟེ། དབང་དོན་ངོ་མི་འཕྲོད་པའི་ཕྱིར་རོ། །ཕག་མོའི་བྱིན་རླབས་རྒྱས་བསྡུས་རྣམས་གཏུམ་མོའི་སྔོན་འགྲོ་ལ་དགོས་པ་ནི་དགོས་ཏེ། བདག་མེད་མའི་དབང་འདི་ནི་མེད་ཐབས་རང་མེད་དོ། །ལར་ཆོས་ལ་ཆོས་བཞིན་བྱེད་ན་དགའ་སྟེ། བྱེད་མཁན་རང་ཉུང་བར་སྣང་ངོ་། །གཞན་ཡང་སྒོས་བླ་མ་མིད་ལ་རས་པའི་ཆོས་སྐོར་རྣམས་ནི་མ་ཚང་བ་མེད་པར་ཐོབ་པའི་རྒྱུ་ཡིག་ཐོབ་ཡིག་དཀར་ཆག་རྣམས་ཟུར་ན་ཡོད་དོ། །རྣམ་ཐར་འདི་ལ་རྒྱུད་པ་དཔག་མེད་ཅིག་ཡོད་དེ་ཟུར་ན་ཡོད་དོ། །རྗེ་མར་པའི་ཆོས་སྐྱོང་གི་འཐིལ་མ་ནི་གྲི་གུག་མ་ཡིན་སྟེ(ཏེ)། ངོ་བོ་གུར་མགོན་དང་བཀའ་གདམས་པའི་གྲི་གུག་ཅན་དང་གཅིག་སྟེ། ཀྱེ་རྡོར་ཁྲོས་པ་ཡིན་ནོ། །ད་ལྟ་ནི་མར་པའི་རྒྱུད་འཛིན་དུ་རྫུས་པའི་རྨོངས་པ་ཅིག་གིས་ནི། ཕྱག་བཞི་པ་གསར་པ་འདི་ལ། མར་པའི་ཆོས་སྐྱོང་དངོས་གཞི་རུ་བྱེད་ཅིང་འདུག་སྟེ། ཁ་གཞང་ནོར་བ་ཡིན་ནོ། །རྗེ་མར་པས་ནི་ཕྱག་བཞི་པའི་ལུང་རེ་ཙམ་ཞུས་པ་སྲིད་དོ། །འདི་ནི་ཁམས་པ་རྒ་ལོའི་དྲུང་དུ། དཔལ་ཕག་
3-3-116b
མོ་གྲུ་པ་རྡོ་རྗེ་རྒྱལ་པོས་ཞུས་པ་ཡིན་ནོ། །ཕག་གྲུའི་རྒྱུད་འཛིན་རྣམས་ཀྱིས། ཆོས་སྐྱོང་དངོས་གཞི་དང་འདྲ་ཉེན་ཡོད་དམ། འོན་ཀྱང་མར་པ་ལ་ལྟོས་ན། ཆོས་སྐྱོང་ནི་གཙོ་བོ་གྲི་གུག་ཅན་ཡིན་ནོ། །བྱ་རོག་གདོང་ཅན་འདི་ཕྱག་བཞི་པའི་ལས་མགོན་ཟེར་ཡང་། བཀའ་བརྒྱུད་ཅིའི་ལས་མགོན་ཡིན་པས། སུས་རྟེན་ཡང་འདྲ་མོད། དྭགས་པོ་ལྷ་རྗེ་པ་ནི། རྗེ་མི་ལའི་གྲི་གུག་ཅན་དང་། བཀའ་གདམས་པའི་གྲི་གུག་ཅན་གཉིས་ཀ་བརྟེན་པ་ཡིན་ནོ། །ལར་ཆོས་པ་ཅི་རིགས་པ་རྣམས་ཀྱིས་བསམ་གཞིག་མི་གཏོང་བར། རྒོད་དང་དུ་གཉིས་ཀར་བྲོ་བ་རྣམས་བྱེད་ཅིང་འདུག་པ་ངས་མང་པོ་མཐོང་སྟེ། ཡ་ཀི་ཕུ་ནས་ཀྱི་བཀའ་མདོ་རྒྱུད་དང་། གྲུབ་ཐོབ་གོང་མ་རྣམས་ཀྱི་གསུང་སྒྲོས་ལ་ལྟ་རྒྱུ་མེད་པར། བཀའ་ཆད་ལུང་རྡུམ་གྱི་དཔེ་ཆ་འཁྱར་མ་རེ་ལ་ཨན་ཐས་ཕྱོགས་མེད་བྱས་ནས། རང་རེ་ལམ་ལོག་པས་མི་ཆོག་པར། སྐལ་མེད་བླུན་པོ་དད་པ་ཅན་མང་པོ་ཡང་ཕུང་པར་འདུག་སྟེ། སྙིང་རེ་རྗེ་ན། ལར་ཡང་དང་པོ་མཁས་པའི་སློབ་དཔོན་མང་རབ་ཅིག་རྟེན་དགོས་སོ། །ཆོས་འདི་ནི་སྐྱེ་བ་གཏན་གྱི་འདུན་མ་ཡིན་པས། ག་དར་ཞིབ་པོ་ཅིག་རང་དགོས་སོ། །ལས་བྱས་པ་གྲོན་ཅན་དུ་མི་འགྲོ་ལ་དོན་ཅན་ཡང་
3-3-117a
དག་ཅིག་དགོས་པ་ཡིན་ནོ། །རང་རང་གིས་ངའི་དེ་མིན་བསམ་པ་མི་ཡོང་སྟེ། རྒྱལ་བའི་བཀའ་མདོ་རྒྱུད་དང་རང་རང་གི་ཉམས་ལེན་ཞུ་ཐུག་ཐུབ་པ་ཅིག་དགོས་པ་ལགས་སོ། །ལར་ཆོས་ལ་ཡར་ཤོར་བཞི་མར་ཤོར་བཞི་བྱ་བ་གསུངས་པ་ལ། ཡར་ཤོར་བཞི་ནི་ལྟ་བ་ཐག་ཆོད། སྒོམ་པ་རང་བྱུང་། བསྒྲུབ་པ་ལྷུན་ལེན། བསླབ་པ་ལམ་ལ་བཞུགས་པ་དང་བཞི་ཡིན། མར་ཤོར་བཞི་ནི་ཚ་གྲོད་གྲང་གྲོད་པ། དྲོད་པོ་ཆོས་རྒྱུས་ཅན། འགལ་ནག་མགོ་འདར་དང་བཞི་ཡིན། དོན་ལ་ལྟ་བ་ཇི་ལྟར་མཐོངས་བ་ཙམ་གྱིས་སྤྱོད་པ་དེ་ཞིབ་པ་ཅིག་ཡོང་བ་ལགས་སོ། །རྒྱ་བོད་ཀྱི་གྲུབ་ཆེན་རྣམས་ཀྱང་དགོངས་པ་ཇེ་ཟབ་ལ་སོང་བ་དང་། མི་འདྲིས་ཇེ་ཆུང་ལ་བཏང་ནས། མཐར་སངས་རྒྱས་པ་དང་སྣང་བ་མ་དག་པ་རྣམས་ཀྱིས་མཐོང་རྒྱུ་མི་འདུག་པ་གང་ཟག་ཡ་རབས་རྣམས་ལ། གང་ཞིག་སངས་རྒྱས་ཡིད་བྱེད་པ། །དེའི་མདུན་ན་ཐུབ་པ་བཞུགས། །ཅེས་(ཞེས་)པ་དེ་ལགས་སོ། །ལར་ཆོས་ཀྱི་རྩ་བ་འདི་མི་རྟག་པ་དང་། ལས་རྒྱུ་འབྲས་རང་གལ་ཆེའོ། །བླ་མ་མཚན་ལྡན་ཅིག་མེད་ཐབས་རང་མེད་དོ། །ཡང་ཁ་ཅིག་གིས་དྲན་མེད་ལུང་མ་བསྟན་རེ་ལ་སྒོམ་དུ་བྱེད་པ་ཡང་འདུག །ཁ་ཅིག་གིས་གོ་བ་དགའ་རབས་སྐྱེས་
3-3-117b
པ་དེ་ལ་སྒོམ་དུ་བྱེད་པ་ཡང་འདུག །བསོད་ཟད་ཁ་ཅིག་གིས་དཔེ་ཆ་འདྲ་བློ་ལ་བཟུང་ནས་གཞན་ལ་ཁྲིད་འདེབས་ཟེར་ནས། འཕྲིན་སྐྱེལ་བྱེད་པ་ཡང་འདུག་སྟེ། ཞེ་དྲང་ན་ཨང་། བྱེད་ནི་འདོད། ཤེས་ནི་མ་ཤེས། ངོ་ཚ་ལ་སྙིང་རྗེ་བར་འདུག་སྟེ། ཡང་ཁ་ཅིག་སྒོམ་བྱས་པས་རྗེད་(བརྗེད་)ངས་ཆེ་རུ་སོང་ཟེར་བ་ཡང་འདུག་སྟེ། དེ་ནི་ཤིན་ཏུ་བླུན་པའི་གཏམ་ཡིན་ནོ། །སྒོམ་བྱས་པ་ནི་རྩ་མིག་ཇེ་དངས། རིག་པ་ཇེ་གསལ་སྔར་བརྗེད་པ་ཐམས་ཅད་དྲན་ནས་འོང་བ་ཡིན། མཐར་འདས་མ་འོངས་ད་ལྟར་རྣམས་ཀྱང་གསལ་བ་ལ་སོགས་སོ། །ལར་སྒོམ་ཆེན་པ་རབ་ཀྱི་ཡང་རབ་ལ་བར་སྣང་གི་འབྲུག་འདྲ་བ་ཅིག་དགོས་ཏེ། སྐད་ཐོན་ལ་གཟུགས་མི་མཐོང་བ་ཅིག་དགོས་པ་ཡིན། རབ་ལ་གངས་ཀྱི་སེང་གེ་ལྟར་དུ་གཟུགས་མཐོང་ཡང་བཀོལ་མི་བཏུབས་པ་ཅིག་དགོས་པ་ཡིན་ནོ། །འབྲིང་ལ་རི་རྩིབས་ཀྱི་སྦྱང་ཁུ་འདྲ་བ་ཅིག་དགོས། ཐ་མ་ལ་མགྲོན་ཁང་གི་གནས་པོ་འདྲ་བ་ཅིག་དགོས། མར་ཤོར་ཐ་ཆད་ནི་མདོ་སྲང་གི་ཁྱི་འཁྱམས་འདྲ་བ་ཡིན་ནོ། །ལར་ཆོས་རང་ཅིག་བྱེད་ན། རྗེན་པ་རང་ཅིག་དགོས་སོ། །ད་ལྟ་རང་དབང་རང་ལ་ཡོད་དུས་འདིར་རང་མགོ་རང་གིས་མ་བཏོན་ན། ནང་པར་བེམ་རིགས་བྲལ་དུས་སུ། རྒྱལ་བ་རྡོ་རྗེ་འཆང་གིས་ཀྱང་མི་སྐྱོབས་པའི་
3-3-118a
དུས་གཅིག་ཡོང་བ་ཡིན་ནོ། །སངས་རྒྱས་ནུས་པ་ཆུང་བ་མིན་ཏེ། རང་སྣང་མ་དག་ཙ་ན། རང་སྣང་རང་ལ་སྡིག་པ་ལགས་སོ། །ལར་ཁས་མི་ཕན་དོན་ཐོག་ན་སླེབ་དགོས། རྒྱལ་ཁམས་ཀྱི་སྤྲང་པོ་ཞི་བྱེད་པ་ཁོས་མི་ཚེ་རི་ལ་སྐྱལ་བ་འདི། སྐྱེ་ཤིས་རྟག་ཏུ་འཇིགས་པས་ལན་པ་འདྲ། དུས་ད་རེས་དམར་ཐག་ཆོད། དཀར་ཐག་གསལ། ཡིན་ཐོག་ན་སླེབ། གདོས་ཐག་ཆོད་པ་འདི་དཔལ་ལྡན་དིང་རི་གླང་འཁོར་བའི་སྐུ་དྲིན་དུ་འདུག་གོ། །ཡང་ཀུན་མཁྱེན་ཆོས་རྗེའི་ཞབས་ལ་རེག་པས། ང་ཁྱི་རྒན་མི་ཁྱུར་ཚུད་འདུག་གོ། །ད་རང་ཉལ་བས་ཆོག་པའི་གནད་ཅིག་གོ་ནས་འདུག་གོ། །འོན་ཀྱང་ལས་རྒྱུ་འབྲས་ཁྱད་དུ་གསོད་པ་འདི་ནི་དུས་དང་རྣམ་པ་ཐམས་ཅད་དུ། བཀའ་མདོ་བརྒྱུད་ནས་མ་གནང་བ་ལགས་པས། གང་ཟག་རྒྱུད་ལོག་པར་ཁ་ལྟས་པའི་བླུན་པོ་རྣམས་ཀྱི་རྗེས་འབྲེང་མི་ཉན་པ་གལ་ཆེའོ། །རང་གིས་མཁའ་ལྟར་དག་པའི་དོན་རྟོག་ཀྱང་། ལས་རྒྱུ་འབྲས་ལ་གཙོ་བོར་འདོན་དགོས་སོ། །སངས་རྒྱས་ཤཱཀྱ་ཐུབ་པས་བདུད་མི་ནག་མདུང་ཐུང་ཅན་བསྒྲལ་བས། ཞབས་ལ་སེང་ལྡེང་གི་ཚེར་མ་ཟུག་པ་དང་། སློབ་དཔོན་ཀླུ་སྒྲུབ་སྙིང་པོས། སྦུར་བའི་སྐེ་བཅད་པས་ཁོང་རང་གི་དབུ་གནང་དགོས་བྱུང་བ་ལ་
3-3-118b
སོགས་རྒྱ་གར་ན་ཡང་གཏམ་རྒྱུད་གྲངས་མེད་པ་རྣམས་འདུག་ཅིང་། བོད་ན་ཡང་ཆོས་རྗེ་ས་སྐྱ་པཎ་ཆེན་གྱིས། རྗེ་དམ་པ་སངས་རྒྱས་ལ་སྐུར་པ་ཞུས་པས། ཆོས་རྗེ་པའི་སྤྱན་འགྲིབས་ཅིང་། འཇམ་པའི་དབྱངས་དང་མཇལ་འཕྲོ་ཆད་པའི་གཏམ་རྒྱུད་དང་། མིད་ལ་རས་པས་སེར་བ་ཕབ་པས་ལོ་གྲངས་དེ་ཙམ་ལ་གསོལ་རྒྱུ་མ་བྱུང་ཞིང་། མཐུ་མཛད་ནས་མི་མང་པོ་བསད་པས་རྗེ་བཙུན་རང་ལ། དགེ་བཤེས་ལོང་བ་ཙག་ཕུག་པས་དུག་དྲངས་པ་ལ་སོགས་པ་གཏམ་རྒྱུད་གྲངས་ལས་འདས་པ་རྣམས་ཡོད། དེ་ཡང་ཁོང་ཞིང་དག་པ་ཆོས་སྐུ་ཚེ་འདིར་སྨིན་ཐུབ་པ་ཡིན། རང་རེ་ཕལ་པ་རྣམས་ཀྱིས་ནི། རྒྱུ་འབྲས་ཁྱད་དུ་བསད་ནས་དུས་འདིར་སྨིན་མ་ནུས་ན། སྐྱེ་བ་མང་པོའི་མཐར་གེགས་ཆེན་པོ་བྱེད་པ་ལགས་པས། ལས་རྒྱུ་འབྲས་ལ་བློ་ཞིབ་པོ་དགོས་སོ། །མེ་སྟག་ཆུང་ངུས་རི་རབ་ཆེན་པོ་ཚིག་པ་ཡོད་དོ། །ང་ཞི་བྱེད་རི་ཁྲོད་པས་ནི་སྐྱེ་བ་ཅི་རིགས་ཀྱི་གོང་ནས་ཤེས་བྱ་དཔག་མེད་ལ་སྦྱངས་པ་དང་། ཚེ་འདིར་ཡང་བླ་མ་སློབ་དཔོན་མཁས་གྲུབ་མང་པོ་དང་མཇལ་བ་དང་། མདོ་རྒྱུད་རྒྱ་མཚོ་ཙམ་མཐོང་ཞིང་ཐོས་པ་དང་། གནས་ཆེན་དང་རི་ཁྲོད་རྣམས་སུ། དཀའ་བ་དང་འབད་པ་བྱས་ནས་སེམས་དངོས་པོའི་
3-3-119a
གནས་ལུག་གཏན་ལ་ཕབ་ནས། དུས་ད་ལྟ་ནི་ཆོས་དང་ཆོས་མིན་ཕྱེད་པའི་མིག་དང་ལྡན་པའི་ན། ཆོས་པའི་གཟུགས་བརྙན་བསྟན་པའི་ཆོམ་རྐུན་སྤྱང་ཁུ་འགས་སེར་རྣམས་ལ། ངས་འཐབ་པ་ནི་དོན་དང་ལྡན་པ་ཡིན་ནོ། །འོན་ཀྱང་ངས་ནི་ཆུ་དང་རླབས་སམ། རླུང་དང་སྒྲའམ། མེ་དང་དུད་པའི་ཚུལ་དུ་དྲན་ཤར་གཉིས་པོ་ལ། སྨོན་འཇུག་གཉིས་ཀྱི་རྩི་དང་འབྲལ་མ་མྱོང་ནས་ཡུན་རིང་སོང་ཡོད་པས་སྨྲས་པ་ཡིན་ནོ། །དོན་ཏིག་པ་ལ་ཆོས་ཐམས་ཅད་ཀྱི་རྩ་བ་ནི། བླ་མ་མཁས་གྲུབ་ཅིག་གི་གསུང་མ་གཏོགས་པ་གཞན་གང་ཡང་མི་ཉན་པ་ཅིག་དགོས་སོ། །ཉམས་ལེན་རྡོ་རུས་ཐུབ་ངེས་པ་ཅིག་དགོས་སོ། །གནས་ཆེན་དང་། རི་བྲག་དང་། བས་མཐའ་རྣམས་སུ་ཉམས་ལེན་སྐད་ཅིག་ཀྱང་མ་ཡེངས་པ་ཅིག་དགོས་སོ། །མདོ་རྒྱུད་ཕྱོགས་མེད་ལ་ལྟ་རྟོག་ཞིབ་པོ་དགོས་སོ། །བཀའ་བརྒྱུད་ཕྱོགས་མེད་ཀྱི་གདམས་ངག་ལ་ཐུག་དགོས་སོ། །རྩ་བ་ཉམས་ལེན་ཅིག་ལ་དྲིལ་དགོས་སོ། དུས་ད་རེས་མི་ལུས་ལན་ཅིག་ཐོབ་པ་འདི་དོན་ཡོད་པ་ཅིག་དགོས་སོ། །ཆོས་ཀྱི་གནད་ཤེས་དགོས་སོ། །གནད་ཁྲོལ་དགོས་སོ། །གནད་ལམ་དུ་ཁྱེར་དགོས་སོ། །ལམ་རང་སར་སླེབ་དགོས་སོ། །ཆོས་ལ་ཆོས་སུ་ཤེས་པ་དང་། 
3-3-119b
ཆོས་ལ་ལམ་དུ་གོ་བ་དང་། ཆོས་ལ་ལས་སུ་མཐོང་བ་དང་། ཆོས་ལོག་པར་འགྲོ་བ་དང་། འདི་རྣམས་ཤན་ཕྱེད་དགོས་སོ། །འདི་དོན་རྟོགས་པའི་གང་ཟག་ནི་ནན་ལྟར་ཉུང་ངོ་། །དཀོན་ནོ། །འཕྲའོ། །ཐུང་ངོ་། །རེམ་དང་མི་རྣམས། རང་ཡང་ཐར་ལ་གཞན་ཡང་ཐར་བ་ནི་བྱ་བ་ཡོད་དོ། །འདི་དགེས་འགྲོ་རྣམས་བླ་མེད་བྱང་ཆུབ་ཐོབ་པར་ཤོག །རེ་ཞིག་རྫོགས་སོ།། །།ཨྠྀི།
